JEREMI 27 - Bibəl ta Sar̄

Jeremi ənī njúkə́ míndən tə́

¹ Ta kəla gír ko̰o̰ ɓē yā Sedekias, ngōn̄ Josias mban̄g kə́ Juda tə́ ní, Kɔ́ɔ̄ɓē ɔr̄ najə̄ ń toō kə Jeremi ədan na:

² Mā Kɔ́ɔ̄ɓē m-ɔ̄r̄ najə̄ i tītə̄ ń toō beé: Ī-səre kəlā gə̄ ō, ī-tɔ́ĺ sáa kāgə̄ gə̄ njúkə́ tə́ ō. Ā ə̄nī njúkə́ ní míndí ḭ̄kɔ́ tə́ ō,

³ ā ə́lań yā kadə̄ mban̄g kə́ Edom ō, kə́ Moab ō, mban̄g yā Amon gə̄ ō, mban̄g kə́ Tir ō, kə́ Sidon ō. Ā ādə̄ i ngé kɔsə kum gotə ɓē ko̰o̰ gə̄ ń ugə̄n̄ Jerusalem rɔ̄ Sedekias, mban̄g kə́ Juda tə́ ní n kadə̄ aw̄n̄neé adə̄n̄ mban̄g gə̄ ní.

⁴ Ā ə̄ndā najə̄ ń toō tadə́ tə́ kadə̄ ədan̄ kɔ́ɔ̄də́ gə̄: Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel ɔ̄r̄ najə̄ i tītə̄ ń toō beé: Yá̰á̰ ń kadə̄ ə́daī kɔ́ɔ̄sí gə̄ ní n toó:

⁵ I mā n m̄-rāā dɔ nang ō, de gə̄ ō, dā̰ gə̄ ō, kə́ tū tə́ ní. m̄-rāādə́ kə tɔ́gə́ḿ kə́ ngá̰ý, m-ɔ́jəń tɔ́gə́ḿ kə̄ ndágá ní. Deē nəkɔ́ ń kemḿ ndigə anī m-ādə̄n dɔ nang ní karī.

⁶ Ngɔlaā ní, i mā n m-ə́la ɓē gə̄ ń toō malang gír tɔ́gə yā nge kəla yāḿ Nabukodonosor, mban̄g kə́ Babilon tə́ ní. Dā̰ kə́ bembeé gə̄gē a i mā n m-ə́ládə́ gíŕ tɔ́gə yān tə́ ní, kadə̄ rāān̄ kəla adə̄nən̄.

⁷ Ni ō, ngōnən ō, ngōn̄ kaan ō ní, nápar de gə̄ malang a rāān̄ kəla yā kadə̄də́. Gō tə́ anī, yá̰á̰ ń rāā ɓē ń toō ní, a rāā ɓē yān ō. Nápar de kə́ ngá̰ý gə̄ ō, mban̄g kə́ tɔ́gə́də́ i ngá̰ý gə̄ ō a o̰o̰n̄ ɓē dɔ ɓē yān tə́.

⁸ Nápar de gə̄ ō, ɓē ko̰o̰ ō ń mbātə́n̄ rāā kəla kadə̄ Nabukodonosor, mban̄g kə́ Babilon tə́ ō, mbātə́n̄ kənī njúkə yān míndə́də́ tə́ ō ní, m-ā m̄-tɔ̄l̄də́ kə kaskaraá ō, kə ɓōó ō, kə mo̰y ngāl̄bɔ̄gīí ō. M-ā m̄-rāā kadə̄ nəkɔ́ tɔ̄l̄də́ kə jīneé malang kɔ̄ɔ́. Najə̄ ń Kɔ́ɔ̄ɓē əda ní n noó.

⁹ Ba sḭḭ̄ tā anī, ī-lōōī koō najə̄ kɔr̄ ngé koō ta yāsí gə̄ ō, kɔdə̄ sāā yāsí gə̄ ō, ngé nī yāsí gə̄ ō, ngé bógə̄rō de gə̄ yāsí gə̄ ō, mbōlí yāsí gə̄ ō ń ədan̄sí na: Ā ə́lan̄ dɔsí gíŕ tɔ́gə yā mban̄g kə́ Babilon tə́ alé ní.

¹⁰ I najə̄ kə́ rɔ̄kum alé n ngé koō ta gə̄ ń noō ədan̄sí kadə̄ ə́ya̰īneé dɔ nang yāsí kɔ̄ɔ́ ní. Kə́ rɔ̄kum tə́ ní, m-ā m̄-tə̄ndā yā tḭ̄ḭ̄sí ō, ā óyiī ō.

¹¹ Banī nápar de gə̄ ń ndigən̄ kənī njúkə yā mban̄g kə́ Babilon tə́, míndə́də́ tə́ ō rāā kəla kadə̄n ō ní, m-ā m-ə́yá̰də́ kadə̄ ndin̄ jəke dɔ nang yādə́ tə́, a ndɔrə̄n̄ dɔ nang ō, a ndin̄ tū tə́ ō. Najə̄ ń Kɔ́ɔ̄ɓē əda ní n noó.

