JEREMI 33 - Bibəl ta Sar̄

Yá̰á̰ kə́ majə gə̄ a reēn̄ kə̄ dɔ ɓē kə́ Jerusalem tə́

¹ Kɔ́ɔ̄ɓē ɔr̄ najə̄ kə Jeremi nja kə́ nge ko̰ jōó, dan ń ni i ndágə loo ngɔ̄m̄ ta kújə yā mban̄g tə́ ɓáý ní, ədan na:

² Kɔ́ɔ̄ɓē ń rāā dɔ nang ō, Kɔ́ɔ̄ɓē ń rāān adə̄ ra ngan̄g ō, ni ń rīn na i Kɔ́ɔ̄ɓē ní, ɔr̄ najə̄ i tītə̄ ń toō beé:

³ Ī-ɓārə́m̄ anī, m-ā m̄-ndigiī, m-ā m-ɔ́jiī yá̰á̰ kə́ bo ngá̰ý gə̄ kə́ ton̄ loo ɓɔ̄ɔ̄ rɔ̄ tə́, i yá̰a̰ gə̄ kə́ ī-ger̄ aĺ ɓáý.

⁴ Rɔ̄kum, Kɔ́ɔ̄ɓē Nə́ɓā yā Israel ɔr̄ najə̄ kə́ dɔ kújə gə̄ kə́ kem ɓē ń toō tə́ ō, kə́ dɔ kújə gə̄ yā mban̄g gə̄ kə́ Juda tə́ ō ń a nujən̄də́ kɔ̄ɔ́ kə ta kūl̄ nán̄g kə́ kɔsə dɔ naā tə́ ō, kaskar ō ní.

⁵ De gə̄ ḭḭ ənīn̄ Kalde gə̄ rɔ̄ɔ̄ i yā kadə̄ nīń de gə̄ ń m-ā m̄-tɔ̄ldə́ kə wōngōó ō, kə wōn̄g kə́ ngá̰ý ō ní taań kem kújə gə̄ ń noō. Tɔdɔ̄ m̄-tūr̄ gidəḿ kɔ̄ɔ́ ta ɓē ń toō tə́ najə̄ kem ndul yān tə́.

⁶ Banī m-ā m̄-rāā kadə̄ ni-tél ndi majə gogə́ tītə̄ kə́ kété. M-ā m̄-rāā kadə̄ rɔ̄də́ ngan̄g ō, ndin̄ lɔm ō, kanjə̄ kadə̄ yá̰á̰ kógə̄ḿ a̰ȳ ndíĺdə́.

⁷ M-ā m̄-tél yā kəndā Juda gə̄ ō, Israel gə̄ ō kijə. M-ā m̄-rāā kadə̄ nin̄ tél ndin̄ majə gogə́ tītə̄ kə́ kété.

⁸ M-ā m̄-tə́gó yá̰á̰ kə́ gōtə́ aĺ gə̄ malang ń rāān̄ á najə̄n əsō dɔdə́ tə́ ta kumḿ tə́ ní kadə̄ unjə̄n̄ njáý njáý. M-ā m̄-mā̰ȳ rɔ̄ḿ dɔ yá̰á̰ kə́ gōtə́ aĺ gə̄ malang ń rāān̄ á najə̄n əsō dɔdə́ tə́ ta kumḿ tə́ kə gō mbātə́ kə́ nin̄ mbātə́mə̄n̄ tə́ ní.

⁹ Ɓē ń toō a tél yá̰a̰ rāā rɔ̄nel̄ ō, yá̰a̰ tɔ̄ȳ ō, yá̰á̰ súū rɔ̄ ō, tām̄ yāḿ mā tə́, dɔ dáń nápar de gə̄ malang kə́ dɔ nang tə́ ń a oōn̄ kōō yá̰á̰ kə́ majə gə̄ malang ń m̄-rāā tām̄ yā Juda tə́ ō Israel tə́ ō ní. M-ā m-ādə̄ a ndin̄ majə ō, m-ā m-ādə̄də́ yá̰á̰ ngá̰ý ō, adə̄ a ɔr kumdə́ ō, a ndewn̄ ō.

