JEREMI 17 - Bibəl ta Sar̄

¹ Yá̰á̰ kə́ gōtə́ aĺ yā Juda i kə́ ndang kə gəreé ō, kə diyamā̰a̰ kə́ ta nīmbə́ ō. Ndangən̄ i ngarā̰ kemdə́ tə́ ō, i dɔ gajə loo tun̄ yá̰a̰ gə̄ tə́ ō.

² Loo tun̄ yá̰a̰ yādə́ gə̄ ō, kāgə̄ kə́ yā ɓōĺ gidə yādə́ gə̄ ń ran̄ ngɔr kadə ngé gə̄ ń ton̄ mbōl̄ ngándáńg tə́ dɔ ngán mbal̄ kə́ ngāl̄ gə̄ tə́ ō, ní a ɔrə̄n̄ najə̄də́ i tītə̄ loo kɔr̄ najə̄ ngáńdə́ gə̄.

³ Ḭ̄ ń o̰o̰ī ta rāā ɓesə̄ dɔ mbal̄ tə́ kem bembeé ní, m-ā m-ādə̄ de gə̄ ɔyn̄ yá̰a̰ kənge yāí gə̄ ō, yá̰a̰ kə́ gātə̄də́ i ngá̰ý gə̄ ń ə̄ndā dɔ jīí ní ō, dɔ gúú tə́. M-ā m-ādə̄ ɔyn̄ dɔ gúú tə́ najə̄ yā yá̰á̰ kə́ gōtə́ aĺ ń ī-rāā dɔ loo ndɔ̄ȳ gə̄ tə́ gō nang yāí tə́ kə taá malang ní.

⁴ A ə́ya̰ ɓē ń m-ādī ní ba ā ɔ̄r̄ rɔ̄í yā ndi kə kérí sa̰y rɔ̄ tə́. M-ā m-ə́la dɔí gír tɔ́gə yā madə̄ ba̰ā̰í gə̄ tə́ kem ɓē kə́ ī-ger̄ aĺ tə́. Tɔdɔ̄ ī-rāāī ādə̄ wōn̄g yāḿ əɓa hor tə́ bup yā ko̰o̰sí kə́ njɔ́ḿ gə̄ tə́.

Kənī kem báŕ báŕ kə́ rɔ̄kum ō, kə́ rɔ̄kum aĺ ō

⁵ Najə̄ ń Kɔ́ɔ̄ɓē əda ní n toó: Ndɔ̄ĺ i dɔ deē ń əndā kemən dɔ deē madə̄n gə̄ tə́ ō, əndā tɔ́gən dɔ yá̰á̰ kə́ dɔ nang tə́ gə̄ tə́ ō, mbātə́ Kɔ́ɔ̄ɓē ngarā̰ kemən tə́ ō ní.

⁶ Ni to i tītə̄ bɔkə́ káḿ kə́ ra kem loo kə́ man̄ gətóo tū tə́ tə́. Ni a ndi dan majə ń a reē tə́ ní alé, ba a rāā ɓē i kem dəla loo kə́ hor o̰o̰ malang tə́. I dɔ nang kə́ katə̄n tɔ̄l̄ yá̰á̰ kə́ kemeé malang adə̄ deē asə ndi ɓē tū tə́ alé.

⁷ Ba tɔ́r̄ ta i dɔ deē ń əndā kemən dɔ Kɔ́ɔ̄ɓē tə́ ní. Kɔ́ɔ̄ɓē a rāā kadə̄ ni a ənī kemən báŕ báŕ.

⁸ Ni to tītə̄ kāgə̄ ń əhɔn kadə man̄ tə́ ní. Əla ngəran kum kə̄ maná. Ni a ger̄ gō ngā nəngā ń a reē ní alé. Mbīn to mbōl̄ ngándáńg. Ɓāl̄ ń man̄ əhɔń laa tə́ ní, ni sōl̄ yá̰a̰ alé. Ni an̄ kə̄ non tə́.

⁹ Gír̄ kə́ kem de gə̄ tə́ tə́la naā ngá̰ý. Dum̄ kadə̄ ḭ̄ deē ɔ̄r̄də́ dɔ tə́.

