KƏLA RĀĀ 5 - Bibəl ta Sar̄

Ananias nin̄ kə Sapira

¹ Banī deē kógə̄ḿ rīn na i Ananias ō, rī nə̄yá̰n na i Sapira ō, oōn̄ naā kə nə̄yá̰neé ba igən̄ kə loo yādə́.

² Deē ní ɔr̄ ta nar gír loo ní əga gidə yān tə́, ba aw̄ kə gotoó ɓōkə́ no ngámbang kəla gə̄ tə́.

³ Anī Piyer ədan na: Ananias, i tām̄ rí tə́ á ī-rāā yá̰á̰ ń Sətan ədaī ní? Ḭ̄ ī-sor̄ Ndíĺ kə́ Táĺ ba ɔ̄r̄ ta nar gír loo yāí ə́ga gidə yāí tə́.

⁴ Loo yāí ní ásə ngɔ̄m̄ kanjə̄ kigəń aĺ a? Aláa dan ń igəń oy ní, yá̰á̰ ń kemií gḛy rāā kə nar gírneé ní ásə rāań karī ō aĺ a? Ba ī-rāā i ba̰ý n ī-núməń yá̰á̰ kə́ beē kemií tə́ ní? I de gə̄ n ī-sor̄də́ ní alé, ba i Nə́ɓā.

⁵ Dan ń Ananias oō najə̄ gə̄ ń noō ní anī, ni-teē əsō ba oy. De gə̄ malang ń oōn̄ ní ɓōĺ rāādə́.

⁶ Balsáa gə̄ ḭḭ ɓír̄nən̄ kə kūbūú ba aw̄ dubə̄nən̄.

⁷ Mbang asə mətá gō tə́ anī, nə̄yá̰n ń ger̄ yá̰á̰ ń rāā yá̰á̰ ní aĺ ní reē udə.

⁸ Piyer dəjen najə̄, əda na: Ígiī loo yāsí ní i kə gātə̄ kə́ beē rɔ̄kum a ə́dam̄. Anī dəyá̰ tél ədan na: Aíyē i kə gātə̄ ń noō!

⁹ Piyer tél dəjen ɓáý to̰ na: I rí n rāāsí á ōōī naā ba ī-nāāī Ndíĺ Kɔ́ɔ̄ɓē ní? Á̰, ngé gə̄ ń dubə̄n̄ nīń ngaaí ní n kōō njadə́ a ɓār̄ ta róbə́ tə́ toō. Nin̄ a unən̄ nīní yā kaw̄ń ō.

¹⁰ Anī dəyá̰ ní teē əsō nja Piyer tə́ kə̄ ta jī tə́ noō ba oy kɔ̄ɔ́. Dan ń balsáa gə̄ udən̄ anī əngen̄ i nīnə́n tá. Nin̄-unnən̄ ba aw̄ dubə̄nən̄ kadə ngaan tə́.

¹¹ Egəlijə malang ō, de gə̄ malang ō ń oōn̄ gotə najə̄ ń noō ní ɓōlə́n̄ ngá̰ý.

Yá̰á̰ kə́ yáā gə̄ rāān̄ yá̰a̰

¹² Yá̰á̰ kə́ to kɔr kum gə̄ ō, yá̰á̰ kə́ yáā gə̄ ō, rāān̄ yá̰á̰ ngá̰ý dan ngán Israel gə̄ tə́ kə ta kūl̄ ngámbang kəla gēé. Nin̄ malang ní kemdə́ i kógə̄ḿ ō, ran̄ naā tə́ loo kógə̄ḿ ō, gír dabə yā Salomo̰ kə́ rāā kə mbalá tə́.

¹³ De kə́ rang kə́ nāā ɓoo rɔ̄n tū yādə́ tə́ gətóo, banī nel̄ ngán Israel gə̄ sedə́ ngá̰ý.

¹⁴ Kósə de kə́ ngá̰ý gə̄, adə̄ i dəngam gə̄ kə dəyá̰ gə̄ ń taān̄ kem Kɔ́ɔ̄ɓē ní reēn̄ kə dɔ naā tə́.

¹⁵ De gə̄ reēn̄ kə ngé mo̰y gēé ɓōkə́n̄də́ kum róbə kɔsə gə̄ tə́. Tə́nīn̄də́ i kem tə̄rá gə̄ tə́ ō, kem waá gə̄ tə́ ō, kadə̄ ré Piyer kə mān̄ anī, kadə̄ ndílən ngóy aw̄ dɔ nge kə́ kógə̄ḿ tə́ dandə́ tə́.

¹⁶ Kósə de kə́ kem ɓē gə̄ kə́ kadə ɓē kə́ Jerusalem tə́ gə̄ ɓə̄ngān̄ naā ɓuk reēn̄ ō. Nin̄-reēn̄ kə ngé mo̰y gə̄ ō, kə de gə̄ kə́ ndíĺ kə́ yḛr gə̄ a rāān̄ kumdə́ ndoō tə́ gə̄ ō, ba de gə̄ malang ń noō ní əngen̄ rɔ̄ ngáā.

