JEREMI 40 - Bibəl ta Sar̄

Jeremi aw̄ ndi Misəpa

¹ Kɔ́ɔ̄ɓē ɔr̄ najə̄ kə Jeremií kutə̄ gō ń Nebujaradan ngol ngé ngɔ̄m̄ dɔ mban̄g əya̰n adə̄ teē kem ɓē kə́ Rama tə́ kɔ̄ɔ́ ní. Dan ń noō tə́ ní Jeremi to i kə súlú dan dəngáy gə̄ malang kə́ Jerusalem tə́ ō, kə́ Juda tə́ ō ń ɔyn̄də́ aw̄n̄ sedə́ Babilon tə́ ní banī Nebujaradan tá a̰a̰ gōn majə.

² Ni-a̰a̰ gōn majə ba ədan na: I Kɔ́ɔ̄ɓē Nə́ɓā yāí n əda kadə̄ yá̰á̰ kə́ to kum kaȳ aĺ ń toō reē dɔ loo ń toō tə́ ní.

³ Kɔ́ɔ̄ɓē rāā adə̄ yá̰á̰ ń əda najə̄n ní reē rāā yá̰a̰. Yá̰á̰ ní rāā yá̰a̰ i tɔdɔ̄ sḭḭ̄ ī-rāāī yá̰á̰ kə́ gōtə́ alé kə Kɔ́ɔ̄ɓēé ō, ōōī najə̄ yān aĺ ō.

⁴ Ba ń toō ní m-ā m̄-tútə́ súĺ kə́ jīí tə́ ɓōólaā nəkɔ́ ń toō tə́. Ré ī-ndigə dānə̄m̄ Babilon anī, ī-reē j-aw̄, na m-ā m-ə̄ndā kumḿ gírí tə́. Ré nelī alé anī ī-lōō reē. Á̰a̰ dɔ nang malang kə taá n to noí tə́ toō: Āw̄ loo nəkɔ́ ń nelī kaw̄ tū tə́ ní tə́.

⁵ Ré ī-gḛy ndi seḿ alé anī, ī-tél āw̄ gogə́ rɔ̄ Gedalia, kə́ ngōn̄ Ahikam kə́ ngōn̄ Sapan tə́ ń mban̄g kə́ Babilon əndān dɔ ɓē gə̄ kə́ Juda tə́ ní. Ī-ndi seneé dan de gə̄ tə́ aláa āw̄ loo ń nelī kaw̄ tū tə́ ní tə́. Tā anī, ngol ngé ngɔ̄m̄ dɔ mban̄g adə̄n yá̰a̰ kəsa ō, yá̰á̰ kə́ rang gə̄ ō, ba əya̰n adə̄ aw̄.

⁶ Jeremi aw̄ Misəpa rɔ̄ Gedalia, kə́ ngōn̄ Ahikam tə́. Ni-ndi seneé dan de gə̄ ń ndin̄ kem ɓēé ɓáý tə́ ní. Loo ń noō tə́ Kɔ́ɔ̄ɓē ɔr̄ najə̄ kə Jeremi.

De kə́ Juda tə́ gə̄ kánə̄n̄ naā rɔ̄ Gedalia tə́

⁷ Dan ń ngol áskar gə̄ malang kə deē yādə́ gə̄ ń gángə̄n̄ naā bembeé ní oōn̄ kadə̄ na mban̄g kə́ Babilon na əndā Gedalia ngōn̄ Ahikam dɔ ɓē tə́ ō, na ɓɔ̄ɔ̄n de kə́ dəngam gə̄ ō, kə́ dəyá̰ gə̄ ō, ngán gə̄ ō, ngé ndoō kə́rēý gə̄ kə́ kem ɓēé ō, ngé gə̄ ń əhɔn̄də́ aw̄n̄ sedə́ Babilon aĺ ō

⁸ anī, nin̄ reēn̄ kə deē yādə́ gēé əngen̄ Gedalia kem ɓē kə́ Misəpa tə́. Ngol áskar gə̄ ní i Ismael ngōn̄ Netania ō, Yohanan ō, Yonatan ō, ngán Karea gə̄ ō, Seraya kə́ ngōn̄ Tanəhumet ō, ngán Epai kə́ Netopa ō, Yejanyahu kə́ ngōn̄ Maaka ō. I ngarā̰ kumdə́ nin̄ kɔ́ gə̄ ō, deē yādə́ gə̄ ō n reēn̄ ní.

