JONAS 3 - Bibəl ta Sar̄

Jonas ɔjə najə̄ kem ɓē kə́ Ninibə tə́

¹ Kɔ́ɔ̄ɓē əda Jonas nja kə́ nge ko̰ jōó na:

² Ḭ́ḭ dɔɔ́ āw̄ ɓē bo kə́ Ninibə tə́. Ə́dan najə̄ ń m-ə̄ndā taí tə́ ní.

³ Anī Jonas ḭḭ dɔɔ́. Ni-aw̄ tā, ba kə́ ɓōó ń toō ɓáa, aw̄ i Ninibə, tītə̄ ń Kɔ́ɔ̄ɓē mēr̄nəń ní. Ninibə i ɓē bo kógə̄ḿ kə́ bo to ɓōĺ ngá̰ý. Deē a njə̄rā i ndɔ̄ mətá tá a ənda kemən a ngān̄g.

⁴ Jonas udə kem ɓēé. Ni-njə̄rā ndɔ̄ kógə̄ḿ kə taá. Ni-əda de gə̄ na: Na̰y i ndɔ̄ kutə sɔ́ yā kadə̄ a nujən̄ ɓē kə́ Ninibə kɔ̄ɔ́!

⁵ De kə́ Ninibə gə̄ taān̄ kem najə̄ yā Nə́ɓā kə̄ ta jī tə́ noō. Nin̄-*ndin̄ ɓō tām̄ yā Nə́ɓā tə́. Ngé kənge yá̰a̰ gə̄ gə̄gē, ngé ndoō gə̄ gə̄gē, nin̄ o̰ō̰n̄ kūbə̄ kəhɔ ndoō.

⁶ Mban̄g kə́ Ninibə oō kōō yá̰á̰ ní. Anī ni-ḭḭ kɔ̄ɔ́ dɔ kōr̄ kāgə̄ mbang yān tə́. Ni-ɔr̄ kūbə̄ mban̄g kə́ rɔ̄n tə́ kɔ̄ɔ́, ba əla kūbə̄ kəhɔ ndoō rɔ̄n tə́ ō, ndi kum bū tə́ ō.

⁷ Gō tə́ anī, mban̄g nin̄ kə de kə́ bo yān gēé ədan̄ de gə̄ na: Ə́daī yá̰á̰ kə́ ndang kadə̄ yā rāā ń toō kə ndū mbērēé kem ɓēé: De gə̄ ō, dā̰ gə̄ ō, man̄g gə̄ ō, batə̄ gə̄ ō, bə̄yā̰ gə̄ ō ní, ɔgə̄n̄də́ kəsa yá̰a̰ ō, ka̰ȳ man̄ ō!

⁸ Majə kadə̄ de gə̄ malang o̰ō̰n̄ kūbə̄ kəhɔ ndoō, de gə̄ ō, dā̰ gə̄ ō! Majə kadə̄ de gə̄ kógə̄ḿ kógə̄ḿ əgan̄ kɔŕ kə̄ dɔ Nə́ɓā tə́ kə tɔ́gə́də́ gēé malang. Majə kadə̄ de gə̄ kógə̄ḿ kógə̄ḿ əya̰n̄ háĺdə́ kə́ majaĺ kɔ̄ɔ́ ō, dəban̄ ta yá̰á̰ kə́ rāā kə dɔ́nɔ́ kɔ̄ɔ́ ō.

⁹ I náa n ger̄? Majanī Nə́ɓā a lōō gíŕ yá̰á̰ ń ní sāā rāā tə́ ní kɔ̄ɔ́. Ni a əya̰ gō wōn̄g ń rāān dɔjí tə́ ní kɔ̄ɔ́, adə̄ j-a j-oyiī alé.

¹⁰ Kəhɔ ń nin̄ əhɔn̄ rɔ̄də́ tɔgə yā kəya̰ háĺdə́ kə́ majaĺ kɔ̄ɔ́ ní, Nə́ɓā a̰ā̰. Adə̄ ni-lōō gíŕ yá̰á̰ ń sāā rāā tə́ ní. Ni ndə̄ngā rɔ̄n najə̄ yá̰á̰ kə́ majaĺ ń sāā rāā sedə́ tə́ ní, adə̄ rāādə́ yá̰á̰ kə́ majaĺ ní alé.