Biblia Todo Logo
Bib sou entènèt

- Piblisite -

JAKARI 9 - Bibəl ta Sar̄


Israel ō, gotə nápar de kə́ rang gə̄ ō ( 9—14 ) Gír de gə̄ ń ndin̄ madə̄ ɓē Israel ní a gāngə̄n̄ sarya dɔdə́ tə́ ō a ajən̄də́ ō

1 Najə̄ yā Kɔ́ɔ̄ɓē. Najə̄ yā Kɔ́ɔ̄ɓē ugə̄ gō nang kə́ Hadərak tə́ ō, dəba Damas ō. Tām̄ Kɔ́ɔ̄ɓē a̰a̰ i gír ɓē gə̄ yā Israel ngóy alé, banī deē ndul gə̄ malang ní, ni a̰a̰də́ ō.

2 Hamat ń i ngɔr kə̄ Damas ní, ni-ɔr̄ najə̄ tū tə́ ō, ɓē gə̄ kə́ Tir ō, kə́ Sidon ō, ń de kə́ kemeé gə̄ jīdə́ ger̄ yá̰á̰ ngá̰ý ní, ni-ɔr̄ najə̄ tū tə́ ō.

3 Tir əndā ndogə̄ mbal̄ gə̄ kə́ yā rɔ̄ɔń dɔ rɔ̄n tə́. Ni kán̄ gində̄ arjā̰a̰ ngá̰ý kə̄ dɔ naā tə́ tītə̄ bumbə́ru kə́ kum róbə kɔsə gə̄ tə́ ō, kán̄ lɔ́r ngá̰ý kə̄ dɔ naā tə́ tītə̄ bɔr kə́ kum kə̄lá róbə gə̄ tə́ beē ō.

4 Banī Kɔ́ɔ̄ɓē a taā ɓē kə́ Tir kɔ̄ɔ́. Ndogə̄ mbal̄ gə̄ yā ɓē kə́ Tir ń a rɔ̄ɔń dɔ rɔ̄n tə́ ní, Kɔ́ɔ̄ɓē a rāādə́ kadə̄ a tə́sōn̄ kum bā bo tə́ ō, hor kógə̄ḿ a o̰o̰ ɓē ngeé ń toō ō.

5 Dan ń ɓē kə́ Askalon a a̰ā̰ tītə̄ ń noō anī, ɓōĺ a rāān ō, ɓōĺ a rāā ɓē kə́ Gaja adə̄ ni a ndew ō, ɓē kə́ Ekəron a ndew ō, tām̄ ɓē kə́ Tir a ɔsə kílən to̰ alé. Ɓē kə́ Gaja a aw̄ kə mban̄g to̰ aĺ ō, de gə̄ a ndin̄ kem ɓē kə́ Askalon tə́ to̰ aĺ ō.

6 De gə̄ kə́ dɔdə́ guŕ naā a ndin̄ kem ɓē kə́ Asdod tə́. Kɔ́ɔ̄ɓē əda na: M-ā m̄-nujə kɔjə rɔ̄ yā Pilistin gə̄ i tītə̄ ń noō.

7 M-ā m-ɔ̄r̄ dā̰ kə́ mósə i tū tə́ tadə́ tə́ kɔ̄ɔ́ ō, dā̰ ń ndējə̄n̄ nə́ɓā kə́ rɔ̄kum aĺ gə̄ ní, m-ā m-ɔ̄r̄ kɔ̄ɔ́ tadə́ tə́ kɔ̄ɔ́ ō. De kə́ dandə́ tə́ gə̄ ń a teēn̄ ta yo tə́ ní, a télən̄ deē yāḿ gə̄, tītə̄ kə́ kété nin̄ i de gə̄ kə́ dan gír kaa yā Juda tə́ beē. De gə̄ kə́ kem ɓē kə́ Ekəron tə́ a udən̄ dan gír deē yāḿ gə̄ tə́, tītə̄ ń Yebus gə̄ rāān̄neé kété ní.

8 M-ā m̄-njə̄rā kə gō gidə ɓē yāḿ yā kəndāń kumḿ gírən tə́, ba rɔ̄ɔń dɔn tə́, najə̄ yā madə̄ ba̰ā̰ gə̄ ń a aw̄n̄ ō, a télən̄ ō ní tə́. Ngār kógə̄ḿ kə́ tə̄rā a reē yā rējə̄ gír deē yāḿ gə̄ to̰ alé. Tām̄ ngɔlaā ní, m-ə̄ndā kumḿ gír deē yāḿ gə̄ tə́.


Mban̄g ń a rāā kadə̄ lɔm to ní

9 Ɓē kə́ Siyo̰, ī-ndām̄ kə tɔ́gí gēé malang! A̰á̰ā̰, ɓē kə́ Jerusalem, ə́ga kɔŕ rɔ̄nel̄! Á̰a̰ā̰, mban̄g yāí a reē kə́ rɔ̄í tə́. Ni i de kə́ nge rāā yá̰á̰ kə́ gōtə́ ō, nge tetə rɔ̄ɔ̄ ō, ni i de kə́ najə̄n gətóo ō. Ni-ndi i gidə kərō kógə̄ḿ tə́, adə̄ i gidə ngōn̄ kərōó kógə̄ḿ kə́ kó̰o̰n i noó tə́.

