JAKARI 14 - Bibəl ta Sar̄

Rɔ̄ɔ̄ kə́ ta tɔ̄l̄ ta tə́ ō, reē Kɔ́ɔ̄ɓē ō

¹ Sḭḭ̄ de kə́ Jerusalem gə̄, dɔ ndɔ̄ yā Kɔ́ɔ̄ɓē i ngɔr. Gír de kə́ rang gə̄ a kə̄ngə̄n̄ naā yá̰a̰ kənge yāsí gə̄ ta kumsí tə́.

² Kɔ́ɔ̄ɓē a ɔsə dɔ nápar de gə̄ malang kə̄ naā tə́, yā kənīń ɓē yāsí rɔ̄ɔ̄. Nin̄ a taān̄ ɓē kə́ Jerusalem ō, a ɔyn̄ yá̰a̰ gə̄ kə́ kem kújə gə̄ tə́ ō, a sāān̄ dəyá̰ gə̄ dɔ gúú tə́ ō. A ɔyn̄ núsə de kə́ kem ɓēé gə̄ yā kaw̄ sedə́ dɔ ɓē kə́ rang tə́ dɔ gúú tə́, banī gotə de gə̄ a teēn̄ kɔ̄ɔ́ kem ɓēé alé.

³ Loo ń noō tə́ Kɔ́ɔ̄ɓē a rɔ̄ɔ̄ gír de kə́ rang gə̄. Ni a rɔ̄ɔ̄ tītə̄ ń a rɔ̄ɔń dan yā rɔ̄ɔ̄ gə̄ tə́ ngándáńg ní.

⁴ Ndɔ̄ ngeé ń noō tə́ ní, ni a ra dɔ ngōn̄ mbal̄ kāgə̄ olibə gə̄ tə́, kadə ɓē kə́ Jerusalem tə́ ngɔr, dām̄ kə́ gír ɓē tə́. Ngōn̄ mbal̄ kāgə̄ olibə gə̄ ní a njar danaá bang ō, wól loo kə́ bo a to ō, a ḭḭ dām̄ kə́ gír ɓē tə́ bátə́ dām̄ kə́ no ɓē tə́. Ngōn̄ mbal̄ ní núsən kógə̄ḿ a aw̄ kum kə̄ dām̄ mbɔ́r ɓē kə́ ko̰ó̰ tə́, ba núsən kə́rēý a aw̄ kum kə̄ dām̄ mbɔ́r ɓē kə́ geleé tə́.

⁵ Wól loo kə́ dan mbal̄ gə̄ tə́ ngeé ń toō, ā ī-teēī i tū tə́ n ā ā̰yīnń naā ní. Tɔdɔ̄ wól loo ní a to bátə́ ta kaw̄ kə̄ Asal. Ā ā̰yī naā i tītə̄ ń kaasí gə̄ a̰ȳnəń naā ɓāl̄ yā Ojias mban̄g kə́ Juda tə́, ndɔ̄ ń dɔ nang ndewń tə́ ní. Loo ń noō tə́ Kɔ́ɔ̄ɓē Nə́ɓā yāḿ a reē, naā tə́ kə de kə́ dɔ rā̰ tə́ gə̄ malang ń a rāān̄ kəla yān ní.

⁶ Ndɔ̄ ngeé ń noō tə́ ní, deē a sāā nja loo kə́ unjə̄ kow to̰ alé. Kūl̄ a o̰o̰ to̰ aĺ ō, kūl̄ a rāā man̄ kadə̄ a tél kɔ̄sə̄ to̰ aĺ ō.

⁷ Ngáńdáńg ní, loo a unjə̄ yáŕ yáŕ, ba i kum mbang kógə̄ḿ kə́ i Kɔ́ɔ̄ɓē ngóy n ger̄ tə́. Loo kə́ kadaá a gətóo ō, loo kə́ ndɔ̄ɔ́ a gətóo ō. Loo tíbí gə̄gē ní, loo a unjə̄ i kow.

