KƏLA RĀĀ 26 - Bibəl ta Sar̄

Pol ɔr̄ najə̄ dɔ rɔ̄n tə́ ta kum Agəripa tə́

¹ Agəripa əda Pol na: Ī-teē taí ba ɔ̄r̄ najə̄ dɔ rɔ̄í tə́ tā. Loo ń noō tə́ Pol əla jīn kə̄ dɔ de gə̄ tə́ rāāńdə́ lápə́ya, ba ɔr̄ najə̄ dɔ rɔ̄n tə́ əda na:

² Mban̄g Agəripa, rɔ̄ḿ nelə̄m̄ ngá̰ý kadə̄ m-ɔ̄r̄ najə̄ dɔ rɔ̄ḿ tə́ ɓōólaā ta kumií tə́, najə̄ yā yá̰a̰ gə̄ malang ń Jipə gə̄ ɔsəmə̄n̄ rāā tə́ ní.

³ Tɔdɔ̄ yá̰a̰ kāgə̄ ɓē yā Jipə gə̄ malang ō, yá̰a̰ gə̄ ń nin̄ a nējə̄n̄ naā najə̄ dɔ tə́ dejə ō ní, nge kə́ dumī ḭ̄ gətóo. Adə̄ m̄-rāāī ɓɔ́ ba ī-tə́gā taí ōōń najə̄ kɔrə̄ḿ.

⁴ Yá̰a̰ gə̄ ń m̄-rāādə́ dan nápar deē yāḿ gə̄ tə́ ō, kem ɓē kə́ Jerusalem tə́ ō, kə dūúḿ bátə́ m̄-tɔgəń ní, Jipə gə̄ malang gerə̄n̄.

⁵ Nin̄-ger̄mə̄n̄ i jóo, adə̄ ré ndigən̄ ɓáa asən̄ kəda najə̄ kə́ kum tə́ dɔḿ tə́ karī. Tɔdɔ̄ mā i Parijiyḛ, adə̄ i gír ɓūtə̄ kógə̄ḿ kə́ loo rāā kəla kadə̄ Nə́ɓā yādə́ ngan̄g ngá̰ý.

⁶ Ba ré reēn̄ seḿ loo sarya tə́ yā rāā sarya seḿ ɓōólaā ɓáa, i najə̄ kəndā kə́ m-ə̄ndā kemḿ dɔ míndə́ Nə́ɓā kə́ ənī adə̄ kaají gə̄ tə́.

⁷ Míndən ngeé ń ənī ní, gír ɓē gə̄ kə́ kutə gidə i jōó yā gír deē yājí gə̄ əndān̄ kemdə́ dɔ tə́ kadə̄ a reē yā kudə gírí, adə̄ nin̄ rāān̄ kəla adə̄n̄ Nə́ɓā ndɔ̄ɔ́ ō kadaá ō kanjə̄ dəba. Mban̄g Agəripa, i tām̄ kəndā kem dɔ míndə́ Nə́ɓā tə́ ngeé ń toō n Jipə gə̄ sekə́mə̄n̄neé ní.

⁸ Kadə̄ Nə́ɓā ndól̄ de kə́ koy gə̄ ní, de kə́rēý gə̄ dansí tə́ a̰a̰n̄ kadə̄ i yá̰á̰ kə́ to taā kem aĺ i najə̄ rí tə́?

⁹ Mā nəkɔ́ ń toō ní, kété m̄-gír̄ kemḿ tə́ m-ə́da na majə kadə̄ m̄-rāā yá̰a̰ malang ń tɔ́gə́ḿ asə ní kadə̄ m̄-nujəń rī Jeju kə́ Najaret kɔ̄ɔ́.

¹⁰ Adə̄ m̄-rāā yá̰á̰ ní kem ɓē kə́ Jerusalem tə́. Ngol gə̄ kə́ dɔ ngé tun̄ yá̰a̰ gə̄ tə́ adə̄mə̄n̄ ta róbə, adə̄ m-ə́wá ngé taā kem gə̄ ngá̰ý m̄-ɓōkə́də́ dəngáyá. Tá dan ń a tɔ̄lə̄n̄də́ ní, mā m̄-ndigə najə̄ gō ngé tɔ̄l̄də́ gə̄ tə́ ō.

¹¹ Mā m-ɔ̄r̄ gō kújə́ kán̄ naā gə̄ tḛ tḛ, m̄-rāā ngé taā kem gə̄ yá̰á̰ kə́ tōr̄ gə̄, ba m̄-ra sedə́ ta tájə̄ nge ń nin̄-taān̄ kemən ní. Tá wōn̄g yāḿ ń a rāām̄ i kə́ kɔ̄r̄ tə́ dɔdə́ tə́ ní, rāām̄ adə̄ m̄-ndəle njadə́ bátə́ ta kə́ dɔ ɓē kə́ rang gə̄ tə́ gə̄gē.

