JEREMI 24 - Bibəl ta Sar̄

Kan̄ kótə̄ ń ɔyn̄ kem jáng jōó ní

¹ Dan ń Nabukodonosor mban̄g kə́ Babilon əhɔ Yekonia, ngōn̄ Joakim mban̄g kə́ Juda tə́ ō, de kə́ bo gə̄ kə́ Juda tə́ ō, ngé ger̄ rāā kəla kəja kāgə̄ majə ngá̰ý gə̄ ō, kɔdə̄ gə̄ kə́ ngé rāā kəla gində̄ gə̄ ō Jerusalem aw̄ sedə́ Babilon ní anī, Kɔ́ɔ̄ɓē rāā adə̄ m-á̰á̰ jáng kan̄ kótə̄ jōó kə́ kəndādə́ kadə naā tə́ ta kújə yā Kɔ́ɔ̄ɓē tə́.

² Kan̄ kótə̄ kə́ majə ngá̰ý gə̄ ton̄ kem jáng kə́ kógə̄ḿ tə́, tītə̄ kan̄ kótə̄ kə́ kíjə gə̄ beé. Kan̄ kótə̄ kə́ majaĺ adə̄ i kə́ dum̄ kəsa gə̄ ton̄ kem jáńg kə́ noō tə́ ō.

³ Anī Kɔ́ɔ̄ɓē ədam̄ na: Jeremi i rí n á̰a̰ā̰ ní? m̄-téĺ m-ə́dan na: M-á̰a̰ i kan̄ kótə̄ gə̄. Ngé kə́ majə gə̄ nelə̄n̄ ngá̰ý ō, ngé kə́ majaĺ aĺ gə̄ nelə̄n̄ aĺ ō. Nelə̄n aĺ bátə́ adə̄ dum̄ kəsa.

⁴ Tā anī Kɔ́ɔ̄ɓē ɔr̄ najə̄ seḿ ədam̄ na:

⁵ Kɔ́ɔ̄ɓē Nə́ɓā yā Israel ɔr̄ najə̄ i tītə̄ ń toō beé: M-ā m-á̰a̰ de kə́ Juda tə́ gə̄ ń əhɔn̄də́ aw̄n̄ sedə́ kem ɓē yā Kalde gə̄ tə́ ní kə kumḿ kə́ majaá tītə̄ loo ndə̄ngā kan̄ kótə̄ kə́ majə ngá̰ý gə̄ ń noō.

⁶ M-ā m-ə̄ndā kumḿ dɔdə́ tə́ majə ō, m-ā m̄-tél yā reē sedə́ gogə́ kem ɓē ń toō tə́ ō. M-ā m-ə̄ndādə́ tītə̄ kújə́ kə́ ngan̄g ō, m-ā m̄-nujə sedə́; to̰ aĺ bátə́ ō. M-ā m̄-mā̰ā̰də́ tītə̄ loo mā̰ā̰ kāgə̄ ō, m-ā m̄-ró̰ȳdə́ to̰ aĺ bátə́ ō.

⁷ M-ā m-ādə̄də́ kur̄ dɔ kə́ kadə̄ nin̄ gerə̄n̄neé na mā i Kɔ́ɔ̄ɓē. A télən̄ gír deē yāḿ gə̄ ō, mā i Nə́ɓā yādə́ ō, a télən̄ yā reē rɔ̄ḿ tə́ kə ngarā̰ kemdə́ malang.

⁸ Banī Kɔ́ɔ̄ɓē ɔr̄ najə̄ i tītə̄ ń toō beé: Yá̰á̰ ń m-ā m̄-rāā kə Sedekias, mban̄g kə́ Juda ō, kə de kə́ bo yān gēé ō, kə gotə de kə́ Jerusalem tə́ gə̄ ō, kə de gə̄ malang ń tél ndin̄ kem ɓē ń toō tə́ ō, kə de gə̄ malang ń ndin̄ kem ɓē kə́ Ejiptə tə́ ō ní, i yá̰á̰ ń a rāān̄ kə kan̄ kótə̄ kə́ majaĺ gə̄ ní. I yá̰á̰ ń a rāān̄ kə ngé kə́ nel aĺ bátə́ gə̄ adə̄ dum kəsa ní n m-ā m̄-rāā sedə́ ní.

⁹ M-ā m-ūtə̄ kumḿ njárárá, ba m-ā m̄-rāādə́ kadə̄ télən̄ yá̰á̰ kə́ to ɓōĺ tām̄ yā ɓē ko̰o̰ gə̄ malang kə́ dɔ nang tə́ tə́. A ənīn̄ pā sedə́ ō, a lurən̄də́ ō, a tájə̄n̄də́ ō, a ndɔ̄lə́n̄də́ ō, kə gō loo gə̄ malang ń m̄-tə̄ndā m̄-tḭ̄ḭ̄də́ tū tə́ tə́ ní.

¹⁰ M-ā m-ə́la kə kaskaraá ō, kə ɓōó ō, kə mo̰y ngāl̄bɔ̄gīí ō dɔ dáńdə́ tə́, bátə́ kadə̄ gətóoneé kɔ̄ɔ́ dɔ nang ń m-ādə̄də́ nin̄ ō kaadə́ gə̄ ō ní tə́.