JEREMI 47 - Bibəl ta Sar̄

Najə̄ kə́ dɔ Pilistin gə̄ tə́

¹ Najə̄ kə́ dɔ Pilistin gə̄ tə́ ń Kɔ́ɔ̄ɓē ɔr̄ kə Jeremi nge koō ta pá tá kadə̄ Parao̰ rɔ̄ɔ̄ ɓē kə́ Gaja ní n toó:

² Najə̄ ń Kɔ́ɔ̄ɓē əda ní n toó: Man̄ ḭḭ ngá̰ý dām̄ mbɔ́r ɓē kə́ ko̰ó̰ tə́ ō, tél man̄ kə́ nūgə́ wut wut ō. Man̄ ní taā loo kem ɓēé ō, un dɔ yá̰a̰ malang kə́ tū tə́ ō, un dɔ ɓē ō, de kə́ kemeé gə̄ ō. Dan ń de gə̄ oōn̄ kōō nja sə́ndá kə́ ngan̄g ngá̰ý gə̄ yā Parao̰ ō, kōō púsə́ sə́nda yān gə̄ ō, kōō nja púsə́ sə́nda gə̄ ō anī,

³ əgan̄ kɔŕ kadə̄ kə dḭḭ̄n̄də́ ō, de gə̄ malang kə́ kem ɓēé nōōn̄ naā ō. Yá̰á̰ ń noō rāā tá kadə̄ bɔbə̄ ngán gə̄ rɔ̄də́ ur̄ wak kɔ̄ɔ́ ní, tə́jān̄ kumdə́ ta ngáńdə́ gə̄ tə́ kɔ̄ɔ́.

⁴ Tām̄ ndɔ̄ kə́ yā kadə̄ Pilistin gə̄ oyn̄neé malang ō, kadə̄ gāngə̄n̄neé gír yā ngé gə̄ malang ń teēn̄ ta yo tə́ Tir ō, Sidon ō, á əɓan̄ kum kaw̄ dḭḭ̄də́ ní, asə kɔ̄ɔ́. Rɔ̄kum Kɔ́ɔ̄ɓē nujə kə Pilistin gə̄ kə́ dor̄ kə Kapətor tə́ ń ndin̄ kə kumdə́ ní.

⁵ Nənga dɔ de kə́ Gaja tə́ gə̄ i kə́ dəsā kɔ̄ɔ́, utə̄n̄ ta de kə́ Askalon tə́ gə̄ kɔ̄ɔ́, adə̄ ndin̄ tadə́ mbóo. Sḭḭ̄ de kə́ ndágə loo tə́ gə̄ ń ī-ndiī kə kumsí ní, ā ī-toī dan tə́jā rɔ̄sí kə doó i bátə́ ta kə́ rá?

⁶ I yá̰á̰ kə́ to kum kaȳ aĺ kə́ ba̰ý beē! Kaskar yā Kɔ́ɔ̄ɓē, ā ī-taā koō i rə́ngáý tə́? Ī-tél údə kem hɔ̄pīí tə́ gogə́. Ī-ndi jəke kanjə̄ rāā yá̰a̰.

⁷ Dan ń i Kɔ́ɔ̄ɓē n əlan kə̄ dɔ Askalon gə̄ tə́ ō, kə̄ dɔ de gə̄ ń ndin̄ kadə bā bo tə́ ō ní, a asə kɔr̄ koō i ba̰ý? Ni mērə̄n kaw̄ kəngen i loo ń noō tə́.