JEREMI 32 - Bibəl ta Sar̄

Jeremi mang loo ndɔr̄ kógə̄ḿ

¹ Kem ɓāl̄ kə́ nge ko̰ kutə ń Sedekias ndiń mban̄g Juda tə́ á i ɓāl̄ kə́ nge ko̰ kutə gidə i sɔ́sɔ́ yā Nabukodonosor ní, Kɔ́ɔ̄ɓē ɔr̄ najə̄ kə Jeremi.

² Dan ń noō tə́ ní, ɓūtə̄ ngé rɔ̄ɔ̄ yā mban̄g kə́ Babilon tə́ gə̄ gīrə̄n̄ gidə ɓē kə́ Jerusalem, əhɔn̄ Jeremi nge koō ta əndānən̄ i ndágə loo ń ngé ngɔ̄m̄ ta kújə yā mban̄g kə́ Juda tə́ gə̄ ran̄ tū tə́ ní tə́.

³ Sedekias, mban̄g kə́ Juda əhɔn dəngáy adə̄ ndi i loo ń noō tə́ tɔdɔ̄ əda na: I tām̄ rí tə́ á ɔ̄r̄ najə̄ gə̄ ń toō ə́da na: Kɔ́ɔ̄ɓē ɔr̄ najə̄ i tītə̄ ń toō beé: M-ā m-ə́la ɓē ń toō gíŕ tɔ́gə yā mban̄g kə́ Babilon tə́, ni a taā ɓē ní kɔ̄ɔ́ ní?

⁴ Ə́da na Sedekias, mban̄g kə́ Juda na a teē jī Kalde gə̄ tə́ alé, banī na a əlanən̄ kə́ rɔ̄kum tə́ jī mban̄g kə́ Babilon tə́? Ni na a ɔr̄ najə̄ seneé kə taneé ō, na a a̰a̰n kə kumneé ō ní?

⁵ Ə́da na, mban̄g kə́ Babilon tə́ na a əhɔ Sedekias yā kaw̄ seneé Babilon tə́ ō, na a ndi na i noó bátə́ kadə̄ Kɔ́ɔ̄ɓē ədań najə̄ kə́ dɔn tə́ ō ní? Tá ə́da na ré jə-nā rɔ̄ɔ̄ de kə́ Kalde tə́ gə̄ anī, na j-a jə-tetə rɔ̄ɔ̄ aĺ ō, ə́da na najə̄ ń Kɔ́ɔ̄ɓē əda ní n noó ō ní?

⁶ Jeremi əda na: Kɔ́ɔ̄ɓē ɔr̄ najə̄ seḿ tītə̄ ń toō beé:

⁷ Ngōn̄ nānīí Salum ń rīn na i Hanamel ní a reē yā kə́daī na: Loo ndɔr̄ yāḿ kə́ Anatot gō nang yā Benjamḛ tə́ ní, ī-mang. Majə kadə̄ i ḭ̄ n ə́nge loo ndɔr̄ ní tɔdɔ̄ sɔɔ̄ i dɔí ḭ̄.

⁸ Tītə̄ ń Kɔ́ɔ̄ɓē ədamə̄ń ní, ngōn̄ nānə̄ḿ Hanamel reē rɔ̄ḿ tə́ ndágə loo ngɔ̄m̄ ta kújə yā mban̄g tə́ ba ədam̄ na: Ī-mang ndɔr̄ yāḿ kə́ Anatot tə́ ń i gō nang yā Benjamḛ tə́ ní. Tɔdɔ̄ sɔɔ̄ i dɔí ḭ̄ ō, majə kadə̄ i ḭ̄ n ə́nge ō. Ní ī-mang ndɔr̄ ní. Tā anī m̄-ger̄ kadə̄ i Kɔ́ɔ̄ɓē n ɔr̄ najə̄ seḿ ní.

⁹ m̄-mang ndɔr̄ ní jī Hanamel ngōn̄ nānə̄ḿ tə́ ní i Anatot. m̄-mbɔ̄jə́ kɔȳ sə́lē kə́ kutə gidə i sīrí ní m-ādə̄n.

