KƏLA RĀĀ 25 - Bibəl ta Sar̄

Pol aw̄ kə sarya yānneé rɔ̄ Sejar tə́

¹ Dan ń Pestus reē ugə̄ ɓē ko̰o̰ yān tə́ rāā ndɔ̄ mətá anī, ḭḭ Sejare aw̄ Jerusalem.

² Loo ń noō tə́ ngol gə̄ kə́ dɔ ngé tun̄ yá̰a̰ gə̄ tə́, kə de kə́ bo gə̄ kə́ dɔ dán Jipə gə̄ tə́ reē sekə́n̄ Pol rɔ̄n tə́. Nin̄-dəjen̄ Pestus kat kat

³ kadə̄ kə rāā kem majə sedə́ ba kə reē kə Poló Jerusalem. Kə́ rɔ̄kum tə́ ɓáa nin̄-oōn̄ naā dɔ Pol tə́ yā tɔ̄lən róbó.

⁴ Banī Pestus tél ədadə́ na loo ń əhɔn̄ Pol ənīnən̄ dəngáyá tū tə́ ní na i Sejare ō, tá nəkɔ́ n-a n-tél na i mbée ngɔr ngɔr nəkɔ́ ń toō tə́ ō.

⁵ Ba ni-ədadə́ dɔ tə́ ɓáý to̰ na kadə̄ ngār yādə́ gə̄ kə aw̄n̄ seneé, ba ré Pol na rāā yá̰á̰ kə́rēý kə́ gōtə́ aĺ ɓáa kadə̄ kə sekə́nən̄.

⁶ Pestus ndi loodə́ rāā i ndɔ̄ sɔ́sɔ́ aláa kutə kógə̄ḿ beē ngóy, ba gō tə́ anī tél dɔ tə́ aw̄ gogə́ Sejare. Teē gidə gō ndɔ̄ ń ni-tél ugə̄ń tə́ ní anī, ni-aw̄ ndi loo sarya tə́, ba əda kadə̄ reēn̄ kə Poló.

⁷ Dan ń Pol reē ugə̄ anī, Jipə gə̄ ń ḭḭn̄ Jerusalem ní reē gīrə̄n̄ gidən ba tə́dan̄ najə̄ kə́ majaĺ ngá̰ý gə̄ dɔn tə́ sekə́nən̄neé, ba nin̄-asən̄ kɔjə kadə̄ najə̄ gə̄ ní i rɔ̄kum alé.

⁸ Banī Pol nējə̄ najə̄ dɔ rɔ̄n tə́ kɔ̄ɔ́, əda na: m̄-rāā yá̰á̰ kə́ mān̄ dɔ ndū najə̄ yā Jipə gə̄ aĺ ō, m̄-rāā yá̰á̰ kə́ majaĺ kə kújə yā Kɔ́ɔ̄ɓēé aĺ ō, kə Sejar aĺ ō.

⁹ Banī Pestus sāā kadə̄ kem Jipə gə̄ nel̄də́, adə̄ ni-dəje Pol na ké ndigə kaw̄ Jerusalem kadə̄ aw̄ gāngə̄n̄ sarya yān ta kumən ni Pestus tə́ wa.

¹⁰ Anī Pol tél ədan na: m̄-ra i loo sarya yā Sejar tə́ n toó, adə̄ a gāngə̄n̄ sarya dɔḿ tə́ i loo ń toō tə́ laā. m̄-rāā yá̰á̰ kógə̄ḿ kə́ gōtə́ aĺ sḛ́ý kə Jipə gēé alé, adə̄ īkɔ́ ī-ger̄ majə.

¹¹ Ré najə̄ əhɔm̄ ō, m̄-rāā yá̰á̰ kógə̄ḿ kə́ gōtə́ aĺ kə́ ndetə yo ō anī, m̄-mbātə́ koy alé. Banī ré yá̰á̰ kógə̄ḿ kə́ rɔ̄kum dan yá̰a̰ gə̄ ń de gə̄ ń toō sekə́mə̄n̄neé tə́ ní gətóo anī, de kə́ asə kəlam̄ jīdə́ tə́ gətóo. m̄-gḛy kaw̄ kə sarya ní rɔ̄ Sejar tə́.

¹² Loo ń noō tə́, dan ń Pestus a̰a̰n̄ najə̄ ní naā tə́ kə ngé kadə̄n kɔjə gēé oy anī, tél əda Pol na: Ī-gḛy kaw̄ń rɔ̄ Sejar tə́ ɓá ní, ā āw̄ rɔ̄ Sejar tə́ tā.

Pol ra no Agəripa nin̄ kə Berenis tə́

¹³ Ndɔ̄ gə̄ mānə̄n̄, anī mban̄g Agəripa nin̄ kə Berenis reē ugə̄n̄ Sejare, ba aw̄n̄ go̰ō̰ Pestus tə́.

¹⁴ Nin̄-ndin̄ ndɔ̄ i ngá̰ý, adə̄ Pestus ɔjə mban̄g gotə najə̄ yā Pol, əda na: Peliksə əya̰ deē kógə̄ḿ dəngáyá laā.

