JEREMI 25 - Bibəl ta Sar̄

Najə̄ ń Jeremi ɔjə ɓāl̄ kutə jōó gidə i mətá ní

¹ Najə̄ kə́ Kɔ́ɔ̄ɓē ɔr̄ kə Jeremi sɔɔ̄ dɔ gír de gə̄ malang kə́ Juda tə́, kem ɓāl̄ kə́ nge ko̰ sɔ́ ń Joakim, ngōn̄ Josias ndiń mban̄g kə́ Juda tə́ ní, adə̄ i kem ɓāl̄ kə́ ta kəga dɔ ń Nabukodonosor, ndiń mban̄g dɔ ɓē kə́ Babilon tə́ ní.

² I najə̄ ń Jeremi nge koō ta ɔr̄ ɔjə dɔ de gə̄ malang kə́ Juda tə́ ō, de gə̄ malang ń ndin̄ Jerusalem tə́ ō ní.

³ Əla gír kem ɓāl̄ kə́ nge ko̰ kutə gidə i mətá ń Josias ngōn̄ Amon ndiń mban̄g dɔ ɓē kə́ Juda tə́ bátə́ ɓōólaā, adə̄ i kem ɓāl̄ kutə jōó gidə i mətá tə́ ní, Kɔ́ɔ̄ɓē ɔr̄ najə̄ seḿ ō, m̄-to dan kɔr̄ najə̄ sesí ō, banī sḭḭ̄ ōōī najə̄ ń m-ɔ̄r̄ ní alé.

⁴ Kɔ́ɔ̄ɓē əla ngé kəla yān gə̄ malang ń i ngé koō ta gə̄ ní rɔ̄sí tə́ kanjə̄ kɔr ta tə́, banī sḭḭ̄ ōōī najə̄ yādə́ aĺ ō, ī-nēlī mbīsí ōōīneé najə̄ kɔr̄də́ aĺ ō.

⁵ Ni ədasí na: Ī-tūrī háĺsí kə́ majaĺ gə̄ ō, ə́ya̰ī gō kəla rāāsí kə́ gōtə́ aĺ gə̄ ō kɔ̄ɔ́, anī ā ī-ndiī dɔ nang ń Kɔ́ɔ̄ɓē adə̄sí sḭḭ̄ ō, kaasí gə̄ ō, kété jóo, i kə́ njɔ́ḿ gə̄ tə́ ní.

⁶ Ī-ngɔ̄dī gō nə́ɓā kə́ rang gə̄ yā ndɔ̄ȳdə́ aĺ ō, ɔ́siī nosí nang tə́ nodə́ tə́ yā rɔȳdə́ aĺ ō, ādī wōn̄g rāām̄ gír kəla rāāsí gə̄ tə́ aĺ ō, anī m-ā m̄-rāā sesí yá̰á̰ kə́ majaĺ aĺ bátə́.

⁷ Banī ōōī najə̄ kɔrə̄ḿ alé. Ī-tél ī-nujiī kemḿ kə kəla rāāsí gə̄ ə̄nīīneé yá̰á̰ kə́ to kum kaȳ aĺ kə̄ dɔsí tə́. Najə̄ ń Kɔ́ɔ̄ɓē əda ní n noó.

⁸ Anī najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: Sḭḭ̄ ōōī najə̄ yāḿ gə̄ aĺ kɔ̄ɔ́ ɓáá ní,

⁹ m-ā m-ə́la gō gír de kə́ mbɔ́r ɓē kə́ ko̰ó̰ tə́ gə̄ ō, m-ā m̄-ɓār̄ nge kəla yāḿ Nabukodonosor, mban̄g kə́ Babilon tə́ ō, yā reē sedə́ kadə̄ rɔ̄ɔ̄n̄ ɓē ń toō ō, de gə̄ ń ndin̄ kemeé ní ō, kadə̄ rɔ̄ɔ̄n̄ nápar de gə̄ ń ndin̄ kemeé ní ō, kadə̄ rɔ̄ɔ̄n̄ nápar de gə̄ malang ń gīrə̄n̄ gidə ní ō. M-ə̄ndādə́ dɔ jīḿ yā rāādə́ kadə̄ télən̄ ndágə loo kə́ to kum ko̰, kə́ de gə̄ a əgan̄ kɔŕ ɓōĺ dɔ tə́ ō, yá̰á̰ kə́ nujə sák sák kə́ njɔ́ḿ gə̄ tə́ ō.