¹⁰ m̄-ndang makətūbə̄ kə́ ɔjə dɔ loo ń m̄-mang ní, ba m-ə̄ndā tambō̰o̰ tū tə́, ta kum de gə̄ ń m̄-ɓāŕdə́ kadə̄ reēn̄ kum tə́ ní. m̄-mbɔ̄jə́ kɔȳ nar ní dɔ yá̰a̰ mbɔ̄jə́ kɔȳ yá̰á̰ tə́.

¹¹ Gō tə́ anī, m-ún makətūbə̄ mang naā ndɔr̄ ní, adə̄ i nge ń najə̄ kə́ dɔ ndɔr̄ ní tə́ ō, ndū gə̄ ō, tambō̰o̰ ō i dɔ tə́ ní ō, nge ń kemən to kə teē ní ō, ba m-ādə̄

¹² Baruk, ngōn̄ Neriya kə́ ngōn̄ Maseya, makətūbə̄ mang naā ndɔr̄ ní ta kum Hanamel kə́ ngōn̄ nānə̄ḿ tə́ ō, ta kum de kə́ kum tə́ gə̄ ń əndān̄ jīdə́ gír makətūbə̄ ní tə́ ō, ta kum de gə̄ malang kə́ Juda tə́ ń ran̄ ndágə loo ngɔ̄m̄ ta kújə yā mban̄g tə́ ní ō.

¹³ M-ə́da Baruk ta kumdə́ tə́ na:

¹⁴ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel əda ní n toó: Ī-taā makətūbə̄ gə̄ ń toō. Ī-taā makətūbə̄ mang naā ndɔr̄ kə́ do̰ō̰ kə́ əndān̄ tambō̰o̰ dɔ naā tə́ ń toō ō, ni kə́ to kə teē ń toō ō, ba ī-ɓōkə́də́ kem jóó nánjə́ kə́ tə́ngā tə́ kadə̄ ton̄ majə ta kaw̄ jóo.

¹⁵ Tɔdɔ̄ najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel, əda ní n toó: De gə̄ a mangən̄ kújə gə̄ ō, loo ndɔr̄ gə̄ ō, kāgə̄ nduú gə̄ ō kem ɓē ń toō tə́.

Ndɔ̄ȳ yā Jeremi

¹⁶ Gō tə́ dan ń m̄-ɓɔ̄ɔ̄ Baruk ngōn̄ Neriya makətūbə̄ mang naā ndɔr̄ ní gír gān̄g anī, m̄-rāā Kɔ́ɔ̄ɓē ɓɔ́ m-ə́da na:

¹⁷ Á Kɔ́ɔ̄ɓē Nə́ɓā, i ḭ̄ n ī-rāā dɔ rā̰ ō, dɔ nang ō, kə ta kūl̄ tɔ́gí kə́ ngá̰ý ɔ́jəń tɔ́gí kə̄ ndágá ní. Yá̰á̰ kə́ dum̄ tɔ́gí gətóo.

¹⁸ I ḭ̄ n ī-rāā majə kə de gēé bátə́ ugə̄ń dɔ gír kojə kə́ nge ko̰ dūbú tə́ ní, ba ḭ̄ ī-rāā ādə̄ ngán gə̄ əgān̄ kə̄rā majaĺ yā bɔbə̄də́ gə̄ ō. Nə́ɓā kə́ bo, go̰ rɔ̄ɔ̄ kə́ ɔl watang, rīí na i Kɔ́ɔ̄ɓē kə́ bo kə́ tɔ́gən i ngá̰ý.

¹⁹ Nə́ɓā kə́ nge ger̄ kadə̄ kɔjə ngá̰ý ō, nge ger̄ rāā yá̰á̰ ngá̰ý ō, ə̄ndā kumií gíŕ hál de gə̄ tə́ malang ō, ə̄ndā njadə́ kógə̄ḿ kógə̄ḿ kə gō hál rāādə́ gēé ō, yá̰a̰ rāādə́ gēé ō.