Rāān̄ ngámbang kəla gə̄ yá̰á̰ kə́ tōr̄

¹⁷ Loo ń noō tə́ ngol ngé tun̄ yá̰a̰ gə̄ ō, de gə̄ ń seneé á i Sadusiyḛ gə̄ ní ō, əndān̄ ngámbang kəla gə̄ nii.

¹⁸ Nin̄-əhɔn̄ ngámbang kəla gə̄ ɓōkə́n̄də́ kem kújə dəngáý kə́ tām̄ yā de gə̄ malang tə́.

¹⁹ Dan ndɔ̄ɔ́ anī de kə́ dɔ rā̰ tə́ yā Kɔ́ɔ̄ɓē teē ta kújə dəngáy, ni-aw̄ sedə́ ndágá ba ədadə́ na:

²⁰ Āw̄ ī-raī kem kújə yā Kɔ́ɔ̄ɓē tə́ ba ɔjiī ngán Israel gə̄ najə̄ malang kə́ dɔ ndi kə kumuú ń toō tə́.

²¹ Nin̄-oōn̄ najə̄ yā de kə́ dɔ rā̰ tə́ yā Kɔ́ɔ̄ɓē ní, adə̄ teēn̄ dəloí ɓatə aw̄ ran̄ kem kújə yā Kɔ́ɔ̄ɓē tə́ a ndóōn̄ de gə̄ yá̰a̰. Ngol ngé tun̄ yá̰a̰ gə̄ reē ugə̄ anī, ni ō de kə́ gōn tə́ gə̄ ō, ɓārə́n̄ ngé sarya kə́ bo gə̄ ō, kum kɔɔ̄ gə̄ malang yā ngán Israel gə̄ ō ɔsən̄ dɔdə́ naā tə́, ba əlan̄ gō ngámbang kəla gə̄ tə́ kújə dəngáyá kadə̄ reēn̄ sedə́.

²² Ba dan ń pajā gə̄ ugə̄n̄ anī əngen̄də́ kújə dəngáyá alé. Nin̄-tél aw̄ ɔjən̄ ngé kəladə́ gə̄ gotə yá̰a̰ gə̄ ń a̰a̰n̄ ní, ədan na:

²³ J-ənge kújə dəngáy i kə́ ra kə tan kə́ kutə̄ kadə̄ ngan̄g mímírí ō, j-ənge ngé ngɔ̄m̄ loo gə̄ i kə́ ran̄ kə njadə́ dɔɔ́ ta róbə́ kújə gə̄ ń tə́ndān̄də́ ta tə́ kadə̄ ngɔ̄mə̄n̄ ní tə́ ō. Ba dan ń jə-tḛḛ̄ ta kújə anī j-ənge deē kógə̄ḿ kemeé alé.

²⁴ Loo ń ngār yā ngé ngɔ̄m̄ ta kújə yā Kɔ́ɔ̄ɓē gə̄ ō, ngol gə̄ kə́ dɔ ngé tun̄ yá̰a̰ gə̄ tə́ ō oōn̄ najə̄ gə̄ ń noō ní, nin̄-gírə̄n̄ yá̰á̰ sétə́ dɔ ngámbang kəla gə̄ tə́, ba dəjen̄ naā na ké i rí n rāā yá̰a̰ wa.

²⁵ Banī de kə́rēý reē ədadə́ na: De gə̄ ń ī-ɓōkíīdə́ dəngáyá ní ra a ndóōn̄ ngán Israel gə̄ yá̰a̰ kem kújə yā Kɔ́ɔ̄ɓē tə́ noō.

²⁶ Anī ngār ɔy pajā gə̄ aw̄ reēń kə ngámbang kəla gēé jəke kanjə̄ rāādə́ yá̰á̰ kə́ tōr̄. Tɔdɔ̄ nin̄-ɓōlə́n̄ najə̄ kadə̄ ngán Israel gə̄ tə́nīn̄də́ kə mbalá yā tɔ̄l̄də́.

²⁷ Adə̄ reēn̄ sedə́ ba aw̄ əndān̄də́ no ngé sarya kə́ bo gə̄ tə́. Ngol ngé tun̄ yá̰a̰ gə̄ dəjedə́ najə̄ əda na:

²⁸ J-ɔgə̄sí ndóō de gə̄ yá̰a̰ kə rī deē ń noō ō, j-ədasí adə̄ unjə̄ ō. Ba ń toō ɓáa ī-ndóōī de gə̄ yá̰a̰ yāsí adə̄ taā kem ɓē kə́ Jerusalem malang kɔ̄ɔ́ ō, ī-sāāī kadə̄ mósə deē ní tél əsō dɔjí tə́ ō!

²⁹ Banī Piyer nin̄ kə ngámbang kəla gə̄ tél ədan̄ na: Koō ta Nə́ɓā i só tə́ tɔȳ koō ta deē ndul gə̄.

