KƏLA RĀĀ 12 - Bibəl ta Sar̄

Tɔ̄lə̄n̄ Jakə ō, əhɔn̄ Piyer ō

¹ Dan ngeé ń noō tə́ ní mban̄g Herod udə kə̄ rɔ̄ rāā ngé kán̄ naā kə́rēý gə̄ yá̰á̰ kə́ tōr̄ tə́.

² Ni-adə̄ tɔ̄lə̄n̄ Jakə kə́ ngōkó̰o̰ Ja̰a̰ kə kaskaraá.

³ Ba dan ń ni-a̰ā̰ kadə̄ nel̄ Jipə gə̄ anī, ni-adə̄ ndūn kadə̄ əhɔn̄ Piyer ō. I kem ndɔ̄ gə̄ ń a rāān̄neé nāā yā mápá kə́ kanjə̄ kaa mápá tə́ ní.

⁴ Ni əhɔ Piyer ənīn dəngáyá ba əndā gír ɓūtə̄ áskar gə̄ sɔ́ tan tə́. Áskar gə̄ kə́ kem ɓūtə̄ gə̄ ní tə́ i deē sɔ́sɔ́ kə dɔ ɓūtə̄ gēé. Ni gír̄ teē seneé ndágá yā gān̄g sarya dɔn tə́ ta kum kósə de gə̄ tə́ i gō ndɔ̄ nāā Pákə tə́.

⁵ Adə̄ Piyer i kújə dəngáyá, banī ngé kán̄ naā gə̄ ndɔ̄ȳn̄ Nə́ɓā kə nja ngárāá tām̄ yān tə́.

Ɔrə̄n̄ Piyer dəngáyá

⁶ Ndɔ̄ɔ́ ndɔ̄ ń kadə̄ teē a Herod a aw̄ kə Piyeré loo sarya tə́ ní, Piyer to a ɓīī i mbənā áskar gə̄ tə́ jōó. Do̰ō̰nən̄ kə súĺ jōó, ba ngé ngɔ̄m̄ loo gə̄ ran̄ ta kújə́ tə́ a ngɔ̄mə̄n̄ loo.

⁷ Anī de kə́ dɔ rā̰ tə́ yā Kɔ́ɔ̄ɓē teē rétə́ ō, loo unjə̄ kow kem kújə dəngáyá ō. De kə́ dɔ rā̰ tə́ ní ɔdə kadə Piyer ndól̄nń ba ədan na kə ḭḭ dɔɔ́ láẃ. Loo ń noō tə́ súĺ gə̄ kə́ jī Piyer tə́ téē tə́sōn̄ kɔ̄ɔ́.

⁸ Gō tə́ anī de kə́ dɔ rā̰ tə́ ní ədan na kə do̰ō̰ ɓōdə̄n ō, kə tə́la sākə̄rā yān gə̄ njan tə́ ō. Piyer rāā tītə̄ ń noō. Anī de kə́ dɔ rā̰ tə́ ní ədan ɓáý to̰ na kə əla kūbə̄ kūl̄ yān rɔ̄n tə́ ba kə un gōn.

⁹ Piyer teē ndágá ba un gōn. Yá̰á̰ ń de kə́ dɔ rā̰ tə́ rāā ní, ni-ger̄ kadə̄ i yá̰á̰ kə́ rɔ̄kum alé. Ni ɔjəń na i yá̰a̰ n na ndɔ̄wn adə̄ n-a̰ā̰ ní.

¹⁰ Nin̄-mānə̄n̄ dɔ ɓūtə̄ áskar gə̄ kə́ ta kəga dɔ tə́ ō, dɔ nge kə́ ko̰ jōó tə́ ō, ba aw̄ ugə̄n̄ ta róbə́ kə́ rāā kə gindīí ń teē kem ɓēé ní tə́. Anī ta róbə́ ní teē dɔ rɔ̄n nodə́ tə́. Nin̄-teēn̄ ndágá ba njə̄rān̄ kum róbə kɔsə tə́ anī, de kə́ dɔ rā̰ tə́ ní əya̰ Piyer ba aw̄ kɔ̄ɔ́ kə̄ ta jīī tə́ noō.

¹¹ Loo ń noō tə́ ndíĺ Piyer tél reē rɔ̄n tə́ adə̄ a̰a̰ yá̰á̰ ń rāā yá̰á̰ ní ger̄ tā, adə̄ əda na: Ń toō m̄-ger̄ kadə̄ rɔ̄kum Kɔ́ɔ̄ɓē əla de kə́ dɔ rā̰ tə́ yān adə̄ reē ɔrə̄m̄ kɔ̄ɔ́ jī Herod tə́ ō, ta yá̰a̰ gə̄ malang ń Jipə gə̄ númə̄n̄ rāā seḿ ní tə́ ō.

¹² Ni-ra gír̄ yá̰á̰ kíndíńg, ba ɔtə aw̄ ɓē Mari kó̰o̰ Ja̰a̰ ń rī tɔ̄yn na i Mark ní tə́. De gə̄ ngá̰ý kánə̄n̄ naā looneé a ndɔ̄ȳn̄ Nə́ɓā.