²⁰ Ḭ̄ ɔ́jə rɔ̄í kə̄ ndágá kem ɓē kə́ Ejiptə i kə yá̰á̰ kə́ to kɔr kum gə̄ kə́ kumdə́ i ngá̰ý ō, ton̄ bátə́ ɓōólaā ō. Tá ḭ̄ ī-rāā ādə̄ rīí ɓār̄ gō nang kə́ Israel tə́ ō, dɔ nang tə́ malang ō, adə̄ ɓōólaā gə̄gē a j-a̰a̰ kə kumjí ɓáý.

²¹ Ḭ̄ ɔ́jə rɔ̄í kə̄ ndágá kə ta kūl̄ yá̰a̰ rāāí kə́ majə to ɓōĺ ngá̰ý gə̄ ō, kə ta kūl̄ tɔ́gə jīí ō, adə̄ ḭ̄ ɔ́jə́ tɔ́gí kə́ majə to ɓōĺ ngá̰ý malang kə̄ ndāgá ī-teēń kə gír deē yāí gə̄ ń i ngán Israel gə̄ ní kɔ̄ɔ́ kem ɓē kə́ Ejiptə tə́.

²² Ḭ̄ ādə̄də́ ɓē ń toō ń ə̄nī ndūí dɔ tə́ ō, ī-túbə ō yā kadə̄ kaadə́ gə̄ ní. I ɓē kə́ mba ō, yibə̄ tejə ō ngá̰ý tū tə́.

²³ Nin̄ udən̄ kem ɓē ní tə́ ō, taān̄ kə́ yādə́ tə́ ō, banī mbātə́n̄ ndūí ō, mbātə́n̄ rāā yá̰á̰ ń ndū najə̄ yāí gə̄ ədan̄ ní ō. Nin̄ mbātə́n̄ rāā yá̰a̰ malang ń ə́dádə́ kadə̄ rāān̄ ní kɔ̄ɔ́. I tām̄ ń toō tə́ n ḭ̄ ī-rāā ādə̄ yá̰á̰ kə́ to kum kaȳ aĺ gə̄ malang ń toō rāādə́ ní.

²⁴ Kalde gə̄ ɔsən̄ nán̄g kə̄ dɔ naā tə́ kadə ndogə̄ mbal̄ tə́ gidə ɓē tə́ yā taāń ɓē. Ɓē a əsō kem jī Kalde gə̄ ń ənīnən̄ rɔ̄ɔ̄ ō, rāān̄ kumən ndoō tə́ kə kaskaraá ō, kə ɓōó ō, kə mo̰y ngāl̄bɔ̄gīí ō ní. Yá̰á̰ ń ə́da ní rāān rɔ̄kum ba ḭ̄ ī-ndi á̰a̰ loo kə̄ rɔ̄n tə́.

²⁵ Kɔ́ɔ̄ɓē Nə́ɓā, ḭ̄ ī-ger̄ majə kadə̄ ɓē a əsō kem jī Kalde gə̄ tə́, ba i tām̄ rí tə́ á ī-mērə̄m̄ mbɔ̄jə́ nar ta kum de kə́ kum tə́ gə̄ tə́ yā mangəń loo ndɔr̄ ní?

Kɔ́ɔ̄ɓē tél ɔr̄ najə̄ kə Jeremi

²⁶ Tā anī Kɔ́ɔ̄ɓē ɔr̄ najə̄ kə Jeremi ədan na:

²⁷ Mā Kɔ́ɔ̄ɓē i Nə́ɓā yā de gə̄ malang. Yá̰á̰ kə́ yā dum̄ taḿ i rí?

²⁸ Ɓá anī m-ā m-ə́la ɓē ń toō gír tɔ́gə yā Kalde gə̄ tə́ ō, gír tɔgə yā Nabukodonosor mban̄g kə́ Babilon tə́ ō. Ni a taā ɓē ní.

