KƏLA RĀĀ 23 - Bibəl ta Sar̄

¹ Pol əndā kumən dɔ ngé sarya kə́ bo gə̄ tə́ ba əda na: Ngákó̰ó̰ḿ gə̄, hálə́ḿ ń m̄-mgɔ̄m̄ ta kum Nə́ɓā tə́ bátə́ ɓōólaā ní, kemḿ ɔjəm̄ ngōn̄ yá̰á̰ kógə̄ḿ sḛ́ý kə́ majaĺ dɔ tə́ alé.

² Banī ngol ngé tun̄ yá̰a̰ gə̄ ń rīn na i Ananias ní, əda de gə̄ ń ran̄ rɔ̄n tə́ ní na kə əndan̄ ta Pol. Anī Pol ədan na:

³ Ndogə̄ mbal̄ kə́ rāā hō̰rō̰ gidə tə́ kadə̄ ndaa, i ḭ̄ n Nə́ɓā a əndaī ní! Ī-ndi laā i yā gān̄g sarya dɔḿ tə́ kə gō ndū najá anī ī-kídə̄ ndū najə̄ ba ə́da na kə əndamə̄n̄ a?

⁴ Anī ngé gə̄ ń ran̄ rɔ̄n tə́ ní ədanən̄ na: Ī-tájə̄ ngol ngé tun̄ yá̰a̰ gə̄ yā Nə́ɓā a?

⁵ Anī Pol tūr̄ ədadə́ na: Ngákó̰ó̰ḿ gə̄, m̄-ger̄ kadə̄ ni i ngol ngé tun̄ yá̰a̰ gə̄ alé, tɔdɔ̄ i kə́ ndang na: Ā ī-tájə̄ ngār yā gír deē yāí gə̄ alé.

⁶ Pol ger̄ kadə̄ dan de gə̄ ń kánə̄n̄ naā á ndin̄ tə́ ní, dām̄ kógə̄ḿ gə̄ i Sadusiyḛ gə̄ ō, dām̄ kə́rēý gə̄ i Parijiyḛ gə̄ ō, adə̄ ni-əga kɔŕ ədań ngé sarya gə̄ na: Ngákó̰ó̰ḿ gə̄, mā i Parijiyḛ ō, mā i ngōn̄ kem de kə́ ni i Parijiyḛ ō! I tām̄ yā yá̰á̰ ń j-əndāī kemjí dɔ tə́ ní, adə̄ i tām̄ yā ndól̄ kə́ de kə́ koy gə̄ a ndólə̄n̄ tə́ n reēn̄neé seḿ loo sarya tə́ yā rāā sarya seḿ ní.

⁷ Dan ń ni-əda najə̄ ń noō ənī tan kə̄ nang tə́ aĺ ɓáý anī, gákə̄ naā ḭḭ dɔ dán Parijiyḛ gə̄ tə́ kə Sadusiyḛ gēé ō, kēgə̄ naā to dan ngé kán̄ naā gə̄ tə́ ō.

⁸ Tɔdɔ̄ Sadusiyḛ gə̄ ədan̄ na deē na oy a na a ndól̄ aĺ ō, de kə́ dɔ rā̰ tə́ gə̄ na gətóon̄ ō, ndíl deē na gətóo ō. Banī Parijiyḛ gə̄ ədan̄ na yá̰a̰ gə̄ ń noō na ton̄ noó mbak.

⁹ Loo ń noō tə́ najə̄ ɓār̄ sow. Ngé ngé ndóō de gə̄ ndū najə̄ kə́rēý gə̄ kə́ dām̄ yā Parijiyḛ gə̄ tə́ ḭḭ tṵ́ṵ̄n̄ rɔ̄ kə ngangāá ngá̰ý ədan̄ na: Jḭḭ j-a̰a̰ yá̰á̰ kógə̄ḿ kə́ majaĺ kə́ deē ń toō rāā alé. Ba ré i ndíl deē kógə̄ḿ, aláa i de kə́ dɔ rā̰ tə́ kógə̄ḿ n ɔr̄ najə̄ seneé ní a i náā n-ger̄?

¹⁰ Dan ń najə̄ a majaĺ i kum kə̄ kété kété ō, ngol áskar gə̄ kə́ bo ɓōĺ najə̄ kadə̄ a rə́yā̰n̄ Pol naā tə́ ō ní anī, ni-adə̄ ndūn ɓūtə̄ áskar gə̄ kadə̄ aw̄ teēn̄ kə Poló kɔ̄ɔ́ dan de gə̄ tə́, ba kə aw̄n̄ seneé kem gérgereé.

