JOJUE 17 - Bibəl ta Sar̄

¹ De kə́ gír ɓē yā Manase tə́ gə̄ əngen̄ dɔ nang yādə́ ō. Manase i hágə Jəjep. Makir ń i go̰ rɔ̄ɔ̄ ō, ni i hágə Manase ō, bɔbə̄ Galaad ō ní, ənge dɔ nang kə́ Galaad ō, dɔ nang kə́ Basan ō, kɔ̄ɔ́ ɓá.

² Gotə ngán Manase gə̄ əngen̄ dɔ nang kə gír kaadə́ gēé. Gír kaa gə̄ ń adə̄n̄də́ dɔ nang ní i gír kaa yā Abiejer ō, Helek ō, Asriel ō, Sekem ō, Heper ō, Semida ō. Manase kə́ ngōn̄ Jəjep ní, ngánən kə́ dəngam gə̄ malang n nuú kə gír kaadə́ gēé.

³ Selopad kə́ ngōn̄ Heper, kə́ ngōn̄ Galaad, kə́ ngōn̄ Makir, kə́ ngōn̄ Manase ojə ngōn̄ ké dəngam alé, ba ojə i ngán kə́ dəyá̰ gə̄ Rī ngánən kə́ dəyá̰ gə̄ ní n toó: Mala ō, Noa ō, Hogəla ō, Milka ō, Tirsa ō.

⁴ Ngán kə́ dəyá̰ gə̄ ní aw̄ əngen̄ nge tun̄ yá̰á̰ ń i Eleajar ní ō, Jojue ngōn̄ Nun ō, ngāgəra dɔ ngán Israel gə̄ ō, ba ədan̄də́ na: Kɔ́ɔ̄ɓē əda Moijə kadə̄ ādə̄jí dɔ nang dɔ dáń ngákó̰ó̰jí kə́ dəngam gə̄ tə́. Adə̄ tītə̄ nəkɔ́ ń Kɔ́ɔ̄ɓē ədań ní, adə̄n̄ ngáń kə́ dəyá̰ gə̄ ní dɔ nang gə̄ dɔ dáń ngágó̰o̰ bɔbə̄ kojədə́ tə́.

⁵ Adə̄ Manase gə̄ əngen̄ dɔ nang gír i kutə ərōnəń dɔ nang kə́ Galaad ō, kə́ Basan ō ń kə́ gidə bā Jurdḛ kə́ dām̄ kə́ gīr ɓē tə́ ní.

⁶ Tām̄ ngán Manase kə́ dəyá̰ gə̄ əngen̄ dɔ nang ní naā tə́ kə ngá kə́ dəngam gēé. Ba dɔ nang kə́ Galaad i yā gotə ngán Manase kə́ rang gə̄.

⁷ Dɔ nang yā Manase gə̄ ḭḭ Aser bátə́ ugə̄ Mikəmeta. Mikəmeta sɔɔ̄n̄ ta naā kə Sisem. Dɔ nang ní dɔ ninə̄n̄ ḭḭ Mikəmeta aw̄ kum kə̄ mbɔ́r ɓē kə́ geleé tə́, aw̄ bátə́ ugə̄ ɓē yā de gə̄ kə́ En Tapua tə́.

⁸ Gō nang kə́ Tapua i yā Manase gə̄ Ba ɓē kə́ Tapua ń ra i dɔ niní ní i yā ngán Epəraim gə̄.

⁹ Gō tə́ anī dɔ nin̄ ní tél kum kə̄ nang tə́, aw̄ ugə̄ man̄ kə́ Kana tə́. Ugə̄ i dɔ gɔ́sən kə́ dām̄ mbɔ́r ɓē kə́ geleé tə́. Ɓē gə̄ ń deē ra man̄ kə́ Kana tə́ anī i kə̄ dām̄ mbɔ́r ɓē kə́ geleé tə́ ní i dɔ nang yā Manase gə̄ tə́ ɓá tā ba i yā Epəraim gə̄. Dɔ nin̄ ní teē man̄ kə́ Kana kə̄ gidə kə́rēý tə́, gidən kə́ dām̄ mbɔ́r ɓē kə́ ko̰ó̰ tə́ ba aw̄ ugə̄ bā bo tə́.

