JEREMI 30 - Bibəl ta Sar̄

Nə́ɓā ənī ndūn adə̄ ɓē ko̰o̰ kə́ Israel tə́

¹ Kɔ́ɔ̄ɓē ɔr̄ najə̄ kə Jeremií ədan na:

² Mā Kɔ́ɔ̄ɓē, Nə́ɓā yā Israel m-ɔ̄r̄ najə̄ i tītə̄ ń toō beé: Ī-ndang najə̄ gə̄ malang ń m-ə́daī ní kem makətūbūú.

³ Kem ndɔ̄ gə̄ ń a reēn̄ noō tə́ ní m-ā m̄-tél yā kənda Israel ō, Juda ō ń i gír deē yāḿ gə̄ ní kijə. M-ā m̄-tél yā reē sedə́ gogə́ kem ɓē ń m-ādə̄ kaadə́ gə̄ ō, nin̄ a əngen̄ yá̰a̰ ndəbā tə́ ō ní. Najə̄ ń Kɔ́ɔ̄ɓē əda ní n noó.

⁴ Najə̄ gə̄ ń Kɔ́ɔ̄ɓē əda kə́ sɔɔ̄ dɔ Israel ō, Juda ō ní ń toó:

⁵ Najə̄ ń Kɔ́ɔ̄ɓē əda ní n toó: De gə̄ oōn̄ kōō kɔŕ kə́ to ɓōĺ ngá̰ý. I ɓōĺ kə́ al̄ naā, lɔm gətóo.

⁶ Ī-dəjeī najə̄ ōōī ké de kə́ dəngam gə̄ ojən̄ ngán gə̄ ō wa. M-á̰a̰ de kə́ dəngam kə́ ngan̄g majə gə̄ tə́nīn̄ jīdə́ dɔ kemdə́ tə́, tītə̄ dəyá̰ gə̄ kə́ a rāān̄ kem beé. I tām̄ rí tə́ á ta kum de gə̄ malang tél kə́ rang ō, tetə ndaa kɔ̄ɔ́ ō ní?

⁷ I yá̰á̰ kə́ to kum kaȳ aĺ kə́ ba̰ý beē! Rɔ̄kum, ndɔ̄ ní i ndɔ̄ kə́ to ɓōĺ ngá̰ý, ndɔ̄ kə́ tītə̄n gətóo. I kum mbang wur kɔl kə́ to ɓōĺ ngá̰ý tām̄ yā Jakob tə́. Banī ni a teē kum tə́ karī.

⁸ Ndɔ̄ ń noō tə́ ní m-ā m̄-tétə̄ njúkə yān naā tə́ ō, m-ā m-ɔ̄r̄ kɔ̄ɔ́ míndən tə́ ō, m-ā m̄-gán̄g kəlān gə̄ ō. Ni a əla dɔn gíŕ tɔ́gə yā tə̄rā gə̄ tə́ to̰ aĺ i kə́ bátə́ gə̄ tə́.

⁹ Jakob gə̄ a rāān̄ kəla yā kadə̄ Kɔ́ɔ̄ɓē Nə́ɓā yādə́ ō, yā kadə̄ mban̄g yādə́ Dabid ń m-ā m-ə́ndān dɔdə́ tə́ ní ō. Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n noó.

¹⁰ Ḭ̄, nge kəla yāḿ Jakob, ī-lōō ɓōĺ, Israel ī-lōō kə ndebə. M-ā m̄-taāī kɔ̄ɔ́ jī ɓē kə́ sa̰y gə̄ tə́ ō, m-ā m̄-gān̄g dɔ ngán kaaí gə̄ dɔ nang ń aw̄n̄ sedə́ tū tə́ ní tə́ ō. Jakob a tél yā reē, ni a ənī kemən mámák yā ndiń. Ni a ndi jəke ō, deē a a̰ȳ ndílən to̰ aĺ bátə́ ō. Najə̄ ń Kɔ́ɔ̄ɓē əda ní n noó.

¹¹ Mā i naā tə́ seí yā gān̄g dɔí. M-ā m-ādə̄ nápar de gə̄ malang ń m̄-tə̄ndā m̄-tḭ̄ḭ̄sí dandə́ tə́ ní gətóon̄ kɔ̄ɔ́. Ba ḭ̄ tá m-ā m̄-rāā kadə̄ ā ī-gətóo kɔ̄ɔ́ kə taá malang alé. M-ā m-ə́ndaī najə̄ yá̰a̰ rāāí gə̄ tə́ kanjə̄ kəndā njaḿ dɔ nge kə́rēý tə́.

¹² Kɔ́ɔ̄ɓē ɔr̄ najə̄ i tītə̄ ń toō beé: Ī-nujə i nujə kə́ al̄ naā ngá̰ý adə̄ dum̄ kəndaī ta naā tə́. Do gə̄ kə́ rɔ̄í tə́ i kə́ dum̄ kedə̄.

¹³ De kə́ yā kəndā rɔ̄n ta najə̄ yāí tə́ gətóo. Kḭ̄ḭ̄ kə́ yā do̰ō̰ń do səya̰ yāí kadə̄ edə̄ gətóo.

