JOJUE 14 - Bibəl ta Sar̄

Loo gán̄g dɔ nang kə́ Kanaan

¹ I Eleajar kə́ nge tun̄ yá̰a̰ ō, Jojue ngōn̄ Nun ō, ngār gə̄ kə́ dɔ gír ɓē gə̄ yā ngán Israel gə̄ tə́ ō n gángə̄n̄ dɔ nang kə́ Kanaan adə̄n̄ ngán Israel gə̄ ní. Ba loo gán̄gə̄n̄neé ní n toó:

² Kə gō ń Kɔ́ɔ̄ɓē ədań Moijə kadə̄ rāā ní, nin̄ túgə̄n̄ i wə̄lā n gángə̄n̄neé dɔ nang gə̄ ní adə̄n̄ gír ɓē gə̄ kə́ ndōhó kə núsə́ ń əngen̄ dɔ nang aĺ ɓáý ní.

³ Moijə gán̄g dɔ nang kə gidə bā Jurdḛ kə́ dām̄ ké gír ɓē tə́ adə̄ gír ɓē kə́ jōó kə núsə kɔ̄ɔ́ ɓá, ba i de kə́ gír ɓē yā Lebi tə́ gə̄ n adə̄də́ alé ní.

⁴ Ngán kaa Jəjep gə̄ kēngə̄n̄ naā gír i jōó: Gīr ɓē yā Manase ō, yā Epəraim ō. Ngán Lebi gə̄ əngen̄ dɔ nang alé ba adə̄n̄də́ i ɓē bo gə̄ kə́ kadə̄ ndin̄ kemeé ō, dɔ nang gə̄ kə́ gidə ɓē bo gə̄ ní tə́ tām̄ yā yá̰a̰ kal̄ yādə́ gə̄ tə́ ō, gotə yá̰a̰ kənge yādə́ kə́ rang gə̄ tə́ ō ngóy.

⁵ Adə̄ ngán Israel gə̄ kēgə̄n̄ naā dɔ nang i tītə̄ ń Kɔ́ɔ̄ɓē ədań Moijə kadə̄ rāā ní.

⁶ Dan ń ngán Israel gə̄ ndinneé Gilgal ɓáý ní, ndɔ̄ kə́rēý tə́ de kə́ gír ɓē yā Juda tə́ gē reēn̄ rɔ̄ Jojue tə́ Anī Kaleb ngōn̄ Yepune ń ni i Keniji ní ədan na: Yá̰á̰ ń Kɔ́ɔ̄ɓē əda Moijə deē yā Nə́ɓā dɔḿ tə́ ō, dɔí tə́ ō, Kades Barnea ní ī-ger̄ majə.

⁷ Dan ń Moijə nge kəla yā Kɔ́ɔ̄ɓē əlam̄ kənda ma̰ȳ looó ní, ɓālə̄ḿ i kutə sɔ́. Ni-ndi i Kades Barnea n əlamə̄ń ní. Ba dan ń m̄-téĺ ní, m̄-reē m-ɔ́jən yá̰á̰ kə́ rɔ̄kum.

⁸ Ngákó̰ó̰ḿ gə̄ ń aw̄n̄ seḿ ní rāān̄ adə̄ kem de gə̄ gān̄g man̄, ba mā m-ún i gō Kɔ́ɔ̄ɓē Nə́ɓā yāḿ kanjə̄ kadə̄ kemḿ kēgə̄.

⁹ Ndɔ̄ ń noō tə́ Moijə ənī ndūn adə̄m̄, əda na dɔ nang ń m-ə̄ndā njaḿ tū tə́ ní na a tél yá̰a̰ yāḿ ō, yā ngánə́ḿ gə̄ ō, yā ngán kaaḿ gə̄ ō, kə́ njɔ́ḿ gə̄ tə́, tɔdɔ̄ mā na m-ún gō Kɔ́ɔ̄ɓē ń i Nə́ɓā yāḿ ní kanjə̄ kadə̄ kemḿ kēgə̄.

¹⁰ Asə ɓāl̄ kutə sɔ́ gidə i mí kɔ̄ɔ́ tā-n Kɔ́ɔ̄ɓē ədań Moijə najə̄ ń noō ní. Dan ń noō tə́ ní ngán Israel gə̄ i kem loo ké mángá tə́. Əla gír ndɔ̄ ń noō tə́ bátə́ ɓōólaā ní, Kɔ́ɔ̄ɓē ndɔ̄mə̄m̄ adə̄ m̄-ndi kə kumḿ tītə̄ ń ni-ənīń míndən ní. Ń-toō ɓālə̄ḿ i kutə sɔ́sɔ́ gidə i mí,

¹¹ ba tɔ́gə́ḿ to tītə̄ kə́ kété ń Moijə əlamə̄ń kəndā ma̰ȳ looó ní. Tɔ́gə́ḿ kə́ ɓōólaā to tītə̄ tɔ́gə́ḿ kə́ kété ń m-ā m̄-rɔ̄ɔń ō, m-ā m̄-rāań yá̰á̰ kə́ rang gə̄ ō ní.

¹² Adə̄ ādə̄m̄ gō nang kə́ mbalá ń Kɔ́ɔ̄ɓē əda najə̄n ndɔ̄ ngeé ń noō tə́ ní. Tɔdɔ̄ ndɔ̄ n noō tə́ ní ōō kadə̄ ngán Anak gə̄ ndin̄ tū tə́ ō, ɓē bo gə̄ kə́ ndogə̄ mbal̄ gīr̄ gidə gə̄ i tū tə́ ō. Ré Kɔ́ɔ̄ɓē i seḿ anī, m-ā m̄-tə̄ɓādə́ kɔ̄ɔ́ tītə̄ ń nəkɔ́ ədań ní.

¹³ Jojue tɔ́r̄ tan dɔ Kaleb ngōn̄ Yepune tə́ ba adə̄n ɓē kə́ Hebron.

¹⁴ I tām̄ najə̄ ń noō tə́ n bátə́ ɓōólaā gə̄gē ɓē kə́ Hebron i ɓē yā Kaleb ngōn̄ Yepune kə́ Keniji ní. Tɔdɔ̄ ni un gō Kɔ́ɔ̄ɓē Nə́ɓā yā Israel kanjə̄ kadə̄ kemən kēgə̄.

¹⁵ Kété ní rī ɓē kə́ Hebron na i Kiryat Arba. Arba i deē kógə̄ḿ kə́ bo tɔȳ madə̄n gə̄ malang dan ngán Anak gə̄ tə́. Loo ń noō tə́ de gə̄ ndin̄ lɔm tɔdɔ̄ rɔ̄ɔ̄ gətóo kem ɓēé.