JEREMI 22 - Bibəl ta Sar̄

¹ Kɔ́ɔ̄ɓē ɔr̄ najə̄ i tītə̄ ń toō beé: Āw̄ ə́da najə̄ ń toō kem ndogə̄ yā mban̄g kə́ Juda tə́,

² ā ə́da na: Ḭ̄ mban̄g kə́ Juda tə́ ń ī-ndi dɔ kōr̄ kāgə̄ mbang yā Dabid tə́ ní ō, sḭḭ̄ ngé rāā kəla yān gə̄ ō, sḭḭ̄ gír deē yān gə̄ ń ī-mānī kə ta róbə gə̄ ń toō ō ní, ōōī najə̄ yā Kɔ́ɔ̄ɓē.

³ Najə̄ ń Kɔ́ɔ̄ɓē əda ní n toó: Ī-rɔ̄ɔ̄ī dɔ yá̰á̰ kə́ súmūú tə́ ō, yá̰á̰ kə́ gōtə́ tə́ ō. Ī-taāī deē ń rāān̄ kumən ndoō tə́ ní jī nge kəsa tətō de gə̄ tə́. Ī-lōōī rāā kum de gə̄ ndoō tə́, ī-lōōī rāā nge nam̄ ɓē ō, ngōn̄ hal ō, dəyá̰ kə́ ngaa koy ō, yá̰á̰ kə́ tōr̄. Ī-lōōī ɓōkə́ mósə de kə́ najə̄ gətóo dɔn tə́ loo ń toō tə́.

⁴ Ré ī-rāāī yá̰á̰ tītə̄ ń noō rɔ̄kum anī, mban̄g gə̄ ń a ndin̄ dɔ kōr̄ kāgə̄ mbang yā Dabid tə́ ní a alə̄n̄ púsə́ sə́nda gə̄ ō, sə́nda gə̄ ō, yā kudəń ndogó mbangāá kə ta róbə gə̄ ń toō. Rɔ̄kum, nin̄ ō, ngé rāā kəla yādə́ gə̄ ō, gír deē yādə́ gə̄ ō a udən̄ kə ta róbə gə̄ ń noō.

⁵ Banī ré sḭḭ̄ ōōī najə̄ gə̄ ń toō aĺ anī, njaḿ gə̄gē, kújə́ ń toō a téĺ yá̰á̰ kə́ nujə kə́ to dɔ naā tə́ bing.

⁶ Najə̄ ń Kɔ́ɔ̄ɓē əda dɔ kújə yā mban̄g kə́ Juda tə́ ní toó: Ká ré ī-toń i tītə̄ Galaad aláa i tītə̄ jam mbal kə́ Liban tə́ tām̄ yāḿ tə́ gə̄gē anī, m-ā m̄-rāāī kadə̄ ī-tél dəla loo ō, ɓē kə́ de gə̄ ndin̄ kemeé alé ō, kanjə̄ ɓōĺ rɔ̄ḿ loon tə́.

⁷ m̄-ɔ̄r̄ kam̄ de gə̄ kadə̄ nujən̄ seí. Náā nəkɔ́ a ɔy yá̰a̰ kəla yān gə̄ jīn tə́. Nin̄ a tə́gān̄ kāgə̄ sédər yāí kə́ majə ngá̰ý gə̄ kɔ̄ɔ́ ō, a rāān̄də́ kadə̄ a tə́sōn̄ kum hor tə́ ō.

⁸ Ré de kə́ kə gō gíŕ nápar de gə̄ malang mānə̄n̄ kadə ɓē ń toō tə́ ngɔr anī, a dəjen̄ naā dɔ dáńdə́ tə́ na: I tām̄ rí tə́ á Kɔ́ɔ̄ɓē rāā ɓē bo ń toō yá̰á̰ kə́ beé?

⁹ De gə̄ a télən̄ yā kədadə́ na: I tɔdɔ̄ mbātə́n̄ madə̄ naā yā Kɔ́ɔ̄ɓē Nə́ɓā yādə́ ba ɔsən̄ nodə́ nang tə́ no nə́ɓā kə́ rang gə̄ tə́ ō, rāān̄ kəla adə̄n̄də́ ō.

Najə̄ kə́ dɔ Salum nge kun gotə Josias tə́

¹⁰ Ī-nōōī deē ń oy kɔ̄ɔ́ ní alé. Əhɔī ndoō tām̄ yān tə́ alé. Ba deē ń a aw̄ i mbéé ní ī-nōōniī ba ī-tél ī-nōōniī ɓáý to̰. tɔdɔ̄ ni a tél yā reē gogə́ kem ɓē kojən tə́ to̰ alé.

