JEREMI 35 - Bibəl ta Sar̄

¹ Kɔ́ɔ̄ɓē ɔr̄ najə̄ kə Jeremi, ɓāl̄ yā Joakim, ngōn̄ Josias, mban̄g kə́ Juda tə́ ədan na:

² Āw̄ ə́nge de gə̄ kə́ gír kaa yā Rekab gə̄ tə́ ba ɔ̄r̄ najə̄ sedə́. Āw̄ sedə́ ɓē Kɔ́ɔ̄ɓēé kem kújə́ kógə̄ḿ tə́ ba ādə̄də́ kasə nduú adə̄ a̰ȳn̄.

³ Tā anī m-āw̄ m̄-sāā Yajania, ngōn̄ Yirmeyahu, ngōn̄ Habasinya ō, ngákó̰o̰n kə́ dəngam gə̄ malang ō, ngánən kə́ dəngam gə̄ malang ō, adə̄ i de gə̄ malang kə́ gír kaa yā Rekab tə́.

⁴ M-āw̄ sedə́ kújə yā Kɔ́ɔ̄ɓē tə́, kem kújə yā ngán Hanan kə́ ngōn̄ Yigədalyahu tə́. Adə̄ i kem kújə́ ń i kadə yā de kə́ bo gə̄ tə́ ō, i dɔɔ́ dɔ kem kújə yā Maseya ngōn̄ Salum kə́ nge ngɔ̄m̄ ta róbə́ kújə yā Kɔ́ɔ̄ɓē tə́ ō ní.

⁵ m̄-tə́ndā jóo gə̄ kə́ kasə nduú rosə kem ō, kópə gə̄ ō no de kə́ gír kaa yā Rekab tə́ gə̄ ba m-ə́dádə́ na kə a̰ȳn̄ kasə.

⁶ Nin̄ tél ədan̄ na: Jḭḭ j-a̰ȳ kasə nduú alé. Kaají Yonadab, ngōn̄ Rekab adə̄jí ndūn əda na: Sḭḭ̄ ō, ngáńsí gə̄ ō ā ā̰yī kasə nduú aĺ bátə́.

⁷ Ā ī-rāāī kújə aĺ ō, ā ī-dubī kum kōō aĺ ō, ā ə̄ndāī kāgə̄ nduú aĺ ō, ā ī-mangiī kāgə̄ nduú tām̄ yāsí tə́ aĺ ō, ba ā ī-ndiī i gíŕ kújə tandā gə̄ tə́ kə ndɔ̄ gə̄ malang ń sḭḭ̄ i kə dɔsí dɔɔ́ ɓáý ní yā kadə̄ ī-ndiīneé kə kumsí ta kaw̄ kə̄ jóo dɔ nang ń ə́hɔī loo tū tə́ ní tə́.

⁸ Jə-rāā yá̰a̰ malang kə gō ndū kaají Yonadab ngōn̄ Rekab adə̄ dā̰ rɔ̄jí jḭḭ kɔ́ gə̄ ō nə̄yá̰jí gə̄ ō, ngáńjí kə́ dəngam gə̄ ō, kə́ dəyá̰ gə̄ ō ní, j-a̰ȳ kasə nduú nja kógə̄ḿ aĺ bátə́.

⁹ Jə-rāā kújə kətojí aĺ ō, jə-mang kāgə̄ nduú, aláa loo ndɔr̄, aláa kōō kə́ yā ndɔr̄ aĺ ō.

¹⁰ Jə-to i gíŕ kújə tandā gə̄ tə́. Jə-rāā yá̰a̰ malang kə gō ndū ń kaají Yonadab ədańjí ní kə gōó majə.

¹¹ I dan ń Nabukodonosor, mban̄g kə́ Babilon taāń ɓē tə́ ní n j-əda naā na: I só tə́ kadə̄ j-a̰yī ɓūtə̄ ngé rɔ̄ɔ̄ yā Kalde gə̄ ō, Aram gə̄ ō, ba j-awī Jerusalem. Gír ndijí Jerusalem n noó.

