KOHELET 1 - Bibəl ta Sar̄

Kum ndi deē kə kumneé gətóo

¹ Mban̄g kə́ Jerusalem ń i Kohelet ngōn̄ Dabid ní, ɔr̄ najə̄ i tītə̄ ń toō beé:

² Kohelet ń i nge kɔjə ngé kán̄ naā gə̄ najə̄ ní, əda na: Yá̰a̰ malang kumən gətóo, yá̰a̰ malang kumən gətóo, yá̰a̰ malang i yá̰á̰ kə́ kumən gətóo.

³ Deē a ənge i rí gír kəla malang ń a̰a̰ tápə loo rāā tə́ dɔ nang tə́ ní?

⁴ De kə́ ɓāl̄də́ əndā gō naā tə́ gə̄ əya̰n̄ loo adə̄n̄ de kə́ ojən̄də́ gōdə́ tə́ gogə́ gə̄, banī dɔ nang to i kum gotən ngándáńg.

⁵ Mbang əɓa ō, udə ō, téĺ láẃ aw̄ gogə́ loo ń əɓa tū tə́ kété tə́ ní ō.

⁶ Nél əla kum kə̄ dām̄ mbɔ́r ɓē kə́ geleé tə́, tél əla kum kə̄ dām̄ mbɔ́r ɓē kə́ ko̰ó̰ tə́. Nél əla ō, tūr̄ rɔ̄n ō, tél un gír njan ō.

⁷ Man̄ bā gə̄ nūgə́n̄, aw̄ əsōn̄ kum bā bo tə́, banī bā bo rosə alé. Nin̄ na̰yn̄ kə̄ loo nūgə́ tə́ ta kaw̄ kə̄ loo ń nin̄ a aw̄n̄ kə̄ tū tə́ ní tə́.

⁸ Yá̰a̰ gə̄ malang rāān̄ kəla, banī deē asə kəda malang alé. Asə deē ka̰a̰ loo kə kumneé aĺ ō, asə deē koō loo kə mbīneé aĺ ō.

⁹ I yá̰á̰ ń to kété ní n ndɔ̄ kə́ rang tə́ a to ɓáý ní. I yá̰á̰ ń rāān̄ kété kɔ̄ɔ́ ɓá ní n ndɔ̄ń tə́ a rāān̄ ɓáý ní. Yá̰á̰ kə́ kijə gətóo dɔ nang tə́ laā.

¹⁰ Ré yá̰á̰ kógə̄ḿ to ba ədan̄ najə̄ dɔ tə́ na: Á̰a̰ī, yá̰á̰ ń toō na i yá̰á̰ kə́ kijə! Anī, yá̰á̰ ní i yá̰á̰ kə́ to kété kɔ̄ɔ́ kem ɓāl̄ gə̄ ń mānə̄n̄ ɓá nojí tə́ ní.

¹¹ Yá̰á̰ ń rāā kaají gə̄ kété jóó ní, dɔjí jḭḭ̄ ndígə̄nal kɔ̄ɔ́. De gə̄ ń nin̄ a utə̄n̄ gojí jḭḭ̄ ní, dɔ ngé gə̄ ń a utə̄n̄ gōdə́ nin̄ ní a ndígə̄nal dɔdə́ tə́ kɔ̄ɔ́ ō.

Yá̰a̰ gə̄ ń nge kum kedə̄ i kum tə́ adə̄ ger̄ ní

¹² Kété ní mā Kohelet m̄-ndi mban̄g dɔ Israel gə̄ tə́ Jerusalem.

¹³ Yá̰a̰ malang ń a rāā yá̰a̰ dɔ nang tə́ laā ní, m-ə̄ndā rɔ̄ḿ ta tə́ m̄-sāā gír ō, m-ə̄ndā ma̰ȳ ngá̰ý kə kum kedēé ō. Nge ń noō i kəla kə́ ngan̄g ngá̰ý kə́ Nə́ɓā əndā dɔ de gə̄ tə́ kadə̄ rāān̄!

¹⁴ M-á̰a̰ kəla malang ń de gə̄ a rāān̄ dɔ nang tə́ laā ní. Banī kumən gətóo ō, i ngɔ̄də̄ gō nél yā kəhɔn ō.

¹⁵ Yá̰á̰ ń i kə́ rugə kɔ̄ɔ́ ní, deē asə ndájə̄ to̰ aĺ ō, yá̰á̰ ń gətóo ní, deē asə tə́da aĺ ō.

¹⁶ Mā m̄-gír̄ m-ə́da na kum kedə̄ yāḿ na i ngá̰ý tɔȳ yā de gə̄ malang ń o̰o̰n̄ ɓē kété noḿ tə́ Jerusalem ní. Tɔdɔ̄ kemḿ ger̄ najə̄ kə́ dɔ kum kedə̄ tə́ ngá̰ý ō, ger̄ yá̰á̰ kə́ dɔ nang tə́ ngá̰ý ō.

¹⁷ m̄-gḛy ger̄ dɔ nin̄ kum kedə̄ ō, mbóo ō. m̄-gḛy ger̄ dɔ nin̄ yá̰á̰ kə́ to ngáā ō, yá̰a̰ kə́ kumən gətóo ō ba m-á̰a̰ kadə̄ nge ń noō i ngɔ̄də̄ gō nél.

¹⁸ Tɔdɔ̄ wur kɔl i ngá̰ý tū kum kedə̄ kə́ ngá̰ý tə́. Deē ń kɔ́ɔ̄ rāā adə̄ ger̄ yá̰a̰ yān aw̄ kum kə̄ kété ní, rɔ̄ tōr̄ yān aw̄ kum kə̄ kété ō.