¹² Ba Sedekias, mban̄g kə́ Juda tə́ tā anī, m-ɔ̄r̄ najə̄ seneé tītə̄ ń toō m-ə́dan na: Ə̄nīī njúkə yā mban̄g kə́ Babilon tə́ míndə́sí tə́, ī-rāāī kəla ādə̄niī ni ō, gír deē yān gə̄ ō, anī ā ī-ndiī kə kumsí.

¹³ I tām̄ rí tə́ á ḭ̄ ō, gír deē yāí gə̄ ō, ī-ndigiī koy yo kaskar ō, ɓō ō, mo̰y ngāl̄bɔ̄gīí ō, tītə̄ ń Kɔ́ɔ̄ɓē ədań ɔjə dɔ nápar de gə̄ ń mbātə́n̄ rāā kəla yā mban̄g kə́ Babilon tə́ ní?

¹⁴ Ī-lōōī koō najə̄ yā ngé koō ta gə̄ ń ədan̄sí na; Rɔ̄kum ā ī-rāāī kəla yā kadə̄ mban̄g kə́ Babilon tə́ aĺ bátə́. Ní, nin̄ ədasí i najə̄ kə́ rɔ̄kum alé.

¹⁵ M-ə́ládə́ aĺ ō, najə̄ gə̄ ń a ɔrə̄n̄ kə́ ngé koō ta gə̄ tə́ kə rīḿ ní i najə̄ kə́ rɔ̄kum aĺ ō. Adə̄ i tām̄ ń toō tə́ ń sḭḭ̄ ō, ngé koō ta yāsí gə̄ ō ní, m-ā m̄-tə̄ndā yā tḭ̄ḭ̄sí ō, ā oyiī ō ní.

¹⁶ M-ɔ̄r̄ najə̄ kə ngé tun̄ yá̰a̰ gēé ō, kə gír de gə̄ ń toō malang ō, m-ə́da na: Najə̄ ń Kɔ́ɔ̄ɓē əda ní n toó: Ī-lōōī koō najə̄ yā ngé koō ta gə̄ ń ədan̄sí na a tél yā reēn̄ kə yá̰a̰ rāā kəla gə̄ kə́ kem kújə yā Kɔ́ɔ̄ɓē tə́ ń aw̄n̄neé Babilon tə́ ní gogə́, ngɔr ń toō tə́ kanjə̄ kɔr bā̰ā̰ ní. Najə̄ ń nin̄ ədan̄sí noō i najə̄ kə́ rɔ̄kum alé.

¹⁷ Ōōī najə̄ yādə́ aĺ bátə́. Ī-rāāī kəla ādī mban̄g kə́ Babilon tə́, anī ā ī-ndiī kə kumsí. I tām̄ rí tə́ á ī-ndigiī kadə̄ ɓē ń toō tél ndəbā ɓē kə́ gájə́ yá̰á̰ kə́ tū tə́ gə̄ ra dɔ naā tə́ bing ní?

¹⁸ Ré nin̄ i ngé koō ta gə̄ ō, ré Kɔ́ɔ̄ɓē əndā najə̄ tadə́ tə́ ō anī, ādə̄ rāān̄ Kɔ́ɔ̄ɓē kə́ bo kə́ tɔ́gən i ngá̰ý ɓɔ́ kə ngangá ngá̰ý najə̄ kadə̄ de gə̄ ɔyn̄ gotə yá̰a̰ rāā kəla gə̄ ń ton̄ kem kújə yā Kɔ́ɔ̄ɓē tə́ ō, kem kújə yā mban̄g kə́ Juda tə́ ō, kə́ Jerusalem tə́ ō ní aw̄n̄neé Babilon tə́.

¹⁹ Tɔdɔ̄ Kɔ́ɔ̄ɓē kə́ bo kə́ tɔ́gən i ngá̰ý ɔr̄ najə̄ dɔ gində̄ nə̄ngá kasə kə́ ngāl̄ ɓururu gə̄ tə́ ō, bay kə́ bo ō, púsə nə̄ngá kasə gə̄ ō, yá̰a̰ rāā kəla kə́ rang gə̄ malang ń ton̄ kem ɓē ń toō tə́ ní ō,

²⁰ dɔ yá̰a̰ gə̄ malang ń Nabukodonosor, mban̄g kə́ Babilon ɔy alé dan ń əhɔ Yekonia, ngōn̄ Joakim, mban̄g kə́ Juda tə́ aw̄ seneé Babilon tə́, naā tə́ kə ngār kə́ Juda tə́ gə̄ malang ō, kə́ Jerusalem tə́ gə̄ ō ní.

²¹ Ɓáa anī, ōōī najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel əda dɔ gotə yá̰a̰ rāā kəla gə̄ ń ton̄ kem kújə yā Kɔ́ɔ̄ɓē tə́ ō, kem kújə yā mban̄g tə́ ō, Jerusalem tə́ ō ní:

²² A ɔyn̄ gotə yá̰a̰ rāā kəla gə̄ ní yā kaw̄ń Babilon, kadə̄ a to noó bátə́ ndɔ̄ ń m-ā m̄-sāań nja yā tél reēń gogə́ loo ń toō tə́ ní. Najə̄ ń Kɔ́ɔ̄ɓē əda ní n noó.