JEREMI 19 - Bibəl ta Sar̄

Jóo man̄ tɔ̄ɔ̄

¹ Kɔ́ɔ̄ɓē ɔr̄ najə̄ i tītə̄ ń toō beé: Āw̄ ī-mang jóo man̄ jī kɔdə̄ jóó tə́, ba ī-gə̄rā kum kɔɔ̄ kə́rēý gə̄ dan ngáń Israel gə̄ tə́ ō, dan ngé tun̄ yá̰a̰ gə̄ tə́ ō ādə̄ aw̄n̄ seí.

² Gō tə́ anī, ī-teē kum kə̄ wól loo kə́ Ben Hinom ń i ta róbə yā jóo man̄ kə́ tɔ̄ɔ̄ gə̄ tə́ ní kadə̄ ə̄nī mbēr̄ najə̄ gə̄ ń m-ā m-ə́daī ní loo ń noō tə́.

³ Ā ə́da na: Mban̄g kə́ Juda tə́ gə̄ ō, sḭḭ̄ de gə̄ ń ī-ndiī Jerusalem tə́ ní ō, ōōī najə̄ yā Kɔ́ɔ̄ɓē. Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel əda ní n toó: M-ā m̄-rāā kadə̄ yá̰á̰ kə́ to kum kaȳ aĺ əsō dɔ loo ń toō tə́. Adə̄ deē nəkɔ́ ń oō najə̄n anī a jənga.

⁴ Tɔdɔ̄ əya̰mə̄n̄ kɔ̄ɔ́, nin̄ rāān̄ loo ń toō adə̄ tél to rim kɔ̄ɔ́. Róōn̄ yá̰a̰ ndējə̄ gə̄ horoó tū tə́ adə̄n nə́ɓā kə́ rang gə̄ kə́ nin̄ kɔ́ gə̄ ō, kaadə́ gə̄ ō, mban̄g kə́ Juda tə́ gə̄ ō gerə̄n̄də́ alé. Ɓōkə́n̄ mósə ngán gə̄ kə́ najə̄ gətóo dɔdə́ tə́ gə̄ nang tə́ adə̄ taā loo ní.

⁵ Rāān̄ loo kə́ kḭḭ kə̄ dɔɔ́ gə̄ kə rī ɓesə̄ Baal ba róōn̄ ngáńdə́ gə̄ horoó dɔ tə́ adə̄nən̄. I yá̰á̰ kə́ m-ādə̄də́ ndūḿ dɔ tə́ aĺ ō, m-ɔ̄r̄ najə̄n sedə́ aĺ ō, i yá̰á̰ kə́ m̄-gír̄ dɔ tə́ aĺ ō.

⁶ I tām̄ najə̄ ń noō tə́ n ndɔ̄ gə̄ a reēn̄ noō kadə̄ a ɓārə́n̄ loo ń toō na i Topet to̰ aĺ ō, wól loo kə́ Ben Hinom to̰ aĺ ō, ba a ɓārə́n̄ na i wól loo tɔ̄l̄ naā ní. Najə̄ ń Kɔ́ɔ̄ɓē əda ní n noó. M-ā m̄-tɔ̄l̄də́ kə kaskaraá ta kum madə̄ ba̰ā̰də́ gə̄ tə́,

⁷ m-ā m-ādə̄ i ngé ndə̄ngān̄də́ yo gə̄ n a tɔ̄lə̄n̄də́ kə jīdə́ ní. M-ā m-ādə̄ nīń de kə́ ngá̰ý gə̄ ń toō yel̄ kə́ dɔ rā̰ tə́ gə̄ ō, dā̰ kə́ dɔ nang tə́ gə̄ ō kadə̄ əsan̄.

⁸ M-ā m̄-rāā kadə̄ ɓē ń toō tél loo kə́ to kum ko̰ kə́ de gə̄ a əgan̄ kɔŕ ɓōĺ dɔ tə́. De gə̄ ń a mānə̄n̄ kadə tə́ á a̰a̰n̄ yá̰a̰ gə̄ malang ń nujə ní a ɔr kumdə́ ō, a tə́gān̄ dɔdə́ nek nek ō.

⁹ M-ā m̄-rāā kadə̄ əsan̄ dā̰ ngáńdə́ kə́ dəngam gə̄ ō, kə́ dəyá̰ gə̄ ō. A əsan̄ dā̰ naā dɔ dáńdə́ tə́ dan wur kɔl tə́ ō, kə sōlōó ō, dan ń madə̄ ba̰ā̰də́ kə́ ngé ndə̄ngādə́ yo gə̄ a utə̄n̄də́ ní.

¹⁰ Ā ī-tɔ̄ɔ̄ jóo man̄ ní ta kum de gə̄ ń ndān̄ tə́ ní.

¹¹ Gō tə́ anī, ā ə́dádə́ na: Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: m̄-nujə kə gír de gə̄ ń toō ō, kə ɓē ń toō ō, tītə̄ loo tɔ̄ɔ̄ jóó ń kɔdə̄ jóo əɓā ní beē, adə̄ deē a asə kəndā ta naā tə́ to̰ alé. Loo kə́ yā dubə̄ń yo a asə alé, adə̄ de gə̄ a dubə̄n̄ nīń Topet tə́ gə̄ gə̄gē.

¹² I yá̰á̰ ń noō n m-ā m̄-rāā kə loo ń noō ní ō kə de gə̄ ń ndin̄ kemeé ní ō. M-ā m̄-rāā ɓē ń toō kadə̄ to tītə̄ Topet. Najə̄ ń Kɔ́ɔ̄ɓē əda ní n noó.

¹³ Kújə́ kə́ Jerusalem tə́ gə̄ ō, Juda tə́ gə̄ ō, a télən̄ yá̰á̰ kə́ yḛr tītə̄ loo kə́ Topet tə́. Rɔ̄kum, kújə gə̄ ń noō malang ń de gə̄ róōn̄ yá̰a̰ ndējə̄ gə̄ ndágə loo gə̄ kə́ dɔ tə́ tə́ adə̄n̄ tə́yō̰ gə̄ ō, tə́ten̄ kasə nang tə́ tū tə́ adə̄n̄ nə́ɓā kə́ rang gə̄ ō ní, a télən̄ yá̰á̰ kə́ yḛr.

¹⁴ Jeremi tél Topet ń Kɔ́ɔ̄ɓē əlan kadə̄ ɔr̄ najə̄ yān tū tə́ ní reē. Ni-ra ndágə loo kə́ gīr̄ gidə kújə yā Kɔ́ɔ̄ɓē tə́ tə́ ba əda ngáń Israel gə̄ malang na:

¹⁵ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel, əda ní n toó: M-ā m̄-rāā kadə̄ yá̰á̰ kə́ to kum kaȳ aĺ gə̄ malang ń m-ɔ̄r̄ najə̄də́ ní əsōn̄ dɔ Jerusalem tə́ ō, dɔ ɓē gə̄ malang ń ni-o̰o̰ ɓē dɔ tə́ ní ō, tɔdɔ̄ nin̄ rāān̄ dɔ ngan̄g ō, mbātə́n̄ koō najə̄ yāḿ gə̄ ō.