¹⁰ Dɔ nang kə́ dām̄ mbɔ́r ɓē kə́ geleé tə́ i yā Epəraim ō, nge kə́ dām̄ kə́ ko̰ó̰ tə́ i yā Manase ō, ba bā bo i dɔ nang yādə́ kə́ dām̄ kə́ no ɓē tə́. Ré deē ra dɔ nang yā Manase gə̄ tə́ anī, dɔ nang yā Aser gə̄ i kə̄ dām̄ mbɔ́r ɓē kə́ ko̰ó̰ tə́ ō, dɔ nang yā Isakar gə̄ i kə̄ dām̄ kə́ gír ɓē tə́ ō.

¹¹ Ɓē gə̄ ń adə̄n̄ Manase gə̄ dɔ nang yā Isakar gə̄ tə́ ō, yā Aser gə̄ tə́ ō ní i Bet Sean ō, Ibəleam ō, naā tə́ ngán ɓē gə̄ ń, ɓē gə̄ ń noō o̰n ɓē dɔ tə́ ní. Tá adə̄n̄də́ ɓē kə́ Dor ō, En Dor ō, Tanak ō, Megido ō, naā tə́ kə de kə́ kemeé gə̄ ō, ngán ɓē gə̄ ō, ngán ɓē gə̄ ń ɓē gə̄ ń noō o̰o̰n̄ ɓē dɔ tə́ á i gō nang kə́ Dor ní ō.

¹² Banī ngán Manase gə̄ asən̄ tə̄ɓā de gə̄ kə́ kem ɓē gə̄ ní tə́ alé, adə̄ Kanaan gə̄ nayn̄ kə̄ loo ndi tə́ kem ɓē gə̄ ní tə́ ɓáý.

¹³ Dan ń ngán Israel gə̄ ngan̄gəń ngá̰ý gə̄gē ní, tə̄ɓān̄ Kanaan gə̄ kɔ̄ɔ́ alé, ba əndān̄ i kəla ɓəlo tá dɔdə́ tə́.

¹⁴ Ngán kaa Jəjep gə̄ ədan̄ Jojue na: Jḭḭ ń Kɔ́ɔ̄ɓē rāā majə sejí ngá̰ý, tɔdɔ̄ ni-adə̄ jə-tél kósə de kə́ ngá̰ý gə̄ ní, ādə̄jí dɔ nang gír loo kógə̄ḿ beé i tām̄ rí tə́?

¹⁵ Jojue tél tūr̄ ədadə́ na: Ré kutəsí i ngá̰ý ō, gō nang kə́ mbalá yā Epəraim asəsí aĺ ō anī, āwī kem ku kāgə̄ gə̄ yā Periji gə̄ tə́ ō, Repay gə̄ tə́ ō, ā ə́hɔī loo tū tə́ tām̄ yāsí tə́.

¹⁶ Ngán kaa Jəjep gə̄ tél ədan̄ Jojue na: Gō nang kə́ mbalá a asəjí alé. Tá Kanaan gə̄ ń ndin̄ ndágə loo gə̄ tə́ á i ngé gə̄ ń ndin̄ Bet Sean ō, kem ngán ɓē gə̄ ń Bet Sean o̰o̰ ɓē dɔ tə́ ní ō, ngé gə̄ ń ndin̄ ndágə loo gə̄ kə́ Jisreel tə́ ō ní, aw̄n̄ kə púsə rɔ̄ɔ̄ kə́ rāā kə gindīí gə̄.

¹⁷ Tā anī Jojue əda ngán Jəjep gə̄ ń i Epəraim gə̄ ō, Manase gə̄ ō ní na: Sḭḭ̄ i de kə́ ngá̰ý gə̄ ō, tɔ́gə́sí i ngá̰ý ō, adə̄ ā ə́ngeī dɔ nang i gír loo kógə̄ḿ beē ngóy alé.

¹⁸ Banī gō nang kə́ mbalá malang ń ku kāgə̄ gə̄ i tū tə́ ní a tél gō nang yāsí. Āw̄ ī-rāāī loo ɓē tū tə́ ō, ī-ngɔ̄mī ta róbən gə̄ ō. Kanaan gə̄ ń ndin̄ tū tə́ ní, aw̄n̄ kə púsə rɔ̄ɔ̄ kə́ rāā kə gindīí gə̄ ō, tɔ́gə́də́ i ngá̰ý ō, ɓá tā ba ā ī-tə̄ɓāīdə́ tū tə́ kɔ̄ɔ́.