¹¹ Rɔ̄kum, najə̄ ń Kɔ́ɔ̄ɓē əda dɔ Salum, ngōn̄ Josias, mban̄g kə́ Juda ń ndi mban̄g gotə bɔbə̄n Josias tə́ ō, teē kɔ̄ɔ́ loo ń toō tə́ i ngɔr ɓáý ō ní n toó: Ni a tél yā reē gogə́ to̰ alé.

¹² Tɔdɔ̄ ni a oy loo ń de gə̄ əhɔnən̄ aw̄n̄ seneé tū tə́ ní tə́ ō, a a̰a̰ ɓē ń toō to̰ aĺ ō.

Ɔsən̄ Joakim dɔ hálən tə́

¹³ Deē ń rāā kújə yān kanjə̄ kadə̄ usən dɔ yá̰a̰ rāā kə́ gōtə́ tə́ ō, rāā kújə yān gə̄ kə́ dɔ madə̄ tə́ gə̄ tə́ dɔɔ́ kanjə̄ kadə̄ usən dɔ yá̰á̰ kə́ súmūú tə́ ō, mēr̄ de gə̄ rāā kəla yān karī kanjə̄ kəgādə́ ō ní, yá̰á̰ kə́ to kum kaȳ aĺ a teē dɔn tə́.

¹⁴ Ni-əda na: m̄-rāā kújə́ kə́ bo ngá̰ý kə madə̄ kə́ dɔ tə́ gə̄ kə́ kemdə́ bo ngá̰ý gə̄ tām̄ yāḿ tə́ ō, m̄-rāā ko̰rō̰ kújə gə̄ tū tə́ ō, m̄-rāā kemdə́ kújə kə kāgə̄ sédər gə̄ ō, m-ɔ́ɔ́ yá̰á̰ kə́ kərē mbo̰o̰ kemdə́ gə̄ tə́ ō.

¹⁵ Nelī rāā yá̰a̰ kə kāgə̄ sédər ngá̰ý ní ī-gír̄ i dɔ ko̰o̰ ɓē tə́ ta kaw̄ jóo a? Bɔbí əsa yá̰á̰ ō, a̰ȳ ō aĺ a? Banī ni rɔ̄ɔ̄ dɔ yá̰á̰ kə́ gōtə́ tə́ ō, dɔ yá̰á̰ kə́ súmūú tə́ ō. adə̄ yá̰a̰ malang i kə́ majə tām̄ yān tə́.

¹⁶ Əndā rɔ̄n ta najə̄ yā deē ń əlan̄ rɔ̄sɔl̄ dɔn tə́ ní ō, ta najə̄ yā nge ndoō tə́ ō kə gōó adə̄ yá̰a̰ malang njə̄rā majə. Deē ń a rāā yá̰a̰ tītə̄ ń noō ní kɔ́ɔ̄ gerə̄m̄ i mbée n noō aĺ a? Najə̄ ń Kɔ́ɔ̄ɓē əda ní n noó.

¹⁷ Banī kumií ō, gír̄ kə́ kemií tə́ ō, ran̄ i dɔ yá̰á̰ kə́ tām̄ yāí īkɔ́ tə́ ngóy ō, gerə̄n̄ i kənī mósə de kə́ najə̄ gətóo dɔn tə́ nang tə́ ō, ī-rāā yá̰a̰ kə dɔ́nɔ́ ō, rāā kum de gə̄ ndoō tə́ ō ngóy.

¹⁸ Tā anī najə̄ ń Kɔ́ɔ̄ɓē əda sɔɔ̄ dɔ Joakim kə́ ngōn̄ Josias, mban̄g kə́ Juda tə́ ní n toó: Pā yo ń na: I yá̰á̰ kə́ to kum kaȳ aĺ kə́ ba̰ý beé, ngōkó̰ó̰ḿ kə́ dəngam, i yá̰á̰ kə́ to kum kaȳ aĺ kə́ ba̰ý beé, ngōkó̰ó̰ḿ kə́ dəyá̰ i yá̰á̰ kə́ to kum kaȳ aĺ kə́ ba̰ý beé, kɔ́ɔ̄ḿ. i yá̰á̰ kə́ to kum kaȳ aĺ kə́ ba̰ý beé, de kə́ bo ní deē a nōōnneé alé.

¹⁹ A dubə̄nən̄ i tītə̄ loo dubə̄ kərō beé. adə̄ a ndɔ́r̄nən̄ nang tə́ ō, a teēn̄ seneé ta róbə gə̄ kə́ Jerusalem tə́ yā kaw̄ kənīn ndágá.

