JAKARI 2 - Bibəl ta Sar̄

Yá̰á̰ kə́ nge ko̰ jōó i gajə dā̰ gə̄ ō, kɔdə̄ gə̄ ō

¹ M-ún kumḿ kə̄ dɔɔ́ anī, m-á̰a̰ gajə dā̰ gə̄ sɔ́.

² m̄-dəje de kə́ dɔ rā̰ tə́ ń əndān̄ dɔn tə́ kadə̄ ɔr̄ najə̄ seḿ ní na ké gajə dā̰ gə̄ ní ɔsən̄ i kum gotə rí wa. Anī ni-tél ədam̄ na: Ɔsən̄ i kum gotə ɓē kə́ ngan̄g gə̄ ń tə̄ɓān̄ de kə́ Juda gə̄ ō, kə́ Israel gə̄ ō, kə́ Jerusalem gə̄ ō, adə̄ aw̄n̄ kə̄ loo gə̄ tə́ ní.

³ Gō tə́ anī, Kɔ́ɔ̄ɓē ɔjəm̄ kɔdə̄ gə̄ sɔ́ adə̄ m-á̰á̰də́.

⁴ m̄-dəje na ké reēn̄ i rāā rí tə́ wa. Anī ni-tél ədam̄ na: Reēn̄ i kəla ɓōĺ tə́ kem ɓē kə́ ngan̄g gə̄ ń ənīn̄ ɓē kə́ Juda rɔ̄ɔ̄ ní tə́ ō, reēn̄ i nujə ɓē gə̄ ní tə́ ō. Nin̄ tə̄ɓān̄ de kə́ kemeé gə̄ ādə̄ aw̄n̄ kə̄ loo gə̄ tə́ ō, de kə́ asə dum̄ tadə́ gətóo ō.

Yá̰á̰ kə́ nge ko̰ mətá i kəla kə́ yā mbɔ̄jə́nń loo

⁵ Mā Jakari m-ún kumḿ kə̄ dɔɔ́ anī, yá̰á̰ ń m-á̰ā̰ ní n toó, m-á̰a̰ i deē kógə̄ḿ kə́ əhɔ kəlā kə́ yā mbɔ̄jə́nń loo jīn tə́.

⁶ m̄-dəjen najə̄ m-ə́da na ké a aw̄ i kə̄ rá wa. Anī ni-tél ədam̄ na: M-āw̄ i kə̄ mbɔ̄jə́ ɓē kə́ Jerusalem tə́, yā gerə̄ń laan ō ngālə̄n ō.

⁷ De kə́ dɔ rā̰ tə́ ń əndān̄ dɔn tə́ kadə̄ ɔr̄ najə̄ seḿ ní, ndɔ́tə̄ kə̄ kété ō, de kə́ dɔ rā̰ tə́ kə́ rang tə́nī tan ō.

⁸ Anī de kə́ dɔ rā̰ tə́ ń əndān̄ dɔn tə́ kadə̄ ɔr̄ najə̄ seḿ ní, ədan na: Āw̄ láẃ ə́da balsáá ń kəlā i jīn tə́ ní na: I gáŕ kadə̄ Jerusalem i ɓē kə́ tan ra i kə wōyōó ō, i ɓē kə́ ndogə̄ mbal̄ kə́ gidə tə́ kə́ yā rɔ̄ɔń dɔ tə́ gətóo ō. Tām̄ de gə̄ gē, dā̰ gə̄ gē ń a ndin̄ kemeé ní, kutədə́ i ngá̰ý.

⁹ Najə̄ ń Kɔ́ɔ̄ɓē əda wáńg ní n toó, ni-əda na: Mə̄kɔ́ m-ā m̄-rā tītə̄ ndogə̄ mbal̄ kə́ rāā kə horoó beē, kə gō gidə ɓēé kadə̄ gīr̄ gidə əla ta naā tə́ ō, m-ā m-ɔ́jə kɔsə ngɔn yāḿ kem ɓēé danaá bang ō!

