JAKARI 7 - Bibəl ta Sar̄

Ndi ɓō tām̄ yā Nə́ɓā tə́ kə́ yā kadə̄ əgań kem deē dɔ nujə ń ɓē kə́ Jerusalem nujə kɔ̄ɔ́ tə́ ní

¹ Kem ɓāl̄ ko̰o̰ ɓē kə́ nge ko̰ sɔ́ yā mban̄g Darius tə́, kem nāā kə́ nge ko̰ ndōhó tə́, adə̄ i kem nāā Kislew tə́, kə ndɔ̄ nāā kə́ nge ko̰ sɔ́ anī, Kɔ́ɔ̄ɓē ɔr̄ najə̄ seḿ.

^2-3 De kə́ Betel gə̄ əlan̄ Sareser ō, Regem Melek ō, ngé kɔsə kum gotə kósə de gə̄ ō, kadə̄ aw̄n̄ kújə yā Kɔ́ɔ̄ɓē kə́ bo kə́ tɔ́gən i ngá̰ý tə́, kadə̄ dəjen̄ Nə́ɓā kadə̄ kə ɔjə kem majə yān kə̄ ndágá ō, kadə̄ dəjen̄ ngé tun̄ yá̰a̰ gə̄ ō, ngé koō ta gə̄ ō, najə̄ ń toō: Majə kadə̄ jə-nōō ngándáńg ō, jə-*ndi ɓō kem nāā kə́ nge ko̰ mí tə́ ō, tītə̄ ń j-a jə-rāań jóo gə̄ ní a?

⁴ Loo ń noō tə́ Kɔ́ɔ̄ɓē kə́ bo kə́ tɔ́gən i ngá̰ý, adə̄m̄ ndūn kadə̄

⁵ yá̰á̰ ń ni tūr̄ əda ní, kə m-ə́dá ngé tun̄ yá̰a̰ gə̄ ō, de kə́ kem ɓēé gə̄ malang ō, kadə̄ gerə̄n̄. Najə̄ ń ni tūr̄ əda ní n toó: Sḭḭ̄ ī-*ndiī ɓō tām̄ yā Nə́ɓā tə́ ō, ə̄nī pā yo ō, kem nāā kə́ nge ko̰ mí tə́ ō, sīrí tə́ ō, asə ɓāl̄ kutə sīrí kɔ̄ɔ́ ɓá. Ba ī-*ndiī ɓō tām̄ yā Nə́ɓā tə́ ní, i tām̄ yāḿ mā tə́ rɔ̄kum a?

⁶ Ba dan ń əsaī yá̰a̰ ō, ā̰yī ō ní, i tām̄ yāsí sḭḭ̄ kɔ́ gə̄ tə́ wa ḿ?

⁷ Kɔ́ɔ̄ɓē əndā najə̄ gə̄ ń noō ta ngé koō gə̄ tə́ adə̄ nin̄ gɔŕyɔ̄nəń de gə̄ kété kɔ̄ɔ́ ɓá. Dan ngeé ń noō tə́ ní, de kə́ Jerusalem gə̄ ō, kə́ kem ɓē gə̄ ń gīrə̄n̄ gidə ɓē kə́ Jerusalem ō tə́ ní, ndin̄ lɔm. Gō nang kə́ Negeb ō, gō nang kə́ mbal̄ bo gə̄ gətóon̄ tū tə́ ō ní, de gə̄ ndin̄ tū tə́.

^8-9 Kɔ́ɔ̄ɓē kə́ bo kə́ tɔ́gən i ngá̰ý mērə̄m̄ kəda najə̄ gə̄ ń toō, əda na: Ī-gāngī sarya kə́ gōtə́ ō, ādə̄ sḭḭ̄ i de kə́ majə gə̄ ō, ī-rāāī tɔdɔ̄ naā ngá̰ý ō.

¹⁰ Ī-lōōī rējə̄ dəyá̰ kə́ ngaa koy gə̄ ō, ngán hal gə̄ ō, tə̄rā gə̄ ō, ngé ndoō gə̄ ō, kə ta kūl̄ yá̰a̰ rāā kə́ gōtə́ aĺ ō, ī-lōōī gír̄ rāā yá̰á̰ kə́ majaĺ kə naá ō.

¹¹ Banī de gə̄ mbātə́n̄ koō najə̄ ń toō kété kɔ̄ɔ́ ɓá. Nin̄ tūrə̄n̄ gidədə́ ta tə́ ō, utə̄n̄ mbīdə́ kɔ̄ɔ́ ō, yā koōń najə̄ ní alé.

¹² Nin̄ rāān̄ kemdə́ adə̄ ngan̄g tītə̄ mbal̄ diyamā̰a̰ beé. Yá̰á̰ ndóō gə̄ ō, najə̄ gə̄ ō, ń Kɔ́ɔ̄ɓē kə́ bo kə́ tɔ́gən i ngá̰ý ɔjədə́ kə ta kūl̄ ndílən, kə ta kūl̄ ngé koō ta gə̄ kété jóó ní, nin̄ mbātə́n̄ koō. Loo ń noō tə́ wōn̄g rāā Kɔ́ɔ̄ɓē kə́ bo kə́ tɔ́gən i ngá̰ý ngá̰ý

¹³ adə̄ ni-əda na: Dan ń m̄-dəjedə́ kadə̄ oōn̄ taḿ anī, nin̄ mbātə́n̄ koō najə̄ yāḿ kɔ̄ɔ́. I beé n mā m̄-mbātə́nń koō najə̄ yādə́, dan ń nin̄ dəjen̄ kadə̄ m̄-rāā sédə́ ní.

¹⁴ m̄-rāā adə̄ nin̄ aw̄n̄ kə̄ dan gír de gə̄ kə́ nin̄ gerə̄n̄də́ kété aĺ tə́. I tītə̄ ń noō n de gə̄ nujənə̄ń ɓē yādə́ gotədə́ tə́, dan ń nin̄ aw̄n̄ kɔ̄ɔ́ tə́ ní. Ɓē yādə́ ní, de kə́ aw̄ tū tə́ gətóo ō, de kə́ ḭḭ tū tə́ reē gətóo ō. Ɓē kə́ majə asə naā beé, nin̄ rāān̄ adə̄ tél loo kə́ nujə sák sák kə́ ra dɔ naā tə́ bing.