JEREMI 39 - Bibəl ta Sar̄

De kə́ Babilon tə́ gə̄ taān̄ ɓē kə́ Jerusalem

¹ Kem nāā kə́ nge ko̰ kutə yā ɓāl̄ kə́ nge ko̰ ndōhó tə́ ń Sedekias ndiń mban̄g Juda tə́ ní, Nabukodonosor, mban̄g kə́ Babilon reē kə ngé rɔ̄ɔ̄ yān gēé malang gīrəń gidə ɓē kə́ Jerusalem.

² Kə ndɔ̄ kə́ nge ko̰ ndōhó yā nāā kə́ nge ko̰ sɔ́ kə́ kem ɓāl̄ kə́ nge ko̰ kutə gidə i kógə̄ḿ ń Sedekias ndiń mban̄g tə́ ní, mbutə̄n̄ kum ndogə̄ mbal̄ kə́ Jerusalem.

³ Tā anī, de kə́ bo gə̄ malang yā mban̄g kə́ Babilon, adə̄ i Nergal Sareser kə́ Simagir ō, Nebu Sarsekim ngol ngé kəla gə̄ kə ndogó mbangāá ō, Nergal Sareser kə́ ngol ngé rɔ̄ɔ̄ gə̄ malang ō, tá de kə́ bo kə́ rang gə̄ malang yā mban̄g ō, ndɔ́tə̄ aw̄ ton̄ ndágə loo kə́ bo kə́ kem ɓēé tə́.

⁴ Dan ń Sedekias, mban̄g kə́ Juda tə́ ō, ngé rɔ̄ɔ̄ gə̄ malang ō, a̰a̰n̄də́ anī, nin̄ teēn̄ kɔ̄ɔ́ kem ɓēé a̰ȳn̄ naā, teēn̄ kem ndɔr̄ yā mban̄g tə́ dan ndɔ̄ɔ́, kə ta róbə́ kə́ dɔ dán ndogə̄ mbal̄ kə́ jōó gə̄ tə́. Adə̄ nin̄ a̰ȳn̄ naā i kum kə̄ Araba tə́.

⁵ Ngé rɔ̄ɔ̄ gə̄ kə́ Kalde tə́ ngɔ̄də̄n̄ gōdə́ ba aw̄ əhɔn̄ Sedekias kem wól loo kə́ Jeriko tə́. Əhɔ aw̄n̄ seneé Ribəla kem ɓē kə́ Hamat tə́, rɔ̄ Nabukodonosor mban̄g kə́ Babilon tə́, adə̄ gān̄g sarya dɔn tə́.

⁶ Mban̄g kə́ Babilon adə̄ tə́jān̄ míndə ngán Sedekias gə̄ ta kum bɔbə̄də́ tə́ Ribəla ō, adə̄ tə́jān̄ míndə ngār gə̄ malang kə́ Juda tə́ ō.

⁷ Gō tə́ anī, ni tɔ̄ɔ̄ kum Sedekias ba do̰ō̰n kə súl gində̄ nə̄ngá kasə kə́ kudə̄ naā tə́ jōó yā kaw̄ń seneé Babilon tə́.

⁸ Kalde gə̄ əlan̄ hor dɔ kújə yā mban̄g tə́ ō, dɔ kújə gə̄ yā de kə́ kem ɓēé gə̄ tə́ ō, tɔ̄ɔ̄n̄ ndogə̄ mbal̄ gə̄ kə́ Jerusalem tə́ nang tə́ ō.

⁹ Nebujaradan ngol ngé ngɔ̄m̄ dɔ mban̄g əhɔ ngé kənge yá̰a̰ gə̄ ń na̰yn̄ kem ɓēé ní ō, de gə̄ ń a̰ȳn̄ ta rɔ̄ɔ̄ tə́ ba nam̄nən̄ ní ō, dɔ gúú tə́ aw̄ sedə́ Babilon.

¹⁰ Ni əya̰ ngé ndoō gə̄ ń əngen̄ yá̰a̰ aĺ ní adə̄ ndin̄ gotoó ō, ba nəɓōdə́ kāgə̄ nduú gə̄ ō, loo ndɔr̄ gə̄ ō.

Ɔrə̄n̄ Jeremi dəngáyá

¹¹ Nabukodonosor, mban̄g kə́ Babilon ɔr̄ najə̄ yā Jeremi kə Nebujaradan kə́ ngol ngé ngɔ̄m̄ dɔ mban̄g ba ədan yá̰a̰ gə̄ kə́ yā kadə̄ rāā:

¹² Á̰a̰ gōn majə ō, əndā kumií gírən̄ tə́ ō. Ī-rāā yá̰á̰ kə́ majaĺ sḛ́ý seneé alé ba ī-rāā yá̰a̰ gə̄ ń nel̄ kemən ni ādə̄n.

¹³ Nebujaradan, ngol ngé ngɔ̄m̄ dɔ mban̄g ō, Nebusajəban, ngol ngé kəla gə̄ kə́ ndogó mbangāá ō, Nergal Sareser kə́ ngol ngé rɔ̄ɔ̄ gə̄ malang ō, de kə́ bo gə̄ malang yā mban̄g kə́ Babilon tə́ ō,

¹⁴ əlan̄ gō Jeremi tə́ yā ɓɔ̄ɔ̄n kə Gedalia, ngōn̄ Ahikam kə́ ngōn̄ Sapan kadə̄ aw̄ seneé ɓēé looneé, i beé n Jeremi ndiń dan de gə̄ tə́ ní.

Najə̄ kə́ dɔ Ebed Melek tə́

¹⁵ Kɔ́ɔ̄ɓē ɔr̄ najə̄ kə Jeremi dan ń a rāań dəngáy ndágə loo ngɔ̄m̄ ta kújə yā mban̄g tə́ ní ədan na:

¹⁶ Āw̄ ɔ̄r̄ najə̄ kə Ebed Melek kə́ Kus ə́dan na: Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel, əda ní n toó: M-ā m̄-rāā kadə̄ najə̄ yāḿ əsō dɔ ɓē ń toō tə́. I yá̰á̰ kə́ to kum kaȳ aĺ n m-ā m̄-rāā kadə̄ teē dɔn tə́ ní, ba i yá̰á̰ kə́ majə alé. Ndɔ̄n tə́ ní, yá̰á̰ ní a rāā yá̰a̰ i ta kumií tə́.

¹⁷ Ndɔ̄ ń noō tə́ ní, m-ā m̄-gān̄g dɔí adə̄ əlanī jī de gə̄ ń ī-ɓōĺdə́ ngá̰ý ní tə́ alé.

¹⁸ M-ā m-ájiī gáŕ adə̄ a oy yo kaskar alé. Ré ə̄nī kemií ādə̄m̄ anī, ā ī-rāā rɔ̄nel̄ teē ń ā ī-teē ta yo tə́ ní. Najə̄ ń Kɔ́ɔ̄ɓē əda ní n noó.