¹⁰ I náā n asə ger̄ gír̄ gə̄ ní? Mā Kɔ́ɔ̄ɓē m-á̰a̰ gír̄ kə́ kem de gə̄ tə́ ō, m-ə̄ndā ma̰ȳ ngarā̰ kemdə́ ō, yā kadə̄ m-ə̄ndań nja deē kógə̄ḿ kógə̄ḿ kə gō hál rāān ō, yá̰a̰ gə̄ ń teēn̄ tū kəla rāān gə̄ tə́ ní ō.

¹¹ Deē ń ɔsə dɔ dūbə̄ yá̰a̰ kənge naā tə́ kə róbəneé aĺ ní, to i tītə̄ kerwḛy kə́ ɔbə̄ kaa kə́ i ni n ənī ní alé. Teē kə̄ danaá rik anī, yá̰a̰ kənge yān a əya̰n kɔ̄ɔ́ dan majə kə́ ngá̰ý tə́. A əsō ō, a tél de kə́ kur̄ dɔn gətóo kə̄ non tə́ ō.

I Kɔ́ɔ̄ɓē ngóy n i nge rāā kadə̄ deē ndi kə kumneé ní

¹² Ta kəla gíŕ yá̰a̰ gə̄ tə́ sasak kōr̄ kāgə̄ mbang kə́ to kɔsə gɔn ndi dɔɔ́ nú kɔ̄ɔ́ ɓá. Kújə́ kə́ táĺ yājí i dɔɔ́ loo ń noō tə́.

¹³ Kɔ́ɔ̄ɓē, ḭ̄ ń Israel gə̄ əndān̄ kemdə́ dɔí tə́ ní, de gə̄ malang ń əya̰nī kɔ̄ɔ́ ní rɔ̄də́ sɔl̄də́ ngá̰ý. Ngé gə̄ ń ɔrə̄n̄ rɔ̄də́ rɔ̄ḿ tə́ kɔ̄ɔ́ ní tadə́ a tḭ̄ḭ̄, tɔdɔ̄ nin̄ əya̰n̄ Kɔ́ɔ̄ɓē ń i ngəra kajə ní kɔ̄ɔ́.

Ndɔ̄ȳ yā Jeremi

¹⁴ Kɔ́ɔ̄ɓē ī-tɔ̄l̄ mo̰y dɔḿ tə́ anī rɔ̄ḿ a ngan̄g. Ī-gān̄g dɔḿ, anī m-ā m-ájə. Tɔdɔ̄ i ḭ̄ n i yá̰á̰ tɔ̄ȳ yāḿ ní.

¹⁵ De gə̄ ədamə̄n̄ na: Najə̄ yā Kɔ́ɔ̄ɓē i rá anī ādə̄ reē rāā yá̰a̰.

¹⁶ Mā tā anī, m̄-mbātə́ kadə̄ mā i nge kul̄ yá̰a̰ yāí alé. Ḭ̄ ī-ger̄ majə kadə̄ m̄-ndə̄ngā ndɔ̄ kə́ majaĺ alé. Najə̄ ń teē taḿ tə́ ní m-ə́da i ta kumií tə́.

¹⁷ Ḭ̄ ń i loo ɓɔ̄ɔ̄ rɔ̄ yāḿ ndɔ̄ yá̰á̰ kə́ to kum kaȳ aĺ tə́ ní, ī-lōō rāām̄ kadə̄ m̄-sōl̄.

¹⁸ Ādə̄ rɔ̄sɔl̄ rāā ngé rāām̄ yá̰á̰ kə́ tōr̄ gə̄, ba ādə̄ rāām̄ mā alé. Ādə̄ i nin̄ n ndewn̄, ba i mā alé. Ī-rāā ādə̄ ndɔ̄ yá̰á̰ kə́ to kum kaȳ aĺ əsō dɔdə́ tə́. Ī-nujə sedə́ ba ī-tél ī-nujə sedə́ ɓáý to̰.

Kɔ́ɔ̄ɓē əda gír deē yān gə̄ kadə̄ ɓōlə́n̄ ndɔ̄ sabat

¹⁹ Kɔ́ɔ̄ɓē ɔr̄ najə̄ i tītə̄ ń toō beé: Āw̄ ī-ra ta róbə́ kə́ bo ń mban̄g kə́ Juda tə́ gə̄ a udən̄neé kem ɓēé ō, teēn̄neé ō ní. Āw̄ ī-ra ta róbə́ kə́ Jerusalem gə̄ tə́ malang.

