JAKARI 4 - Bibəl ta Sar̄

Yá̰á̰ kə́ nge ko̰ mí i ɗəra hor gə̄ ō, kāgə̄ olibə gə̄ ō

¹ De kə́ dɔ rā̰ tə́ ń əndān̄ dɔn tə́ kadə̄ ɔr̄ najə̄ seḿ ní, reē ndólə̄m̄ tītə̄ kə́ m̄-to m-ā m̄-ɓīī i mbée beé.

² Ni dəjem̄ najə̄, əda na ké m-á̰a̰ i rí wa. Anī m̄-téĺ m-ə́dan na m-á̰a̰ i kāgə̄ ɗəra hor kə́ rāān̄ kə lɔ́rɔ́, ba jóo yibə̄ i ta tə́. Lámba gə̄ i sīrí ta kāgə̄ hor ní tə́ ō, ta ndo̰ hor gə̄ i sīrí tū lámbá kə́ kógə̄ḿ beē tə́ ō.

³ Kāgə̄ olibə gə̄ i jōó kadə jóo yibə̄ ní tə́. Kógə̄ḿ i kadən kə́ dām̄ kə́ ko̰ó̰ tə́ ō, kə́rēý i kadən kə́ dām̄ kə́ geleé tə́ ō.

⁴ De kə́ dɔ rā̰ tə́ ń əndān̄ dɔn tə́ kadə̄ ɔr̄ najə̄ seḿ ní, m̄-dəjen najə̄ m-ə́da na Kɔ́ɔ̄ɓē yāḿ, nge ń noō ní ɔsə i kum gotə rí?

⁵ Anī ní tél dəjem̄ na ké m̄-ger̄ kum nge ń noō aĺ wa? Anī m-ə́dan na: A̰ á̰.

^6a Anī ni ɔjəm̄ kum əda na:

^10b Lámbá kə́ sīrí gə̄ ɔsən̄ i kum gotə Kɔ́ɔ̄ɓē. Nin̄ əndān̄ kumdə́ gír dɔ nang tə́ kə taá malang.

¹¹ m̄-tél m̄-dəjen ɓáý to̰ m-ə́da na kāgə̄ olibə gə̄ kə́ jōó gə̄ ń kógə̄ḿ i kadə kāgə̄ hor tə́ dām̄ kə́ ko̰ó̰ tə́ ō, kə́rēý i kadən tə́ dām̄ kə́ geleé tə́ ō ní, ɔsən̄ i kum gotə rí?

¹² m̄-dəjen najə̄ ń toō ō m-ə́da na: Ba ta jī kāgə̄ olibə kə́ jōó gə̄ ní, ɔsən̄ i kum gotə rí? Tām̄ rāān̄ təyōo gə̄ jōó kə lɔ́rɔ́, adə̄ yibə̄ kə́ kə lɔ́rɔ́ a teē ta təyōo gə̄ ní tə́, tū kāgə̄ olibə kə́ jōó gə̄ ní tə́.

¹³ Anī ni-tél dəjem̄ na ké m̄-ger̄ nge ń noō aĺ wa. m̄-téĺ m-ə́dan na: A̰ á̰, Kɔ́ɔ̄ɓē yāḿ.

¹⁴ Tā anī, ni ɔjəm̄ kum, əda na: I de kə́ jōó gə̄ ń ɔrə̄n̄ kam̄də́ tayā kə yibīí kadə̄ rāān̄ kəla yā kɔ́ɔ̄ dɔ nang kə taá malang ní.

Kənī míndə gə̄ kə́ tām̄ yā Jorobabel tə́

^6b De kə́ dɔ rā̰ tə́ ní mērə̄m̄ kəda Jorobabel najə̄ ń toō: Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: Ā ī-rāā yá̰a̰ i kə ta kūl̄ kəhɔ rɔ̄ tɔgə aĺ ō, i kə ta kūl̄ dɔ́nɔ́ aĺ ō, banī i kə ta kūl̄ Ndílə́ḿ.

⁷ Ni-əda ɓáý to̰ na: Mbal̄ kə́ bo ń noō, i yá̰á̰ kə́ ngan̄g ngá̰ý a? Jorobabel a rāān yā kadə̄ a téĺ ndágə mbō. Ni a teē kə mbal̄ kə́ majə tām̄ kíĺ kújə yā Kɔ́ɔ̄ɓē tə́ i tū mbal̄ bo ń noō tə́. Adə̄ de gə̄ a əgan̄ kɔŕ a ədan̄ na: Á, i mbal̄ kə́ majə ngá̰ý a̰á̰, á, i mbal̄ kə́ majə ngá̰ý a̰á̰!

⁸ Kɔ́ɔ̄ɓē əndā najə̄ kə́ rang ń toō taḿ tə́, əda na:

⁹ Jorobabel əndā ngəra kújə yā Kɔ́ɔ̄ɓē ō, i ni n a tɔ̄l̄ ta ō ní. Dan ń yá̰á̰ ń noō a rāā yá̰a̰ anī, ā ī-gerī kadə̄ i Kɔ́ɔ̄ɓē kə́ bo kə́ tɔ́gən i ngá̰ý n əlam̄ kə̄ rɔ̄sí tə́ ní.

^10a Ī-lōō kídə̄ kəhɔ rɔ̄ tɔgə kə́ sḛ́ý beē kə́ ta kəla gíŕ tə́. Ba majə kadə̄ ī-rāā i rɔ̄nel̄ tá, dan ń á̰a̰ Jorobabel loo kəla gíŕ kəndā kújə yā Kɔ́ɔ̄ɓē gogə́ rang tə́ ní.