¹¹ Teē ndɔ̄ kə́ noō tə́ ndɔ̄ɔ́ anī, Kɔ́ɔ̄ɓē ndɔ̄bə̄ Pol ba ədan na: Ə́hɔ rɔ̄í tɔgə, na tītə̄ ń ə́dań najə̄ kə́ kum tə́ dɔḿ tə́ kem ɓē kə́ Jerusalem tə́ ní, majə kadə̄ ī-rāā tītə̄ ń noō kem ɓē kə́ Rom tə́ ō.

Jipə gə̄ oōn̄ naā dɔ Pol tə́ yā tɔ̄lən

¹² Dan ń loo tīī anī Jipə kə́rēý gə̄ oōn̄ naā, nin̄-túbə̄n̄ kə yá̰a̰ kəsaá ō, kə yá̰a̰ ka̰yá̰ ō, bátə́ kadə̄ ré n-tɔ̄lə̄n̄ Pol pá tá.

¹³ De gə̄ ń oōn̄ naā ba túbə̄n̄ ní tɔȳn̄ deē kutə sɔ́ ń noō.

¹⁴ Nin̄-aw̄ əngen̄ ngol ngé tun̄ yá̰a̰ gə̄ ō, kum kɔɔ̄ gə̄ ō, ba ədan̄də́ na n-túbə̄n̄ kə yá̰a̰ kəsaá ō, kə yá̰a̰ ka̰yá̰ ō, bátə́ kadə̄ ré kə n-tɔ̄lə̄n̄ Pol pá tá.

¹⁵ Ní, kə nin̄ ngol gə̄ kə́ dɔ ngé tun̄ yá̰a̰ gə̄ tə́ ō, kum kɔɔ̄ gə̄ ō, kadə̄ míndə́də́ kə i kógə̄ḿ beē kə ngé sarya kə́ bo gə̄ yā Jipə gə̄, ba kə dəjen̄ ngol áskar gə̄ kə́ bo kadə̄ reē kə Poló. Kə rāān̄ tītə̄ kə́ a sāān̄ i tél kəndā ma̰ȳ najə̄ yā Pol ní rang kə gōó beē. Ba nin̄ kɔ́ gə̄ tā a na n-ran̄ dɔ rɔ̄də́ tə́ kɔ̄ɔ́ yā tɔ̄l̄ Pol kété pá tá kadə̄ a ugə̄ ɓáý.

¹⁶ Banī ngōn̄ ngōkó̰o̰ Pol kə́ dəyá̰ oō najə̄ ní, adə̄ ni-aw̄ kem gérgereé əda Pol kɔgə̄n.

¹⁷ Pol ɓāŕ ngol áskar gə̄ kógə̄ḿ ba ədan na kə aw̄ kə balsáá ní rɔ̄ ngol áskar gə̄ kə́ bo tə́ na aw̄ kə najá yā kədan.

¹⁸ Ngol áskar gə̄ ní aw̄ seneé rɔ̄ ngoldə́ kə́ bo tə́ ba ədan na: I Pol kə́ dəngáý ní n-ɓārə́m̄, ba ədam̄ na kə m̄-reē kə balsáá ń toō rɔ̄í tə́, na aw̄ kə najá yā kədaī.

¹⁹ Ngol áskar gə̄ kə́ bo ní əhɔ ta jī balsáá ní, aw̄ seneé kə kérneé ba dəjen na ké i yá̰á̰ rí n a sāā kədan ní wa.

²⁰ Balsáá ní ədan na: Jipə gə̄ oōn̄ naā yā dəjeī kadə̄ āw̄ kə Poló rɔ̄ ngé sarya kə́ bo gə̄ tə́ bírí, ba a rāān̄ tītə̄ kə́ ngé sarya kə́ bo gə̄ a sāān̄ i tél kəndā ma̰ȳ najə̄ yān ní rang kə gōó beē.

²¹ Ba ī-lōō taā kemdə́! Tɔdɔ̄ de gə̄ kə́ dandə́ tə́ kə́ mānə̄n̄ kutə̄ sɔ́ ń noō túbə̄n̄ kə yá̰a̰ kəsaá ō, kə yá̰a̰ ka̰yá ō, bátə́ kadə̄ ré kə n-tɔ̄lə̄n̄ Pol pá tá. Adə̄ nin̄-ton̄ a um̄nən̄ noó. Ń toō nin̄-ndin̄ dɔ rɔ̄də́ tə́ kɔ̄ɔ́, ba a ngóōn̄ i taí ḭ̄ ngóy kadə̄ ī-ndigə.

