JEREMI 10 - Bibəl ta Sar̄

Nə́ɓā kə́ ndi kə kumneé ō, ɓesə̄ gə̄ ō

¹ De kə́ Israel tə́ gə̄, ōōī najə̄ ń Kɔ́ɔ̄ɓē əda dɔsí tə́ ní.

² Kɔ́ɔ̄ɓē ɔr̄ najə̄ i tītə̄ ń toō beé: Ī-lōōī ndájə̄ yá̰a̰ rāā nápar de gə̄ ō, ī-lōōī kadə̄ yá̰á̰ kə́ rāā yá̰a̰ no rā̰ tə́ əla ɓōĺ kemsí tə́ ō. Na i nápar de gə̄ n yá̰a̰ gə̄ ń noō a əla ɓōĺ kemdə́ tə́ ní.

³ Tɔdɔ̄ yá̰a̰ kāgə̄ ɓē yā gír de gə̄ i yá̰á̰ kə́ kanjə̄ kumən. De gə̄ tə́gān̄ kāgə̄ kem kuú ō, kɔdə̄ kāgə̄ tɔ́l kə walá ō.

⁴ Rāān̄ gidə kə gində̄ arjā̰a̰á̰ ō, kə lɔ́rɔ́ ō adə̄ ndə́lē, ba əndan̄ tū kāgə̄ tə́ kə máyá̰ ō kə mūú ō kadə̄ yéȳ kə̄ loo gə̄ tə́ alé.

⁵ Ɓesə̄ gə̄ ní ran̄ tītə̄ ndíĺ yá̰á̰ kə́ kudə kem ndɔr̄ kosə́ gə̄ tə́ beē. Ɔrə̄n̄ najə̄ aĺ ō. A ətōn̄də́ i mbéé tá ō. Rɔ̄kum, a ətōn̄də́ i mbée tɔdɔ̄ asən̄ njə̄rā alé. Ī-lōōī ɓōĺdə́ na a rāān̄ yá̰a̰ sesí aĺ ō, asən̄ rāā yá̰á̰ kə́ majə sḛ́ý tām̄ yāsí tə́ aĺ ō.

⁶ Kɔ́ɔ̄ɓē, de kə́ tītīí ḭ̄ gətóo. Ḭ̄ i de kə́ bo ō, rīí ɓār̄ ngá̰ý dɔ yá̰a̰ gə̄ ń ī-rāā tə́ ní ō.

⁷ Mban̄g yā nápar de gə̄, i náā n a ɓōlíī aĺ ní? I ḭ̄ n de gə̄ ɓōĺnī ní. De kə́ nge kum kedə̄ kə́ tītīí dan nápar de gə̄ tə́ ō, kem ɓē ko̰o̰ gə̄ tə́ malang ō ní gətóo.

⁸ I mbóo gə̄ malang ō, gerə̄n̄ najə̄ aĺ ō. Ɓesə̄ yādə́ gə̄ ń unən̄ gōdə́ ní, ndóōn̄də́ yá̰á̰ kə́ kanjə̄ kumən gə̄.

⁹ Ɓesə̄ gə̄ ní i njár̄ gində̄ arjā̰a̰ kə́ hɔɔ́lɔ̄ kə́ ḭḭn̄neé Tarsis ō, i lɔ́ŕ kə́ Upajə ō ń nge tɔ́ĺ yá̰a̰ ō, nge nōō yá̰a̰ ō rāān̄ ní. Əlan̄ kūbə̄ kə́ kərē gusə gusə ō, kərē bḭḭ ō rɔ̄də́ tə́. Nin̄ malang i yá̰a̰ gə̄ ń de kə́ jīdə́ ger̄ yá̰a̰ gə̄ rāān̄ ní.

¹⁰ Banī Kɔ́ɔ̄ɓē Nə́ɓā i Nə́ɓā rɔ̄kum, i Nə́ɓā kə́ ndi kə kumneé ō, i mban̄g kə́ ndi ngándáńg ō. Dan ń wōn̄g rāān anī, dɔ nang ndebə. Nápar de gə̄ asən̄ yá̰á̰ sḛ́ý ta wōn̄g yān kə́ ngá̰ý tə́ alé.

¹¹ Yá̰á̰ ń ā ə́daīdə́ ní n toó: Nə́ɓā gə̄ ń rāān̄ dɔ rā̰ aĺ ō, dɔ nang aĺ ō ní, a gətóon̄ kɔ̄ɔ́ dɔ nang tə́ ō, gír rā̰ tə́ ō.

¹² Tɔdɔ̄ Nə́ɓā i nge ń rāā dɔ nang kə ta kūl̄ tɔ́gəneé ō, əndā yá̰a̰ gə̄ kə kum kedə̄ yānneé ō, teē kem dɔ rā̰ kə̄ gogə́ kə gō yá̰a̰ ger̄ yānneé ō ní.

¹³ I ni n ɔsə dɔ man̄ gə̄ kə́ no rā̰ tə́ naā tə́ ō, rāā adə̄ kil̄ man̄ ḭḭ ta ngóy dɔ nang tə́ aw̄ kum kə̄ dɔɔ́ ō, rāā adə̄ man̄ tel̄ ō, man̄ edə ō, ni-rāā adə̄ nél teē kem loo ɓɔ̄ɔ̄ rɔ̄ yān tə́ ō ní.