¹⁴ Dɔ ngé sāāí gə̄ malang ndigə̄nalií kɔ̄ɔ́. Gírə̄n̄ dɔí tə́ to̰ alé. M-ə́ndaī tītə̄ ń madə̄ ba̰ā̰í ḭ̄ deē a əndaīneé ní. I yá̰á̰ kə́ tōr̄ ngá̰ý n m̄-rāā seí ní, kadə̄ ī-gerə̄ń gō majaĺ yāí kə́ ngá̰ý gə̄ ō, yá̰á̰ kə́ gōtə́ aĺ yāí kə́ ngá̰ý gə̄ ō.

¹⁵ Ba̰ý á ī-nōō rɔ̄í dɔ nujə kə́ ī-nujə sák sák tə́ beē? Do yāí i kə́ dum̄ kedə̄. I ndéý kə́ m-ə́ndaī najə̄ yā majaĺ yāí kə́ ngá̰ý gə̄ tə́ ō, i najə̄ yā yá̰á̰ kə́ gōtə́ aĺ yāí kə́ ngá̰ý gə̄ tə́ ō.

¹⁶ Ɓáa de gə̄ malang ń nujən̄ seí ní, a nujən̄ sedə́ ō, a əhɔn̄ madə̄ ba̰ā̰í gə̄ náḿ náḿ yā kaw̄ sedə́ dɔ nang kə́ rang tə́ ō. De gə̄ ń nujən̄ kə yá̰a̰ yāí ní a nujən̄ kə yá̰a̰ yādə́ ō. De gə̄ malang ń ɔyn̄ yá̰a̰ yāí dɔ gúú tə́ ní m-ā m-ə́ya̰ kadə̄ ɔyn̄ yá̰a̰ yādə́ dɔ gúú tə́ ō.

¹⁷ M-ā m̄-rāā kadə̄ rɔ̄í əsō naā tə́ majə ō, kadə̄ doí gə̄ edə̄n̄ ō. Tɔdɔ̄ de gə̄ ɓāríīn̄ na i yá̰á̰ kə́ ɓōkə́ kɔ̄ɔ́ ō, Siyo̰ ń de kə́ usən dɔ tə́ gətóo ō ní. Najə̄ ń Kɔ́ɔ̄ɓē əda ní n noó.

¹⁸ Najə̄ ń Kɔ́ɔ̄ɓē əda ní n toó: M-ā m̄-tél yā rāā kújə tandā gə̄ yā Jakob gogə́ rang. Kumḿ a o̰o̰m̄ kə kújə yān gēé. A télən̄ yā kəndā ɓē gə̄ kógə̄ḿ kógə̄ḿ gotədə́ kə́ kété gə̄ tə́. A télən̄ yā kəndā kújə́ kə́ majə ngá̰ý gə̄ loo radə́ gə̄ tə́.

¹⁹ Pā ndadə̄ gə̄ kə́ tū tə́ a ɓār̄ kə̄ dɔɔ́ dɔɔ́. I kōō ngé rāā nāā gə̄ n a ɓār̄ ní. M-ā m̄-rāādə́ kadə̄ ojən̄ naā ngá̰ý, kutədə́ a tél kə̄ gogə́ to̰ aĺ bátə́. M-ā m-ɔ́r tadə́, m-ā m̄-rāādə́ jingəling to̰ aĺ ō.

²⁰ Ngánən gə̄ a télən̄ yā ndi majə tītə̄ kə́ kété ō, deē yān gə̄ a télən̄ yā kán̄ naā majə ta kumḿ tə́ ō. Ngé rāā kumən ndoō tə́ gə̄ malang ní m-ā m-ɔ́jə́də́ kum ō.

²¹ Ngār yān a teē i dan gír deē yān nəkɔ́ gə̄ tə́. A ojən̄ nge ko̰o̰ ɓē yān i ɓēé looneé. M-ā m̄-rāān kadə̄ ndɔ́tə̄ kə̄ ngɔr. Ni a reē rɔ̄ḿ tə́. Tɔdɔ̄ i náā n a asə nāā ndɔ́tə̄ kum kə̄ rɔ̄ḿ tə́ ní? Najə̄ ń Kɔ́ɔ̄ɓē əda ní n noó.

²² Sḭḭ̄ ā ī-téliī gír deē yāḿ gə̄ ō, mā m-ā m̄-tél Nə́ɓā yāsí ō.

²³ Á̰a̰ī néĺ ń əla kə tɔ́gɔ́ noō. I wōn̄g yā Kɔ́ɔ̄ɓē n ḭḭ seneé ní. Nél balway əla kə ngangá ngá̰ý kum kə̄ dɔ de gə̄ ń najə̄ i dɔdə́ tə́ ní.

²⁴ Wōn̄g kə́ ngá̰ý yā Kɔ́ɔ̄ɓē a tetə alé, bátə́ kadə̄ yá̰a̰ gə̄ ń núm̄ kemən tə́ yā rāā ní udə gírí majə. Ndɔ̄ ń tə́ anī, sḭḭ̄ ā ī-gerī kum ɓáý.