²⁹ Kalde gə̄ ń ənīn̄ ɓē ń toō rɔ̄ɔ̄ ní a udən̄ kemeé. A əlan̄ hor dɔ tə́ yā róōnəń naā tə́ kə kújə gə̄ ń de gə̄ róōn̄ yá̰a̰ ndējə̄ gə̄ kə́ tām̄ yā Baal tə́ ō, tə́ten̄ kasə adə̄n̄ nə́ɓā kə́ rang gə̄ ō, dɔ tə́ dɔɔ́ adə̄ wōn̄g rāām̄ ní. Kɔ́ɔ̄ɓē ɔr̄ najə̄ i tītə̄ ń noō.

³⁰ Rɔ̄kum, kə ngōn̄ dūúdə́ bátə́ ɓōólaā ní Israel gə̄ ō, Juda gə̄ ō, ton̄ i dan rāā yá̰á̰ kə́ nel̄ kemḿ aĺ tə́. Ngán Israel gə̄ rāān̄ kəla kadə̄m̄ wōn̄g sɔɔ̄ń kəla rāādə́ gə̄.

³¹ Əla gír ndɔ̄ ń əndān̄əń ɓē ń toō tə́ bátə́ ɓōólaā ní, ɓē toō rāā i kəla kadə̄m̄ wōn̄g, i wōn̄g kə́ ngá̰ý. Ní, m-ā m-á̰a̰n ta kumḿ tə́ to̰ alé,

³² najə̄ yá̰á̰ kə́ majaĺ gə̄ malang ń Israel gə̄ ō, Juda gə̄ ō rāān̄ tə́ ní. Nin̄ ō, mban̄g yādə́ gə̄ ō, de kə́ bo yādə́ gə̄ ō, ngé tun̄ yá̰a̰ yādə́ gə̄ ō, ngé koō ta yādə́ gə̄ ō, de kə́ Juda tə́ gə̄ ō, de gə̄ ń ndin̄ Jerusalem ō ní,

³³ nin̄ tūrə̄n̄ i gə́ra gōdə́ n adə̄mə̄n̄ ní ba i nɔtə nodə́ alé. m̄-ndóōdə́ yá̰a̰ kanjə̄ kɔr ta tə́ gə̄gē, ba nin̄ əndān̄ mbīdə́ gírí aĺ ō, ndigən̄ yá̰a̰ gə̄ ń m̄-ndóōdə́ ní aĺ ō.

³⁴ Nin̄ tə́ndān̄ yá̰á̰ kə́ to yḛr gə̄ ń i ɓesə̄ yādə́ gə̄ ní kem kújə́ ń rīḿ ɓār̄ dɔ tə́ ní. Tām̄ ń toō tə́ ní, nin̄-rāān̄ beé adə̄ kújə́ ní téĺ kə́ yḛr.

³⁵ Rāān̄ loo kə́ ḭḭ kə̄ dɔɔ́ gə̄ tām̄ yā ɓesə̄ Baal tə́ wól loo kə́ Ben Hinom tə́, yā tɔ̄lə̄ń ngáńdə́ kə́ dəngam gə̄, kə kə́ dəyá̰ gə̄ dɔ tə́ yā kadə̄ ɓesə̄ Molok. I yá̰á̰ kə́ m-ə́dádə́ kadə̄ rāān̄ aĺ ō, i majaĺ kə́ to ɓōĺ ngá̰ý kə́ m̄-gír̄ mēr̄ ngán Juda gə̄ rāā kadə̄ nin̄ ndɔmə̄n̄neé ta róbə aĺ ō.

³⁶ Ɓáa ngɔlaā ní, Kɔ́ɔ̄ɓē Nə́ɓā yā Israel ɔr̄ najə̄ dɔ ɓē ń sḭḭ̄ ə́daī na a əsō kem jī mban̄g kə́ Babilon tə́ kə kaskaraá ō, kə ɓōó ō, kə mo̰y ngāl̄bɔ̄gīí ō ní i tītə̄ ń toō beé:

³⁷ M-ā m-ḭ́ḭ sedə́ kə gō ɓē gə̄ malang ń m̄-tə̄ndā m̄-tḭ̄ḭ̄də́ tū tə́ kə wōngōó ō, wōn̄g kə́ ngá̰ý ō, kə́ al̄ naā ngá̰ý ō ní yā kɔsə dɔdə́ naā tə́. M-ā m̄-tél yā reē sedə́ gogə́ loo ń toō tə́ ō, m-ā m-ə̄ndādə́ kadə̄ ndin̄ laā kanjə̄ kadə̄ yá̰á̰ kógə̄ḿ a̰ȳ ndíĺdə́ ō.

