JEJU TEĒ KUM JA̰A̰ 1 - Bibəl ta Sar̄

Tāā kə́ dɔ makətūbə̄ ń toō tə́

¹ Yá̰a̰ gə̄ kə́ ton̄ loo mundə̄ tə́ ń Nə́ɓā teē kum Jeju Kərist dɔ tə́ kadə̄ ɔjə ngé kəla yān gə̄ ní, yá̰a̰ gə̄ ní a rāān̄ yá̰a̰ ngɔr. Kərist əla deē yān kə́ dɔ rā̰ tə́ kadə̄ ɔjə Ja̰a̰ nge kəla yān yá̰a̰ gə̄ ní.

² Ja̰a̰ əda najə̄ kə́ kum tə́ yān əda na yá̰a̰ malang ń n-a̰ā̰ ní na i najə̄ yā Nə́ɓā ō, i najə̄ kə́ kum tə́ yā Jeju Kərist ō.

³ Deē ń tə́da makətūbə̄ ń toō ō, de gə̄ ń oōn̄ najə̄ kə́ Nə́ɓā əndā ta deē tə́ ń toō ō, ba ngɔ̄mə̄n̄ yá̰á̰ ń ndangən̄ kemeé ní, rɔ̄də́ nel̄də́. Tɔdɔ̄ kum mbang ń kadə̄ yá̰a̰ gə̄ ń noō rāān̄neé yá̰á̰ ní dɔ i ngɔr.

Ja̰a̰ rāā Egəlijə kə́ sīrí gə̄ lápə́ya

^4-5 I mā Ja̰a̰ n m̄-ndang makətūbə̄ ń toō m-ə́lań m-ādə̄ Egəlijə kə́ sīrí gə̄ kə́ gō nang kə́ Aji tə́ ní. Ādə̄ nge ń ndi ngɔlaā ō, ndi kété ō, a reē ɓáý ní ō, ādə̄ ndíĺ kə́ sīrí gə̄ ń ran̄ ta kōr̄ kāgə̄ mbang yān tə́ ní ō, rajən̄sí ō, sɔlə̄n̄ kemsí ō. Ādə̄ Jeju Kərist ń i nge kəda najə̄ kə́ kum tə́ kə́ ni i nge ra dɔ ndūn tə́ ō, ni i ngōn̄ hágə́ kə́ ndól̄ kété no de kə́ koy gə̄ tə́ ō, ni i de kə́ bo kə́ dɔ mban̄g gə̄ kə́ dɔ nang tə́ ō ní, Kərist ń táŕjí ō, gān̄g dɔjí kə mósəneé najə̄ majaĺ yājí tə́ ō,

⁶ rāā adə̄ jə-téliī de gə̄ kə́ kem ɓē ko̰o̰ yān tə́ ō, ngé tun̄ yá̰a̰ gə̄ yā Bɔbə̄n Nə́ɓā ō ní, kɔsə gɔn i yān ō, tɔ́gən to ō, kə dɔ ɓāl̄ gə̄ ɓāl̄ gə̄. Adə̄ i tītə̄ ń noō.

⁷ Á̰a̰ī, ni a reē dan kil̄ man̄ tə́ ō, de gə̄ malang a a̰a̰nən̄ kə kumdə́ ō, de gə̄ ń ɔsənən̄ kə nəngaá ní, a a̰a̰nən̄ ō. Gír ɓē gə̄ malang kə́ dɔ nang tə́ a nōōn̄ rɔ̄də́ najə̄ yān tə́ ō. A̰á̰ā̰, adə̄ i tītə̄ ń noō.

⁸ Kɔ́ɔ̄ɓē Nə́ɓā əda na ni na i Alpa ō, Omega ō, deē ń ndi ngɔlaā ō, ndi kété ō, a reē ɓáý ō ní. I ni n i Nə́ɓā kə́ bo kə́ tɔ́gən i ngá̰ý ní.

Kərist ndɔ̄bə̄ Ja̰a̰

⁹ Mā ngōkó̰ó̰sí Ja̰a̰ ń mā i sesí kum yá̰á̰ kə́ tōr̄ tə́ ō, kem Ɓē ko̰o̰ tə́ ō, loo kəhɔ rɔ̄ tɔgə tə́ gō Jeju tə́ ō ní, m̄-ndi dor̄ ń rīn na i Patəmos ní tə́ i tām̄ najə̄ yā Nə́ɓā tə́ ō, najə̄ kə́ kum tə́ kə́ m-ə́da tām̄ yā Jeju tə́ ō.

