JEREMI 26 - Bibəl ta Sar̄

Ngé tun̄ yá̰a̰ gə̄ ō, ngé koō ta gə̄ ō sāān̄ tɔ̄l̄ Jeremi

¹ Ta kəla gír ko̰o̰ ɓē yā Joakim, ngōn̄ Josias, mban̄g kə́ Juda tə́ ní, Kɔ́ɔ̄ɓē ɔr̄ najə̄ ń toō kə Jeremi ədan na:

² Mā Kɔ́ɔ̄ɓē m-ɔ̄r̄ najə̄ i tītə̄ ń toō beé: Ī-ra ndágə loo kə́ gīr̄ gidə kújə yā Kɔ́ɔ̄ɓē tə́, ba ə́da najə̄ gə̄ malang ń m-ə́daī dɔ de gə̄ ń ndin̄ kem ɓē gə̄ kə́ Juda tə́ á ɔsən̄ nodə́ nang tə́ kem kújə yā Kɔ́ɔ̄ɓē tə́ ní, kanjə̄ kɔr̄ kumən kógə̄ḿ kə̄ gogə́.

³ Majanī a oōn̄ ō, náā nəkɔ́ ɓáa a əya̰ gō róbə njə̄rān kə́ gōtə́ aĺ ō, adə̄ m-ā m-ásə lōō gíŕ yá̰á̰ kə́ to kum kaȳ aĺ ń m̄-sāā rāā sedə́ najə̄ yā kəla rāādə́ kə́ gōtə́ aĺ gə̄ tə́ ní.

⁴ Ā ə́dádə́ na: Najə̄ ń mā Kɔ́ɔ̄ɓē m-ə́dá ní n toó: Ré sḭḭ̄ ōōī najə̄ yāḿ aĺ ō, úniī gō yá̰á̰ ń m̄-ndóōsí ní aĺ ō,

⁵ ōōī najə̄ kə́ ta ngé kəla yāḿ gə̄ ń i ngé koō ta gə̄ á m-ə́ládə́ rɔ̄sí tə́ kə nja naā tə́ ní aĺ anī,

⁶ yá̰á̰ ń m̄-rāā kə Silo ní, m-ā m̄-rāā kə kújə́ ń toō. M-ā m̄-rāā ɓē ń toō kadə̄ a téĺ yá̰á̰ kə́ nápar de gə̄ malang kə́ dɔ nang tə́ a ndɔ̄lə́n̄ naā kə rīneé.

⁷ Ngé tun̄ yá̰a̰ gə̄ ō, ngé koō ta gə̄ ō, de gə̄ malang kə́ kem ɓēé ō, oōn̄ najə̄ gə̄ ń Jeremi ra a ɔr̄ kem kújə yā Kɔ́ɔ̄ɓē tə́ ní

⁸ Dan ń Jeremi ɔr̄ najə̄ ń Kɔ́ɔ̄ɓē ədan kadə̄ əda de gə̄ malang kə́ kem ɓēé ní gír gān̄g anī, ngé tun̄ yá̰a̰ gə̄ ō, ngé koō ta gə̄ ō, de kə́ kem ɓēé gə̄ ō, əhɔn̄ Jeremi ba ədanən̄ na: I ḭ̄kɔ́ n ī-ndigə koy ní.

⁹ Tām̄ ɔ̄r̄ najə̄ kə rī Kɔ́ɔ̄ɓēé əda na: Kújə́ ń toō na a to tītə̄ Silo ō, ɓē ń toō na a nujə sák sák ō, de kə́ kemeé gə̄ na a gətóon̄ kɔ̄ɔ́ ō. Loo ń noō tə́ de gə̄ malang kə́ kem ɓēé kánə̄n̄ naā kə̄ dɔ Jeremi tə́ kem kújə yā Kɔ́ɔ̄ɓē tə́.

¹⁰ Dan ń de kə́ bo kə́ Juda tə́ gə̄ oōn̄ kōō yá̰á̰ gə̄ ń noō ní anī, nin̄ ḭḭn̄ kem kújə yā mban̄g tə́ aw̄ ndin̄ ta róbə́ kújə kə́ kijə yā Kɔ́ɔ̄ɓē tə́.

¹¹ Ngé tun̄ yá̰a̰ gə̄ ō, ngé koō ta gə̄ ō, ədan̄ de kə́ bo gə̄ ō, de gə̄ malang kə́ kem ɓēé ō na: Majə kadə̄ deē ń toō oy. Tɔdɔ̄ ni-ɔr̄ najə̄ dɔ yá̰a̰ gə̄ ń a rāān̄ ɓē ń toō tə́ ní adə̄ sḭḭ̄ kɔ́ gə̄ ōōī kə mbīsí.

¹² Jeremi əda de kə́ bo gə̄ ō, de gə̄ malang kə́ kem ɓēé ō na: Najə̄ gə̄ malang ń ōōī toō ní, i Kɔ́ɔ̄ɓē n əlam̄ kadə̄ m-ə́da dɔ kújə́ ń toō tə́ ō, dɔ ɓē ń toō tə́ ō ní.

