JOEL 1 - Bibəl ta Sar̄

¹ Najə̄ ń Kɔ́ɔ̄ɓē ɔr̄ kə Joel kə́ ngōn̄ Petuel ní.

Kur̄ gə̄ taān̄ loo ō, man̄ əhɔ laa ō

² Sḭḭ̄ kum kɔɔ̄ gə̄, ōōī yá̰á̰ ń toō. Sḭḭ̄ de kə́ kem ɓēé gə̄ malang, ī-nēlī mbīsí. Yá̰á̰ ń toō rāā yá̰a̰ ɓāl̄ yāsí tə́ a? Aké rāā yá̰á̰ ɓāl̄ yā bɔbə̄sí gə̄ tə́ a?

³ Ə̄nīī ngáńsí gə̄ gotə yá̰á̰ ní ō, ngáńsí gə̄ a ənīn̄ ngáńdə́ gə̄ gotə ō, ngán kaadə́ gə̄ a ənīn̄ gotə gír de kə́ ndɔ̄ń tə́ gə̄ ō.

⁴ Yá̰á̰ ń taw̄ əya̰ ní, yim̄ gə̄ əsan̄ kɔ̄ɔ́ ō. Yá̰á̰ ń yim̄ gə̄ əya̰n̄ ní, kə́ndīŕ gə̄ əsan̄ kɔ̄ɔ́ ō. Yá̰á̰ ń kə́ndīŕ gə̄ əya̰n̄ ní, gaẃ gə̄ əsan̄ kɔ̄ɔ́ ō.

⁵ Ngé kasə rāā gə̄, ī-ndólī dɔ ɓīī tə́ ō, ī-nōōī ō. Sḭḭ̄ malang, ngé ka̰ȳ kasə nduú gə̄, ī-nōōī rɔ̄sí. Tɔdɔ̄ ɔrə̄n̄ kasə nduú tasí tə́ kɔ̄ɔ́.

⁶ Dūbūú kur̄ kə́ ngá̰ý gə̄ rɔ̄ɔ̄n̄ ɓē yāḿ. Tɔ́gə́də́ i ngá̰ý ō, kutədə́ i kə́ dum̄ tə́da ō. Ngān̄gdə́ i ngān̄g ɓɔl ō, kə̄ngā mbɔ̄r̄də́ i kə̄ngā mbɔ̄r̄ ɓɔl kə́ kó̰o̰ ō.

⁷ Nin̄ nujən̄ kə kāgə̄ nduú yāḿ gə̄ sák sák kɔ̄ɔ́ ō. Jéngə̄n̄ kāgə̄ kótə̄ yāḿ gə̄ náḿ náḿ kɔ̄ɔ́ ō. Nin̄ əsan̄də́ ɔrə̄n̄ ngɔ̄ɔ̄də́ gə̄ kɔ̄ɔ́ ba yá̰á̰ gə̄ ń əya̰n̄ ní i ta jīdə́ kə́ tetə ndaa gə̄ ngóy.

⁸ Ī-nō rɔ̄í, tītə̄ ngōmandə kə́ ger̄ dəngam aĺ ɓáý kə́ o̰ō̰ sákə̄ kūbə̄ rɔ̄n tə́, yā nōoń dəngam ń əhɔ gātə̄n dan ń ni i mandən tə́ ní.

⁹ De gə̄ ndējə̄n̄ yá̰á̰ aláa tə́tən̄ kasə nduú kem kújə yā Kɔ́ɔ̄ɓē tə́ to̰ alé. Ngé tun̄ yá̰a̰ gə̄ ń i de kə́ bo gə̄ yā Kɔ́ɔ̄ɓē ní əhɔn̄ ndoō.

¹⁰ Nujən̄ kə ndɔr̄ gēé sák sák kɔ̄ɔ́, dɔ nang əhɔ ndoō. Nujən̄ kə gémēé sák sák kɔ̄ɔ́ ō, kasə nduú kə́ kijə təgā kɔ̄ɔ́ ō, yibə̄ kə́ kijə gətóo kɔ̄ɔ́ ō.

¹¹ Jī ngé ndɔr̄ gə̄ ur̄ wak. Ngé ndɔr̄ kāgə̄ nduú gə̄, nōōn̄ rɔ̄də́. Kōō gémē ō kōō ɔ́rjə ō nujə kɔ̄ɔ́. Kōō kə́ ndɔrɔ́ nujə malang kɔ̄ɔ́.

