JEREMI 38 - Bibəl ta Sar̄

Ənīn̄ Jeremi kem bəlo taā man̄ ndī tə́

¹ Sepatia kə́ ngōn̄ Matan ō, Gedalia kə́ ngōn̄ Pasəhur ō, Yukal kə́ ngōn̄ Selemia ō, Pasəhur kə́ ngōn̄ Malkiya ō, oōn̄ najə̄ gə̄ ń Jeremi tél a əda de gə̄ malang kə̄ nja naā tə́ ni. Ni-əda na:

² Najə̄ ń Kɔ́ɔ̄ɓē əda ní n toó Deē ń a ndi kem ɓē ń toō tə́ ní, a oy yo kaskar ō, yo ɓō ō, yo mo̰y ngāl̄bɔ̄gīí ō. Deē ń a teē yā kaw̄ nam̄ Kalde gə̄ anī, a ndi kə kumneé ō, a rāā rɔ̄nel̄ teē ń ni teē ta yo tə́ ní ō. Rɔ̄kum ni a ndi kə kumneé.

³ Mā Kɔ́ɔ̄ɓē m-ɔ̄r̄ najə̄ i tītə̄ ń toō beé: Ɓē ń toō a əsō kem jī ɓūtə̄ ngé rɔ̄ɔ̄ gə̄ yā mban̄g kə́ Babilon tə́ gáŕ. Nin̄ a taān̄.

⁴ De kə́ bo gə̄ ədan̄ mban̄g na: Ādə̄ jə-tɔ̄lī deē ń noō kɔ̄ɔ́, tɔdɔ̄ dan ń ɔr̄ najə̄ beé ní a rāā kadə̄ jī ngé rɔ̄ɔ̄ gə̄ ń na̰yn̄ kem ɓēé ō, jī de gə̄ malang ń ndin̄ kemeé ní ō a ur̄ wak kɔ̄ɔ́. Deē ń noō sāā kadə̄ de gə̄ ń toō ajən̄ alé. Ni sāā i kadə̄ yá̰á̰ kə́ to kum kaȳ aĺ tá rāādə́ ngóy.

⁵ Mban̄g Sedekias tél ədadə́ na: Ni i kem jīsí tə́, mban̄g asə mbātə́ najə̄ tasí tə́ alé.

⁶ Nin̄ əhɔn̄ Jeremi, ba ənīnən̄ kem bəlo taā man̄ yā Malkiya kə́ ngōn̄ ngār tə́. Bəlo ní i ndágə loo ngɔ̄m̄ ta kújə yā mban̄g tə́. Əlan̄ Jeremi bəloó i kə kəlaá. Man̄ gətóo kemeé, ba i bɔr ngóy, adə̄ Jeremi dubə̄ tū tə́.

⁷ Ebed Melek, de Kus ń a rāā kəla ndogó mbangāá ní, oō kadə̄ de gə̄ ənīn̄ Jeremi kem bəlo taā man̄ ndī tə́, dan ń mban̄g ndi a gān̄gəń sarya ta róbə yā Benjamḛ tə́ ní.

⁸ Ebed Melek teē kem kújə yā mban̄g tə́ ba aw̄ ɔr̄ najə̄ kə mbangāá.

⁹ Ni ədan na: Kɔ́ɔ̄ḿ mban̄g, i yá̰á̰ kə́ majaĺ ngá̰ý n de gə̄ ń toō rāān̄ kə Jeremi nge koō taá ní. Nin̄ ənīnən̄ kem bəlo ta man̄ ndī tə́. Ɓō a tɔ̄lən kemeé, tɔdɔ̄ mápa gətóo kem ɓē.

¹⁰ Tā anī mban̄g əda Ebed Melek kə́ Kus na: Ɔ́y de gə̄ mətá ba āw̄ sedə́ ɔ̄rī Jeremi nge koō ta kem bəlo taā man̄ ndī tə́ na sōgə́ oy.

¹¹ Ebed Melek ɔy de gə̄ gōn tə́ ba aw̄ kem kújə yā mban̄g tə́. Ni ɔy ngísə kūbə̄ gə̄ gír loo ngɔ̄m̄ yá̰a̰ kənge tə́. Ni do̰ō̰də́ kə kəlaá ba əlań adə̄ Jeremi kem bəlo ta man̄ ndī tə́.

¹² Ebed Melek kə́ Kus əda Jeremi na: Ə́la kūbə̄ gə̄ ń toō gíŕ sɔ́lí tə́ ba ə̄ndā kəlā dɔ tə́. Jeremi rāā yá̰á̰ ń ədan ní.

¹³ Nin̄ ndɔ́rə̄n̄ Jeremi kə kəlāá teēn̄ seneé kɔ̄ɔ́ kem bəlo taā man̄ ndī tə́. Jeremi ndi ndágə loo ngɔ̄m̄ ta kújə yā mban̄g tə́.

Mban̄g Sedekias mēr̄ kaw̄ koō taá ɓē Jeremi ɓáý to̰

¹⁴ Mban̄g Sedekias əla gō Jeremi nge koō ta tə́ kadə̄ aw̄n̄ seneé rɔ̄n tə́ ta róbə́ kújə́ kə́ nge ko̰ mətá yā Kɔ́ɔ̄ɓē tə́. Mban̄g əda Jeremi na: M-ā m̄-dəjeī najə̄ kógə̄ḿ, ba ī-mundə̄m̄ yá̰a̰ alé.