¹² Anī Kɔ́ɔ̄ɓē əda Jeremi na:

¹³ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel əda ní n toó: Āw̄ ə́da de kə́ Juda tə́ gə̄ ō, de gə̄ ń ndin̄ Jerusalem tə́ ní ō na: Ā ī-mbātíī yá̰a̰ gə̄ ń m̄-ndóōsí ní ō, ā ī-mbātíī najə̄ kɔrə̄ḿ gə̄ ō i bátə́ rə́ngáý tə́? Najə̄ ń Kɔ́ɔ̄ɓē əda ní n noó.

¹⁴ Yonadab, ngōn̄ Rekab ɔgə̄ ngánən gə̄ ka̰ȳ kasə nduú anī nin̄ ɓōlə́n̄ ndíl najə̄ ń kaadə́ ədadə́ ní, adə̄ bátə́ ɓōólaā gə̄gē ní nin̄ a̰ȳn̄ kasə nduú alé. Banī mā m̄-ɔ̄r̄ najə̄ sesí kanjə̄ kɔr ta tə́ ba ōōī najə̄ yāḿ alé.

¹⁵ m̄-to dan kəla ngé kəla yāḿ gə̄ ń i ngé koō ta gə̄ ní kə̄ rɔ̄sí tə́ kadə̄ ədan̄sí na: Sḭḭ̄ kógə̄ḿ kógə̄ḿ malang ní ī-tūrī háĺsí kə́ majaĺ gə̄ rɔ̄kum, ī-tūrī yá̰a̰ rāāsí gə̄ ō, ī-lōōī ngɔ̄də̄ gō nə́ɓā kə́ rang gə̄ yā ndɔ̄ȳdə́ ō. Anī ā ī-ndiī dɔ nang ń m-ādə̄ kaasí gə̄ ō, madə̄sí sḭḭ̄ ō ní tə́. Banī sḭḭ̄ ī-nēlī mbīsí ōōīneé najə̄ yāḿ alé.

¹⁶ Ngán Yonadab gə̄ ɓōlə́n̄ ndíl najə̄ ń kaadə́ ədadə́ ní, ba gír de gə̄ ń toō oōn̄ najə̄ yāḿ alé.

¹⁷ I tām̄ən ń toō tə́ n Kɔ́ɔ̄ɓē kə́ tɔ́gən i ngá̰ý, Nə́ɓā yā Israel ɔr̄ najə̄ i tītə̄ ń toō beé ní: M-ā m̄-rāā kadə̄ yá̰á̰ kə́ to kum kaȳ aĺ gə̄ malang ń m-ɔ̄r̄ najə̄də́ sɔɔ̄ dɔ Juda ō sɔ̄ɔ̄ dɔ de gə̄ malang ń ndin̄ Jerusalem tə́ ō ní rāā yá̰a̰, tɔdɔ̄ m-ɔ̄r̄ najə̄ sedə́ ba oōn̄ aĺ ō, m̄-ɓāŕdə́ ba ndigən̄ ɓār̄ taḿ tə́ aĺ ō.

¹⁸ Jeremi əda de kə́ gír kaa yā Rekab tə́ gə̄ na: Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel əda ní n toó: Sḭḭ̄ ī-sɔlī dɔsí gír ndū ń kaasí Yonadab adə̄sí tə́ ō, ī-rāāī yá̰a̰ gə̄ malang ń ni ədasí kadə̄ ī-rāāī ní ō, ī-rāāī yá̰a̰ malang ń ni mersí rāā ō ní,

¹⁹ mā Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel m-ɔ̄r̄ najə̄ i tītə̄ ń toō beé: Yonadab, ngōn̄ Rekab a nal̄ de gə̄ kə́ yā kadə̄ ran̄ ta kumḿ tə́ kə dɔ ndɔ̄ gə̄ alé.