¹⁴ De gə̄ malang ndin̄ tadə́ mbóo kóńg. Rɔ̄ ngé nōō lɔ́r gə̄ malang sɔl̄də́ dɔ ɓesə̄ yādə́ gə̄ tə́. Yá̰a̰ yādə́ kə́ tɔ́sə̄ gə̄ i yá̰á̰ kə́ rɔ̄kum aĺ gə̄. Koō gətóo kemdə́ tə́.

¹⁵ I yá̰á̰ kə́ rāā kanjə̄ kumən gə̄ ō, kə́ to kəgō gə̄ ō. Ré ndɔ̄ kə́ yā kadə̄ ɔjəmə̄n̄neé kəla rāādə́ gə̄ asə anī, yādə́ i yo.

¹⁶ Nə́ɓā yā Jakob to tītə̄də́ alé. I ni n i nge rāā yá̰a̰ malang ō, Israel i gír de gə̄ ń nin̄ i yá̰a̰ kənge yān ní ō. Rīn na i Kɔ́ɔ̄ɓē kə́ bo kə́ tɔ́gən i ngá̰ý.

Loo a nujə̄ sák sák ngɔr (Jeremi əda na)

¹⁷ Ɔ́ý yá̰a̰ kənge yāí kə́ nang tə́ gə̄, ḭ̄ ń ngé rɔ̄ɔ̄ gə̄ gīrə̄n̄ gidií ní.

¹⁸ tɔdɔ̄ najə̄ ń Kɔ́ɔ̄ɓē əda ní n toó: Ń toō ní m-ā m̄-tə̄ɓā de kə́ kem ɓēé gə̄ kɔ̄ɔ́, ba njaḿ i gōdə́ tə́ ngɔr kadə̄ a̰ȳn̄ naā alé.

(De kə́ Jerusalem gə̄ ədan̄ na)

¹⁹ Rɔ̄ ndoō wa! Loo nujə sák sák kɔ̄ɔ́! J-ə́ngeī do kə́ dum̄ kedə̄. J-ə́daī na: I majaĺ yājí n noó. Yājí i kadə̄ jə-tə́gāī tají dɔ tə́.

²⁰ Kújə tandā yājí gə̄ nujən̄ sák sák kɔ̄ɔ́, kəlādə́ gə̄ gángə̄n̄ malang kɔ̄ɔ́. Ngánjí gə̄ əya̰n̄jí kɔ̄ɔ́, nin̄ gətóon̄. De gə̄ kə́ kadə̄ rákə̄n̄ tandā yājí gə̄ gətón̄ bátə́ ō, de gə̄ kə́ kadə̄ rákə̄n̄ gérger yājí gə̄ gətón̄ bátə́ ō.

(Jeremi əda na)

²¹ Ngé ngɔ̄m̄ yá̰a̰ kul̄ gə̄ i mbóo de gə̄, nin̄ sāān̄ Kɔ́ɔ̄ɓē alé. I tām̄ ń toō tə́ n gerə̄n̄ rāā kəla kə gōó aĺ ō, usədə́ dɔ yá̰a̰ kul̄ gə̄ tə́ aĺ ō ní.

²² De gə̄ oōn̄ kōō yá̰á̰ kógə̄ḿ kə́ a reē kə̄ dɔdə́ tə́ ō, kə́ ḭḭ dām̄ mbɔ́r ɓē kə́ ko̰ó̰ tə́ ba yéȳ yá̰a̰ kə ngangāá ngá̰ý ō. A reē yā rāā ɓē kə́ Juda tə́ kadə̄ tél loo kə́ to kum ko̰ ō, kadə̄ telən̄ loo ra tal̄ gə̄ ō.

Jeremi ndɔ̄ȳ kum gotə gír deē yān gə̄

²³ Kɔ́ɔ̄ɓē, m̄-ger̄ kadə̄ deē ndul i kɔ́ɔ̄ róbə yān aĺ ō, m̄-ger̄ kadə̄ nge njə̄rā mbā asə njə̄rā dɔ róbə́ tə́ kə gōó alé.

²⁴ Kɔ́ɔ̄ɓē, ə́ndam̄, banī ādə̄ i kə looneé tá. ī-lōō kəndam̄ kə wōngōó na sōgə́ ī-rāām̄ ādə̄ m̄-to yá̰a̰ alé.

²⁵ Ādə̄ wōn̄g yāí kə́ ngá̰ý əsō dɔ nápar de gə̄ ń gernī aĺ tə́ ní ō, dɔ gír de gə̄ ń ndɔ̄ȳn̄ī aĺ tə́ ní ō, tɔdɔ̄ de gə̄ nujən̄ Jakob. De gə̄ nujən̄ seneé ō, tɔ̄l̄nən̄ kə̄ nodə́ tə́ ō. De gə̄ nujən̄ kə loo yānneé sák sák kɔ̄ɔ́.