¹⁰ M-ā m̄-rāā kadə̄ pā walya ō, najə̄ kə́ to rɔ̄nel̄ ō, pā yā ngaa dəyá̰ ō, rɔ̄nel̄ yā nge taā ngaa ō, kōō mbal̄ kusə yá̰a̰ ō, hor lámba ō gətóon̄ kɔ̄ɔ́ ɓēé loodə́.

¹¹ Ɓē ń noō kə taá malang a tél loo kə́ nujə sák sák kɔ̄ɔ́ ō, ndágə loo kə́ to kum ko̰ ō, nápar de gə̄ ń noō a rāān̄ kəla adə̄n̄ mban̄g kə́ Babilon kem ɓāl̄ kutə sīrí.

¹² Banī dan ń ɓāl̄ kə́ kutə sīrí gə̄ ní a təgān̄ anī, m-ā m-ə́nda mban̄g kə́ Babilon ō, nápar de gə̄ ń noō ō. M-ā m-ə́nda ɓē yā Kalde gə̄ ō, m-ā m̄-rāān kadə̄ a tél ndágə loo kə́ to kum ko̰ kə́ njɔ́ḿ gə̄ tə́. Najə̄ ń Kɔ́ɔ̄ɓē əda ní n noó.

¹³ M-ā m̄-rāā kadə̄ yá̰a̰ gə̄ malang ń m-ɔ̄r̄ najə̄də́ dɔ ɓē ń toō tə́ ní, a reēn̄ dɔn tə́. Yá̰a̰ malang ń ndangən̄ kem makətūbə̄ ń toō tə́ ní ō, najə̄ ń Jeremi oō taḿ tə́ á ɔr̄ sɔɔ̄ dɔ de gə̄ ní ō.

¹⁴ Tɔdɔ̄ nápar de kə́ ngá̰ý gə̄ ō, mban̄g kə́ tɔ́gə́də́ i ngá̰ý gə̄ ō, a o̰o̰n̄ ɓē dɔdə́ tə́. M-ā m-ādə̄ əgān̄ kə̄rā yá̰a̰ gə̄ ń rāān̄ ní ō, jī bēl̄ loo rāā yá̰a̰ yādə́ gə̄ ō.

Kopə sarya

¹⁵ Yá̰á̰ ń Kɔ́ɔ̄ɓē, Nə́ɓā yā Israel ədam̄ ní n toó: Ī-taā kópə kasə nduú ń toō jīḿ tə́, ādə̄ nápar de gə̄ malang ń m-ā m-ə́laī kə̄ rɔ̄də́ tə́ ní ādə̄ a̰ȳn̄, i kasə wōn̄g yāḿ.

¹⁶ A a̰ȳn̄ ō, a bḭ́ḭ̄n̄ ō, tāmə̄n̄ mbitə mbitə ō, dan ń a a̰a̰n̄ kaskar ń m-ə́la dɔ dáńdə́ tə́ ní.

¹⁷ m̄-taā kópə jī Kɔ́ɔ̄ɓē tə́ ō, m-ādə̄ nápar de gə̄ malang ń Kɔ́ɔ̄ɓē əlam̄ kə̄ rɔ̄də́ tə́ ní m-ādə̄ a̰ȳn̄ ō.

