JOJUE 3 - Bibəl ta Sar̄

Israel gə̄ teēn̄ bā Jurdḛ

¹ Jojue nin̄ kə ngán Israel gēé ḭḭn̄ Sitim kə gír looí ɓatə, aw̄ ugə̄n̄ ta bā Jurdḛ tə́. ɓīīn̄ kə̄ ta bā tə́ noō a ngóōnəń kum mbang kə́ yā teēń bā Jurdḛ kə̄ gidə kə́rēý tə́.

² Kə ndɔ̄ kə nge ko̰ mətá anī ngé gə̄ ń i ngé ndóō ngán Israel gə̄ ndū najə̄ ní njə̄rān̄ mbo̰ō̰ de gə̄ tə́ kem gérgereé,

³ ba ədan̄də́ na: Ré á̰a̰ī ngán Lebi kə́ ngé tun̄ yá̰a̰ gə̄ a ətōn̄ sandúkə madə̄ naā yā Kɔ́ɔ̄ɓē Nə́ɓā yāsí a aw̄n̄neé anī, ḭ́ḭḭ̄ kɔ̄ɔ́ loo ń ī-ndiī tū tə́ tə́ ní ba úniī gōdə́.

⁴ I beé n ā ī-gerīiń róbə́ kə́ yā kun ní, tɔdɔ̄ sḭḭ̄ úniī róbə́ ń toō kété aĺ ɓáý, ɓá tā ba ādī dɔ dáńsí to asə kilometər kógə̄ḿ kə sandúkə madə̄ naā ní, ba ī-lōōī njə̄rā gō tə́ ngɔr.

⁵ Gō tə́ anī Jojue əda gír de gə̄ na: Ɔ̄rī kam̄sí tām̄ yā Nə́ɓā tə́ ādə̄ majaĺ gətóo dɔ dáńsí tə́, tɔdɔ̄ bírí anī Kɔ́ɔ̄ɓē a rāā yá̰á̰ kə́ kɔr kum gə̄ dɔ dáńsí tə́.

⁶ Teē kə ndɔ̄ kə́ noō anī, ni-əda ngé tun̄ yá̰a̰ gə̄ kadə̄ unən̄ sandúkə madə̄ naā ba kə mānə̄n̄ kété no de gə̄ tə́. Anī nin̄ rāān̄ tītə̄ ń Jojue ədańdə́ ní, adə̄ unən̄ sandúkə madə̄ naā ba mānə̄n̄ kété no de gə̄ tə́.

⁷ Kɔ́ɔ̄ɓē əda Jojue na: Ɓōólaā m-ā m-ə́lá gír rāā kadə̄ ī-tél de kə́ bo ta kum ngán Israel gə̄ tə́ malang, kadə̄ gerə̄n̄ na mā i seí naā tə́ tītə̄ ń kété mā i naā tə́ kə Moijə ní.

⁸ Ba ə́dá ngé tun̄ yá̰a̰ gə̄ ń a ətōn̄ sandúkə madə̄ naā ní kadə̄ udən̄ kum man̄ Jurdḛ tə́ anī, dəba ran̄ gotə kógə̄ḿ.

⁹ Jojue əda ngán Israel gə̄ na: Ī-ndɔ́tī kə̄ ngɔr ōōīń najə̄ gə̄ ń Kɔ́ɔ̄ɓē Nə́ɓā yāsí əda ní.

¹⁰ Ā ī-gerī kadə̄ Nə́ɓā kə́ kə kumuúi dɔ dáńsí tə́ ō, kadə̄ ni a tə̄ɓā Kanaan gə̄ ō, Het gə̄ ō, Hibi gə̄ ō, Periji gə̄ ō, Girgas gə̄ ō, Amor gə̄ ō, Yebus gə̄ kɔ̄ɔ́ nosí tə́ i kə ta kūl̄ yá̰á̰ ń toō:

¹¹ Sandúkə madə̄ naā yā Kɔ́ɔ̄ɓē ń i kɔ́ɔ̄ dɔ nang malang ní, a teē bā Jurdḛ kété nosí tə́.

¹² Ī-gə̄rāī de gə̄ kutə gidə i jōó dɔ dáńsí tə́, de gə̄ kógə̄ḿ kógə̄ḿ kə dɔ gír ɓē gēé.

¹³ Loo ń ré ngé tun̄ yá̰a̰ gə̄ ń a ətōn̄ sandúkə madə̄ naā yā Kɔ́ɔ̄ɓē ń i kɔ́ɔ̄ dɔ nang malang ní a əndān̄ njadə́ kum bā Jurdḛ tə́ anī, bā Jurdḛ a gān̄g danaá jōó: Man̄ ń a ḭḭ dām̄ loo kə́ kḭḭ kə̄ dɔɔ́ tə́ á nūgə́ kum kə̄ dām̄ loo kə́ risə kə̄ nang tə́ tə́ ní, a tél yā kán̄ naā loo kógə̄ḿ tītə̄ kə́ deē gān̄g gírən i kə babəraá beé.

¹⁴ Dan ń gír de gə̄ ḭḭn̄ kɔ̄ɔ́ loo ndidə́ gə̄ tə́ yā teē bā Jurdḛ anī, ngé kətō sandúkə madə̄ naā ń i ngé tun̄ yá̰a̰ gə̄ ní, njə̄rān̄ nodə́ tə́ kété.

¹⁵ I dan yā sāā kōō gə̄ tə́ n bā Jurdḛ a ḭḭń ngá̰ý adə̄ a taāń loo ní. Dan nəkɔ́ ń ngé tun̄ yá̰a̰ gə̄ ń i ngé kətō sandúkə madə̄ naā gə̄ əlan̄ njadə́ kə̄ kum man̄ tə́ ta gógə́ tə́ anī,

¹⁶ bā lōō gír nūgə́ tə́ ba dəba tītə̄ kə́ deē gān̄g gírən i kə babəraá. Man̄ dəba i sa̰y, ɓē ń rīn na i Dam ní tə́, kadə Sartan tə́, ba dāmə̄n ń a nūgə́ kum kə̄ bā katə̄ kə́ Araba tə́ ní gətóo kɔ̄ɔ́ malang, loo ń noō tə́ gír de gə̄ teēn̄ bā Jurdḛ kə̄ gidə kə́rēý tə́, teēn̄ i loo ń ra sɔɔ̄n̄ ta naā kə ɓē kə́ Jeriko ní tə́.

¹⁷ Ngé tun̄ yá̰a̰ gə̄ ń ətōn̄ sandúkə madə̄ naā yā Kɔ́ɔ̄ɓē ní, dəba ran̄ gotə kógə̄ḿ dan bāá loo kə́ tutə tə́, bátə́ adə̄ ngán Israel gə̄ mānə̄nəń malang kə̄ gidə kə́rēý tə́ kanjə̄ kadə̄ man̄ ɔdə njadə́.