⁸ Ndɔ̄ ngeé ń noō tə́ ní, man̄ kógə̄ḿ a əɓa nang tə́ kem ɓē kə́ Jerusalem tə́. Núsən kógə̄ḿ a nūgə́ kum kə̄ bā katə̄ tə́ ō, núsən kə́rēý a aw̄ bā bo kə́ no ɓē tə́ ō. Man̄ ní a nūgə́ kə́ njɔ́ḿ gə̄ tə́ ɓāl̄ kógə̄ḿ, a nūgə́ ɓālāá ō, ɓaraá ō.

⁹ Kɔ́ɔ̄ɓē a ndi mban̄g dɔ dɔ nang malang tə́ kə taá. Ndɔ̄ ń noō tə́ ní, i Kɔ́ɔ̄ɓē ngóy n de gə̄ a rɔȳnən̄ tītə̄ Nə́ɓā beé ō, de gə̄ a ndɔ̄ȳn̄ i kə rīn nií ngóy ō.

¹⁰ Dɔ nang malang ń to kə gō gidə ɓē kə́ Jerusalem ní, a rāān̄ kadə̄ a téĺ ndágə mbō. A əlan̄ gír i Geba ń deē ra kem ɓēé anī i kə̄ dām̄ mbɔ́r ɓē kə́ ko̰ó̰ tə́ ní, bátə́ Rimon ń deē ra kem ɓēé anī i kə̄ dām̄ mbɔ́r ɓē kə́ geleé tə́ ní. Ɓē kə́ Jerusalem a ndi i loo kə́ kḭḭ kə̄ dɔɔ́ tə́, ba ɓē a ḭḭ i ta róbə yā Benjamḛ tə́, bátə́ ta róbə́ ń rīn na i kíl loo ní tə́, loo ń ta róbə́ kə́ jóo i tū tə́ ní tə́. A ḭḭ kújə́ kə́ ngāl̄ ɓururu kum kə̄ dɔɔ́ yā Hananel tə́, bátə́ loo mbə́rē kan̄ kāgə̄ nduú yā mban̄g tə́.

¹¹ De gə̄ a ndin̄ kem ɓēé ō, deē a nujə ɓē to̰ aĺ ō, de gə̄ a ndin̄ kemeé kanjə̄ sōl̄ yá̰á̰ kógə̄ḿ ō.

¹² Yá̰á̰ kə́ tōr̄ gə̄ ń Kɔ́ɔ̄ɓē a reēń dɔ gír de gə̄ ń rɔ̄ɔ̄n̄ ɓē kə́ Jerusalem ní n toó: Dā̰də́ a ndum dan ń nin̄ a ndin̄ kə kumdə́ ɓáý ní ō, kumdə́ a ndum kem kārə̄n tə́ ō, ndo̰də́ a ndum kem tadə́ tə́ ō.

¹³ Ndɔ̄ ngeé ń noō tə́ ní, Kɔ́ɔ̄ɓē a rāā kadə̄ ɓōĺ kə́ to ɓōĺ ngá̰ý a rāādə́. Nin̄ a rɔ̄ɔ̄n̄ naā ō, nin̄ kógə̄ḿ kógə̄ḿ ń i madə̄ ɓē naā gə̄ ní, a ənīn̄ naā rɔ̄ɔ̄ ō.

¹⁴ De kə́ dəngam gə̄ kə́ Juda a rɔ̄ɔ̄n̄ kem ɓē kə́ Jerusalem tə́. Nin̄ a ɔyn̄ yá̰a̰ kənge gə̄ kə́ kem ɓē gə̄ kə́ kadədə́ gə̄ tə́ malang. Adə̄ i lɔ́r ō, i gində̄ arjā̰a̰ ō, i kūbə̄ gə̄ kə́ ngá̰ý ō. Nin̄ a kánə̄n̄ yá̰a̰ gə̄ ń noō kə̄ dɔ naā tə́ gidə ɓēé.

