JEREMI 7 - Bibəl ta Sar̄

Taā kem loo kə́ ndāńg karī

¹ Kɔ́ɔ̄ɓē ɔr̄ najə̄ kə Jeremií ədan na:

² Ī-ra ta kújə yā Kɔ́ɔ̄ɓē tə́, ə̄nī mbēr̄ najə̄ ń toō ə́da na: Sḭḭ̄ de kə́ Juda tə́ gə̄ malang ń údiī kə ta róbə gə̄ ń toō yā kɔsə nosí nang tə́ rɔȳń Kɔ́ɔ̄ɓē ní, ōōī najə̄ yā Kɔ́ɔ̄ɓē.

³ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel əda ní n toó: Ī-tūrī háĺsí ō, yá̰a̰ rāāsí gə̄ ō, anī m-ā m-ə́yá̰sí kadə̄ ā ī-ndiī loo ní tə́.

⁴ Ī-lōōī gól̄ rɔ̄sí kə najə̄ kə́ rɔ̄kum aĺ gēé ba kəda kə̄ nja naā tə́ na: Kújə yā Kɔ́ɔ̄ɓē! Kújə yā Kɔ́ɔ̄ɓē! Kújə yā Kɔ́ɔ̄ɓē, kújə ní i laā.

⁵ Ba ī-tūrī háĺsí ō, yá̰a̰ rāāsí gə̄ ō, ādī de gə̄ yá̰á̰ kə́ sɔɔ̄ dɔdə́ kógə̄ḿ kógə̄ḿ ō,

⁶ ī-rāāī kum nge nam̄ ɓē ō, ngōn̄ hal ō, nge ngaa koy ō ndoō tə́ alé. Ī-ɓōkíī mósə́ kə́ kanjə̄ najə̄ dɔn tə́ nang tə́ loo ń toō tə́ alé, ī-ngɔ̄dī gō nə́ɓā kə́ rang gə̄ alé na sōgə́ yá̰á̰ kə́ to kum kaȳ aĺ əsō dɔsí tə́.

⁷ Ta anī m-ā m-ə́yá̰sí kadə̄ ī-ndiī loo ń toō tə́, kem ɓē ń m-ādə̄ kaasí gə̄ i jóo kə́ njɔ́ḿ gə̄ tə́ ní.

⁸ Ba sḭḭ̄ ī-gólī rɔ̄sí kə najə̄ kə́ rɔ̄kum aĺ gə̄ ō, kə́ teē yá̰a̰ aĺ gə̄ ō.

⁹ Ní kə sḭḭ̄ ī-ɓogiī ō, ī-tɔ̄lī de gə̄ ō, ī-rāāī rāȳ ō, ī-túbī dɔ najə̄ kə́ rɔ̄kum aĺ tə́ ō, ī-róōī yá̰a̰ ndejə̄ gə̄ ādī Baal ō, ī-ngɔ̄dī gō nə́ɓā kə́ rang gə̄ kə́ ī-gerīdə́ aĺ tə́ ō,

¹⁰ ba kə ī-reēī ta kumḿ tə́ kem kújə ń toō ń rīḿ ɓār̄ dɔ tə́ ní yā kəda na: Ajən̄jí kɔ̄ɔ́ ɓá ō, kə ī-toī dan rāā yá̰á̰ kə́ majaĺ gə̄ malang ń noō tə́ ō a?

¹¹ Sḭḭ̄, ī-rāāī kújə́ ń rīḿ ɓār̄ dɔ tə́ ní i loo ɓɔ̄ɔ̄ rɔ̄ yā ngé tɔ̄l̄ de gə̄ tə́ a? Mā tā a, m-á̰a̰ kadə̄ i beé. Najə̄ ń Kɔ́ɔ̄ɓē əda ní n noó.

¹² Āwī Silo, loo yāḿ ń rīḿ ɓār̄ dɔ tə́ kété ní, ba á̰a̰ī yá̰á̰ ń m̄-rāā seneé najə̄ kem ndul yā Israel ń i gír deē yāḿ gə̄ ní tə́.

¹³ Dan ń sḭḭ̄ ī-rāāī yá̰a̰ gə̄ ń toō malang ō, m-ɔ̄r̄ najə̄ sesí kə̄ nja naā tə́ ba ī-mbātíī koō ō, m̄-ɓārsí ba ī-mbātíī ndigə ō ní,

¹⁴ kújə́ ń rīḿ i dɔ tə́ ō, ī-taāī kemən mámák ō, loo ń m-ādə̄sí ō, m-ādə̄ kaasí gə̄ ō ní, ngɔlaā m-ā m̄-rāań yá̰á̰ ń m̄-rāā kə Silo ní.

