KƏLA RĀĀ 15 - Bibəl ta Sar̄

Ngé kán̄ naā gə̄ kə́ Jerusalem

¹ Anī de kə́rēý gə̄ ḭḭn̄ Jerusalem reē ɔjən̄ ngákó̰ó̰jí gə̄ najə̄ A̰tiyos, ədan̄də́ na: Ré ādī əjan̄ mɔtəsí tītə̄ ń najə̄ yā Moijə ədań ní aĺ anī, ā ásiī kadə̄ ajən̄sí alé.

² Gō najə̄ ngeé ń noō tə́ ní míndə kasə naā aĺ to ō, Pol nin̄ kə Barnabas nējə̄n̄ naā najə̄ kə de gə̄ ní ngá̰ý dɔ najə̄ ní tə́ ō. Anī de gə̄ gḛyn̄ kadə̄ Pol ō, Barnabas ō, de kə́rēý gə̄ kə́ A̰tiyos ō, aw̄n̄ Jerusalem kadə̄ aw̄ ɔrə̄n̄ najə̄ ní kə ngámbang kəla gēé ō, kə kum kɔɔ̄ gēé ō.

³ Adə̄ Egəlijə kə́ A̰tiyos adə̄n̄də́ sádə̄ mbā. Nin̄-əndan̄ gō nang kə́ Penisi ō Samari ō gāngə̄n̄, ba ɔjən̄ loo tūr̄ ń de gə̄ ń i Jipə aĺ gə̄ tūrə̄n̄ rɔ̄də́ kə̄ rɔ̄ Nə́ɓā tə́ ní dɔɔ́ dɔɔ́. Najə̄ ní adə̄ ngákó̰ó̰jí gə̄ malang ń oōn̄ ní rɔ̄nel̄ ngá̰ý.

⁴ Dan ń nin̄-ugə̄n̄ Jerusalem anī Egəlijə ō, ngámbang kəla gə̄ ō, kum kɔɔ̄ gə̄ ō, əhɔn̄də́ kə̄ rɔ̄də́ tə́, ba nin̄-ɔjən̄də́ gotə yá̰a̰ malang ń Nə́ɓā rāā kə ta kūl̄də́ ní.

⁵ Banī ngé taā kem kə́rēý gə̄ kə́ teēn̄ i dan ngé ndóō yá̰a̰ yā Parijiyḛ gə̄ tə́ ḭḭn̄ dɔɔ́ ba ədan̄ na, i gáŕ kadə̄ əjan̄ mɔtə de gə̄ ń i Jipə aĺ gə̄ ní ō, kadə̄ ədan̄də́ kadə̄ ngɔ̄mə̄n̄ ndū najə̄ yā Moijə ō.

⁶ Ngámbang kəla gə̄ ō, kum kɔɔ̄ gə̄ ō, kánə̄n̄ naā yā kəndā ma̰ȳ najə̄ ní.

⁷ Dan ń nin̄-nējə̄n̄ naā najə̄ ngá̰ý anī, Piyer ḭḭ dɔɔ́ ba ədadə́ na: Ngákó̰ó̰ḿ gə̄, ī-gerī majə kadə̄ ta kəla gíŕ tə́ ní Nə́ɓā gə̄rām̄ adə̄ m-ɔ́jə de gə̄ ń i Jipə aĺ gə̄ ní Najə̄ kə́ Majə ɓēé loosí laā adə̄ oōn̄ ō, taān̄ kem ō.

⁸ Ba Nə́ɓā ń i nge ger̄ kem de gə̄ ní ɔjə kə̄ ndágá kadə̄ əhɔdə́ kə̄ rɔ̄n tə́ i kə ta kūl̄ kadə̄də́ Ndíĺ kə́ Táĺ tītə̄ ń ni-adə̄ńjí ní ō.