Pol ɔjə gotə loo tūr̄ ń tūr̄ hálən ní

¹² I beé n ngol gə̄ kə́ dɔ ngé tun̄ yá̰a̰ gə̄ tə́ əya̰n̄neé yá̰a̰ gə̄ gír jīḿ tə́ ō, əlamə̄n̄neé kə̄ Damas ō ní.

¹³ Mban̄g Agəripa, mā i dɔ róbə́ tə́ ō, loo i dan kadə ndaá ō, ba m-á̰a̰ loo kə́ unjə̄ kow tɔȳ mbang, teē dɔ rā̰ tə́ ba unjə̄ gīr̄ dɔḿ ō, unjə̄ gīr̄ dɔ ngé gə̄ ń nin̄ i seḿ dɔ róbə mbā tə́ ní ō.

¹⁴ Jḭḭ malang ní jə-téē jə-tə́sō adə̄ j-a̰a̰ rɔ̄jí i nang tə́. Anī m-ōō ndū deē kógə̄ḿ ədam̄ najə̄ kə ta Hebəro, əda na: Sol, Sol, ī-rāām̄ ndoō tə́ i tām̄ rí tə́? Ngan̄g seí kadə̄ ə̄ɓā ta katə kāgə̄ kēlīí.

¹⁵ Mā m̄-tél m̄-dəjen najə̄ m-ə́da na: Ḭ̄ i náā Kɔ́ɔ̄ɓē? Anī Kɔ́ɔ̄ɓē tél ədam̄ na: Mā i Jeju ń ā ī-rāām̄ ndoō tə́ ní.

¹⁶ Ba ḭ́ḭ ī-ra kə njaí dɔɔ́. m̄-ndɔ̄bī i yā kadə̄ m̄-rāāī nge kəla yāḿ tə́. Ā ī-tél de kə́ kum tə́ yāḿ, kadə̄ ɔ́jə loo ka̰a̰ ń á̰a̰m̄ ɓōólaā ní ō, kadə̄ ā ə́dá yá̰a̰ gə̄ ń m-ā m-ɔ́jiī ɓáý kadə̄ á̰a̰ā̰ ní ō.

¹⁷ m̄-gān̄g dɔí kɔ̄ɔ́ ɓáá jī Jipə gə̄ tə́ ō, jī gír de gə̄ ń m-ā m-ə́laī kə̄ rɔ̄də́ tə́ ba nin̄ i Jipə aĺ gə̄ ní tə́ ō.

¹⁸ M-ə́laī i kadə̄ āw̄ i teē kumdə́, kadə̄ āw̄ ī-teē sedə́ kɔ̄ɔ́ kum til tə́ ba ī-reē sedə́ kum loo kə́ unjə̄ kow tə́, i kadə̄ āw̄ ī-teē sedə́ kɔ̄ɔ́ gíŕ tɔ́gə yā Sətan tə́ ba ī-reē sedə́ rɔ̄ Nə́ɓā tə́, yā kadə̄ taān̄ kemḿ anī əngen̄neé mā̰ȳ rɔ̄ dɔ majaĺ yādə́ gə̄ tə́ ō, kadə̄ əngen̄neé loo dan de gə̄ yā Nə́ɓā tə́ ō.

Pol ɔr̄ najə̄ kəla yān

¹⁹ Adə̄ mban̄g Agəripa, m̄-mbātə́ najə̄ ta yá̰á̰ kə́ dɔ rā̰ tə́ ń m-á̰a̰ā̰ ní tə́ alé.

²⁰ Ba m-ɔ́jə de kə́ Damas gə̄ najə̄ ta kəga dɔ, gō tə́ anī i de kə́ Jerusalem gə̄ ō, de kə́ gō nang malang kə́ Jude tə́ ō, tá nápar de gə̄ ń nin̄ i Jipə aĺ gə̄ ní m-ɔ́jə́də́ najə̄ ō. M-ɔ́jə́də́ kadə̄ əya̰n̄ gíŕ yá̰a̰ rāādə́ kə́ majaĺ gə̄ kɔ̄ɔ́, ba kə tūrə̄n̄ rɔ̄də́ kə̄ rɔ̄ Nə́ɓā tə́ ō, kə rāān̄ yá̰á̰ kə́ ɔjə kadə̄ nin̄-əya̰n̄ majaĺ yādə́ gə̄ kɔ̄ɔ́ rɔ̄kum ō.

