JAKARI 8 - Bibəl ta Sar̄

Kɔ́ɔ̄ɓē ənī míndən tām̄ yā lɔm tə́ ō, tām̄ yā yá̰a̰ kənge kə́ ngá̰ý al̄ naā tə́ ō

¹ Kɔ́ɔ̄ɓē kə́ bo kə́ tɔ́gən i ngá̰ý ɔr̄ najə̄ seḿ. Yá̰á̰ ń ədam̄ ní n toó:

² Mā Kɔ́ɔ̄ɓē kə́ bo kə́ tɔ́gə́ḿ i ngá̰ý, m̄-tár ɓē kə́ Jerusalem i kə táŕ kə́ o̰o̰ hor bir bir. Tár ngeé ń toō o̰ō̰m̄ tītə̄ hor kə́ o̰o̰ loo beé.

³ I tām̄ najə̄ ń toō tə́ n m̄-tél m̄-reē gogə́ dɔ mbal̄ Siyo̰ tə́ ní. A̰á̰ā̰, m̄-tél m̄-ndi kem ɓē kə́ Jerusalem tə́ gogə́ ɓáý to̰. A ɓārə́n̄ ɓē kə́ Jerusalem na i ɓē kə́ nge ra dɔ ndūn tə́ ō, a ɓārə́n̄ mbal̄ bo yā Kɔ́ɔ̄ɓē kə́ bo kə́ tɔ́gən i ngá̰ý na i mbal̄ bo kə́ táĺ ō.

⁴ De kə́ dəngam kə́ tɔgə ɓə́ga gə̄ ō, kə́ dəyá̰ kə́ tɔgə ɓə́ga gə̄ ō, a télən̄ yā reē ndi ndágə loo gə̄ kə́ Jerusalem tə́ gogə́. Nin̄ a tɔ́sə̄n̄ i kāgə̄, najə̄ ɓāl̄də́ kə́ i ngá̰ý tə́.

⁵ Ngán gə̄ a taān̄ loo ndágə loo gə̄ kə́ kem ɓēé tə́. Ngáń kə́ dəngam gə̄ ō, kə́ dəyá̰ gə̄ ō, a kógə̄n̄ naā ndágə loo gə̄ ngeé ń noō tə́.

⁶ Kɔ́ɔ̄ɓē kə́ bo kə́ tɔ́gən i ngá̰ý əda wáńg na: Tām̄ yā ngán Israel gə̄ ń teēn̄ ta yo tə́ ní, a to i tītə̄ yá̰á̰ kə́ deē asə rāā aĺ beē. Banī mā ń i Kɔ́ɔ̄ɓē kə́ bo kə́ tɔ́gən i ngá̰ý ní, kə m-á̰ā̰ tītə̄ kə́ i yá̰á̰ kə́ deē asə rāā aĺ beē a?

⁷ A̰á̰ā̰, m-ə́da na m-ā m-ájə́ gír deē yāḿ gə̄, kə ta kūl̄ kɔydə́ kem ɓē gə̄ kə́ dām̄ kə́ gír ɓē tə́ tə́ ō, no ɓē tə́ tə́ ō, yā tél reē sedə́ gogə́.

⁸ M-ā m̄-tél yā reē sedə́ gogə́, kadə̄ a ndin̄ kem ɓē kə́ Jerusalem tə́. Nin̄ a télən̄ gír deē yāḿ gə̄ ō, mā i Nə́ɓā yādə́ kə́ nge ra dɔ ndūn tə́ ō, kə́ nge rāā yá̰á̰ kə́ gōtə́ ō.

⁹ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: Ə́hɔī rɔ̄sí tɔgə! Ādə̄ əga kemsí dɔ najə̄ gə̄ ń ngé koō ta yāḿ gə̄ ədan̄sí ní tə́, dan ń əndānń ngəra kújə yāḿ yā tél rāā gogə́ rang ní.

¹⁰ Kété ní, kəla ń de gə̄ rāān̄ ní, deē əgādə́ aĺ ō, kəla ń dā̰ gə̄ rāān̄ ní, deē ənge yá̰á̰ gírí aĺ ō. Deē asə kənī kemən njə̄rań aĺ ō, najə̄ yā madə̄ ba̰ā̰ gə̄ tə́. Tɔdɔ̄ kété ní, m̄-sə̄lā de gə̄ malang dɔ naā tə́.

¹¹ Ba ngɔlaā ní, mā Kɔ́ɔ̄ɓē kə́ bo kə́ tɔ́gən i ngá̰ý m-ə́dá wáńg na: De gə̄ kə́ dan gír de gə̄ ń toō tə́ ń teēn̄ ta yo tə́ ní, m-ā m̄-rāādə́ yá̰á̰ ń m̄-rāā sedə́ kété ní to̰ alé.

¹² M-ā m̄-rāā kadə̄ lɔm a reē dɔ nang tə́ ō, kāgə̄ nduú gə̄ a anə̄n̄ ō, dɔ nang a teē yá̰a̰ ō, man̄ kə́ dɔ rā̰ tə́ a edə ō. Gír deē yāḿ gə̄ ń teēn̄ ta yo tə́ ní, m-ā m̄-rāā majə sedə́ kə yá̰a̰ gə̄ ń noō malang.