¹⁰ Ndíĺ Nə́ɓā reē dɔḿ tə́ ndɔ̄ yā Kɔ́ɔ̄ɓē tə́, əhɔm̄ adə̄ m̄-ger̄ gōn, anī m-ōō ndū deē kógə̄ḿ ɓār̄ ngá̰ý tītə̄ kōō bərúnjə beé gōḿ tə́,

¹¹ ədam̄ na: Yá̰á̰ ń á̰a̰ā̰ ní ī-ndang makətūbūú ə́lań ādə̄ Egəlijə kə́ sīrí gə̄, adə̄ i Egəlijə kə́ Epejə ō, Səmirnə ō, Pergam ō, Tiyatir ō, Sardə ō, Piladelpi ō, Laodise ō.

¹² m̄-mbel kadə̄ m-á̰a̰ deē ń a ɔr̄ najə̄ seḿ ní anī, m-á̰a̰ i ɗəra hor kə́ rāā kə lɔ́rɔ́ gə̄ sīrí,

¹³ ba deē kógə̄ḿ kə́ to tītə̄ ngōn̄ deē ra dan ɗəra hor gə̄ ní tə́. Kɔ́ɔ̄ o̰ō̰ kūbə̄ ngāl̄ kə́ ɔdə gidə njan nang tə́ ō, do̰ō̰ kadən kə kəlā lɔ́rɔ́ ō.

¹⁴ Dɔn ō, nənga dɔn ō, ndaan̄ tītə̄ búy kūbə̄ beé ō, tītə̄ néjə beé ō, kumən to tītə̄ ta ndo̰ hor beé ō.

¹⁵ Njan to tītə̄ gində̄ nə̄ngá kasə kə́ nō horoó beé ō, ndūn ɓār̄ tītə̄ kōō man̄ kə́ ngá̰ý kə́ a ɓār̄ beé ō.

¹⁶ Tə́yō̰ gə̄ sīrí i jī ko̰n tə́ ō, kəyā kə́ tan lēmbə́ ba atə dām̄ jōó teē tan tə́ ō, ta kumən ndə́lē tītə̄ mbang kə́ dan kadə ndaá beē ō.

¹⁷ Dan ń m-á̰a̰n anī, m-ə̄sō kə̄ njan tə́ tītə̄ de kə́ koy kɔ̄ɔ́ beē. Anī ni-əndā jī ko̰n dɔḿ tə́, ba əda na: Ī-lōō ɓōĺ. Mā i ta kəla gíŕ yá̰a̰ ō, ta tɔ̄l̄ tan ō,

¹⁸ deē ń ndi kə kumneé ní ō. Kété ní m-óy, banī ngɔlaā m̄-ndi kə kumḿ kə dɔ ɓāl̄ gə̄ ɓāl̄ gə̄. Tá kélé gə̄ yā yo ō, yā loo kə́ ɓádá ō, i jīḿ tə́.

¹⁹ I beé ní, yá̰a̰ gə̄ ń á̰á̰də́ kɔ̄ɔ́ ō, yá̰a̰ gə̄ ń ā á̰á̰də́ toō ō, yá̰a̰ gə̄ ń a utə̄n̄ gōdə́ ɓáý ō ní, ī-ndangdə́ makətūbūú.

²⁰ Ba tə́yō̰ kə́ sīrí gə̄ ń á̰á̰də́ jī ko̰ḿ tə́ ō, ɗəra hor kə́ sīrí gə̄ kə́ rāā kə lɔ́rɔ́ ō ń i yá̰a̰ gə̄ kə́ ton̄ loo mundə̄ tə́ ní, kumdə́ n toó: Tə́yō̰ kə́ sīrí gə̄ ní i de kə́ dɔ rā̰ tə́ gə̄ yā Egəlijə kə́ sīrí gə̄ ō, ɗəra hor kə́ sīrí gə̄ ní, i Egəlijə kə́ sīrí gə̄ ō.