JEREMI 13 - Bibəl ta Sar̄

Jeremi ō ta kūbə̄ lḛ́ḛ́ kə́ yā do̰ō̰ń ɓōdə̄ ō

¹ Yá̰á̰ ń Kɔ́ɔ̄ɓē ədam̄ ní n toó: Āw̄, ī-mang ta kūbə̄ lḛ́ḛ, ī-do̰ō̰ ɓōdīí tə́, ba ī-lōō kəla kum man̄ tə́.

² m̄-mang ta kūbə̄ lḛ́ḛ m̄-do̰ō̰ ɓōdə̄ḿ tə́ tītə̄ ń Kɔ́ɔ̄ɓē ədań ní.

³ Kɔ́ɔ̄ɓē tél ədam̄ ɓáý to̰ na:

⁴ Ḭ́ḭ dɔɔ́ āw̄ kum kə̄ Opəratə tə́, kə ta kūbə̄ ń ī-mang ī-do̰ō̰ ɓōdīí tə́ ní, ba ī-ɓɔ̄ɔ̄n kem bəlo mbal̄ tə́ loo ń noō tə́.

⁵ M-āw̄ m̄-ɓɔ̄ɔ̄ ta kūbə̄ ní kadə Opəratə tə́ tītə̄ ń Kɔ́ɔ̄ɓē ədań ní.

⁶ Ndɔ̄ ngá̰ý gō tə́ anī, Kɔ́ɔ̄ɓē ədam̄ na: Ḭ́ḭ dɔɔ́ āw̄ kum kə̄ Opəratə tə́ ba un ta kūbə̄ do̰ō̰ ɓōdə̄ ń m-ə́daī na kə ī-ɓɔ̄ɔ̄ noó ní.

⁷ M-ḭ́ḭ m-āw̄ Opəratə tə́ m̄-ndəle ta kūbə̄ ní ba m-ún loo ń m̄-ɓɔ̄ɔ̄ tū tə́ ní tə́. Banī ta kūbə̄ lḛ́ḛ ní əɓa mōrō kɔ̄ɔ́ adə̄ majə rāāń yá̰a̰ to̰ alé.

⁸ Anī Kɔ́ɔ̄ɓē ɔr̄ najə̄ seḿ əda na:

⁹ Najə̄ ń Kɔ́ɔ̄ɓē əda ní n toó: M-ā m̄-rāā kadə̄ Juda a asə kənda kadən to̰ aĺ ō, kadə̄ Jerusalem ənda kadən ngá̰ý to̰ aĺ ō.

¹⁰ Gír de kə́ ngé kem ndul gə̄ ń mbātə́n̄ koō najə̄ yāḿ ba rāān̄ dɔ ngan̄g kə̄ nodə́ tə́ ō, ngɔ̄də̄n̄ gō nə́ɓā kə́ rang gə̄ tə́ yā ndɔ̄ȳdə́ ō, ɔsən̄ nodə́ nang tə́ nodə́ tə́ rɔȳn̄də́ ō ní, ādə̄ tél ton̄ tītə̄ ta kūbə̄ do̰ō̰ ɓōdə̄ ń toō ń majə rāań yá̰a̰ to̰ alé ní.

¹¹ M-ə́hɔ de gə̄ malang kə́ gír yā Israel tə́ ō, kə́ gír yā Juda tə́ ō kə̄ rɔ̄ḿ tə́, tītə̄ loo do̰ō̰ ta kūbə̄ lḛ́ḛ ɓōdə̄ tə́ beé. I yā kadə̄ télən̄ gír deē yāḿ gə̄ ō, rī ɓār̄ yāḿ ō, yá̰a̰ tɔ̄ȳ yāḿ ō, yá̰á̰ súū rɔ̄ yāḿ ō, banī usədə́ nin̄ dɔ tə́ alé. Najə̄ ń Kɔ́ɔ̄ɓē əda ní n noó.

Kasə nduú ō, wōn̄g yā Nə́ɓā ō

¹² Ḭ̄ ā ɔ̄r̄ najə̄ ń toō sedə́. Najə̄ ń Kɔ́ɔ̄ɓē Nə́ɓā yā Israel əda ní n toó. De gə̄ ā ɓōkə́n̄ kasə nduú kadə̄ rosə kem jóo malang. Ba ré tél ədan̄ na: Jə-ger̄ majə kadə̄ a ɓōkə́n̄ kasə nduú kadə̄ rosə kem jóo malang,

¹³ anī ā ə́dádə́ na: Najə̄ ń Kɔ́ɔ̄ɓē əda ní n toó: M-ā m̄-rāā kadə̄ kasə a rāā de gə̄ malang kə́ kem ɓē ń toō tə́ ō, a rāā mban̄g gə̄ kə́ gír yā Dabid tə́ ń ndin̄ dɔ kōr̄ kāgə̄ mbang yān tə́ ní ō, ngé tun̄ yá̰a̰ gə̄ ō, ngé koō ta gə̄ ō, de gə̄ malang kə́ kem ɓē kə́ Jerusalem tə́ ō.

¹⁴ M-ā m̄-rāā kadə̄ bɔbə̄ ngán gə̄ ō, ngán gə̄ ō, malang tɔ́sə̄n̄ dɔdə́ naā tə́ tɔ̄ɔ̄n̄. De kógə̄ḿ kə́ kadə̄ m-ə́ya̰n karī gətóo. Yá̰á̰ kə́ a ɔgə̄m̄ nujə sedə́ a gətóo. M-ā m-á̰a̰ kum tō ndoō yādə́ aĺ ō, m-ā m̄-mā̰ȳ rɔ̄ḿ dɔdə́ tə́ aĺ ō, kumḿ o̰o̰m̄ sedə́ aĺ ō. Najə̄ ń Kɔ́ɔ̄ɓē əda ní n noó.

