JOJUE 5 - Bibəl ta Sar̄

¹ Dan ń ngār gə̄ malang yā Amor gə̄ ń ndin̄ gidə bā Jurdḛ tə́ kum kə̄ no ɓē tə́ ní ō, ngār gə̄ malang yā Kanaan gə̄ ń ndin̄ kə gō kadə bā boó ní ō, oōn̄ kadə̄ Kɔ́ɔ̄ɓē rāā adə̄ bā Jurdḛ iī kɔ̄ɔ́ no ngán Israel gə̄ tə́ bátə́ adə̄ jə-teēiń bā Jurdḛ anī, kemdə́ gān̄g man̄ adə̄ rɔ̄də́ oy yélélé kɔ̄ɔ́ no ngán Israel gə̄ tə́.

Əjan̄ mɔtə ngán Israel gə̄ Gilgal tə́

² Dan ń ngeé ń nuū tə́ ní, Kɔ́ɔ̄ɓē əda Jojue na: Ī-rāā kəyā mbal̄ ba ə́jań mɔtə ngán Israel kə́ ngɔlaā gə̄ ń toō kɔ̄ɔ́.

³ Anī Jojue rāā kəyā mbal̄ ba əjań mɔtədə́. Ni-əja mɔtədə́ i dɔ ngōn̄ mbal̄ ń a ɓārə́n̄ na i Ngōn̄ Mbal̄ ta mɔtə ní tə́.

⁴ Yá̰á̰ ń rāā yá̰á̰ á Jojue əjań mɔtədə́ ní n toó: Ngán Israel gə̄ malang ń teēn̄ kɔ̄ɔ́ kem ɓē kə́ Ejiptə tə́ ní, kə́ dəngam gə̄ ń i ngé rɔ̄ɔ̄ gə̄ ní oyn̄ kɔ̄ɔ́ dɔ róbə́ tə́ kem dəla loo tə́.

⁵ Nin̄ i de gə̄ kə́ əjan̄ mɔtədə́ kɔ̄ɔ́, ba ngán Israel kə́ dəngam gə̄ malang ń ojən̄də́ dɔ róbə́ tə́ kem dəla loo tə́ ní, deē əja mɔtədə́ alé. I tām̄ najə̄ ń noō tə́ n Jojue əjań mɔtədə́ ní.

⁶ Ngán Israel gə̄ njə̄rān̄ ɓāl̄ kutə sɔ́ kem dəla loo tə́. Ta tɔ̄l̄ ta anī de gə̄ mang ń teēn̄ kɔ̄ɔ́ kem ɓē kə́ Ejiptə tə́ á nin̄ i ngé rɔ̄ɔ̄ gə̄ ní oyn̄ kɔ̄ɔ́ malang tām̄ oōn̄ ta Kɔ́ɔ̄ɓē alé. Dɔ nang kə́ mba ō, yibə̄ tejə ō, i ngá̰ý tū tə́ ń Kɔ́ɔ̄ɓē ənī ndūn adə̄ kaadə́ gə̄ yā kadə̄jí ní. Kɔ́ɔ̄ɓē túbə kə rɔ̄neé əda na n-a n-əya̰də́ kadə̄ a̰a̰n̄ dɔ nang ní alé,

⁷ ba i ngáńdə́ gə̄ n ni-aw̄ sedə́ dɔ nang ní tə́ kum gotədə́ ní. I ngáńdə́ gə̄ ngeé ń toō n Jojue əja mɔtədə́ ní, tām̄ ta reēdə́ ní deē əja mɔtədə́ róbó alé.

⁸ Dan ń əjan̄ mɔtədə́ malang oy anī, ndin̄ gotə kógə̄ḿ kem gérgereé bátə́ adə̄ do edə̄ń.

⁹ Gō tə́ anī Kɔ́ɔ̄ɓē əda Jojue na: Rɔ̄sɔl̄ ń ḭ́ḭḭ̄ń dɔ nang kə́ Ejiptə tə́ ī-reēiń ní, ɓōólaā m-ɔ̄rən kɔ̄ɔ́ dɔsí tə́. I tām najə̄ ń noō tə́ n bátə́ ɓōólaā gə̄gē a ɓārə́n̄ rī loo ní na i Gilgal ní.

Pákə́ kə́ ta kəga dɔ kə́ dɔ nang kə́ Kanaan tə́

¹⁰ Ngán Israel gə̄ ndin̄ Gilgal. Nin̄ rāān̄ nāā Pákə ndágə loo gə̄ kə́ Jeriko tə́ kə ndɔ̄ nāā kə́ nge ko̰ kutə gidə i sɔ́, ta loo tíbə́ tə́.

¹¹ Teē gidə gō ndɔ̄ Pákə anī əsan̄ mápá kə́ rāā kanjə̄ kaa mápa ō, əsan̄ dɔ kōō kə́ tə́ngā gə̄ ō. Nin̄ rāān̄ yá̰a̰ kəsa gə̄ ń nuū i kə kum kōō kə́ dɔ nang kə́ Kanaan tə́.

¹² Dan ń əsan̄ kum kōō kə́ dɔ nang ní tə́ kɔ̄ɔ́ ɓá ní, teē kə ndɔ̄ kə́ nuū anī gíŕ mána gān̄g kɔ̄ɔ́, ngán Israel gə̄ əngen̄ mána to̰ alé. Kem ɓāl̄ ń nuū tə́ əsan̄ i yá̰á̰ kə́ teē dɔ nang kə́ Kanaan tə́.

Ngol ngé rɔ̄ɔ̄ gə̄ yā Kɔ́ɔ̄ɓē

¹³ Ndɔ̄ kə́rēý tə́ Jojue i kadə ɓē kə́ Jeriko tə́ ngɔr ni-ɔr̄ dɔn dɔɔ́ anī, a̰a̰ deē kógə̄ḿ ra non tə́ kə kaskar kə́ kɔr̄ kɔ̄ɔ́ kem kɔ̄pən tə́ jīn tə́. Jojue aw̄ rɔ̄n tə́ ba dəjen najə̄ əda na: Ḭ̄ i de kə́ dām̄ yājí tə́ aké ḭ̄ i de kə́ dām̄ yā madə̄ ba̰ā̰jí gə̄ tə́?

¹⁴ Deē ní tél ədan na: Mā i de kə́ dām̄ yāsí tə́ aĺ ō, kə́ dām̄ yā madə̄ ba̰ā̰sí gə̄ tə́ aĺ ō. Mā i ngol kósə́ ngé rɔ̄ɔ̄ gə̄ yā Kɔ́ɔ̄ɓē ba m-ūgə̄ i ngɔr ɓáý. Tā anī Jojue əsō sébə kumən nang tə́ rɔȳnneé ba ədan na: Mā i nge kəla yāí, i rí n kə m̄-rāā?

¹⁵ Anī ngol ngé rɔ̄ɔ̄ gə̄ yā Kɔ́ɔ̄ɓē əda Jojue na: Ɔ̄r̄ sākə̄rā kə́ njaí tə́ kɔ̄ɔ́, tām̄ loo ń ī-ra tū tə́ toó i loo kə́ tá. Anī Jojue rāā tītə̄ ń ədanəń ní.