JONAS 2 - Bibəl ta Sar̄

Jonas ndɔ̄ȳ Kɔ́ɔ̄ɓē

¹ Kɔ́ɔ̄ɓē əla kānjə̄ kógə̄ḿ kə́ bo adə̄ reē ur Jonas. Jonas rāā ndɔ̄ mətá kem kānjə̄ ní tə́.

² Jonas to kem kānjə̄ tə́ ndɔ̄yń Kɔ́ɔ̄ɓē Nə́ɓā yān.

³ Ni-əda na: Kumḿ tō ndoō ngá̰ý. Adə̄ m-ə́ga kɔŕ dɔí ḭ̄ Kɔ́ɔ̄ɓē tə́, anī ḭ̄ ī-ndigəm̄. m̄-to kem bəlo kə́ lú ngá̰ý yā yo tə́ m̄-ɓārə́nń yá̰a̰ kadə̄ deē dḭḭ̄m̄, anī ḭ̄ ōō ndūḿ.

⁴ Ḭ̄ ə̄nīm̄ kem bəlo kə́ ɗúú ngá̰ý tə́ dan ɓūl̄ bā bo tə́ ō, man̄ gīr̄ gidəḿ ō. Ɓəngál man̄ yāí gə̄ malang ō, man̄ yāí malang ō, reēn̄ dɔḿ tə́.

⁵ Ba mā m-ə́da na: Ḭ̄ ī-tə̄ɓām̄ kɔ̄ɔ́ ta kumií tə́, adə̄ mā i sa̰y rɔ̄í tə́. Ɓá tā banī, m̄-ndigə tél ka̰a̰ kújə́ yāí kə́ táĺ.

⁶ Man̄ ugə̄ míndə́ḿ tə́. Bā bo gīr̄ gidəḿ. Mu gə̄ ɓírə̄n̄ dɔḿ.

⁷ m̄-risə bátə́ m-ūgə̄ nja mbal̄ bo gə̄ tə́ nang tə́. Mā i ɓádá, dan de kə́ koy gə̄ tə́. Utə̄n̄ ta róbə gə̄ kə lakélé gāngə̄n̄neé gírə́ḿ, kə́ njɔ́ḿ gə̄ tə́. Banī ḭ̄ Kɔ́ɔ̄ɓē Nə́ɓā yāḿ ī-teē seḿ kɔ̄ɔ́ bəlo kə́ lú ngá̰ý ń toō tə́ kə kumḿ.

⁸ Kɔ́ɔ̄ɓē Nə́ɓā yāḿ, m-ā m-óy ngɔr. Loo ń noō tə́ əga kemḿ dɔí ḭ̄ Kɔ́ɔ̄ɓē tə́ ō, ndɔ̄ȳ yāḿ ḭḭ kum kə̄ dɔɔ́ aw̄ ugə̄ rɔ̄í tə́ kem kújə́ kə́ táĺ yāí tə́ ō.

⁹ Ngé ndɔ̄ȳ nə́ɓā kə́ rɔ̄kum aĺ gə̄ ní, əngen̄ ta róbə́ kə́ yā kadə̄ ajən̄neédə́ alé.

¹⁰ Banī mā m-ā m-ə̄nī pā yā ɓōkíīneé tɔ̄ȳ. M-ā m̄-ndējī yá̰á̰ kə́ tun̄ gə̄. M-ā m̄-rāā yá̰a̰ gə̄ ń m-ə̄nī ndūḿ m-ādī najə̄n tə́ ní. A̰á̰ā̰, Kɔ́ɔ̄ɓē, i ḭ̄ n i nge kajə deē ní!

¹¹ Loo ń noō tə́ Kɔ́ɔ̄ɓē əda kānjə̄ na: Ī-tɔ̄mbə̄ Jonas kɔ̄ɔ́ ndágá dɔ nang tə́! Anī kānjə̄ oō ta Kɔ́ɔ̄ɓē kə̄ ta jī tə́ noō, adə̄ rāā yá̰á̰ ń Kɔ́ɔ̄ɓē əda ní.