10 Ni a rāā kadə̄ púsə rɔ̄ɔ̄ gə̄ kə́ Epəraim gətóon̄ kɔ̄ɔ́ ō, ni a rāā kadə̄ sə́nda gə̄ kə́ Jerusalem gətóon̄ kɔ̄ɔ́ ō. Ni a tétə̄ ga̰ gərā gə̄ kə́ yā rɔ̄ɔń kɔ̄ɔ́ ō, a rāā kadə̄ lɔm to dan nápar de gə̄ tə́ ō. Əla gír bā katə̄ tə́ bátə́ bā bo kə́ no ɓē tə́ ō, bā Opəratə tə́, bátə́ ta ngóy ɓē kə́ dām̄ kə́ rang tə́ ō ní, ni i ngol de gə̄.


Əya̰n̄ dəngáy gə̄ dɔɔ́

11 Kɔ́ɔ̄ɓē əda na: Sɔɔ̄ń madə̄ naā ń m-ə́hɔ sesí ní ō, mósə́ kə́ ɓōkə́ nang tə́ kə́ ɔjə kadə̄ m-ə́hɔ madə̄ naā sesí rɔ̄kum ō ní, de gə̄ ń əhɔn̄də́ dəngáyá á ton̄ gə́le bəlo taā man̄ ndi kə́ man̄ gətóo kemeé tə́ ní, m-ā m-ɔ̄r̄də́ dəngáyá.

12 Siī dəngáy gə̄ ń kəndā kem dɔ tə́ yāsí i ngá̰ý ní, ī-tél ī-reēī gogə́ kem ɓē yāsí kə́ ngɔ̄m̄nən̄ majə tə́! Ɓōólaā nəkɔ́ ń toō m-ə́dásí najən̄, yá̰á̰ ń sḭḭ̄ āwīiń kɔ̄ɔ́ ɓá ní, m-ā m-ādə̄sí yá̰á̰ ní loo nja kə́ jōó tə́.

13 M-ā m-ún dɔ nang kə́ Juda tītə̄ loo kun ga̰ gərā kə́ yā rɔ̄ɔń beē. Epəraim a rāā rɔ̄n i kum gərā tə́. Ḭ̄ ɓē kə́ Jerusalem, m-ā m-ə́lá ngání gə̄ kadə̄ aw̄ ənīn̄ Gərek gə̄ rɔ̄ɔ̄. M-ā m-úńdə́ yā rāań kəla tītə̄ kaskar yā nge rɔ̄ɔ̄ beē.

14 Loo ń noō tə́ Kɔ́ɔ̄ɓē a teē hɔy dɔdə́ tə́ dɔɔ́ ō, kum gərā yān a teē tītə̄ tel̄ man̄ beé ō. Kɔ́ɔ̄ɓē Nə́ɓā a kɔ̄ŕ bərúnjə. Man̄ kə́ a edə kə néĺ kə́ əla kə ngangá ngá̰ý ń a ḭḭ dām̄ mbɔ́r ɓē kə́ geleé tə́ yā reē ní, ni a reēń.

15 Kɔ́ɔ̄ɓē kə́ bo kə́ tɔ́gən i ngá̰ý a ngɔ̄m̄ de gə̄ kə́ dan gír deē yān gə̄ tə́. Kɔkərɔ gə̄ kə́ kem bējə̄ gə̄ tə́ ní, nin̄ a nujənə̄ń kɔ̄ɔ́ ō, a tɔ̄ɔ̄n̄ kɔ̄ɔ́ ō. A ɓōkə́n̄ mósə madə̄ ba̰ā̰də́ gə̄ nang tə́ tītə̄ kasə nduú beē. Nin̄ a ɓōkə́n̄ tītə̄ mósə dā̰ kə́ tɔ̄l̄ yā tun̄ beé, kem bay ndējə̄ yá̰á̰ tə́, aláa tītə̄ mósə́ kə́ ɓōkə́ tū gajə gə̄ kə́ kíl loo tun̄ yá̰á̰ tə́ beē.

16 Ba ndɔ̄ ngeé ń noō tə́ ní, Kɔ́ɔ̄ɓē Nə́ɓā yādə́ a ajədə́, tītə̄ ń nge ngɔ̄m̄ yá̰a̰ kul̄ a ajəń ɓūtə̄ yá̰a̰ kul̄ yān gə̄ ní beē. Nin̄ a ndílēn̄ kem ɓē yān tə́ tītə̄ mbal̄ gə̄ kə́ gātə̄də́ i ngá̰ý gə̄, kə́ tə́lan̄ tū jākā mbang tə́ beē.

17 Rɔ̄də́ a nel̄də́ rɔ̄kum ō, nin̄ a majən̄ deē rɔ̄kum ō! Kōō gémē a adə̄ balsáa gə̄ tɔ́gə ō, kasə nduú kə́ kijə a adə̄ ngámandə gə̄ tɔ́gə ō.

Bibəl ta Sar̄ © L'Alliance Biblique du Tchad, 2006, 2010.

Bible Society of Chad
Swiv nou:



Piblisite