²⁰ Ā ə́dádə́ na: Mban̄g kə́ Juda tə́ gə̄ ō, de kə́ kem ɓē kə́ Jerusalem tə́ gə̄ ō, sḭḭ̄ malang ń ī-mānī kə ta róbə gə̄ ń toō ō ní, ōōī najə̄ yā Kɔ́ɔ̄ɓē.

²¹ Kɔ́ɔ̄ɓē ɔr̄ najə̄ i tītə̄ ń toō beé: Ī-lōōī kətō yá̰á̰ kə́ kɔȳ gə̄ ndɔ̄ sabat tə́, ī-mānīneé ta róbə́ kə́ Jerusalem gə̄ tə́ aĺ ō.

²² Sḭḭ̄ ā ī-teēī kə yá̰á̰ kə́ kɔȳ gə̄ kə́ kem kújə yāsí gə̄ tə́ ndágá ndɔ̄ sabat tə́ alé, tītə̄ ń m-ə̄nań ndūḿ kaasí gə̄ ní.

²³ Nin̄ oōn̄ najə̄ yāḿ alé ō, nēlə̄n̄ mbīdə́ alé ō. Ba rāān̄ dɔ ngan̄g adə̄ mbātə́n̄ koō yá̰a̰ gə̄ ń m-ɔ́jə́də́ ní ō, mbātə́n̄ kun dɔdə́ tə́ ō.

²⁴ Ré sḭḭ̄ ōōī najə̄ kɔrə̄ḿ kə́ rɔ̄kum tə́ ō, ī-rāāī ādə̄ de gə̄ ətōn̄ yá̰á̰ kə́ kɔȳ gə̄ mānə̄n̄neé ta róbə gə̄ ń toō tə́ ndɔ̄ sabat tə́ aĺ ō, ī-ɓōlíī gidə ndɔ̄ sabat ō, ī-rāāī kəla ndɔ̄ ngeé ń noō tə́ aĺ ō anī,

²⁵ mban̄g gə̄ ń ndin̄ dɔ kōr̄ kāgə̄ mbang yā Dabid tə́ ō, alə̄n̄ kem púsə́ sə́nda gə̄ tə́ ō, dɔ sə́nda gə̄ tə́ ō ní, nin̄ ō, de kə́ bo yādə́ gə̄ ō, de kə́ Juda tə́ gə̄ ō, de kə́ kem ɓē kə́ Jerusalem tə́ gə̄ ō, a udən̄ kə ta róbə ɓē gə̄ ń toō. De gə̄ a ndin̄ kem ɓē ń toō tə́ ngándáńg. Najə̄ ń Kɔ́ɔ̄ɓē əda ní n noó.

²⁶ De gə̄ a ḭḭn̄ ɓē gə̄ kə́ Juda tə́ ō, kem ɓē gə̄ ń ndi gīrə̄n̄ gidə Jerusalem ní ō, kem ɓē gə̄ kə́ Benjamḛ tə́ ō, dɔ nang kə́ mbal̄ bo gətóo tū tə́ tə́ ō, kə́ mbalá tə́ ō, kə́ Negeb tə́ ō, yā reē. Ngé gə̄ ń adə̄n̄ dā̰ gə̄ kə́ yā róō horoó ō, kə́ yā tun̄ ō, kadə̄ karī gə̄ ō, kajaja ō ní, a reēn̄ naā tə́ kə ngé gə̄ ń a adə̄n̄ yá̰a̰ tun̄ kə́ yā tɔ̄ȳiń Kɔ́ɔ̄ɓē kem kújə yān tə́ ní.

²⁷ Banī ré sḭḭ̄ ī-mbātíī koō najə̄ yāḿ, adə̄ ɔ̄rī kam̄ ndɔ̄ sabat aĺ ō, ə̄tōī yá̰á̰ kə́ kɔȳ gə̄ ō, údiī kə ta róbə́ kə́ Jerusalem tə́ gə̄ ndɔ̄ sabat tə́ ō anī, m-ā m̄-rāā hor ta róbə ɓē gə̄ tə́ kadə̄ a o̰o̰ kújə́ kə́ majə ngá̰ý kə́ Jerusalem tə́ gə̄ ō, a oy aĺ ō.