¹⁵ M-ā m̄-tə̄ɓāsí rɔ̄ḿ tə́ kɔ̄ɔ́ sa̰y tītə̄ ń m̄-tə̄ɓāń ngákó̰ó̰sí gə̄ malang kə́ gír kaa yā Epəraim tə́ ní ō.

Ndɔ̄ȳ kə́ Nə́ɓā a oō alé

¹⁶ Ḭ̄ ī-lōō ndɔ̄ȳ tām̄ yā gír de gə̄ ń toō tə́. Ī-lōō nōō rɔ̄í ō, rāā ɓɔ́ ō tām̄ yādə́ tə́. Ī-lōō to dan kɔr̄ najə̄ seḿ tə́ tām̄ yādə́ tə́. Tɔdɔ̄ m-ā m-ōō ndūí alé.

¹⁷ Á̰á̰ yá̰á̰ ń nin̄ a rāān̄ kem ɓē gə̄ kə́ Juda tə́ ō, kum róbə kɔsə gə̄ kə́ Jerusalem tə́ ō ní aĺ a?

¹⁸ Ngán gə̄ ɔyn̄ kīr̄ ō, bɔbə̄də́ gə̄ unjə̄n̄ hor ō, dəyá̰ gə̄ ló̰ȳn̄ ndujə̄ ō yā rāań mápá kə́ kə yibīí yā kadə̄ Mban̄g kə́ dəyá̰ kə́ dɔ rā̰ tə́. Sḭḭ̄ ī-téteī kasə nang tə́ ādī nə́ɓā kə́ rang gə̄ ādə̄mīneé wōn̄g.

¹⁹ I mā n ādə̄mī wōn̄g ní a? I nin̄ kɔ́ gə̄ aláa? I tām̄ rɔ̄sɔl̄ yādə́ nin̄ kɔ́ gə̄ tə́. Najə̄ ń Kɔ́ɔ̄ɓē əda ní n noó.

²⁰ I tām̄ ń toō tə́ n najə̄ ń Kɔ́ɔ̄ɓē Nə́ɓā əda ní n toó: M-ā m̄-bə̄gā wōn̄g yāḿ, wōn̄g kə́ ngá̰ý yāḿ dɔ loo ń toō tə́ ō, dɔ de gə̄ tə́ ō, dɔ dā̰ gə̄ tə́ ō, dɔ kāgə̄ kə́ bembeé gə̄ tə́ ō, dɔ kum kōō gə̄ kə́ teēn̄ dɔ nang tə́ tə́ ō. I hor kə́ a oy aĺ bátə́.

Gíŕ nápar de gə̄ kə́ oōn̄ najə̄ yā Nə́ɓā yādə́ alé

²¹ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel, əda ní n toó: Ī-reēī kə yá̰a̰ tun̄ kə́ yā róō horoó gə̄ dɔ yá̰a̰ tun̄ yāsí gə̄ tə́, ba ə́saī dā̰də́.

²² Dan ń m̄-teē kə kaasí gēé kem ɓē kə́ Ejiptə tə́ kɔ̄ɔ́ ní, m-ə́dádə́ najə̄ kógə̄ḿ aĺ bátə́ ō, m̄-dəjedə́ yá̰a̰ tun̄ kə́ yā róō horoó aĺ ō, yá̰a̰ tun̄ kə́ rang aĺ ō.

²³ Yá̰á̰ ń m̄-dəjedə́ ní n toó ngóy: Ōōī najə̄ yāḿ anī m-ā m̄-téĺ Nə́ɓā yāsí ō, sḭḭ̄ ā ī-téliī gír deē yāḿ gə̄ ō. Ré úniī gō róbə́ ń m̄-rāā tām̄ yāsí tə́ ní anī, ā ī-ndiī majə.

²⁴ Banī nin̄ oōn̄ ndūḿ alé. Nin̄ nēlə̄n̄ mbīdə́ aĺ ō, ba rāān̄ yá̰a̰ kə gō kemdə́ ɔjəń dɔ dɔ ngan̄g yādə́ kə́ al̄ naā ngá̰ý ō, tūrə̄n̄ gidədə́ taḿ tə́ kɔ̄ɔ́ ō.