De gə̄ ń əhɔn̄də́ aw̄n̄ sedə́ dɔ ɓē kə́ rang tə́ dɔ gúú tə́ ní, Kɔ́ɔ̄ɓē ɓāŕdə́ kadə̄ tél reēn̄ gogə́

¹⁰ Kɔ́ɔ̄ɓē əda wáńg na: Āwī, āwī! Sḭḭ̄ ń m̄-tə̄ɓāsí ādə̄ āwī kə̄ loo gə̄ tə́ dām̄ mbɔ́r ɓē kə́ ko̰ó̰ tə́ ō kə́ geleé tə́ ō, dūn̄ ɓē tə́ ō, no ɓē tə́ ō ní. Ā̰yī naā ngɔlaā, ə́ya̰ī dɔ nang kə́ dām̄ mbɔ́r ɓē kə́ ko̰ó̰ tə́, ba āwī.

¹¹ De kə́ Jerusalem gə̄, āwī! Sḭḭ̄ ń ī-ndiī Babilon ní, āwī láẃ!

¹² Kɔ́ɔ̄ɓē kə́ bo kə́ tɔ́gən i ngá̰ý əndā najə̄ kə́ bo ngá̰ý taḿ tə́. Najə̄ ń ni-əda dɔ nápar de gə̄ ń ɔyn̄ yá̰a̰ yāsí gə̄ dɔ gúú tə́ ní n toó: Deē ń ənīsí rɔ̄ɔ̄ ní, ənī i yá̰a̰ kənge yāḿ kə́ gātə̄n i ngá̰ý rɔ̄ɔ̄.

¹³ A̰á̰ā̰, m-ā m̄-rāā yá̰á̰ kógə̄ḿ kə gotə gír de kə́ rang gēé. Loo ń noō tə́ ngé gə̄ ń kété nin̄ i ɓəlo yādə́ gə̄ ní, ta i dɔdə́ tə́ kadə̄ ɔyn̄ yá̰a̰ yādə́ gə̄ dɔ gúú tə́. Dan ń yá̰á̰ ń noō a rāā yá̰a̰ anī, ā ī-gerī kadə̄ i Kɔ́ɔ̄ɓē kə́ bo kə́ tɔ́gən i ngá̰ý n əlam̄ ní.

¹⁴ Kɔ́ɔ̄ɓē əda wáńg ɓáý to̰ na: Jerusalem, ə́ga kɔŕ rɔ̄nel̄, ī-rāā rɔ̄nel̄. Á̰a̰ā̰ kadə̄ m̄-reē. M-ā m̄-ndi i kem ɓēé danaá bang.

¹⁵ Ndɔ̄ ń noō tə́ ní, gír de kə́ ngá̰ý gə̄ a əhɔn̄ gōḿ mā Kɔ́ɔ̄ɓē. Nin̄ a télən̄ gír deē yāḿ gə̄. Banī mā m-ā m̄-ndi i kemií ḭ̄ tə́, dan ɓēé bang. Dan ń yá̰á̰ ń noō a rāā yá̰a̰ anī, ā ī-gerī kadə̄ i Kɔ́ɔ̄ɓē kə́ bo kə́ tɔ́gən i ngá̰ý n əlam̄ rɔ̄sí tə́ ní.

¹⁶ Juda a téĺ yá̰a̰ yā Kɔ́ɔ̄ɓē gogə́, kem ɓē ń i yān tə́ ní ō, Jerusalem a tél ɓē ń ni gə̄rā tām̄ yān tə́ ní gogə́ ō.

¹⁷ Ādə̄ de gə̄ malang ndin̄ kə tadə́ kə́ mbóó no Kɔ́ɔ̄ɓē tə́! A̰á̰ā̰, ni ndól̄ dɔ ɓīī tə́ ō, teē kem kújə yān kə́ táĺ tə́ kə̄ ndágá ō.