JEREMI 41 - Bibəl ta Sar̄

¹ Ismael, ngōn̄ Netania kə́ ngōn̄ Elisama ń i mósə mban̄g ō, i de kə́ bo yān kógə̄ḿ kə́ dan madə̄ gə̄ tə́ ō ní, reē kə de kə́ dəngam gə̄ kutə gōn tə́ kem nāā kə́ nge ko̰ sīrí tə́ ənge Gedalia ngōn̄ Ahikam Misəpa ba əsan̄ yá̰a̰ naā tə́ loo ń oō tə́.

² Tā anī Ismael ngōn̄ Netania ō, de kə́ dəngam kə́ kutə gə̄ ń dānə̄nən̄ ō ní, tə́gān̄ Gedalia kə kaskaraá tɔ̄lnən̄ kə ta jī tə́ noō. I loo tɔ̄l̄ ń ni tɔləń nge ń mban̄g əndān dɔ ɓē ní n noó.

³ Ismael tɔ̄l̄ de gə̄ malang kə́ Juda tə́ ń ndin̄ kə Gedalia Misəpa ní ō, tɔ̄l̄ áskar Kalde gə̄ ń ndin̄ noó ní ō.

Ismael tɔ̄l̄ ngé njə̄rā mbā gə̄ kutə sɔ́sɔ́

⁴ Kə ndɔ̄ kə́ nge ko̰ jōó ní de kə́ ger̄ kadə̄ tɔ̄lə̄n̄ Gedalia gətóó ɓáý.

⁵ Anī de kə́ dəngam gə̄ kutə sɔ́sɔ́ ḭḭn̄ Sisem ō, Silo ō, Samari ō, reēn̄. Nin̄ dəsān̄ mbāýdə́ kɔ̄ɔ́ ō, rə́yā̰n̄ kūbə̄ kə́ rɔ̄də́ gə̄ tə́ ō, tə́jān̄ rɔ̄də́ kə doó ō, əhɔn̄ yá̰a̰ ndējə̄ gə̄ ō, kajaja ō, jīdə́ tə́ yā ndējə̄ kem kújə yā Kɔ́ɔ̄ɓē tə́.

⁶ Ismael, ngōn̄ Netania, teē Misəpa aw̄ tə́nī tadə́. Ni-njə̄rā kə nōó kumən tə́. Dan ń ni ugə̄ rɔ̄də́ tə́ anī ədadə́ na: Ī-reē á̰a̰ī Gedalia, ngōn̄ Ahikam.

⁷ Ba dan ń ugə̄n̄ dan ɓēé anī, Ismael, ngōn̄ Netania ō de kə́ dəngam gə̄ ń dānə̄nən̄ ní ō, tɔ̄lə̄n̄də́ ba tə́nīn̄də́ kem bəlo taā man̄ ndī tə́.

⁸ De gə̄ kutə dan de gə̄ ń Ismael a tɔ̄l̄də́ tə́ ní ədanən̄ na: Ī-tɔ̄l̄jí alé na jə-ɓɔ̄ɔ̄ sádə̄ mbā yājí gə̄ adə̄ i kōō gémē ō, kōō ɔ́rjə ō, yibə̄ ō, tejə ō kem ndɔrɔ́ noō. Anī Ismael loo gír tɔ̄l̄də́ tə́ kə ngákó̰ó̰də́ gēé.

⁹ Bəlo ń Ismael tə́nī nīń de gə̄ malang ń ni-tɔ̄l̄də́ ní kemeé ní, i bəlo taā man̄ ndī kə́ bo ngá̰ý ń mban̄g Asa ndēr̄ dan ń mban̄g Basa kə́ Israel tə́ ənīnneé rɔ̄ɔ̄ tə́ ní. Ismael, ngōn̄ Netania tə́nī de gə̄ ń ni-tɔ̄l̄də́ ní kemeé adə̄ rosə.

¹⁰ Ismael ɔy gotə de gə̄ malang ń na̰yn̄ Misəpa ní aw̄ sedə́. De gə̄ ní i ngáń ngār kə́ dəyá̰ gə̄ ō, de gə̄ malang ń ndin̄ Misəpa ɓáý ní ō, ngé gə̄ ń Nebujaradan, ngol ngé ngɔ̄m̄ dɔ mban̄g ɓɔ̄ɔ̄də́ kə Gedalia, ngōn̄ Ahikam, kadə̄ ngɔ̄m̄də́ majə ní ō. Ismael, ngōn̄ Netania, əhɔdə́ aw̄ sedə́ yā kəsōń gír Amon gə̄ tə́.

Taān̄ dəngáy gə̄ yā Ismael əyan̄də́ dɔɔ́

¹¹ Yohanan, ngōn̄ Karea ō, ngol áskar gə̄ malang ń i seneé ní ō, oōn̄ najə̄ yá̰á̰ kə́ majaĺ ń Ismael, ngōn̄ Netania rāā ní.

¹² Nin̄ ɔsən̄ dɔ deē yādə́ gə̄ malang naā tə́ ba aw̄ ənīn̄ Ismael, ngōn̄ Netania rɔ̄ɔ̄. Nin̄ əngenən̄ kadə man̄ kə́ bo ngá̰ý kə́ Gabaon tə́.

¹³ Dan ń de gə̄ malang ń i kem jī Ismael tə́ ní a̰a̰n̄ Yohanan, ngōn̄ Karea ō, ngol ɓūtə̄ áskar gə̄ malang ń dānə̄nən̄ ní ō anī, rāān̄ rɔ̄nel̄.

¹⁴ De gə̄ malang ń Ismael ɔydə́ Misəpa aw̄ sedə́ ní télən̄ dɔ tə́ ba reēn̄ rɔ̄ Yohanan ngōn̄ Karea tə́.

¹⁵ Banī Ismael, ngōn̄ Netania, a̰ȳ no Yohanan, ngōn̄ Karea tə́ kə de kə́ dəngam gēé sɔ́sɔ́ ba aw̄ nam̄ Amon gə̄.

¹⁶ Anī Yohanan, ngōn̄ Karea ō, ngol áskar gə̄ ń dānə̄nən̄ ní ō, a̰a̰n̄ gō gotə de gə̄ malang majə. Nin̄ a̰a̰n̄ gō de gə̄ ń ngōn̄ Netania ɔydə́ Misəpa aw̄ sedə́ dan ń tɔ̄lə̄n̄neé Gedalia ngōn̄ Ahikam tə́ ní, adə̄ i de kə́ dəngam gə̄ ō, áskar gə̄ ō, dəyá̰ gə̄ ō, ngán gə̄ ō, ngé rāā kəla kə́ ndogó mbangāá gə̄ ń ḭḭn̄ sedə́ Gabaon tə́ ní ō.

¹⁷ Nin̄ əsōn̄ róbó aw̄n̄ ba əhɔn̄ kɔr kújə ɓīī mbā gə̄ kə́ Kimham tə́ ngɔr kadə Betlehem tə́, yā kadə̄ gō tə́ anī n-aw̄n̄ Ejiptə tə́.

¹⁸ Nin̄ a̰ȳn̄ i Kalde gə̄ ń nin̄ ɓōlə́n̄də́ ngá̰ý ní, tɔdɔ̄ Ismael kə́ Netania, tɔ̄l̄ Gedalia kə́ ngōn̄ Ahikam ń mban̄g kə́ Babilon əndān dɔ ɓē tə́ ní.