JEREMI 18 - Bibəl ta Sar̄

Jeremi aw̄ ɓē kɔdə̄ jóo

¹ Kɔ́ɔ̄ɓē ɔr̄ najə̄ kə Jeremi i tītə̄ ń toō beé:

² Ḭ́ḭ dɔɔ́ āw̄ ɓē kɔdə̄ jóo. M-ā m-ɔ̄r̄ najə̄ yāḿ seí i ɓēé looneé.

³ M-ḭ́ḭ m-āw̄ ɓē kɔdə̄ jóó anī m-ə́ngen ndi a əɓa i jóo.

⁴ Dan ń kɔdə̄ jóo əɓa jóo ba a̰a̰ kadə̄ asə kumən alé anī, bótə̄yō̰ kɔ̄ɔ́ ō, tél əɓā kə́ rang kə gōó majə ō.

⁵ Anī Kɔ́ɔ̄ɓē ɔr̄ najə̄ seḿ tītə̄ ń toō:

⁶ Mā m-ásə rāāsí tītə̄ yā kɔdə̄ jóó ń noó aĺ a, de kə́ gír yā Israel tə́ gə̄. Sḭḭ̄ ī-toī kem jīḿ tə́ tītə̄ nánjə́ ń to kem jī kɔdə̄ jóó tə́ noō beé. Najə̄ ń Kɔ́ɔ̄ɓē əda ní n noó.

⁷ Dan kə́rēý gə̄ tə́ anī, m-ɔ̄r̄ najə̄ kɔr̄ nápar de gə̄ aláa ɓē ko̰o̰ kógə̄ḿ kə gír ngəraá ō, ɓéngə̄lē ō, nujəń sák sák ō.

⁸ Ba ré nápar de gə̄ ń m-ɔ̄r̄ najə̄ sɔɔ̄ dɔdə́ ní lōōn̄ gír rāā yá̰á̰ kə́ majaĺ tə́ anī, m-ā m̄-lōō gíŕ yá̰á̰ ń m̄-gír̄ ra sedə́ tə́ ní.

⁹ Dan kə́rēý gə̄ tə́ anī, m-ɔ̄r̄ najə̄ kəndā nápar de gə̄ aláa ɓē ko̰o̰ kógə̄ḿ ō, m̄-rāā ō.

¹⁰ Banī ré nin̄ rāān̄ yá̰á̰ kə́ majaĺ ń m̄-mbātə́ kɔ̄ɔ́ ní kanjə̄ kadə̄ oōn̄ najə̄ yāḿ anī, m-ā m̄-lōō gír rāā yá̰á̰ kə́ majə ń m-ɔ́jə rāā sedə́ tə́ ní.

¹¹ Ngɔlaā ní ɔ̄r̄ najə̄ kə de kə́ Juda tə́ gə̄ ō, kə de gə̄ ń ndin̄ Jerusalem tə́ ní ō, ə́dádə́ na: Najə̄ ń Kɔ́ɔ̄ɓē əda ní n toó: Á̰a̰ī, m̄-nóm̄ yá̰á̰ kə́ to kum kaȳ aĺ yā rāā sesí. m̄-gír̄ rāā yá̰á̰ kógə̄ḿ sesí. Ī-tūrī hálsí kógə̄ḿ kógə̄ḿ ba ə́ya̰ī yá̰a̰ kə́ majaĺ gə̄ kɔ̄ɔ́. Rɔ̄kum, ī-rāāī ādə̄ pā njə̄rāsí majə ō, kəla rāāsí majə ō.

¹² Banī nin̄ ədan̄ na: Yá̰á̰ kə́ yā rāā to̰ gətóo. Jḭḭ, j-a j-un i gō yá̰á̰ ń jə-gír̄ yā rāā ní ō, náā nəkɔ́ ɓáa a rāā dɔ ngan̄g kə́ al̄ naā kə̄ non tə́ ō.

Dɔ Israel ndígə̄nal Kɔ́ɔ̄ɓē yān kɔ̄ɔ́

¹³ Tā anī najə̄ ń Kɔ́ɔ̄ɓē əda ní n toó: Ī-dəjeī gír najə̄ dan nápar de gə̄ tə́, á̰a̰ī ké ōōī najə̄ kə́ beē ta deē kógə̄ḿ tə́ wa. Ngōmandə kə́ Israel tə́ rāā yá̰á̰ kə́ majaĺ kə́ to ɓōĺ ngá̰ý.

¹⁴ Néjə kə́ Liban tə́ ḭḭ dɔ mbal̄ kə́ bembeé gə̄ tə́ nja kógə̄ḿ adə̄ á̰a̰ī a? Man̄ kə́ sɔl̄ lɔm ń i sa̰y ō, a nūgə́ ō ní deē a mbātə́ a?