¹⁵ Dā̰ gə̄ malang kə́ kem gérger gə̄ yā madə̄ ba̰ā̰ gə̄ tə́, adə̄ i sə́nda gə̄ ō, kərō rapáy gə̄ ō, jámbal gə̄ ō, kərō gə̄ ō ní, yá̰á̰ kə́ tōr̄ gə̄ ń rāā deē ndul gə̄ ní, a rāādə́ nin̄ ō.

¹⁶ Əla gír ndɔ̄ ń noō tə́ ní, Gír de gə̄ ń rɔ̄ɔ̄n̄ ɓē kə́ Jerusalem ní, de kə́ dandə́ gə̄ tə́ ń a teēn̄ ta yo tə́ ní, a aw̄n̄ kem ɓē ngeé ń toō tə́ kə dɔ ɓāl̄ gə̄. Kɔ́ɔ̄ɓē kə́ bo kə́ tɔ́gən i ngá̰ý ní, nin̄ a rɔȳnən̄ loo ń noō tə́ ō, nin̄ a rāān̄ nāā kújə́ kámbə gə̄ ō.

¹⁷ Gír kojə gə̄ kə́ dɔ nang tə́ ní, ré gír de gə̄ kógə̄ḿ kə́ dandə́ tə́ aw̄ Jerusalem rɔȳ mban̄g ń i Kɔ́ɔ̄ɓē kə́ bo kə́ tɔ́gən i ngá̰ý ní tə́ aĺ anī, man̄ a edə dɔ nang yān tə́ alé.

¹⁸ Ré gír kojə gə̄ kə́ Ejiptə gə̄ aw̄n̄ Jerusalem rāā nāā kújə́ kámbə gə̄ tə́ aĺ anī, yá̰á̰ kə́ tōr̄ kógə̄ḿ a əsō dɔdə́ tə́, tītə̄ ń əsōń dɔ nápar de gə̄ ń a aw̄n̄ rāā nāā ngeé ń noō tə́ aĺ ní.

¹⁹ Nge ń noō i ndéý kə́ a əndān̄ ɓē kə́ Ejiptə tām̄ yá̰a̰ rāān kə́ gōtə́ aĺ tə́ ō, a əndan̄ nápar de gə̄ malang ń a aw̄n̄ rāā nāā ngeé ń noō tə́ aĺ ní ō.

²⁰ Ndɔ̄ ngeé ń noō tə́ ní, ɓɔ kə́ dūú gə̄ yā sə́nda gə̄ gə̄gē, a ndangən̄ tū tə́ na: I kə́ kɔr̄ kam̄ tām̄ yā Kɔ́ɔ̄ɓē tə́. Jóo ndīr̄ yá̰a̰ gə̄ kə́ kem kújə yā Kɔ́ɔ̄ɓē tə́ ní, a ɓōlə́n̄ gidədə́ tītə̄ ń a ɓōlə́n̄nəń gidə kópə gə̄ ń mósə dā̰ gə̄ i kemeé ta loo tun̄ yá̰á̰ tə́ ní ō.

²¹ Jóo ndīr̄ yá̰a̰ gə̄ malang kə́ kem ɓē kə́ Jerusalem tə́ ō, dɔ nang kə́ Juda tə́ ō ní, a ɔrə̄n̄ kam̄də́ tām̄ yā Kɔ́ɔ̄ɓē kə́ bo kə́ tɔ́gən i ngá̰ý tə́. De gə̄ ń a reēn̄ ndējə̄ yá̰á̰ kə́ tun̄ gə̄ tə́ ní, a ɔyn̄ jóo gə̄ ní yā ndīrəń dā̰. Loo ń ré ndɔ̄ ní a ugə̄ anī, ngé kigə yá̰a̰ gə̄ a gətóon̄ kem kújə yā Kɔ́ɔ̄ɓē kə́ bo kə́ tɔ́gən i ngá̰ý tə́.