¹⁵ Dan ń mā i Jerusalem ní, ngol gə̄ kə́ dɔ ngé tun̄ yá̰a̰ gə̄ tə́ ō, kum kɔɔ̄ yā Jipə gə̄ ō, reē sekə́nən̄ rɔ̄ḿ tə́, ba dəjen̄ kadə̄ m̄-gān̄g sarya dɔn tə́.

¹⁶ Banī m̄-tūr̄ m-ə́dádə́ na kə gō yá̰a̰ kāgə̄ ɓē yā de kə́ Rom tə́ gə̄ ní, deē ń sekə́nən̄ ní, a reēn̄ kə ngé sekə́n gēé non tə́ ō, a əya̰nən̄ kadə̄ ɔr̄ najə̄ dɔ rɔ̄n tə́ najə̄ sekə́ ń sekə́nən̄ tə́ ní ō, pá tá a əlanən̄ jī ngé sekə́n gə̄ tə́ ɓáý.

¹⁷ Loo ń noō tə́ nin̄ reēn̄ seḿ laā. Ba teē gidə gō ndɔ̄ ń jə-reē j-ugə̄ń tə́ ní anī m̄-ngóō to̰ alé, m-āw̄ m̄-ndi loo sarya yāḿ tə́, ba m-ādə̄ ndūḿ kadə̄ reēń kə deē ní.

¹⁸ Dan ń ngé sekə́n gə̄ ní i non tə́ ní, mā m̄-gír̄ kadə̄ a ɔsənən̄ rāā yá̰á̰ kə́ majaĺ ngá̰ý gə̄, banī nin̄-ədan̄ yá̰á̰ kógə̄ḿ kə́ ɔjə dɔ yá̰a̰ gə̄ ń mā m̄-gír̄ ní alé.

¹⁹ Ba nējə̄n̄ i naā najə̄ seneé dɔ ndɔ̄ȳ Nə́ɓā yādə́ tə́ ō, dɔ de kə́rēý kə́ rīn na i Jeju tə́ kə́ oy kɔ̄ɔ́ tə́ ba tām̄ yā Pol tə́ ɓáa ni na ndi kə kumneé tə́ ō ngóy.

²⁰ Mā m̄-ger̄ loo kəndā ma̰ȳ najə̄ kə́ tītə̄ ń noō alé, adə̄ m̄-dəje Pol m-ə́da na ké gḛy kaw̄ Jerusalem kadə̄ aw̄ gāngə̄n̄ sarya dɔ najə̄ yān tə́ ní wa.

²¹ Banī Pol gḛy kaw̄ kə sarya yān ní i rɔ̄ Sejar tə́. Adə̄ m-ādə̄ ndūḿ kadə̄ kə ngɔ̄m̄nən̄ bátə́ kadə̄ m-ə́la seneé rɔ̄ Sejar tə́.

²² Loo ń noō tə́ Agəripa əda Pestus na n-sāā kadə̄ nəkɔ́ kə n-oō najə̄ kə́ ta deē ní tə́. Anī Pestus tél ədan na: Bírí anī ā oō najə̄ kə́ tan tə́.

²³ Teē kə ndɔ̄ kə́ noō anī Agəripa nin̄ kə Berenis reēn̄ kə de gēé ɓuk ɓuk gōdə́ tə́. Nin̄-udən̄ loo sarya tə́ kə ngol áskar kə́ bo gə̄ ō, kə de kə́ rang kə́ bo gə̄ kə́ kem ɓēé ō. Pestus adə̄ ndūn kadə̄ reēn̄ kə Poló, anī reēn̄ seneé.

²⁴ Pestus un najə̄ ɔr̄, əda na: Mban̄g Agəripa ō, sḭḭ̄ malang ń ī-ndiī sejí laā ō ní, á̰a̰ī deē ń kósə Jipə gə̄ malang sekə́nən̄ rɔ̄ḿ tə́ Jerusalem gə̄gē, laā gə̄gē, ba əgan̄ kɔŕ ədan̄ na majə kadə̄ ni-ndi kə kumneé aĺ ní.

²⁵ Mā tā a m-á̰a̰ kadə̄ ni-rāā yá̰á̰ kógə̄ḿ kə́ asə kadə̄ oyń alé. Ba dan ń nəkɔ́ gḛy kaw̄ kə sarya yānneé rɔ̄ Sejar tə́ ní, m̄-ndigə kəla seneé rɔ̄n tə́.

²⁶ Mā m-á̰a̰ najə̄ kə́ sew kə́ kadə̄ m̄-ndang m-ə̄ndā dɔn tə́ m-ə́lań m-ādə̄ Sejar alé. I tām̄ najə̄ ń noō tə́ n m̄-reē seneé nosí tə́ ní, ba mandang ɓáa i kə̄ noí ḭ̄ mban̄g Agəripa tə́, yā kadə̄ ré m-ōō najə̄ kə́ tan tə́ ba m-ə́nge yá̰á̰ kógə̄ḿ tū tə́ anī m̄-ndang.

²⁷ Tɔdɔ̄ mā m-á̰a̰ kadə̄ deē ń ni i dəngáý ní, kəla seneé kanjə̄ kəda najə̄ kə́ dɔn tə́ kadə̄ unjə̄ ní i yá̰á̰ kə́ əhɔ naā alé.