JONAS 4 - Bibəl ta Sar̄

Jonas oō gíŕ yá̰á̰ ń rāā yá̰á̰ á Nə́ɓā a̰a̰ń kum tō ndoō yā de kə́ Ninibə gə̄ ní

¹ Rɔ̄ Jonas nelə̄n aĺ bátə́, kə́ rɔ̄kum tə́, rɔ̄n nelə̄n aĺ bátə́. Ni-rāā wōn̄g.

² Ni ndɔ̄ȳ Kɔ́ɔ̄ɓē tītə̄ ń toō beé əda na: Ha̰, Kɔ́ɔ̄ɓē, m̄-ger̄ majə i dan ń mā i kem ɓē yāḿ tə́ nú ɓáý ní. m̄-ger̄ kadə̄ ḭ̄ i de kə́ majə ngá̰ý ō, kumií o̰ō̰ī ngá̰ý ō, ḭ̄ i de kə́ nge tə́gā taí dɔ deē tə́ ō, ḭ̄ i de kə́ táŕ ngá̰ý ō, ré ə́la ɓōĺ kem deē tə́ anī, ī-tél ā ī-ndə̄ngā rɔ̄í ō.

³ Kɔ́ɔ̄ɓē, ngɔlaā ní ə́ya̰m̄ ādə̄ m-óy. A̰á̰ā̰, m̄-gḛy i yo ba i ndi kə kumuú alé.

⁴ Kɔ́ɔ̄ɓē tūr̄ əda Jonas na: Wōn̄g ń ī-rāā ní, najə̄ i yāí a?

⁵ Jonas teē kɔ̄ɔ́ kem ɓēé, ba aw̄ dəba loo ń deē ra Ninibə anī i kə̄ dām̄ kə́ gír ɓē tə́ ní. Ni-rāā ndíĺ kógə̄ḿ ba ndi gírí loo ngeé ń noō tə́. Ni sāā ka̰a̰ yá̰á̰ ń a rāā yā rāā yá̰a̰ kem ɓēé ní.

⁶ Loo ń noō tə́ Kɔ́ɔ̄ɓē Nə́ɓā rāā adə̄ kāgə̄ kógə̄ḿ əɓa nang tə́, ba tɔgə tɔȳ dɔ Jonas yā kadə̄ ni-əngeń ndíl ō, kadə̄ gír rɔ̄nelāĺ yān gāngəń ō. Rɔ̄ Jonas nelə̄n ngá̰ý najə̄ yā kāgə̄ ní tə́.

⁷ Banī teē kə ndɔ̄ kə́ noō anī, kété pá tá kadə̄ mbang əɓa ní, Nə́ɓā əla kur̄ kógə̄ḿ adə̄ reē əsa kāgə̄ ní adə̄ oy.

⁸ Ba dan ń mbang ḭḭ kə̄ dɔɔ́ anī, Nə́ɓā rāā adə̄ néĺ kógə̄ḿ kə́ təngā kə́ dūn̄ ɓē tə́ əla ō, mbang ɔsə dɔ Jonas ō, adə̄ na i ngɔr kadə̄ ni sitə̄ kɔ̄ɔ́. Loo ń noō tə́ Jonas ndə̄ngā yo, ni-əda na: m̄-gḛy i yo banī i ndi kə kumuú alé.

⁹ Nə́ɓā dəje Jonas na ké wōn̄g ń ni-rāā tām̄ yā kāgə̄ tə́ ní ké i gōtə́ wa. Anī Jonas tél ədan na: A̰á̰ā̰, m̄-rāā wōn̄g i gōtə́ ō, m̄-ndə̄ngā yo i gōtə́ ō!

¹⁰ Kɔ́ɔ̄ɓē ədan na: Kāgə̄ ń toō ń ḭ̄ ī-rāā kəlan aĺ ō, ī-rāān adə̄ əɓa dɔ nang tə́ aĺ ō ní, kumií ḭ̄ o̰o̰ī tām̄ yān tə́. Ni tɔgə ndɔ̄ɔ́ ndɔ̄ kógə̄ḿ ō, oy ndɔ̄ɔ́ ndɔ̄ kógə̄ḿ ō.

¹¹ Ba ɓē kə́ Ninibə ń de kə́ kemeé gə̄ kə́ mānə̄n̄ 120 000 ń noō, gerə̄n̄ yá̰á̰ kə́ majə tām̄ yādə́ tə́ aĺ ō, dā̰ gə̄ i ngá̰ý kemeé ō ní, kə mā kə kumḿ kə o̰o̰m̄ tām̄ yān tə́ aĺ a?