Ōōī tá na sōgə́ tasí tɔ̄ɔ̄

¹⁵ Ōōī, ī-nēlī mbīsí ōōīneé, ī-tetiī rɔ̄sí kə̄ nang tə́ ba ōōī: I Kɔ́ɔ̄ɓē n ɔr̄ najə̄ ní.

¹⁶ Ɔ́siī gɔn Kɔ́ɔ̄ɓē Nə́ɓā yāsí kété tá kadə̄ ni-əla kə tilií dɔsí tə́ ō, kété tá kadə̄ ī-bḭ́ḭ̄ dɔ mbal̄ gə̄ kə́ til taā dɔdə́ tə́ ō. Ī-ngóōī i loo kə́ unjə̄ kow, ba ni-tūrə̄n adə̄ téĺ ndíl yo ō, kil̄ man̄ kə́ ndul ndí ndí ō.

¹⁷ Ré ōōī yá̰á̰ ń toō aĺ anī, m-ā m̄-rāā rɔ̄ḿ ndoō loo ɓɔ̄ɔ̄ rɔ̄ yāḿ tə́, najə̄ kɔjə rɔ̄ yāsí kə́ ngá̰ý ń toō tə́. Kumḿ i kə nōó, i kə nōó. Man̄ nōō a reē kumḿ tə́. Əhɔn̄ ɓūtə̄ yá̰a̰ kul̄ yā Kɔ́ɔ̄ɓē gə̄ dɔ gúú tə́ aw̄n̄ sedə́ dɔ ɓē kə́ rang tə́.

Nə́ɓā ɔr̄ najə̄ kə gír kojə yā mban̄g

¹⁸ Ə́da mban̄g ō, kó̰o̰ mban̄g ō na: Ī-ndiī dɔ dā̰ nang tə́! Jākā mbang kə́ dɔsí tə́ ń majə ngá̰ý ní teē əsō kɔ̄ɔ́.

¹⁹ Ta ɓē gə̄ kə́ Negeb i kə́ kutə̄ kɔ̄ɔ́, deē kógə̄ḿ kə́ reē yā teē gətóo. Aw̄n̄ kə de kə́ Juda tə́ malang dɔ ɓē kə́ rang tə́. I kəhɔ de gə̄ kə taá malang kaw̄ sedə́ dɔ ɓē kə́ rang tə́ dɔ gúú tə́.

Əlan̄ rɔ̄sɔl̄ dɔ Jerusalem tə́

²⁰ Ún kumií kə̄ dɔɔ́ ba á̰a̰ loo: I nin̄ n ḭḭn̄ mbɔ́r ɓē kə́ ko̰ó̰ tə́ a reēn̄ toó. Gír de gə̄ ń ɓɔ̄ɔ̄īn̄ ní i rá? Ɓūtə̄ yá̰a̰ kul̄ yāí kə́ majə ngá̰ý gə̄ ní i rá?

²¹ I rí n ā ə́da dan ń de gə̄ a reēn̄ rāāī yá̰á̰ kə́ to kum kaȳ aĺ tə́ ní. I īkɔ́ n ī-ndóōdə́ loo ko̰o̰ ɓē dɔí tə́ ní aĺ a? Rɔ̄kum, rɔ̄í a tōrī tītə̄ yā dəyá̰ ń a rāā kem ní.

²² Ī-dəje rɔ̄í najə̄ ə́da na: I tām̄ rí tə́ á yá̰á̰ ń toō rāām̄ ní? I tām̄ yá̰á̰ kə́ gōtə́ aĺ ngá̰ý ń ī-rāā tə́ ní n de gə̄ sa̰ā̰n̄neé kūbə̄ kə́ ta gírí tə́ kə̄ dɔɔ́ ō, ɓīīn̄neé seí dɔ gúú tə́ ō ní.

²³ De kə́ Kus asə tūr̄ ɓálən a? Kagə asə tūr̄ bḭḭ̄n a? Sḭḭ̄ de gə̄ ń rāā majaĺ ndér̄sí kɔ̄ɔ́ ní, ā ásiī rāā yá̰á̰ kə́ majə a?

²⁴ M-ā m̄-tə̄ndā m̄-tḭ̄ḭ̄də́ tītə̄ buĺ mu kə́ néĺ kə́ mángá ɔy dáyń beé.

²⁵ Dūbə̄ yá̰a̰ kənge yāí ń m̄-mbɔ̄jə́ m-ādī ní n toó, tɔdɔ̄ dɔí ndígə̄nal dɔḿ tə́ ō, ə̄nī kemií ādə̄ yá̰á̰ kə́ rɔ̄kum aĺ ō. Najə̄ ń Kɔ́ɔ̄ɓē əda ní n noó.

²⁶ Tām̄ ń toō tə́ ní, mā m-ā m̄-sa̰ā̰ kūbə̄ kə́ ta gírí tə́ kə̄ dɔɔ́ kadə̄ de gə̄ a̰ā̰n̄ gírí.

²⁷ M-ōō ndūí loo nōō ɓō dəngam tə́ ō, m-á̰a̰ī loo rāā rāȳ tə́ ō, loo rāā ájə́ba kə́ to rɔ̄sɔl̄ tə́ ō. M-á̰á̰ yá̰á̰ kə́ to yḛr kum yāí gə̄ ń ī-rāā dɔ ngán mbal̄ gə̄ tə́ ō, kem ndɔr̄ gə̄ tə́ ō ní. Rɔ̄ ndoō wa, Jerusalem! Ī-mbātə́ kun gōḿ yā tə́goń rɔ̄í kadə̄ unjə̄ i bátə́ ta kə́ rá?