¹⁵ Dɔ gír deē yāḿ gə̄ ndigə naləḿ kɔ̄ɔ́. Nin̄ ndējə̄n̄ ɓesə̄ gə̄ kajaja. Ɓesə̄ gə̄ ní rāān̄də́ adə̄ tə́sōn̄ kum róbə́ yādə́ gə̄ ń i róbə́ kə́ lōō kōkə̄ gə̄ tə́ ní. Nin̄ unən̄ gō kə̄lá róbə gə̄ ń i róbə́ kə́ rāā aĺ ɓáý gə̄ ní.

¹⁶ Nin̄ rāān̄ ɓē yādə́ adə̄ téĺ ndágə loo kə́ to kum ko̰ kə́ de gə̄ a əgan̄ kɔŕ ɓōĺ dɔ tə́. De gə̄ malang ń mānə̄n̄ loo ń noō tə́ ní ɔr̄ kumdə́ ō, tə́gān̄ dɔdə́ nek nek ō.

¹⁷ m̄-tə̄ndā m̄-tḭ̄ḭ̄də́ no madə̄ ba̰ā̰də́ gə̄ tə́ tītə̄ nél kə́ dūn̄ ɓē tə́ ń a əla noó beē. Ndɔ̄ ń a tetən̄neédə́ rɔ̄ɔ̄ tə́ ní, m-ā m̄-tūr̄ gidəḿ tadə́ tə́, nin̄ a a̰a̰n̄ ta kumḿ alé.

De gə̄ oōn̄ naā dɔ Jeremi tə́, ndɔ̄ȳ yā nge koō ta

¹⁸ Anī de kə́rēý gə̄ ədan̄ na: Ī-reē j-oōī naā dɔ Jeremi tə́. Na ndū najə̄ a nal̄ ta ngé tun̄ yá̰a̰ gə̄ aĺ ō, Kɔjə̄ a nal ta kum kɔɔ̄ gə̄ aĺ ō, najə̄ yā Nə́ɓā a nal̄ ta ngé koō ta gə̄ aĺ ō. Ī-reēī jə-tə́daī najə̄ kə́ majaĺ gə̄ dɔn tə́ jə-nujiīneé rīn. J-əndāī mbījí gír najə̄ kɔrə̄n gə̄ tə́ alé.

¹⁹ Kɔ́ɔ̄ɓē, ī-nēl̄ mbīí, ōoń najə̄ gə̄ ń madə̄ ba̰ā̰ḿ gə̄ ɔrə̄n̄ ní.

²⁰ Deē a əga kə̄rā majə kə yá̰á̰ kə́ majaĺ a? Tɔdɔ̄ nin̄ ndērə̄n̄ bəlo kadə̄ m-ə̄sō kemeé kadə̄ gír yāḿ gān̄g. Ādə̄ əga kemií dɔḿ mā ń m̄-rā ta kumií tə́ m-ɔ̄r̄ najə̄ seí tām̄ yādə́ tə́ ō, m̄-tūr̄ ta wōn̄g yāí kə́ ngá̰ý dɔdə́ tə́ kɔ̄ɔ́ ō ní.

²¹ Ɓá anī ādə̄ ɓō rāā ngáńdə́ gə̄ ō, ī-rāā ādə̄ oyn̄ yo kaskar ō, ādə̄ nə̄yá̰də́ gə̄ nalə̄n̄ ngáńdə́ gə̄ ō, ngaadə́ gə̄ ō, ādə̄ yo tɔ̄l̄ dəngam gə̄ ō, ādə̄ balsáa gə̄ oyn̄ yo kaskar ta rɔ̄ɔ̄ tə́ ō.

²² Ādə̄ de gə̄ oōn̄ kōō kɔŕ wur kɔl kə́ ɓār̄ ɓēé loodə́, dan ń ā ə́la kə de gēé kadə̄ teēn̄ rétə́ gēé kə̄ rɔ̄də́ tə́ ənīn̄də́ rɔ̄ɔ̄ ɔyn̄neé yā kɔýń yá̰a̰ yādə́ gə̄ ní. Tɔdɔ̄ nin̄ ndērə̄n̄ bəlo gīrə̄n̄neé gidəḿ yā kəhɔm̄ń ō, ənīn̄ réng gír njaḿ tə́. kanjə̄ kadə̄ m̄-ger̄ gō ō.

²³ Ḭ̄ Kɔ́ɔ̄ɓē ḭ̄ ī-ger̄ najə̄ kə́ asə yoḿ gə̄ malang ń tétə̄n̄ dɔḿ tə́ ní majə. Ɔ̄r̄ yá̰á̰ kə́ gōtə́ aĺ yādə́ ń rāān̄ ní kɔ̄ɔ́ alé. Ādə̄ majaĺ yādə́ gə̄ ń rāān̄ ta kumií tə́ ní gotə to karī alé. Ādə̄ tə́sōn̄ nang tə́ ta kumií tə́. Dan ń wōn̄g yāí a ḭḭ seí ní ɔ́jə́də́ kum.