KƏLA RĀĀ 22 - Bibəl ta Sar̄

¹ Ngákó̰ó̰ḿ gə̄ ō, bɔbə́ḿ gə̄ ō, ōōī yá̰á̰ ń ngɔlaā m-ā m-ə́dásí yā nējəń najə̄ dɔḿ tə́ kɔ̄ɔ́ ní.

² Dan ń nin̄-oōn̄ kadə̄ a ɔr̄ najə̄ sedə́ i kə ta Hebəro anī, tél ran̄ jəke tɔȳ kə́ kété ɓáý.

³ Mā i Jipə, ojəmə̄n̄ i Tarsə, dɔ nang kə́ Silisi tə́. Ba ətōmə̄n̄ i kem ɓē ń toō tə́ ō, i Gamaliyel n i nge ndóōm̄ yá̰a̰ ō ní. Ni ɔjəm̄ ndū najə̄ yā kaají gə̄ kə ta njaá ndetə ndetə, adə̄ m̄-ger̄ kə gōó majə. Tá kété ní o̰o̰m̄ tɔdɔ̄ Nə́ɓā ngá̰ý tītə̄ ń sḭḭ̄ malang ī-ra ā ī-rāāīneé ɓōólaā toó ō.

⁴ Ngé gə̄ ń unən̄ gō róbə yā Kɔ́ɔ̄ɓē ń toō ní, m̄-rāādə́ ndoō tə́ ngá̰ý bátə́ adə̄ oyn̄. M-ə́hɔ dəngam gə̄ ō, dəyá̰ gə̄ ō m̄-ɓōkə́də́ dəngáyá.

⁵ Ngol ngé tun̄ yá̰a̰ gə̄ ō, kum kɔɔ̄ gə̄ malang ō, asən̄ ndigə gōḿ tə́ kadə̄ m-ə́da i najə̄ kə́ rɔ̄kum. m̄-taā makətūbə̄ i jīdə́ nin̄ kɔ́ gə̄ tə́ yā kaw̄ń kadə̄ ngákó̰ó̰jí Jipə gə̄ kə́ Damas tə́ ní. Adə̄ m-ḭ́ḭ m-ā m-āwń i kə̄ Damas, yā kaw̄ kəhɔń ngé taā kem gə̄ ń ndin̄ noó ní yā reē sedə́ Jerusalem, kadə̄ rāān̄də́ yá̰á̰ kə́ tōr̄.

Pol ɔjə gotə loo tūr̄ ń tūr̄ hálən ní

⁶ Adə̄ mā i róbó ō, m-ə̄ndā dɔ ɓē kə́ Damas ngɔr ō. Loo i ngɔr kə̄ dan kadə ndaá, anī loo kə́ unjə̄ kow ḭḭ dɔ rā̰ tə́ gīr̄ gidəḿ.

⁷ m̄-teē m-ə̄sō nang tə́ anī m-ōō ndū deē kógə̄ḿ ɔr̄ najə̄ seḿ ədam̄ na: Sol, Sol, ī-rāām̄ ndoō tə́ beē i tām̄ rí tə́?

⁸ m̄-tél m-ə́dan na: I ḭ̄ náā, Kɔ́ɔ̄ɓē? Ndū deē ní tél ədam̄ na: I mā Jeju kə́ Najaret ń ā ī-rāām̄ ndoō tə́ ní.

⁹ De gə̄ ń seḿ ní a̰a̰n̄ loo ń unjə̄ kow ní, banī oōn̄ ndū deē ń ɔr̄ najə̄ seḿ ní alé.

¹⁰ Loo ń noō tə́ m̄-dəje najə̄ m-ə́da na: Kə m̄-rāā i rí tā Kɔ́ɔ̄ɓē? Anī Kɔ́ɔ̄ɓē tél ədam̄ na: Ḭ́ḭ dɔɔ́ āw̄ Damas. Tɔdɔ̄ i Damas n a ədanī yá̰a̰ malang ń kadə̄ ā ī-rāā ní.

¹¹ Loo kə́ unjə̄ kow ní ndór̄ kumḿ kɔ̄ɔ́, adə̄ m-á̰a̰ loo to̰ alé. Ba i madə̄ mbāḿ gə̄ n əhɔn̄ ta jīḿ á m-ūgəń kem ɓē kə́ Damas tə́ ní.