¹⁵ Jeremi tél əda Sedekias na: Ré m-ə́daī najə̄ kə́ rɔ̄kum anī, ā ī-tɔ̄lə̄m̄ ō, ré m-ādī kɔjə̄ anī, ā ōō aĺ ō.

¹⁶ Tā anī mban̄g Sedekias ənī ndūn adə̄ Jeremi loo mundə̄ tə́ əda na: Tītə̄ ń Kɔ́ɔ̄ɓē ndiń kə kumneé noō ō, ajəńjí ō ní, m-ā m̄-tɔ̄lī aĺ ō, m-ā m-ə́laī jī ngé ndə̄ngāí yo tə́ aĺ ō.

¹⁷ Anī Jeremi əda Sedekias na: Kɔ́ɔ̄ɓē, Nə́ɓā kə́ tɔ́gən i ngá̰ý, Nə́ɓā yā Israel, ɔr̄ najə̄ i tītə̄ ń toō beē: Ré ī-ndigə teē kaw̄ kəsō kem jī de kə́ bo gə̄ yā mban̄g kə́ Babilon tə́ anī, ā ī-teē ta yo tə́ ō, hor a o̰o̰ ɓē ń toō aĺ ō. Ḭ̄ ō, gír kojə yāí ō ā ī-ndiī kə kumsí.

¹⁸ Banī ré ī-teē āw̄ əsō kem jī de kə́ bo gə̄ yā mban̄g kə́ Babilon tə́ aĺ anī, ɓē ń toō a əsō jī Kalde gə̄ tə́ kadə̄ a əlan̄ hor dɔ tə́ ō, ḭ̄ ā ī-teē jīdə́ tə́ aĺ ō.

¹⁹ Mban̄g Sedekias tél əda Jeremi na: Yá̰á̰ ń m̄-sōl̄ ní i de kə́ Juda tə́ gə̄ ń əsōn̄ gír Kalde gə̄ tə́ ní. Majanī a əlamə̄n̄ jīdə́ tə́ yā kadə̄ əlan̄ rɔ̄sɔl̄ dɔḿ tə́.

²⁰ Jeremi tél əda na: A əlanī jīdə́ tə́ alé. Ōō ndū Kɔ́ɔ̄ɓē kem najə̄ gə̄ ń m-ɔ̄r̄ seí tə́ toō anī, yá̰a̰ malang a əsō naā tə́ majə ō, ā ī-teē ta yo tə́ ō.

²¹ Ba ré ī-mbātə́ teē anī, yá̰á̰ ń a rāā yá̰á̰ á Kɔ́ɔ̄ɓē rāā ta kumḿ tə́ adə̄ m-á̰a̰ā̰ ní n toó:

²² Dəyá̰ gə̄ malang ń na̰yn̄ kem kújə yā mban̄g kə́ Juda tə́ ɓáý ní, aw̄n̄ sedə́ kum kə̄ rɔ̄ de kə́ bo gə̄ yā mban̄g kə́ Babilon tə́. Dəyá̰ gə̄ ní ədan̄ na: Madə̄ taí kə́ ngá̰ý gə̄ kɔ́lnī ba o̰o̰n̄ ɓē dɔí tə́. Dan ń njaí dubə̄ bɔrɔɔ́ anī, nin̄ ɔrə̄n̄ rɔ̄də́ kɔ̄ɔ́.

²³ A aw̄n̄ kə nə̄yá̰í gə̄ malang ō, ngání gə̄ ō rɔ̄ Kalde gə̄ tə́. Īkɔ́ ā a̰ȳ yā tɔȳdə́ aĺ ō. Mban̄g kə́ Babilon a əhɔī kə jīneé ō, a əla hor dɔ ɓē ń toō tə́ ō.

²⁴ Sedekias əda Jeremi na: Ādə̄ deē kógə̄ḿ oō gotə najə̄ ń j-ɔr̄ kə naá toō aĺ bátə́ anī ā óy alé.

²⁵ Ré de kə́ bo gə̄ oōn̄ kadə̄ m-ɔ̄r̄ najə̄ seí ō, ré reē ədanī na: Ə̄nījí gotə najə̄ ń ə́da mban̄g ní ō, najə̄ ń mban̄g ədaī ní ō, ī-mundə̄jí yá̰á̰ kógə̄ḿ aĺ ō, ɓáa j-a jə-tɔ̄lī alé ní anī,

²⁶ ā ī-tél ə́dádə́ na: m̄-rāā mban̄g ɓɔ́ kadə̄ oō nduḿ, banī lōō kəla seḿ kem kújə yā Yonatan tə́ na tógə́ m-óy kemeé.

²⁷ De kə́ bo gə̄ malang reēn̄ rɔ̄ Jeremi tə́ dəjenən̄ najə̄. Ni-tél tūr̄də́ tītə̄ ń mban̄g ədanneé ní. Nin̄ dəjenən̄ gír kə ngangá alé adə̄ najə̄ ní ɓār̄ kə̄ loo gə̄ tə́ alé.

²⁸ Jeremi ndi ndágə loo ngɔ̄m̄ ta kújə yā mban̄g tə́ bátə́ kadə̄ Kalde gə̄ taān̄neé ɓē kə́ Jerusalem.