²¹ I tām̄ najə̄ ń noō tə́ n Jipə gə̄ əhɔmə̄n̄neé kem kújə yā Kɔ́ɔ̄ɓē tə́ ba sāān̄ tɔ̄lə̄m̄ ní.

²² Banī Nə́ɓā ngɔ̄mə̄m̄ bátə́ ɓōólaā, adə̄ m̄-ra laā ɓáý kadə̄ yá̰a̰ gə̄ ń mā i kum tə́ á m-á̰a̰ā̰ ní, m-ə́da de gə̄ malang, de kə́ dūú gə̄ ō, de kə́ bo gə̄ ō. Mā m-ə́dá yá̰á̰ kógə̄ḿ kə́ rang alé, ba i yá̰á̰ ń ngé koō ta gə̄ ō, Moijə ō, ədan̄ na a reē ní.

²³ Nin̄ ədan̄ kadə̄ Kərist ní na a a̰a̰ tápə̄ ō, na a oy ba na a ndól̄ kété dan de kə́ koy gə̄ tə́ ō, na a ɔjə gír deē yājí gə̄ ō, de gə̄ kə́ nin̄ i Jipə aĺ gə̄ ō, loo kə́ unjə̄ kow ō.

Pol mēr̄ Agəripa taā kem

²⁴ Pol ɔr̄ najə̄ dɔ rɔ̄n tə́ ugə̄ loo ń noō tə́, anī Pestus əga kɔŕ əda na: Pol, ā̰ȳ kɔ̄r̄ kɔ̄ɔ́! Yá̰á̰ ń ī-ndóō ngá̰ý ní rāāī adə̄ ā̰ȳ kɔ̄r̄ kɔ̄ɔ́!

²⁵ Pol tél tūr̄ ədan na: Nge ko̰o̰ ɓē kə́ majə Pestus, m-ā̰ȳ kɔ̄r̄ alé. Najə̄ ń m-ɔ̄r̄ ní i najə̄ kə́ rɔ̄kum ō, najə̄ kɔr̄ de kə́ kur̄ dɔn ndi kə gōó majə ō.

²⁶ Mban̄g Agəripa ger̄ yá̰a̰ gə̄ ń toō, adə̄ m-ásə kɔr̄ najə̄n ta kumən tə́ kanjə̄ ɓōĺ. Mā m̄-taā kem mámák kadə̄ yá̰á̰ kógə̄ḿ kə́ mbaān ni danaá gətóo. Tɔdɔ̄ yá̰a̰ gə̄ ń toō ní rāān̄ yá̰a̰ i kɔgɔ̄ loo kógə̄ḿ tə́ alé.

²⁷ Mban̄g Agəripa, ī-taā kem najə̄ kɔr̄ ngé koō ta gə̄ a? Mā m̄-ger̄ majə kadə̄ ḭ̄ ī-taā kem.

²⁸ Anī Agəripa tél əda Pol na: Na̰y i sḛ́ý beē kadə̄ ɔ́sə́ ngóýḿ kadə̄ m̄-tél deē yā Kərist.

²⁹ Anī Pol tél ədan na: Ká na̰y i sḛ́ý beē aáā, ngá̰ý a̰á̰ā̰, kadə̄ Nə́ɓā rāā adə̄ i ḭ̄ ngóy alé, ba kadə̄ i de gə̄ malang ń a oōn̄ najə̄ kə́ taḿ tə́ ɓōólaā toó, kadə̄ ī-téliī ī-toī tītə̄ḿ mə̄kɔ́, ba kadə̄ i kə súĺ gə̄ ń jīḿ tə́ toō jīsí tə́ alé.

³⁰ Loo ń noō tə́ mban̄g ḭḭ dɔɔ́, ni gə̄gē nge ko̰o̰ ɓē gə̄gē, Berenis gə̄gē, ngé gə̄ ń ndin̄ sedə́ loo sarya tə́ ní gə̄gē.

³¹ Dan ń nin̄-teēn̄ anī ədan̄ naā na: Deē ń toō rāā yá̰á̰ kógə̄ḿ kə́ asə yo aĺ ō, kə́ asə kadə̄ de tṵ́ṵ̄nəń kə súĺ aĺ ō.

³² Anī Agəripa əda Pestus na: Deē ń toō ní, nə́ngētə́ əda na n-aw̄ kə sarya yān ní rɔ̄ Sejar tə́ aĺ ɓáa j-a j-əya̰n dɔɔ́ karī.