¹³ Ngɔlaā ń toō ní, ə́hɔī hángalsí sḛ́ý ō, ī-tūrī kəla rāāsí ādə̄ to só tə́ sḛ́ý ō. Ōōī ndū Kɔ́ɔ̄ɓē Nə́ɓā yāsí kə́ a ɓāŕsí, anī ni a loo gíŕ yá̰á̰ kə́ to kum kaȳ aĺ ń əda kadə̄ rāāsí ní tə́.

¹⁴ Tām̄ yāḿ tə́ tā anī, mā n i kem jīsí tə́ toó. Yá̰á̰ ń á̰a̰ī ta kumsí tə́ kadə̄ i kə́ majə ō, i kə́ gōtə́ ō ní, ī-rāāī seḿ.

¹⁵ Banī ōōī majə. Ré ī-tɔ̄l̄mī anī, najə̄ yā de kə́ najə̄ gətóo dɔn tə́ a əsō dɔsí sḭḭ̄ kɔ́ gə̄ tə́ ō, dɔ ɓē ń toō tə́ ō, dɔ de gə̄ ń ndin̄ kemeé tə́ ní ō, tɔdɔ̄ kə́ rɔ̄kum tə́ ní, i Kɔ́ɔ̄ɓē n əlam̄ kəda najə̄ gə̄ malang ń toō tə́ kadə̄ ōōī ní.

¹⁶ De kə́ bo gə̄ ō, de gə̄ malang kə́ kem ɓēé ō ədan̄ ngé tun̄ yá̰a̰ gə̄ ō, ngé koō ta gə̄ ō na: J-adī deē ń toō oy alé, tɔdɔ̄ ni-ɔr̄ najə̄ sejí i kə rī Kɔ́ɔ̄ɓē Nə́ɓā yājí.

¹⁷ Kum kɔɔ̄ kə́rēý gə̄ kə́ kem ɓēé ḭḭn̄ dɔɔ́ ba ədan̄ de gə̄ ń kánə̄n̄ naā ní na:

¹⁸ Mise nge koō ta kə́ Moreset tə́ ɔr̄ najə̄ ɓāl̄ yā Ejekias, mban̄g kə́ Juda tə́, əda gír de gə̄ malang kə́ Juda tə́ na: Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: A ndɔrə̄n̄ ɓē kə́ Siyo̰ tītə̄ loo ndɔr̄ loo beé ō, Jerusalem a tél ndəbā ɓē kə́ gájə́ yá̰á̰ kə́ tū tə́ gə̄ ra dɔ naā tə́ bing ō, mbal̄ kə́ kújə yā Kɔ́ɔ̄ɓē tə́ a tél loo kə́ kḭḭ kə̄ dɔɔ́ kə́ mu taā dɔ ō.

¹⁹ Ní, Ejekias mban̄g kə́ Juda tə́ ō, gír deē yān gə̄ malang ō tɔ̄lə̄n̄ Mise a? Ní, de gə̄ ɓōlə́n̄ ndíĺ Kɔ́ɔ̄ɓē sɔlə̄n̄neé kemən aĺ a? I loo ń noō tə́ n Kɔ́ɔ̄ɓē lōō gíŕ yá̰á̰ kə́ to kum kaȳ aĺ ń əda kadə̄ rāādə́ ní tə́. Ba jḭḭ̄ ɓáa jə-sāāī i yá̰á̰ kə́ majə aĺ kə̄ dɔjí tə́.

Joakim adə̄ tɔ̄lə̄n̄ Uria nge koō ta

²⁰ De kógə̄ḿ kə́ rang ɔr̄ najə̄ kə́ nge koō ta tə́ kə rī Kɔ́ɔ̄ɓēé. Deē ní rīn na i Uria, i ngōn̄ Semaya kə́ Kiryat Yearim. Ni-ɔr̄ najə̄ yá̰a̰ gə̄ ń a rāān̄ yā reē kə̄ dɔ ɓē kə́ Jerusalem tə́ ō, dɔ nang kə́ Juda tə́ ō ní. Najə̄ kɔrə̄n to tītə̄ yā Jeremi.

²¹ Mban̄g Joakim ō, go̰ rɔ̄ɔ̄ yān gə̄ ō, de kə́ bo yān gə̄ ō ōōn̄ najə̄ gə̄ ní, adə̄ mban̄g sāā tɔ̄lən. Najə̄ ń noō əsō mbī Uria tə́ anī, ɓōĺ rāān adə̄ a̰ȳ aw̄ Ejiptə tə́.

²² Banī mban̄g Joakim əla Elnatan kə́ ngōn̄ Akbor ō, de kə́ rang gə̄ ō seneé adə̄ aw̄ ugə̄n̄ Ejiptə tə́.

²³ Nin̄ teēn̄ kə Uria kɔ̄ɔ́ kem ɓē kə́ Ejiptə tə́ ba aw̄n̄ seneé adə̄nən̄ kə mban̄g Joakim. Mban̄g tɔ̄lən ba ənī nīnə́n kem bəlo kə́ nīń de gə̄ i ngá̰ý i tū tə́ tə́.

²⁴ Jeremi tā anī, Ahikam kə́ ngōn̄ Sapan ngɔ̄mən ō, ɔgə̄ kəlan jī de gə̄ ń sāān̄ tɔ̄lən tə́ ní ō.