Rɔ̄sɔl̄ kə́ dɔ Jerusalem tə́

²⁰ Āl̄ dɔ mbal̄ Liban tə́ ba ə́ga kɔŕ. Ādə̄ ndūí ɓār̄ taā dɔ loo kə́ Basan tə́. Ə́ga kɔŕ ādə̄ ndūí ɓār̄ kə̄ loo gə̄ tə́, tɔdɔ̄ ngé sāāí gə̄ malang ní gír yādə́ gān̄g kɔ̄ɔ́.

²¹ M-ɔ̄r̄ najə̄ seí dan ń usiīneé dɔ yá̰a̰ tə́ aĺ ní. ba ī-tél ə́da na: m̄-gḛy koō ngōn̄ najə̄ sḛ́ý aĺ bátə́. I yá̰á̰ ń noō n ī-rāā kə ngōn̄ dūúí bátə́ ɓōólaā ní. Ḭ̄ ōō najə̄ yāḿ nja kógə̄ḿ alé.

²² Nél ɔy ngé kulīí gə̄ malang aw̄ sedə́ kɔ̄ɔ́ ō, əhɔn̄ ngé sāāí gə̄ aw̄n̄ sedə́ dɔ ɓē kə́ rang tə́ ō. Kə́ rɔ̄kum tə́ ní, rɔ̄í a sɔlī ō, a ndaanī ō, najə̄ yā ngé nong yāí gə̄ malang tə́.

²³ Ḭ̄ ń ī-rāā ɓē dɔ mbal̄ Liban tə́ ō, ī-rāā kújə yāí dan kāgə̄ sédər gə̄ tə́ ō ní, ā ī-to̰ō̰ rus rus dan ń rɔ̄í a tōrī, tītə̄ yā dəyá̰ ń a rāā kem á a jənga rik rik ní.

Najə̄ kə́ sɔɔ̄ dɔ Konyahu, ngōn̄ Joakim

²⁴ Tītə̄ ń m̄-ndiń kə kumḿ noō, ká ré Konia, ngōn̄ Joakim, mban̄g kə́ Juda tə́, i tə́rá yá̰á̰ kə́ kəndā jī ko̰ḿ tə́ gə̄gē anī, m-ā m-ɔ̄rə̄n kɔ̄ɔ́.

²⁵ Rɔ̄kum, m-ə́laī jī ngé ndə̄ngāí yo tə́ ō, jī ngé gə̄ ń ī-ɓōĺdə́ ní tə́ ō, jī Nabukodonosor, mban̄g kə́ Babilon tə́ ō, jī de kə́ Kalde tə́ gə̄ ō.

²⁶ Ḭ̄ ō, kó̰o̰ kojií ō ní, m̄-ɓōkə́sí dɔ nang kə́ rang ń ojən̄sí tū tə́ aĺ ní tə́. Ā óyiī i tū tə́ noō.

²⁷ Adə̄ ā ī-téliī yā kaw̄ gogə́ dɔ nang ń ngur kaw̄ tū tə́ rāāsí ngá̰ý ní tə́ to̰ aĺ bátə́.

²⁸ Konia ngeé ń toō ní, i jóó kə́ tɔ̄ɔ̄ adə̄ majə rāań yá̰a̰ to̰ aĺ, aké i bay kə́ de gə̄ əyan̄ kɔ̄ɔ́ kə̄ nodə́ tə́ a? I tām̄ rí tə́ á tə́ɓānən̄ kə ngánən gēé ō, ɓōkə́n̄də́ kɔ̄ɔ́ dɔ nang kə́ gerə̄n̄ aĺ tə́ ō ní?

²⁹ Dɔ nang yāḿ, dɔ nang yāḿ, ōō najə̄ yā Kɔ́ɔ̄ɓē.

³⁰ Kɔ́ɔ̄ɓē ɔr̄ najə̄ i tītə̄ ń toō: Ī-ndangiī najə̄ kə́ dɔ deē ń toō tə́! I de kə́ nujə kɔ̄ɔ́. I ngōn̄ kə́ dəngam kə́ kəla rāān teēn yá̰á̰ tə́ aĺ bátə́ dan ń ndiń kə kumneé ní. Dan ngán kaaí gə̄ tə́ ní, nge kə́ kal kógə̄ḿ kə́ a asə ndi dɔ kōr̄ kāgə̄ mbang yā Dabid tə́ ō, kə́ a asə ko̰o̰ ɓē dɔ Juda tə́ ō ní gətóo.