¹³ Ɓē ko̰o̰ gə̄ kə́ Juda tə́ ō, kə́ Israel tə́ ō, dan nápar de gə̄ tə́ ní, sḭḭ̄ i gír de gə̄ kə́ ndɔ̄lə́n̄də́ kadə̄ gotə gír de kə́ rang gə̄ a̰a̰n̄. Banī ngɔlaā ní, m-ájə́sí. Adə̄ ā ī-téliī i gír de gə̄ kə́ tɔ́rə̄n̄ tadə́ dɔdə́ tə́, kadə̄ gotə gír de kə́ rang gə̄ a̰a̰n̄. I beé ní, ī-ɓōlíī to̰ alé, banī ə́hɔī rɔ̄sí tɔgə!

¹⁴ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: Dan ń kaasí gə̄ rāāmə̄n̄ adə̄ wōn̄g rāām̄ ní, m̄-gḛy rāāsí yá̰á̰ kə́ majaĺ ō, yá̰á̰ ń m̄-gír̄ rāā ní, m̄-lōō gírí aĺ ō.

¹⁵ Banī ngɔlaā ní, m̄-gḛy rāā majə sesí, sḭḭ̄ de kə́ Jerusalem gə̄ ō, de gə̄ malang kə́ kem ɓē ko̰ kə́ Juda tə́ ō. Ī-lōōī ɓōĺ.

¹⁶ Jī bēl̄ loo rāā yá̰a̰ gə̄ ń ā úniī gō ní n toó: Ə́daī naā najə̄ kə́ rɔ̄kum. Loo sarya yāsí gə̄ tə́ ɓáa, ī-gāngī sarya kə́ gōtə́, kə́ a reē kə lɔmɔɔ́.

¹⁷ Kɔ́ɔ̄ɓē ɔr̄ najə̄, əda na: Ī-lōōī gír̄ rāā yá̰á̰ kə́ majaĺ kə naá. Ī-mbātíī túbə̄ dɔ lám̄ tə́. Yá̰a̰ rāā kə́ majaĺ gə̄ malang ń noō ní, nelə̄m̄ aĺ ngá̰ý. I mā Kɔ́ɔ̄ɓē n m-ə́da najə̄ ń noō ní.

Ndɔ̄ ndi ɓō a tél ndɔ̄ rāā nāā

¹⁸ Kɔ́ɔ̄ɓē kə́ bo kə́ tɔ́gən i ngá̰ý ɔr̄ najə̄ seḿ əda na:

¹⁹ Ndi ń ā ī-*ndiī ɓō tām̄ yā Nə́ɓā tə́ kem nāā kə́ nge ko̰ sɔ́ tə́ ō, mí tə́ ō, kem nāā kə́ nge ko̰ sīrí tə́ ō, kutə tə́ ō ní, ngɔlaā a télən̄ i ndɔ̄ naā gə̄ kə́ rɔ̄nel̄ i ngá̰ý tū tə́ ō, kem de gə̄ a nel̄də́ ngá̰ý tū tə́ ō, tām̄ yā gír de gə̄ kə́ Juda tə́. I beé ní, ī-gḛyiī najə̄ kə́ rɔ̄kum ō, ndi lɔm ō.

²⁰ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: A̰á̰ā̰, gír de gə̄ kə́ nin̄ i tə̄rā gə̄, kə́ nin̄ teēn̄ i kem ɓē gə̄ kə́ gír i kósə́ ngá̰ý tə́, a reēn̄ kem ɓē kə́ Jerusalem tə́ gogə́ rang.

²¹ De gə̄ kə́ kem ɓē kógə̄ḿ tə́ a ədan̄ de gə̄ kə́ kem ɓē kə́ rang tə́ na: Ī-reēī ādə̄ j-aw̄ jə-ndɔ̄yī Kɔ́ɔ̄ɓē kə́ bo kə́ tɔ́gən i ngá̰ý, ādə̄ jə-sāāī kadə̄ ni i danjí tə́ ō. Nin̄ a télən̄ yā kəda na: J-a j-aw̄ i mbée ō.

²² A̰á̰ā̰, gír de gə̄ kə́ nin̄ i ngá̰ý ō, nápar de gə̄ kə́ tɔ́gə́də́ i ngá̰ý ō, a reēn̄ Jerusalem sāāḿ tə́ kadə̄ mā i dandə́ tə́ ō, ndɔ̄ȳm̄ tə́ ō.

²³ M-ə́da na kum mbang ngeé ń noō tə́ ní, tə̄rā gə̄ kutə, kə́ nin̄ kógə̄ḿ kógə̄ḿ ní ta yādə́ gə̄ i tayā tayā, a əhɔn̄ ta kūbə̄ yā Jipə kógə̄ḿ ba a ədanən̄ na: Jə-sāā kaw̄ sesí, tām̄ j-oō kadə̄ Nə́ɓā i sesí.