¹³ Dan ń ni-ənda ta loo anī, nge kəla kə́ dəyá̰ kógə̄ḿ kə́ rīn na i Rodə reē teē ta loo tə́.

¹⁴ Ni ger̄ ndū Piyer tā, ba rɔ̄nel̄ asən nák adə̄ teē ta róbə alé, ba tél aw̄ gogə́ kemeé kə ngɔ̄dɔ̄ɔ́ aw̄ əda na Piyer na ra ndágá ta róbə́ tə́ noō.

¹⁵ Nin̄-ədanən̄ na i kɔ̄r̄ n na a rāān. Banī ni-əhɔ tan ngan̄g əda na i rɔ̄kum, anī nin̄-ədanən̄ na i de kə́ dɔ rā̰ tə́ yā Piyer.

¹⁶ Banī Piyer na̰y kə̄ loo kənda ta loo tə́. Dan ń teēn̄ ta loo á a̰a̰n̄ kadə̄ i Piyer anī ɔr kumdə́ ngá̰ý.

¹⁷ Ni wél̄ jīn ɔgə̄ńdə́ kɔr̄ najə̄, ba ɔjədə́ loo kɔr̄ ń Kɔ́ɔ̄ɓē ɔrə̄n dəngáyá ní. Ni ədadə́ ɓáý to̰ na kə aw̄ kə ədan̄ Jakə gotə ō, ngákó̰ó̰də́ kə́ rang gə̄ ō. Gō tə́ anī ni-teē aw̄ loo kə́ rang tə́.

¹⁸ Dan ń loo tīī anī áskar gə̄ a̰a̰n̄ woy woy, nin̄-dəjen̄ na ké Piyer tél i rí kɔ̄ɔ́ wa.

¹⁹ Herod adə̄ ndəlenən̄, banī ndəlenən̄ sétə́ deē əngen alé. Loo ń noō tə́ adə̄ dəjen̄ ngé ngɔ̄m̄ loo gə̄ najə̄ ba adə̄ ndūn kadə̄ tɔ̄lə̄n̄də́ kɔ̄ɔ́. Gō tə́ anī Herod ḭḭ dɔ nang kə́ Jude tə́ aw̄ ndi kem ɓē kə́ Sejare tə́ sḛ́ý.

Mban̄g Herod oy

²⁰ Wōn̄g rāā Herod ngá̰ý kə de kə́ Tir gə̄ ō, kə de kə́ Sidon gə̄ ō. Nin̄-ɓōkə́n̄ ndūdə́ gō naā tə́ yā kaw̄ kənge Herod. Dan ń tūrə̄n̄ kem Blastus ń i pajā yā mban̄g ní adə̄ ndigə najə̄ gōdə́ tə́ oy anī, aw̄ əngen̄ Herod ba dəjenən̄ kadə̄ kə rɔ̄ɔ̄də́ alé, ba kadə̄ kə n-ndin̄ lápə́ya kə naá. Tɔdɔ̄ yá̰á̰ ń ndoōn rāādə́ gō nang yādə́ tə́ ní, nin̄ a aw̄ a ɔyn̄ i kem ɓē ko̰o̰ yā mban̄g tə́ n a reēn̄neé ní.

²¹ Ndɔ̄ ń Herod gān̄g ní asə, anī ni-o̰ō̰ kūbə̄ mban̄g ō, ndi dɔ kōr̄ kāgə̄ mbang tə́ ō, ba ɔr̄ najə̄ sedə́ ɓoo ɓoo.

²² Anī kósə de gə̄ əgan̄ kɔŕ ədan̄ na: I nə́ɓā kógə̄ḿ n a ɔr̄ najə̄ ba i deē ndul alé!

²³ Dan nəkɔ́ ń noō tə́ bang ɓáa de kə́ dɔ rā̰ tə́ yā Kɔ́ɔ̄ɓē əndan. Tām̄ dan ń de gə̄ ɔsən̄ gɔn Nə́ɓā ní, ni-tél kə kɔsə gɔn ní adə̄ Nə́ɓā alé, ba ngɔ̄m̄ i tām̄ yān nəkɔ́ tə́. Loo ń noō tə́ kur̄ gə̄ əsanən̄ adə̄ oy.

²⁴ Dan ngeé ń noō tə́ ní najə̄ yā Nə́ɓā a ḭḭ i kə gidəneé ō, a taā i loo kum kə̄ kété kété ō.

²⁵ Dan ń Barnabas nin̄ kə Sol tɔ̄lə̄n̄ ta kəla ń əlan̄də́ ní kem ɓē kə́ Jerusalem tə́ anī, télən̄ dɔ tə́ ta kaw̄ gogə́, ba unən̄ Ja̰a̰ ń rī tɔ̄yn na i Mark ní kadə̄ aw̄ sedə́.