⁹ Nin̄ ō, jḭḭ̄ ō ní jə-tītī naā ta kum Nə́ɓā tə́. Ni-ɔr̄ majaĺ kə́ kemdə́ tə́ kɔ̄ɔ́ adə̄ kemdə́ unjə̄ njáý njáý i kə ta kūl̄ taā ń nin̄-taān̄ kem ní.

¹⁰ Loo ń noō tə́ ní yá̰á̰ kə́ ɔy ń kaají gə̄ ō, jḭḭ̄ kɔ́ gə̄ ō, j-asiī kətō aĺ ní, ə̄ndāī dɔ ngé taā kem gə̄ tə́ ī-nāāīneé Nə́ɓā i tām̄ rí tə́?

¹¹ Tá jə-taāī kem kadə̄ Kɔ́ɔ̄ɓē Jeju rāā i kem majə sejí n ajəńjí tītə̄ ń ajəńdə́ nin̄ ō ní.

¹² Loo ń noō tə́ ngé kán̄ naā gə̄ malang tél ndin̄ kə tadə́ kə́ mbóó kóńg ō, de gə̄ oōn̄ najə̄ kə́ ta Barnabas tə́ ō, Pol tə́ ō. Nin̄-ənīn̄ gōtə́ yá̰á̰ kə́ to kɔr kum gə̄ malang ō, yá̰á̰ kə́ yáā gə̄ ō ń Nə́ɓā rāā kə ta kūl̄də́ dan de gə̄ ń i Jipə aĺ gə̄ tə́ ní.

¹³ Dan ń nin̄-ɔrə̄n̄ najə̄ oy anī Jakə əda na: Ngákó̰ó̰ḿ gə̄, ōōī najə̄ yāḿ!

¹⁴ Simo̰ ter̄ kemjí dɔ kəndā ń Nə́ɓā əndā kumən gír de gə̄ ń i Jipə aĺ gə̄ tə́ ní. Ni gə̄rā de gə̄ dandə́ tə́ ta kəla gíŕ tə́ kadə̄ nin̄ i gír deē yān gə̄.

¹⁵ Tá najə̄ yā ngé koō ta gə̄ əsō gō naā tə́ kə yá̰á̰ ń noō ō, tɔdɔ̄ i kə́ ndang na:

¹⁶ Gō yá̰a̰ gə̄ ń noō tə́ anī mā Kɔ́ɔ̄ɓē m-ā m̄-tél yā reē, ba kújə yā Dabid ń əsō kɔ̄ɔ́ ní, m-ā m̄-tél yā rāā gogə́ rang ō, loon kə́ tétə̄ nang tə́ gə̄ ní, m-ā m̄-tél yā rāādə́ gogə́ ō, loon kə́ rúgə̄ gə̄ ní, m-ā m̄-tél yā ndájə̄də́ kadə̄ ran̄ súmūú gogə́ ō.

¹⁷ Loo ń noō tə́ gotə de gə̄ a sāān̄ Kɔ́ɔ̄ɓē, naā tə́ kə nápar de gə̄ malang ń rīḿ ɓār̄ dɔdə́ tə́ ní.

¹⁸ Najə̄ ń Kɔ́ɔ̄ɓē əda ní n noó, ni ń i nge rāā kadə̄ gerə̄n̄ yá̰á̰ gə̄ ń toō i jóó ngá̰ý ní.

¹⁹ Adə̄ de gə̄ ń i Jipə aĺ gə̄ ba tūrə̄n̄ rɔ̄də́ kə̄ rɔ̄ Nə́ɓā tə́ ní, mā Jakə m̄-ndigə kadə̄ deē njə́ɓādə́ kə yá̰á̰ kə́ ɔgə̄də́ kaw̄ kum kə̄ kété alé.

²⁰ Banī majə kadə̄ j-əlaī kə makətūbūú j-adīdə́ j-ɔgīneédə́ kəsa dā̰ kə́ yḛr gə̄ ń i dā̰ gə̄ kə́ tɔ̄lə̄n̄ ba tun̄ adə̄n̄ ɓesə̄ gə̄ ní ō, j-ɔgīneédə́ rāā kaya ō, kəsa dā̰ kə́ tūŕ míndə ō, kəsa mósə dā̰ ō.