⁹ Gedalia kə́ ngōn̄ Ahikam kə́ ngōn̄ Sapan túbə ba ədadə́ nin̄ ō, deē yādə́ gə̄ ō na: Ī-lōōī ɓōĺ kadə̄ Kalde gə̄ o̰o̰n̄ ɓē dɔsí tə́. Ī-ndiī kem ɓēé ō, ōōī ta mban̄g kə́ Babilon ō, anī ā ī-ndiī majə.

¹⁰ Mā m-ā m̄-ndi Misəpa tām̄ yā Kalde gə̄ ń a reēn̄ ɓēé loojí tə́ ní. Sḭḭ̄ tāa, ī-sāāī kan̄ kāgə̄ nduú kə́ yā rāā kasə tə́ ō, kan̄ kāgə̄ gə̄ ō, yibə̄ ō, ə̄ndāī kon̄ tə́, ba ī-ndiī kem ɓē gə̄ ń ə́hɔī loo tū tə́ ní tə́.

¹¹ Tāa Juda gə̄ malang ń ndin̄ Moab ō, dan Amon gə̄ tə́ ō, ngé gə̄ ń ndin̄ Edom ō, kə gō ɓē gə̄ malang ní ō, oōn̄ kadə̄ mban̄g kə́ Babilon na əya̰ gō yá̰á̰ kə́rēý gə̄ adə̄ Juda ō, na əndā Gedalia kə́ ngōn̄ Ahikam kə́ ngōn̄ Sapan dɔ ɓē gə̄ tə́ ō,

¹² Anī ḭḭn̄ kə̄ loo gə̄ malang ń tə̄ndā tḭ̄ḭ̄n̄də́ tū tə́ ní reēn̄. Dan ń reē ugə̄n̄ kem ɓē kə́ Juda tə́ rɔ̄ Gedalia tə́ Misəpa ní anī, nin̄ sāān̄ kan̄ kāgə̄ nduú yā rāā kasə tə́ ō, kan̄ kāgə̄ gə̄ ō, adə̄ al̄ naā ngá̰ý.

Tɔ̄lə̄n̄ Gedalia

¹³ Yohanan kə́ ngōn̄ Karea ō, ngol áskar gə̄ malang ń na̰yn̄ bembeé ní ō, reēn̄ rɔ̄ Gedalia tə́ Misəpa,

¹⁴ ba ədanən̄ na: Baalis, mban̄g yā Amon gə̄ mēr̄ Ismael, ngōn̄ Netania tɔ̄lī ní ī-ger̄ aĺ a? Banī Gedalia, ngōn̄ Ahikam mbātə́ taā kem najə̄ kɔr̄də́.

¹⁵ Tā anī Yohanan, ngōn̄ Karea əda Gedalia loo mundə̄ tə́ jəke Misəpa na: Ādə̄m̄ ta róbə ādə̄ m-āw̄ m̄-tɔ̄l̄ Ismael kə́ ngōn̄ Netania kanjə̄ kadə̄ deē ger̄ gō. Ī-gḛy kadə̄ tɔ̄lī kə̄ non tə́ a? De kə́ Juda tə́ gə̄ malang ń ndi gīrə̄n̄ gidií ní a tə̄ndān̄ naā yā tḭ̄ḭ̄ kə̄ loo gə̄ tə́ ō, de gə̄ ń na̰yn̄ Juda tə́ ní a oyn̄ ō.

¹⁶ Gedalia, ngōn̄ Ahikam tél əda Yohanan, ngōn̄ Karea na: Ī-lōō kə rāā yá̰á̰ ń noō. Najə̄ ń ɔ̄r̄ dɔ Ismael tə́ noō i najə̄ kə́ rɔ̄kum alé.