²² Ngol áskar gə̄ kə́ bo tāā balsáá ní na kə lōō kəda de kə́ rang sḛ́ý na ɔjən gíŕ yá̰a̰ gə̄ ń toō. Gō tə́ anī ni-əya̰n adə̄ aw̄.

Ndɔ́tə̄n̄ kə Poló aw̄n̄ seneé ta Peliksə nge ko̰o̰ ɓē tə́

²³ Gō tə́ anī ngol áskar gə̄ kə́ bo ɓāŕ ngol áskar yān gə̄ jōó ba ədadə́ na: Ɔ́yiī áskar gə̄ ɓú jōó ō, ngé sə́nda gə̄ kutə sīrí ō, ngé nənga gə̄ ɓú jōó ō, ba ī-rāāī rɔ̄sí yā kadə̄ ré mbang kə́ ndōhó kə́ ndɔ̄ɔ́ asə anī āwī Sejare.

²⁴ Ī-rāāī loo sə́nda gə̄ ɓáý to̰ tām̄ yā Pol tə́, ba āwī seneé rɔ̄ Peliksə nge ko̰o̰ ɓē tə́ kanjə̄ kadə̄ yá̰á̰ kógə̄ḿ rāān.

²⁵ Ba ni-ndang najə̄ gə̄ ń toō əlańdə́:

²⁶ Peliksə nge ko̰o̰ ɓē kə́ majə ngá̰ý, i mā Kəlodə Lijiyas n m-ə́la kə̄ dɔí tə́ ní, lápə́ya yāí!

²⁷ Deē ń m-ə́la seneé m-ādī toó, Jipə gə̄ əhɔnən̄ ba a sāān̄ i tɔ̄lən. Mā m-ōō kadə̄ ni i de kə́ Rom, adə̄ m-āw̄ kə ɓūtə̄ áskar gēé m̄-taānneé jīdə́ tə́ kɔ̄ɔ́.

²⁸ m̄-gḛy ger̄ kum yá̰a̰ bang ń a sekə́nən̄neé ní, adə̄ m-āw̄ seneé rɔ̄ ngé sarya kə́ bo yādə́ gə̄ tə́.

²⁹ Ba m-á̰a̰ kadə̄ sekə́nən̄ i najə̄ yā yá̰a̰ gə̄ kə́ tū ndū najə̄ yādə́ tə́ kə́ nin̄ kɔ́ gə̄ a nējə̄n̄ naā najə̄ dɔ tə́ tə́. Ba yá̰á̰ kógə̄ḿ kə́ yā kadə̄ deē tɔ̄l̄nəń, aláa tṵ́ṵ̄nəń kə súĺ ní gətóo.

³⁰ Ədamə̄n̄ na Jipə gə̄ na oōn̄ naā dɔ deē ngeé ń toō tə́ yā tɔ̄lən. Adə̄ m-ḭ́ḭ kə̄ ta jī tə́ beē m-ə́la seneé m-ādī. Ba m-ə́dá ngé sekə́n gə̄ kadə̄ aw̄ ɔrə̄n̄ gíŕ yá̰á̰ ń nin̄ a sekə́nən̄neé ní rɔ̄í tə́.

³¹ Áskar gə̄ rāān̄ yá̰á̰ ń ədan̄də́ ní. Nin̄-unən̄ Pol dan ndɔ̄ɔ́ aw̄n̄ seneé A̰tipatəris.

³² Teē kə ndɔ̄ kə́ noō anī, áskar gə̄ əya̰n ngé sə́nda gə̄ adə̄ aw̄n̄ kə Poló, ba nin̄-tél aw̄n̄ gogə́ gérgereé.

³³ Dan ń ngé sə́nda gə̄ ní ugə̄n̄ Sejare anī, adə̄n̄ nge ko̰o̰ ɓē makətūbə̄ yā Kəlodə Lijiyas ní ō adə̄nən̄ kə Poló ō.

³⁴ Ni-taā makətūbə̄ ní a̰a̰, ba dəje Pol na ké ni i de kə́ gō nang kə́ rá tə́ wa. Dan ń ni-oō kadə̄ Pol i de kə́ gō nang kə́ Silisi tə́ anī ədan na:

³⁵ Ré ngé sekíī gə̄ reē ugə̄n̄ pá tá m-ā m-ōō najə̄ kə́ taí tə́ ɓáý. Ba ni-adə̄ ndūn kadə̄ ngɔ̄mə̄n̄ Pol kem kújə ngār yā Herod tə́.