¹² Kāgə̄ nduú tutə kɔ̄ɔ́, kāgə̄ kótə̄ ndəlē riw kɔ̄ɔ́. Kāgə̄ gərenadə ō, kāgə̄ túmbur ō, kāgə̄ jīm̄ tītə̄ ō, kāgə̄ malang kə́ kem ndɔrɔ́ i kə́ tutə kɔ̄ɔ́. Rɔ̄nel̄ gətóo kɔ̄ɔ́ dan de gə̄ tə́.

Mērə̄n̄ ngán Israel gə̄ ndi ɓō ō, rāā Kɔ́ɔ̄ɓē ɓɔ́ ō

¹³ Ngé tun̄ yá̰a̰ gə̄ ī-dō̰ō̰ī ɓōdə̄sí ō, ī-nōōī rɔ̄sí ō. Sḭḭ̄ ngé rāā kəla tun̄ yá̰a̰ ī-gāngī kɔŕ. Sḭḭ̄ de kə́ bo gə̄ yā Nə́ɓā yāḿ, ī-reēī, ō̰ō̰ī kūbə̄ kəhɔ ndoō ī-ɓīīneé. Tɔdɔ̄ ndəjə̄ yá̰a̰ aláa tə́te kasə nduú kem kújə yā Nə́ɓā yāsí tə́ kɔ̄ɔ́.

¹⁴ Ī-*ndiī ɓō tām̄ yā Nə́ɓā ɔ̄rīineé kam̄sí, ə̄nīī mbēr̄ kán̄ naā kə́ táĺ, ɔ́siī dɔ kum kɔɔ̄ gə̄ ō, de gə̄ malang kə́ kem ɓēé ō naā tə́, kem kújə yā Kɔ́ɔ̄ɓē ń i Nə́ɓā yāsí ní tə́, ba ī-ɓāríī Kɔ́ɔ̄ɓē ādə̄ dḭḭ̄sí.

Ndɔ̄ wōn̄g yā Kɔ́ɔ̄ɓē

¹⁵ Ndoō wa. Ndɔ̄ kə́ to ɓōĺ ngá̰ý ń i ndɔ̄ yā Kɔ́ɔ̄ɓē ní dɔ i ngɔr! Loo kə́ nujə ń i Nə́ɓā kə́ bo kə́ tɔ́gən i ngá̰ý n gḛy ní, a reē naā tə́ seneé.

¹⁶ Yá̰a̰ kəsa gətóo i ta kumjí tə́ aláa? Rɔ̄nel̄ ō, walya ō, gətóon̄ kem kújə yā Kɔ́ɔ̄ɓē tə́ i ta kumjí tə́ aláa?

¹⁷ Kum kōō kə́ dubə̄ gə̄ tutən̄ gíŕ nángāá kɔ̄ɔ́. Nujən̄ kə kújə ngɔ̄m̄ kōō gēé ō, bótə̄yō̰n̄ mōȳ gə̄ ō, tɔdɔ̄ gémē təgā kɔ̄ɔ́.

¹⁸ Yá̰a̰ kul̄ gə̄ tṵ́ṵ̄n rus rus, man̄g gə̄ dáȳn̄ biriri kə̄ loo gə̄ tə́, tɔdɔ̄ mu kə́ mbōl̄ gətóo. Tá ɓūtə̄ yá̰a̰ kul̄ kə́ dūú gə̄ gə̄gē a oyn̄ ō.

Ndɔ̄ȳ yā nge koō ta

¹⁹ Kɔ́ɔ̄ɓē m-ə́ga kɔŕ kə̄ dɔí tə́, tɔdɔ̄ hor o̰o̰ loo ko̰o̰ dā̰ gə̄ ń i loo kə́ kə̄sāá ní kɔ̄ɔ́. Ta ndo̰ hor gə̄ o̰o̰n̄ kāgə̄ gə̄ kə́ kem ndɔr̄ gə̄ tə́ malang kɔ̄ɔ́.

²⁰ Dā̰ kə́ bembeé gə̄gē a tūrə̄n̄ kumdə́ kum kə̄ rɔ̄í tə́, tɔdɔ̄ man̄ gə̄ ḭḭn̄ kɔ̄ɔ́ ō, hor o̰o̰ loo ko̰o̰ dā̰ gə̄ ń i loo kə́ kə̄sāá ní kɔ̄ɔ́ ō.