²¹ Tām̄ əla gír i jóó ngá̰ý bátə́ ɓōólaā n de gə̄ a ɔjən̄ ndū najə̄ yā Moijə kə̄ kem ɓē gə̄ tə́ kógə̄ḿ kógə̄ḿ ō, a tə́dan̄ ndū najə̄ yān kem kújə́ kán̄ naā gə̄ tə́ kə dɔ ndɔ̄ sabat gə̄ malang ō ní.

Makətūbə̄ kə́ ndang adə̄n̄ ngé taā kem gə̄ kə́ nin̄ i Jipə aĺ gə̄

²² Loo ń noō tə́ ngámbang kəla gə̄ ō, kum kɔɔ̄ gə̄ ō, ngé kán̄ naā gə̄ malang ō, ndigən̄ gə̄rā de kə́rēý gə̄ dandə́ tə́ yā kəladə́ A̰tiyos naā tə́ kə Pol nin̄ kə Barnabas. Nin̄-gə̄rān̄ Jud ń a ɓāŕnən̄ na i Barsabas ní ō, Silas ō. Nin̄ i ngé kɔr no de gə̄ dan ngákó̰ó̰də́ gə̄ tə́.

²³ Əlan̄də́ kə makətūbə̄ ń toō, nin̄-ndangən̄ kemeé na: Ngámbang kəla gə̄ ō, kum kɔɔ̄ gə̄ ō, nin̄ ń i ngákó̰ó̰sí gə̄ ní, rāān̄ ngákó̰ó̰də́ kə́ Jipə aĺ gə̄ ń ndin̄ A̰tiyos dɔ nang kə́ Siri tə́ ō, Silisi tə́ ō ní lápə́ya.

²⁴ J-oō kadə̄ na de kə́rēý gə̄ ḭḭn̄ danjí tə́ laā aw̄ nujən̄ kemsí ō, a̰ȳn̄ ndíĺsí ō kə najə̄ kɔr̄də́. Banī jḭḭ j-adə̄də́ ndūjí dɔ yá̰á̰ kógə̄ḿ tə́ tū najə̄ ń noō tə́ aĺ bátə́.

²⁵ I tām̄ najə̄ ń noō tə́ n jḭḭ malang ní kemjí i gō naā tə́ yā gə̄rań de gə̄ kadə̄ j-əladə́ loosí ní. Nin̄ a dānə̄n̄ kó tár yājí gə̄ ń i Barnabas ō Pol ō ní.

²⁶ Nin̄ i de gə̄ kə́ ənīn̄ rɔ̄də́ kɔ̄ɔ́ tām̄ yā rī Kɔ́ɔ̄ɓē yājí Jeju Kərist tə́.

²⁷ Adə̄ j-əla Jud ō, Silas ō, kadə̄ aw̄ ədan̄sí najə̄ gə̄ ń jə-ndang ní kə tadə́ ɓáý to̰.

²⁸ Tɔdɔ̄ Ndíĺ kə́ Táĺ ō, jḭḭ kɔ́ gə̄ ō ní, jə-ndigə kəndā yá̰á̰ kə́ ɔy kə́ rang dɔsí tə́ alé, ba i yá̰á̰ gə̄ ń toō ń i yá̰á̰ kə́ majə kadə̄ yā rāādə́ gə̄ ní tá ngóy:

²⁹ Dā̰ kə́ tɔ̄l̄ ba tun̄ kadə̄ ɓesə̄ gə̄ ní, ī-lōōī kəsa ō, ī-lōōī kəsa mósə dā̰ ō, kəsa dā̰ kə́ tūŕ míndə ō, ī-lōōī sāā naā loo kaya tə́ ō. Ré ī-ngɔ̄mī rɔ̄sí dɔ yá̰a̰ gə̄ ń noō tə́ anī, ī-rāāī i yá̰á̰ kə́ majə. Ī-ndiī lápə́ya!