³⁸ Nin̄ a télən̄ gír deē yāḿ gə̄ ō, mā m̄-tél Nə́ɓā yādə́ ō.

³⁹ M-ā m-ādə̄də́ ngarā̰ kem ō, háĺ kə́ kógə̄ḿ beē ō, yā kadə̄ ɓōlə́n̄neé ndílə́ḿ ngándáńg tām̄ yā majə yādə́ tə́ ō, tām̄ majə yā ngáńdə́ gə̄ kə́ gotədə́ tə́ ō.

⁴⁰ M-ā m-ə́hɔ madə̄ naā sedə́ kadə̄ a to ngándáńg. M-ā m̄-rāā majə sedə́, kanjə̄ kɔr ta tə́ ō, m-ā m̄-rāā kadə̄ a ɓōlə́n̄ ndílə́ḿ ngarā̰ kemdə́ tə́ ō, yā kadə̄ ɔrə̄n̄ rɔ̄də́ sa̰y rɔ̄ḿ tə́ to̰ aĺ i kə́ bátə́ gə̄ tə́.

⁴¹ Rɔ̄ḿ a nelə̄m̄ tām̄ majə kə́ m̄-rāā sedə́ tə́. Rɔ̄kum, m-ā m-ə̄ndādə́ kə́ rɔ̄ rɔ́ gə̄ tə́ kem ɓē ń toō tə́ kadə̄ tə́lan̄ ngəradə́ ngan̄g. M-a m̄-rāā yá̰á̰ ń noō i kə ngarā̰ kemḿ malang ō, i kə rɔ̄ḿ kə taá ō.

⁴² Rɔ̄kum, Kɔ́ɔ̄ɓē ɔr̄ najə̄ i tītə̄ ń toō beé: M-ā m̄-rāā kadə̄ yá̰á̰ kə́ majə gə̄ ń m-ə̄nī ndūḿ dɔ tə́ tām̄ yā gír ɓē ń toō tə́ ní, reēn̄ ngá̰ý dɔn tə́ tītə̄ ń m̄-rāań m-ādə̄ yá̰á̰ kə́ to kum kaȳ aĺ reēń ngá̰ý dɔn tə́ ní.

⁴³ Ɓē ń toō ń sḭḭ̄ ə́daī na i loo kə́ to kum ko̰o̰ ō, loo kə́ de gə̄ ō, dā̰ gə̄ ō na gətóon̄ kemeé ō, loo kə́ na əsō jī de kə́ Kalde tə́ gə̄ kɔ̄ɔ́ ō ní, de gə̄ a mangən̄ ndɔr̄ gə̄ kə́ kemeé.

⁴⁴ A mbɔ̄jə́n̄ nar yā mangəń loo ndɔr̄ gə̄ ō, a ndangən̄ makətūbə̄ kə́ ɔjə dɔ ō, a ɓārə́n̄ de gə̄ kadə̄ nin̄ i kə́ kum tə́ yā kəndāń tambō̰o̰ tū makətūbə̄ ní tə́ ō. A ḭḭn̄ i kem ɓē gə̄ kə́ Juda tə́ ō, kem ngé kə́ dɔ mbalá gə̄ tə́ ō, ngé kə́ mbal̄ bo gətóo tū tə́ gə̄ tə́ ō, ngé kə́ Negeb tə́ gə̄ ō n a reēn̄ ní. Tɔdɔ̄ m-ā m̄-tél yā kəndādə́ kijə. Najə̄ ń Kɔ́ɔ̄ɓē əda ní n noó.