¹⁰ Kɔ́ɔ̄ɓē ɔr̄ najə̄ i tītə̄ ń toō beé: Loo ń toō ń sḭḭ̄ ə́daī na i ndəbā ɓē ō, i loo kə́ de gə̄ ō, dā̰ gə̄ ō na gətóon̄ kemeé ō, kem ɓē kə́ Juda tə́ gə̄ ō, kum kə̄lá róbə kə́ to kum ko̰ kə́ Jerusalem gə̄ ō ń ə́daī na i loo kə́ kanjə̄ de gə̄ ō, kanjə̄ ngé ndi ɓē gə̄ ō, kanjə̄ dā̰ gə̄ ō ní, de gə̄ a oōn̄ kōō

¹¹ pā walya ō, najə̄ kə́ to rɔ̄nel̄ ō, pā yā ngaa dəyá̰ ō, rɔ̄nel̄ yā nge taā ngaa ō, pā gə̄ yā ngé gə̄ ń reē adə̄n̄ yá̰a̰ tun̄ gə̄ kə́ yā tɔ̄yń kem kújə yā Kɔ́ɔ̄ɓē tə́ ba ədan̄ na: Ī-tɔ̄yī Kɔ́ɔ̄ɓē kə́ bo kə́ tɔ́gən i ngá̰ý, tɔdɔ̄ kem majə yān to ngándáńg ō, ni-ra dɔ ndūn tə́ ngándáńg ō ní, ā ōōī kemeé ɓáý. Rɔ̄kum, m-ā m̄-tél yā kəndā ɓē ń toō kijə ō, m-ā m̄-rāā kadə̄ tél ndi majə gogə́ tītə̄ kə́ kété ō. Najə̄ ń Kɔ́ɔ̄ɓē əda ní n noó.

¹² Kɔ́ɔ̄ɓē kə́ bo kə́ tɔ́gən i ngá̰ý ɔr̄ najə̄ i tītə̄ ń toō beé: Loo ń toō i ndəbā ɓē ō, i loo kə́ kanjə̄ de gə̄ ō, kə́ kanjə̄ dā̰ gə̄ ō, kə gō ɓē kə́ tū tə́ gə̄ malang ō ní, nge kul̄ yá̰a̰ gə̄ a rāān̄ gong kə́ rang gə̄ tū tə́ yā kadə̄ batə̄ yādə́ gə̄ a taān̄neé koō.

¹³ Batə̄ gə̄ a tél yā mānə̄n̄ kə gō naá no nge tə́dádə́ tə́ kem ɓē gə̄ kə́ dɔ mbalá tə́ ō, kə́ mbal̄ bo gətóo tū tə́ ō, kem ɓē gə̄ kə́ Negeb tə́ ō, kem ɓē yā Benjamḛ tə́ ō, kə gō gidə ɓē kə́ Jerusalem ō, kem ɓē gə̄ kə́ Juda tə́ ō. Najə̄ ń Kɔ́ɔ̄ɓē əda ní n noó.

Nə́ɓā a tūr̄ ndūn ń ənī ní alé

¹⁴ Ndɔ̄ gə̄ ń a reēn̄ noō tə́ ní, m-ā m̄-rāā yá̰á̰ ń m-ə̄nī ndūḿ yā rāā kadə̄ ngán Israel gə̄ ō, ngán Juda gə̄ ō ní. Najə̄ ń Kɔ́ɔ̄ɓē əda ní n noó.

¹⁵ Kem ndɔ̄ gə̄ ń noō tə́ ní, m-ā m̄-rāā kadə̄ kōō Dabid a teē. I kōōn kə́ rɔ̄kum. Ni a rɔ̄ɔ̄ dɔ yá̰á̰ kə́ súmūú gə̄ tə́ ō, dɔ yá̰á̰ kə́ gōtə́ gə̄ tə́ ō kem ɓēé.

¹⁶ Ɓāl̄ yān tə́ ní, ngán Juda gə̄ a ajən̄ ō, de kə́ Jerusalem gə̄ a ndin̄ kanjə̄ kadə̄ yá̰á̰ kógə̄ḿ a̰ȳ ndíĺdə́ ō. Rī ń de gə̄ a ɓārə́n̄neé Jerusalem ní n toó: Kɔ́ɔ̄ɓē i nge rāājí kadə̄ jə-téliī de kə́ gōtə́ gə̄.