³⁰ Jeju ń ə́ndaniī kə máyá̰ tū kāgə̄ kə́ dēsə́ tə́ ī-tɔ̄liīneé ní, Nə́ɓā yā kaají gə̄ ndólə̄n.

³¹ I ni n Nə́ɓā ɔsən kə̄ dɔɔ́ kə tɔ́gəneé əndānəń ngāraá ō, nge kajə de gə̄ tə́ ō, kadə̄ ngán Israel gə̄ əngen̄neé ta róbə ndə̄ngā rɔ̄də́ ba kəngeń mā̰ȳ rɔ̄ dɔ majaĺ yādə́ gə̄ tə́ ní.

³² Yá̰á̰ gə̄ ń noō ń rāān̄ yá̰á̰ ní jḭḭ i de kə́ kum tə́ gə̄ ō, i jḭḭ ō Ndíĺ kə́ Táĺ ń Nə́ɓā adə̄ ngé koō tan gə̄ ní ō.

³³ Dan ń nin̄-oōn̄ najə̄ gə̄ ń noō ní anī wōn̄g asədə́ nák, adə̄ sāān̄ tɔ̄l̄ ngámbang kəla gə̄ kɔ̄ɔ́.

³⁴ Banī deē kógə̄ḿ ḭḭ dɔɔ́ dan ngé sarya kə́ bo gə̄ tə́. Deē ní i Parijiyḛ, rīn na i Gamaliyel. Ni i nge ndóō de gə̄ ndū najə̄ gə̄ kə́ ngán Israel gə̄ malang ɓōlə́n̄ ndílən. Ni-ḭḭ dɔɔ́ ba dəje kadə̄ kə teēn̄ kə ngámbang kəla gēé ndágá sḛ́ý.

³⁵ Gō tə́ anī ni-ɔr̄ najə̄ kə ngé sarya kə́ bo gēé, ədadə́ na: Yá̰á̰ ń ī-sāāī rāā kə de gə̄ ń toō ní ə̄ndāī ma̰ȳ majə tá.

³⁶ Tɔdɔ̄ Tedas ń teē yān ní dan i ngá̰ý aĺ ɓáý. Ni ɔjə kadə̄ ni na i deē kógə̄ḿ kə́ bo, adə̄ de gə̄ kə́ asən̄ ɓú sɔ́ ń noō unən̄ gōn. Dan ń tɔ̄l̄nən̄ kɔ̄ɔ́ anī de gə̄ ń unən̄ gōn ní tə̄ndān̄ naā tḭ̄ḭ̄n̄ malang kɔ̄ɔ́, adə̄ gotədə́ to i karī.

³⁷ Gōn ni tə́ ɓáa Judas kə́ Galile teē yān dan yā rāā sānjə̄mā tə́. Ni ɔy de gə̄ ngá̰ý gōn tə́. Ba dan ń ni-oy kɔ̄ɔ́ ō anī, de gə̄ malang ń unən̄ gōn ní tə̄ndān̄ naā tḭ̄ḭ̄n̄ kɔ̄ɔ́ ō.

³⁸ Adə̄ kə́ ɓōó ń toō ɓáa m-ə́dásí: Ī-lōōī kaw̄ gír najə̄ yā de gə̄ ń toō tə́ to̰, ə́ya̰īdə́ ādə̄ aw̄n̄! Ré yá̰á̰ ń gírə̄n̄ kadə̄ a rāān̄ ní ō, kəla yādə́ ō, i yá̰a̰ yā de gə̄ anī a nujə.

³⁹ Banī ré i yá̰a̰ yā Nə́ɓā anī, sḭḭ̄ ā ásiī nujəń alé. Ī-lōōī tél ngé rɔ̄ɔ̄ kə Nə́ɓāá gə̄! Ngé sarya gə̄ ndigən̄ najə̄ gō Gamaliyel tə́,

⁴⁰ anī tél ɓārə́n̄ ngámbang kəla gə̄ gogə́, ba adə̄ əndan̄də́ kə ndéyé ō, ɔgə̄n̄də́ kɔr̄ najə̄ kə rī Jeju ō, pá tá əya̰n̄də́ dɔɔ́.

⁴¹ Ngámbang kəla gə̄ teēn̄ loo sarya kə́ bo tə́, anī rɔ̄də́ nel̄də́ tām̄ kəndā kə́ Nə́ɓā əndā ma̰ȳdə́ a̰ā̰ kadə̄ asən̄ kadə̄ kídə̄n̄də́ ba rāān̄də́ yá̰á̰ kə́ tōr̄ tām̄ yā rī Jeju tə́.

⁴² Nin̄-ndóōn̄ de gə̄ yá̰a̰ ō, ɔjən̄ de gə̄ Najə̄ kə́ Majə yā Jeju Kərist ō, kə dɔ ndɔ̄ gə̄ kem kújə yā Kɔ́ɔ̄ɓē tə́ ō, kem kújə gə̄ tə́ ɓēé ō.