¹⁸ M-ādə̄ Jerusalem ō, ɓē kə́ Juda tə́ gə̄ ō, mban̄g yān gə̄ ō, de kə́ bo yān gə̄ ō, kadə̄ a̰ȳn̄ ba télən̄ yá̰á̰ kə́ nujə sák sák ō, kə́ to kum ko̰ kə́ de gə̄ a əgan̄ kɔŕ ɓōĺ dɔ tə́ ō, yá̰á̰ kə́ de gə̄ a ndɔ̄lə́n̄ naā kə rīneé ō. I yá̰á̰ ń noō n a rāā yá̰a̰ ngɔlaā toó.

¹⁹ Gotə nápar de gə̄ ń a̰ȳn̄ kópə ngeé ń toō ní, nin̄ n toó: Parao̰ mban̄g kə́ Ejiptə ō, ngé kəla yān gə̄ ō, de kə́ bo yān gə̄ ō, gír deē yān gə̄ malang ō,

²⁰ de kə́ no ɓē tə́ gə̄ malang ō, mban̄g gə̄ malang kə́ kem ɓē kə́ Us tə́ ō, mban̄g gə̄ malang kə́ kem ɓē yā Pilistin gə̄ tə́, adə̄ i mban̄g kə́ Askalon tə́ ō, kə́ Gaja tə́ ō, kə́ Ekəron tə́ ō, gotə de gə̄ ń na̰yn̄ Asdod tə́ ní ō,

²¹ Edom gə̄ ō, Moab gə̄ ō, Amon gə̄ ō,

²² mban̄g gə̄ malang kə́ Tir tə́ ō, kə́ Sidon tə́ ō, kə́ gō nang kə́ gidə bā bo tə́ ō,

²³ kə́ Dedan tə́ ō, kə́ Tema tə́ ō, kə́ Bujə tə́ ō, de gə̄ malang ń i nge dəsā mbāý kə́ mbɔ́ŕdə́ gə̄ tə́ ní ō,

²⁴ mban̄g Arabə gə̄ malang ō, mban̄g gə̄ malang kə́ no ɓē tə́ ń ndin̄ kem dəla loo tə́ ní ō,

²⁵ mban̄g gə̄ malang kə́ Jimri tə́ ō, kə́ Elam tə́ ō, kə́ Medə tə́ ō,

²⁶ mban̄g gə̄ malang kə́ mbɔ́r ɓē kə́ ko̰ó̰ tə́ ń ndin̄ ngɔr ō, ndin̄ sa̰y ō ní, ɓē ko̰o̰ gə̄ malang ń ndin̄ kə gō loo gēé dɔ nang tə́ ní ō. M-ādə̄ mban̄g kə́ Sesak adə̄ a̰ȳ ta tɔ̄l̄ ta tə́ ō.

²⁷ Ā ə́dádə́ na: Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel əda ní n toó: Ā̰yī ādə̄ rāāsí ō, ī-tōmbī ō, ī-teē ī-tə́sōī kanjə̄ kadə̄ ḭ́ḭī dɔɔ́ ō, dan ń a á̰a̰ī kaskar ń m-ā m-ə́la dɔ dáńdə́ tə́ ní.

²⁸ Ré nin̄ mbātə́n̄ taā kópə kasə ní jīí tə́ ka̰ȳ anī, ā ə́dádə́ na: Kɔ́ɔ̄ɓē kə́ bo kə́ tɔ́gən i ngá̰ý ɔr̄ najə̄ i tītə̄ ń toō beé: Ā ā̰yī gáŕ.

²⁹ M-ā m-ə́la kə yá̰á̰ kə́ to kum kaȳ aĺ dɔ de gə̄ tə́. M-ə́la gír i dɔ ɓē ń rīḿ ɓār̄ dɔ tə́ ní sḭḭ̄ a ī-teēī kum tə́ karī a? Njaḿ gē ā ī-teēī kum tə́ alé. Tɔdɔ̄ m-ā m̄-rāā kadə̄ de kə́ dɔ nang tə́ gə̄ malang oyn̄ yo kaskar. Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n noó.