¹⁷ Najə̄ ń Kɔ́ɔ̄ɓē əda ní n toó: Dabid a nal̄ de kə́ kadə̄ a ndi dɔ kōr̄ kāgə̄ mbang yā de gə̄ kə́ gír kojə yā Israel tə́ alé.

¹⁸ Ngé tun̄ yá̰a̰ gə̄ kə́ gír yā Lebi tə́ a nalə̄n̄ de gə̄ kə́ kadə̄ a ndin̄ ta kumḿ tə́ gotədə́ tə́ yā ndējəń yá̰a̰ tun̄ kə́ yā róō horoó ō, yā róoń yá̰á̰ kə́ ndējə̄ gə̄ ō, yā kadə̄ń yá̰a̰ tun̄ gə̄ kə dɔ ndɔ̄ gə̄ malang ō alé.

¹⁹ Kɔ́ɔ̄ɓē ɔr̄ najə̄ kə Jeremií ədan na:

²⁰ Mā Kɔ́ɔ̄ɓē m-ɔ̄r̄ najə̄ i tītə̄ ń toō beé: Ré sḭḭ̄ ásiī gān̄g madə̄ naā ń m-ə́hɔ kə loo kə́ kadaá ō, m̄-rāā kə loo kə́ ndɔ̄ɔ́ ō ní, adə̄ loo kə́ kadaá ō, loo kə́ ndɔ̄ɔ́ ō unən̄ gō naā kə gōó to̰ aĺ anī,

²¹ madə̄ naā ń m-ə́hɔ kə nge kəla yāḿ Dabid ní a gān̄g kɔ̄ɔ́ ō. Ngōn̄ kaan kə́ a ndi dɔ kōr̄ kāgə̄ mbang yān tə́ yā ko̰o̰ń ɓē a gətóo. Madə̄ naā ń m-ə́hɔ kə ngé tun̄ yá̰a̰ gə̄ kə́ gír yā Lebi tə́ ń i de kə́ bo yāḿ gə̄ ní a gān̄g kɔ̄ɔ́ ō.

²² M-ā m̄-rāā kadə̄ ngán kaa nge kəla yāḿ Dabid ō, ngán kaa Lebi gə̄ ō ń i de kə́ bo yāḿ gə̄ ní, a bəlan̄ ngá̰ý tītə̄ tə́yō̰ gə̄ kə́ dɔ rā̰ tə́ gə̄ ō, nán̄g ngárə̄ḿnjēý kə́ ta bā bo tə́ ō ń deē asə tə́da aĺ ní.

²³ Kɔ́ɔ̄ɓē ɔr̄ najə̄ kə Jeremi ədan na:

²⁴ Īkɔ́ ī-ger̄ majə kadə̄ de gə̄ ń toō ədan̄ na Kɔ́ɔ̄ɓē na mbātə́ gír kojə kə́ jōó gə̄ ń na gə̄rā ní. Adə̄ kídə̄n̄ gír deē yāḿ gə̄ ba rāān̄də́ nápar de gə̄ tə́ to̰ alé.

²⁵ Banī Kɔ́ɔ̄ɓē ɔr̄ najə̄ i tītə̄ ń toō beé əda na: Mā ń m-ə́hɔ madə̄ naā kə loo kə́ kadaá ō, kə loo kə́ ndɔ̄ɔ́ ō, m̄-rāā ādə̄ yá̰a̰ gə̄ kə́ dɔ rā̰ tə́ ō, kə́ dɔ nang tə́ ō njə̄rān̄ kə gōó majə ō ní,

²⁶ kə m̄-mbātə́ de kə́ gír kaa yā Jakob tə́ gə̄ ō, kə́ gír kaa yā nge kəla yāḿ Dabid tə́ gə̄ ō a? Kə m̄-gə̄rā ngār gə̄ dan gír deē yā Dabid tə́ kadə̄ o̰ō̰n̄ ɓē dɔ gír kojə yā Abəraham tə́ ō, yā Isaak tə́ ō, yā Jakob tə́ ō, to̰ aĺ a? M-ā m̄-rāā ni ń noō alé! M-ā m̄-tél yā kəndādə́ kijə, tɔdɔ̄ kumḿ o̰o̰m̄ sedə́.