²⁵ Jóo nəkɔ́ ń kaadə́ gə̄ teēn̄neé kɔ̄ɔ́ kem ɓē kə́ Ejiptə tə́ ní, m-ə́lá ngé kəla yāḿ gə̄ malang ń i ngé koō ta gə̄ ní rɔ̄də́ tə́ kə dɔ ndɔ̄ gə̄, kanjə̄ kɔr ta tə́.

²⁶ Banī nin̄ oōn̄ ndūḿ alé, nin̄ nēlə̄n̄ mbīdə́ alé, ba rāān̄ dɔ ngan̄g, kemdə́ ndul mān̄ yā kaadə́ gə̄.

²⁷ Ɔ́jə́də́ kum najə̄ gə̄ ń noō malang, ba oōn̄ ndūí alé. Ī-ɓāŕdə́, ba dalnī najə̄ tə́ alé.

²⁸ Tā anī, ə́dádə́ na: Á̰a̰ī nápar de gə̄ ń oōn̄ ta Kɔ́ɔ̄ɓē Nə́ɓā yādə́ aĺ ní n toō. Nin̄ mbātə́n̄ kəndā kumdə́ gíŕ yá̰á̰ ń Nə́ɓā ɔjədə́ tə́ ní: Najə̄ kə́ rɔ̄kum gətóo, najə̄ kə́ rɔ̄kum gətóo tadə́ tə́.

Wól loo tɔ̄l̄ de gə̄

²⁹ Ə́ja nənga dɔí ń ɔjə kadə̄ ɔ̄r̄ kamí tām̄ yā Nə́ɓā tə́ ní ba ī-ɓōkə́ kɔ̄ɔ́. Ə̄nī pā nōō rɔ̄ kum róbə gə̄ tə́, tɔdɔ̄ Kɔ́ɔ̄ɓē kídə̄ de gə̄ ń rāānən̄ adə̄ ənge wōn̄g ní ō, əya̰də́ kɔ̄ɔ́ ō.

³⁰ De kə́ Juda tə́ gə̄ rāān̄ yá̰á̰ kə́ majaĺ kə́ nelə̄m̄ aĺ ngá̰ý tə́ndān̄ yá̰á̰ kə́ yḛr yādə́ gə̄ kem kújə́ ń rīḿ ɓār̄ dɔ tə́ ní tə́, adə̄ téĺ yá̰á̰ kə́ yḛr. Najə̄ ń Kɔ́ɔ̄ɓē əda ní ń noó.

³¹ Nin̄ rāān̄ loo kə́ ḭḭ kə̄ dɔɔ́ gə̄ Topet tə́, kem wól loo kə́ Ben Hinom tə́, yā róoń ngáńdə́ kə́ dəngam gə̄ ō, kə́ dəyá̰ gə̄ ō horoó. Yá̰á̰ ń noō i mā n m̄-dəje ní alé, m̄-gír̄ dɔ tə́ sḛ́ý aĺ bátə́ ō.

³² Tām̄ ń toō tə́ ní, á̰a̰ī, ndɔ̄ gə̄ a reēn̄ noó, de gə̄ a ədan̄ kem ndɔ̄gə̄ ń noō tə́ na: Topet aláa na i wól loo kə́ Ben Hinom to̰ alé, ba a ədan̄ na i wól loo tɔ̄l̄ de gə̄, tɔdɔ̄ loo gətóo, adə̄ Topet nəkɔ́ tél i loo ɓōkə́ nīń gə̄. Najə̄ ń Kɔ́ɔ̄ɓē əda ní ń noó.

³³ Nīń gír de gə̄ ń toō a téĺ yá̰a̰ kəsa yā yel̄ kə́ dɔ rā̰ tə́ gə̄ ō, yā dā̰ kə́ dɔ nang tə́ gə̄ ō, de kə́ yā tə̄ɓādə́ dɔ tə́ gətóo.

³⁴ M-ā m̄-rāā kadə̄ pā walya ō, najə̄ kə́ to rɔ̄nel̄ ō, pā yā ngaa dəyá̰ ō, rɔ̄nel̄ yā nge taā ngaa ō, a ɓār̄ kem ɓē gə̄ kə́ Juda tə́ to̰ aĺ ō, kum róbə kɔsə gə̄ kə́ Jerusalem tə́ to̰ aĺ ō. Tɔdɔ̄ ɓē a tél loo kə́ nujə sák sák.