³⁰ Ba ḭ̄ ā ə́dádə́ najə̄ gə̄ malang ń m-ɔ̄r̄ seí ní, ā ə́dádə́ na: Kɔ́ɔ̄ɓē ndán̄g rɔ̄n kə̄ dɔ rā̰ tə́, ndūn ɓār̄ kə̄ kem kújə yān kə́ táĺ tə́. Ni ndán̄g rɔ̄n dɔ ɓē yān tə́. Ni ur kɔĺ dɔ de gə̄ malang ń ndin̄ dɔ nang tə́ ní, tītə̄ yā ngé mbə̄sā kan̄ kāgə̄ nduú kə njadə́ beē.

³¹ Kōn ɓār̄ bátə́ ugə̄ ta ngóy dɔ nang tə́, tɔdɔ̄ Kɔ́ɔ̄ɓē nējə̄n̄ naā najə̄ tə́ kə nápar de gēé, ni-rāā sarya kə de gēé kógə̄ḿ kógə̄ḿ. Əya̰ de gə̄ ń najə̄ i dɔdə́ tə́ ní adə̄ oyn̄ yo kaskar. Najə̄ ń Kɔ́ɔ̄ɓē əda ní n noó.

³² Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: Yá̰á̰ kə́ to kum kaȳ aĺ ɔr̄ gō gír de gə̄ tə́ kə gō naá. Néĺ kə́ bo ngá̰ý əla ta ngóy dɔ nang gə̄ tə́.

³³ Əla gír dām̄ dɔ nang kógə̄ḿ tə́ bátə́ gān̄g kə́ noō tə́ ní, de gə̄ a əndān̄ yo ngé gə̄ ń Kɔ́ɔ̄ɓē a tɔldə́ ní, ndɔ̄ ń noō tə́ alé. De gə̄ a ɔyn̄də́ yā dubə̄də́ alé, adə̄ a télən̄ dɔ bū loo kə́ dɔ nang tə́.

³⁴ Ngé kul̄ yá̰a̰ gə̄, ī-nōōī, ə́gaī kɔŕ ādə̄ dḭḭ̄n̄sí. Kɔ́ɔ̄ yá̰a̰ kul̄ gə̄ ī-wángə̄lāī nang tə́ na kum mbang yāsí asə kadə̄ tə́jān̄ míndə́sí. A tə̄ndā tḭ̄ḭ̄n̄sí kə loo gə̄ tə́ ō, ā ī-teēī yā tə́sō tītə̄ yá̰a̰ rāā kəla kə́ gātə̄n i ngá̰ý beé ō.

³⁵ Loo kə́ yā kadə̄ ngé kul̄ yá̰a̰ gə̄ ɓɔ̄ɔ̄n̄neé rɔ̄də́ a gətóo. Loo kə́ yā kadə̄ kɔ́ɔ̄ yá̰a̰ kul̄ gə̄ ndin̄neé kanjə̄ sōl̄ a gətóo.

³⁶ De gə̄ a oōn̄ kōō kɔŕ kə́ ngé kul̄ yá̰a̰ gə̄ əgan̄ ō, kōō kɔ́ɔ̄ yá̰a̰ kul̄ gə̄ kə́ a nōōn̄ naā ō. Kɔ́ɔ̄ɓē a nujə kə loo kəsa yá̰a̰ yādə́ sák sák kɔ̄ɔ́.

³⁷ Gɔng gə̄ ń yá̰a̰ kul̄ gə̄ rosə ní tél ton̄ kúkúkú dan ń wōn̄g yā Kɔ́ɔ̄ɓē ḭḭ seneé kə ngangá ngá̰ý ní.

³⁸ De gə̄ ɔtən̄ aw̄n̄ tītə̄ ń ɓɔl a əya̰ń loo ton ní beē. Wōn̄g kə́ ngá̰ý yā Kɔ́ɔ̄ɓē ō, kaskar yān kə́ kumən o̰o̰n aĺ ō, rāān̄ ɓē yādə́ adə̄ téĺ ndágə loo kə́ to kum ko̰.