^30-31 Loo ń noō tə́ nin̄-əya̰n̄ ngé gə̄ ń nin̄-əlan̄də́ ní adə̄ aw̄n̄. Ba dan ń nin̄-aw̄ ugə̄n̄ A̰tiyos á ɔsən̄ dɔ ngé taā kem gə̄ naā tə́ ba adə̄n̄də́ makətūbə̄ ní anī, najə̄ kə́ kemeé adə̄ de gə̄ malang tɔ́gə, adə̄ rɔ̄ de gə̄ malang nel̄də́ ngá̰ý.

³² Jud ō, Silas ō ń nin̄ i ngé koō ta gə̄ ní, ɔrə̄n̄ najə̄ kə ngákó̰ó̰də́ gēé dan i ngá̰ý. Mbūsə̄n̄neédə́ ō, adə̄n̄neédə́ tɔ́gə ō.

³³ Nin̄-rāān̄ ndɔ̄ oy tām̄ loo ngeé ń noō tə́. Gō tə́ anī ngákó̰ó̰də́ gə̄ ndə̄ngān̄ kadə̄ ta téĺdə́ ta kaw̄ kə̄ gogə́ rɔ̄ ngé gə̄ ń əlan̄də́ ní tə́ i kə kem kə́ sɔl̄ lɔmɔɔ́ ō, nin̄-əya̰n̄də́ adə̄ tél aw̄n̄ gogə́ ō.

³⁴ Banī Silas ndigə ndi noó.

³⁵ Ba Pol nin̄ kə Barnabas tá ndin̄ A̰tiyos. Nin̄-ndóōn̄ de gə̄ yá̰a̰ ō, ɔjən̄ de gə̄ Najə̄ kə́ Majə yā Kɔ́ɔ̄ɓē ō, de kə́ rang gə̄ ngá̰ý i sedə́ ō.

Pol nin̄ kə Barnabas əya̰n̄ naā

³⁶ Gō tə́ rāā ndɔ̄ oy tām̄ anī, Pol əda Barnabas na: Ādə̄ jə-tél j-aw̄ jə-go̰ō̰ ngákó̰ó̰jí gə̄ kə́ kem ɓē gə̄ malang ń j-ɔjə najə̄ yā Kɔ́ɔ̄ɓē tū tə́ ní. Loo ń noō tə́ j-a j-a̰a̰də́ ké ndin̄ i ba̰ý wa.

³⁷ Barnabas ndigə kun Ja̰a̰ ń rīn kə́ ko̰ jōó na i Mark ní kadə̄ aw̄ sedə́ ō.

³⁸ Ba Pol gír̄ kadə̄ kə aw̄ sedə́ alé, tām̄ i de kə́ əya̰də́ kɔ̄ɔ́ kété dɔ nang kə́ Pampili tə́ ba aw̄ kəla sedə́ alé.

³⁹ Mbātə́ najə̄ gō naā tə́ yādə́ ní gō reē ngan̄g ngá̰ý adə̄ nin̄-əya̰n̄ naā. Ta anī Barnabas gə̄rā Mark kadə̄ aw̄ unən̄ to bo ta kaw̄ kə̄ dor̄ kə́ Sipər tə́ ō,

⁴⁰ Pol gə̄rā yān i Silas ō. Dan ń ngákó̰ó̰jí gə̄ ndɔ̄ȳn̄ Kɔ́ɔ̄ɓē tām̄ yā Pol tə́ kadə̄ rāā kem majə seneé oy anī, Pol aw̄ kaā yān ō.

⁴¹ Ni ənda dɔ nang kə́ Siri ō, kə́ Silisi ō gān̄g. Ni mbūsə̄ de gə̄ kə́ kem Egəlijə gə̄ tə́ adə̄ ran̄ ngan̄g dɔ taā kem yādə́ tə́ ō.