¹² Ba kem ɓē kə́ Damas tə́ ní, dəngam kógə̄ḿ kə́ rīn na i Ananias ndi noó. Ni i de kə́ nge ɓōĺ ndíĺ Nə́ɓā ō, i de kə́ nge kəhɔ gō ndū najə̄ ō, Jipə gə̄ malang kə́ Damas tə́ ədan̄ najə̄ yān majə ō.

¹³ Ni-reē əngem̄ ba ədam̄ na: Ngōkó̰ó̰ḿ Sol, ī-tél á̰a̰ loo gogə́! Anī m̄-tél m-á̰a̰ loo gogə́ kə̄ ta jī tə́ noō ō, m-á̰a̰ Ananias ō.

¹⁴ Ni-əda ɓáý to̰ na: Nə́ɓā yā kaají gə̄ gə̄rā əndāī dɔ jīn kadə̄ ī-ger̄ yá̰á̰ ń kemən ndigə ní ō, kadə̄ á̰a̰ nge kə́ kal kógə̄ḿ beē ń ni i de kə́ sew ní ō, kadə̄ ōō najə̄ kə́ tan tə́ ō.

¹⁵ Tɔdɔ̄ i gáŕ kadə̄ ḭ̄ i de kə́ kum tə́ yān ta kum de gə̄ tə́ malang najə̄ yá̰á̰ ń á̰a̰ā̰ ō, ōō ō tə́ ní.

¹⁶ Ba ń toō ɓáa yá̰á̰ kə́ rang kə́ yā kadə̄ ī-ngóō i rí ɓáý? Ḭ́ḭ dɔɔ́ ādə̄ rāāniī batém ō, ādə̄ tə́gon̄ yá̰á̰ kə́ majaĺ gə̄ ń ī-rāā ní kɔ̄ɔ́ ō, kə ta kūl̄ ɓāŕ kə́ ī-ɓārə́n kadə̄ rāā seí tə́.

Pol ɔjə gotə kəla ń əlanən̄ kə̄ rɔ̄ de gə̄ kə́ nin̄ i Jipə aĺ gə̄ tə́ ní

¹⁷ m̄-tél m-āw̄ gogə́ Jerusalem, ba dan ń m̄-ndi m-ā m̄-ndɔ̄ȳ kem kújə yā Kɔ́ɔ̄ɓē tə́ anī, m-á̰á̰ yá̰á̰ kógə̄ḿ.

¹⁸ Anī m-á̰á̰ Kɔ́ɔ̄ɓē loo kɔr̄ najə̄ tə́ seḿ, ni-ədam̄ na kə m̄-lōō kɔr̄ bā̰ā̰ ba kə m̄-teē kɔ̄ɔ́ láẃ kem ɓē kə́ Jerusalem tə́, tɔdɔ̄ de kə́ kemeé gə̄ na a ndigən̄ najə̄ ń m-ā m-ə́da dɔn tə́ ní alé.

¹⁹ Banī mā m̄-tél m-ə́da na: Kɔ́ɔ̄ɓē, nin̄ kɔ́ gə̄ gerə̄n̄ mbak kadə̄ mā m̄-túdə̄ kə̄ kem kújə́ kán̄ naā yā Jipə gə̄ tə́ m-ə́hɔń ngé gə̄ ń taān̄ kemií ní ba m̄-ɓōkə́də́ dəngáyá ō, m-ādə̄ əndan̄də́ ō.

²⁰ Etiyen ń i de kə́ kum tə́ yāí ní, dan ń ɓōkə́n̄ mósən nang tə́ ní, mā i kum tə́ ō. Mā m̄-ndigə najə̄ gō ngé tɔ̄lən gə̄ tə́ ō, m̄-ngɔ̄m̄ kūbə̄ yādə́ gə̄ ō.

²¹ Banī Kɔ́ɔ̄ɓē ədam̄ na: Āw̄ na m-ā m-ə́laī i kə sa̰y, i kə̄ rɔ̄ de gə̄ kə́ nin̄ i Jipə aĺ gə̄ tə́.

