JOJUE 16 - Bibəl ta Sar̄

Dɔ nang kə́ tām̄ yā Epəraim gə̄ tə́ ō, Manase gə̄ ō,

¹ Dɔ nang ń adə̄n̄ ngán Jəjep ní, i dɔ nang ń dɔ ninə̄n əla gír bā Jurdḛ tə́ kadə̄ ɓē kə́ Jeriko tə́ ní. Ré deē ra ta kəɓa man̄ kə́ Jeriko tə́ anī, i kə̄ dām̄ kə́ gír ɓē tə́. Dɔ nin̄ dɔ nang ní ḭḭ Jeriko, teē dəla loo tə́ ba əta tan kə̄ dɔɔ́ aw̄ mbal̄ kə́ Betel tə́.

² Ḭḭ Betel aw̄ Lujə, ra nuú gān̄g ɓē kə́ Atarot ń Arki gə̄ ndin̄ kemeé tə́ ní.

³ Dɔ nin̄ dɔ nang ní tél risə kum kə̄ nang tə́ dām̄ kə́ no ɓē tə́ aw̄ ugə̄ dɔ nin̄ dɔ nang yā Yapəlet gə̄ tə́. Aw̄ bátə́ ugə̄ gō nang kə́ Bet Horon kə́ wól loo tə́ ō, Gejer ō, ta tɔ̄l̄ tan i bā bo tə́.

⁴ Manase gə̄ ō, Apəraim gə̄ ō ń i ngán kaa Jəjep gə̄ ní əngen̄ dɔ nang yādə́ i tītə̄ ń noō.

⁵ Dɔ nin̄ dɔ nang yā Epəraim gə̄ kə gō gír kaadə́ gēé ń toó: Dɔ nin̄ dɔ nang yādə́ kə́ dām̄ kə́ gír ɓē tə́ əla gír i Atarot Adar bátə́ ugə̄ń Bet Horon kə́ dɔɔ́ tə́.

⁶ Dɔ nin̄ ní ḭḭ no ɓē tə́ aw̄ kum kə̄ Mikəmeta dām̄ mbɔ́r ɓē kə́ ko̰ó̰ tə́ tél rugə rɔ̄n Tanat Silo dām̄ kə́ gír ɓē tə́ aw̄ kum kə̄ Yanoa.

⁷ Gō tə́ anī ḭḭ ba risə aw̄ Atarot ō, Naara ō, Jeriko ō. Aw̄ bátə́ ugə̄ bā Jurdḛ tə́

⁸ Dɔ nin̄ ní ḭḭ Tapua aw̄ man̄ kə́ Kana tə́ dām̄ kə́ no ɓē tə́. Ḭḭ man̄ kə́ Kana tə́ aw̄ ugə̄ bā bo tə́. Dɔ nang ń de kə́ gír ɓē yā Epəraim tə́ gə̄ əngen̄ kə gō gír kaadə́ gēé ní n nuú.

⁹ Tá ɓē bo gə̄ kə ngán ɓē kə́ gidə tə́ gē ń i ɓē gə̄ kə́ ran̄ i dɔ nang yā Manase gə̄ tə́ ní, adə̄n̄də́ dɔ tə́ ɓáý to̰.

¹⁰ Epəraim gə̄ tə̄ɓān̄ Kanaan gə̄ ń ndin̄ Bejer ní alé. Adə̄ Kanaan gə̄ ndin̄ dandə́ tə́ bátə́ ɓōólaā. Banī Epəraim gə̄ əndān̄ kəla ɓəlo dɔdə́ tə́.