Biblia Todo Logo
Bib sou entènèt

- Piblisite -

JAKARI 5 - Bibəl ta Sar̄


Yá̰á̰ kə́ nge ko̰ mehḛ́ i makətūbə̄ ndɔ̄ĺ

1 M-ún kumḿ kə̄ dɔɔ́ ɓáý to̰ anī, m-á̰a̰ makətūbə̄ kə́ to tītə̄ ndāŕ kə́ ɓír̄ gidə naā tə́, kə́ nél un a dáyń ɓōdə̄ loo tə́.

2 De kə́ dɔ rā̰ tə́ ní dəjem̄ najə̄, əda na ké m-á̰a̰ i rí wa. Anī m̄-téĺ m-ə́dan na m-á̰a̰ i ndāŕ kə́ ɓír̄ gidə naā tə́, kə́ nél un a dáyń ɓōdə̄ loo tə́. Ndāŕ ní, ngālə̄n i métər kutə kógə̄ḿ ō, laan i métər mí ō.

3 Anī de kə́ dɔ rā̰ tə́ ní, ədam̄ na i ndɔ̄ĺ ń a rāān̄ yā ndɔ̄ĺ ɓē kə taá malang ní n ndangən̄ najə̄n ní. Gidə ndāŕ kə́ dām̄ kógə̄ḿ tə́ ɓáa ndangən̄ tū tə́ na: A tə̄ɓān̄ ngé ɓogə gə̄ malang kɔ̄ɔ́ kem ɓēé. Dāmə̄n kə́rēý tə́ anī ndangən̄ tū tə́ na: De gə̄ malang ń túbən̄ dɔ láḿ tə́ ní, a tə̄ɓān̄də́ kɔ̄ɔ́ kem ɓēé ō.

4 Kɔ́ɔ̄ɓē kə́ bo kə́ tɔ́gən i ngá̰ý əda wáńg na: M-ə̄nī ndɔ̄ĺ ń noō i yā kadə̄ udə kem kújə yā ngé ɓogə gə̄ tə́ ō, kadə̄ udə ɓē de gə̄ malang ń unən̄ rīḿ a túbənə̄ń dɔ láḿ tə́ ní ō. Ndɔ̄ĺ ní a ndi noó ō, a nujə yá̰a̰ malang kɔ̄ɔ́ ō. A nujə sáā kāgə̄ gə̄ gə̄gē, mbal̄ gə̄ gə̄gē, kɔ̄ɔ́.


Yá̰á̰ kə́ nge ko̰ sīrí i dəyá̰ kə́ ɔsə kum gotə kem ndul

5 De kə́ dɔ rā̰ tə́ ń əndān̄ dɔn tə́ kadə̄ ɔr̄ najə̄ seḿ ní, ndɔ́tə̄ kə kété ba ədam̄ na: Ún kumií dɔɔ́ ba á̰á̰ yá̰á̰ ń teē noó.

6 m̄-dəjen najə̄ m-ə́da na ké nge ń noō ɔsə i kum gotə rí wa. Anī ni-tél ədam̄ na: I yá̰á̰ kə́ yā ɓōkə́ yá̰a̰ kemeé, kə́ yá̰a̰ rāā kə́ gōtə́ aĺ gə̄ kə́ kem ɓēé malang i kemeé.

7 Kum mbang ngeé ń noō tə́ anī, yá̰a̰ ta yá̰á̰ kə́ rāā kə gində̄ pəlɔm ń əndān̄ ta yá̰á̰ kə́ yā ɓōkə́ yá̰a̰ kemeé tə́ ní, ḭḭ kə̄ dɔɔ́. Anī m-á̰a̰ dəyá̰ kógə̄ḿ ndi kem yá̰á̰ kə́ yā ɓōkə́ yá̰a̰ kemeé ní tə́.

8 De kə́ dɔ rā̰ tə́ ni ədam̄ na: Dəyá̰ ní i Kem Ndul. Gō tə́ anī, ni mbəren adə̄ tél aw̄ gogə́ kem yá̰á̰ kə́ yā ɓókə́nń yá̰á̰ ní tə́, ba tél əndā yá̰a̰ ta yá̰á̰ ni gogə́ ta tə́.

9 M-ún kumḿ kə̄ dɔɔ́ gōtə́ anī, m-á̰a̰ dəyá̰ gə̄ jōó teēn̄. Bɔ̄gə̄də́ to tītə̄ bɔ̄gə̄ yel̄ kóndə́la beé ō, nin̄ ḭḭn̄ bɔ̄gə̄ ō, tām̄ nél əla adə̄ undə́ aw̄ sedə́. Nin̄ unən̄ yá̰a̰ ɓōkə́ yá̰á̰ ní aw̄nəń ɓōdə̄ loo tə́ dɔɔ́, dɔ dán dɔ nang ō dɔ rā̰ ō tə́.

10 m̄-dəje de kə́ dɔ rā̰ tə́ ní najə̄, m-ə́da na ké unən̄ yá̰a̰ ɓōkə́ yá̰á̰ ní a aw̄n̄neé i kə̄ rá wa.

11 Ni-tél ədam̄ na: A aw̄nəń i kə Mesopotami. Nin̄ a rāān̄ kújə tām̄ yān tə́ ba a udənən̄ kemeé kə njan kə́ dɔɔ́ dɔ loo kógə̄ḿ tə́.

Bibəl ta Sar̄ © L'Alliance Biblique du Tchad, 2006, 2010.

Bible Society of Chad
Swiv nou:



Piblisite