Pol nin̄ kə ngol áskar gə̄ kə́ boó

²² Kósə de gə̄ nə̄lə̄n̄ mbīdə́ oōn̄neé najə̄ kɔr̄ Pol bátə́ ugə̄ kum mbang ń ni ədań najə̄ gə̄ ń noō tə́ ní. Ba gō tə́ anī nin̄-ədan̄ kə̄ dɔɔ́ ngá̰ý na: De kə́ tītə̄ ń noō i de kə́ yā kadə̄ ni-ndi dɔ nang tə́ alé! Majə kadə̄ ni-ndi kə kumneé alé! Ī-tɔ̄l̄niī kɔ̄ɔ́!

²³ Dan ń nin̄ a urən̄ i kɔĺ ō, a tə́nīn̄ i kūbə̄ yādə́ kə́ dɔ madə̄ tə́ gə̄ kɔ̄ɔ́ ō, a ɔyn̄ i bumbə́ru n a tə̄ndā tḭ̄ḭ̄n̄ kə̄ dɔɔ́ ō ní anī,

²⁴ ngol áskar gə̄ kə́ bo adə̄ ndūn kadə̄ aw̄n̄ kə Poló gérgereé ba kə dəjenən̄ najə̄ kə ndéyé kadə̄ kə n-gerə̄ń ké a əgan̄ kɔŕ dɔn tə́ beē i tām̄ rí tə́ wa.

²⁵ A rāān̄ yā laa Pol nang tə́ yā kəndan anī ni-əda ngol áskar kə́ ɓú gə̄ ń ra loo rāā kəla tə́ noō ní na: Ngōn̄ nge ɓē kə́ Rom ń gāngə̄n̄ sarya dɔn tə́ aĺ ɓáý ní adə̄n̄sí ta róbə kadə̄ ə́ndaniī a?

²⁶ Dan ń ngol áskar gə̄ kə́ gō nge kə́ bo tə́ oō beé anī, aw̄ dəje ngolən kə́ bo ní na: Ī-sāā ī-rāā rí? Deē ní i ngōn̄ nge ɓē kə́ Rom!

²⁷ Ngol áskar gə̄ kə́ bo ní reē kə rɔ̄neé rɔ̄ Pol tə́ ba dəjen najə̄ na: Ḭ̄ i ngōn̄ nge ɓē kə́ Rom rɔ̄kum anī ə́dam̄! Pol ndigən əda na: A̰á̰ā̰!

²⁸ Anī ngol áskar gə̄ kə́ bo ní əda na: Mā m-ādə̄ i nar kə́ ngá̰ý n m̄-téləń ngōn̄ nge ɓē kə́ Rom ní. Pol tūr̄ əda yān na: Ba mā ojəmə̄n̄neé i mbée.

²⁹ Anī kə̄ ta jī tə́ noō ngé gə̄ ń a rāān̄ loo kəndan kadə̄ ədań najə̄ kə́ kemən tə́ ní, tḭ̄ḭ̄n̄ naā dɔn tə́ kɔ̄ɔ́. Dan ń ngol áskar gə̄ kə́ bo reē ger̄ kadə̄ Pol i ngōn̄ nge ɓē kə́ Rom, ba ni-adə̄ ndūn adə̄ tṵ́ṵ̄nən̄ kə súĺ ní, ɓōĺ rāān.

Pol ra no ngé sarya kə́ bo gə̄ yā Jipə gə̄ tə́

³⁰ Yá̰a̰ nəkɔ́ bang ń Jipə gə̄ a sə̄lān̄neé gíŕ Pol ní, ngol áskar gə̄ kə́ bo sāā ger̄ kə gōó. Adə̄ teē kə ndɔ̄ kə́ noō anī, adə̄ tútən̄ súĺ gə̄ kɔ̄ɔ́ rɔ̄n tə́, ba əda kadə̄ ngol gə̄ kə́ dɔ ngé tun̄ yá̰a̰ gə̄ tə́ ō, ngé sarya kə́ bo gə̄ malang ō, kə kánə̄n̄ naā. Gō tə́ anī ni-reē kə Poló əndan̄ nodə́ tə́.