JAKARI 12 - Bibəl ta Sar̄

Gīrə̄n̄ ɓē kə́ Jerusalem yā taā ba Kɔ́ɔ̄ɓē gān̄g dɔn

¹ Najə̄ yā Kɔ́ɔ̄ɓē kógə̄ḿ kə́ tām̄ yā Israel tə́ n toó. Kɔ́ɔ̄ɓē ń teē kem dɔ rā̰ ō, əndā dɔ nang dɔ gír gisən gə̄ tə́ ō, əla koō kem deē tə́ ō ní, əda wáńg na:

² M-ā m̄-rāā Jerusalem i kópə kógə̄ḿ kə́ kasə nduú wōn̄g yāḿ rosə kem tə́. Kasə wōn̄g yāḿ ní, a tūr̄ dɔ gír de gə̄ malang ń ndin̄ kadən tə́ ní. Dan ń a ənīn̄ ɓē kə́ Jerusalem rɔ̄ɔ̄ anī, dɔ de kə́ Juda gə̄ malang a ndi gōtə́ alé.

³ A̰á̰ā̰, kum mbang ngeé ń noō tə́ ní, m-ā m̄-rāā ɓē kə́ Jerusalem i kūbə̄rū mbal̄ kógə̄ḿ kə́, de kə́ asə kunən dɔɔ́ a gətóó tə́. De gə̄ malang ń a ndigən̄ kunən dɔɔ́ ní, a əngen̄ do. I tām̄ najə̄ ń noō tə́ n nápar de gə̄ malang kə́ dɔ nang tə́ a əndān̄ rɔ̄də́ naā tə́ yā rɔ̄ɔ̄n ní.

⁴ Kum mbang ngeé ń noō tə́ ní, mā Kɔ́ɔ̄ɓē m-ə́dá wáńg na: M-ā m-ə́la ɓōĺ kem sə́nda gə̄ tə́ malang ō, ngé kal̄də́ gə̄ a a̰ȳn̄ kɔ̄r̄ ō. M-ā m-ə̄ndā kumḿ gō ɓē kə́ Juda tə́, banī sə́nda gə̄ malang yā nápar de gə̄ ní, m-ā m̄-rāādə́ kadə̄ kumdə́ a̰a̰ loo alé.

⁵ Ngār gə̄ kə́ Juda a ədan̄ kə̄ kemdə́ nin̄ kɔ́ gə̄ tə́ na: De kə́ Jerusalem gə̄ ngangə̄n̄ ngá̰ý, i tɔdɔ̄ Nə́ɓā yādə́ i Kɔ́ɔ̄ɓē kə́ bo kə́ tɔ́gən i ngá̰ý.

⁶ Kum mbang ngeé ń noō tə́ ní, m-ā m̄-rāā ngār kə́ Juda gə̄ kadə̄ a tél a ton̄ tītə̄ hor kə́ a o̰o̰ gír kīr̄ kə́ kán̄ dɔ naā tə́ bing beé, aláa a ton̄ i tītə̄ mu kə́ ndégə̄ kem jī kógə̄ḿ ba kəla hor tū tə́ gír dɔ do̰ō̰ kōō gə̄ tə́ beē. Gír de kə́ rang gə̄ ń ndi gīrə̄n̄ gidədə́ ní, nin̄ a nujən̄də́ kə̄ ta gə̄ tə́. Banī de kə́ Jerusalem gə̄ a na̰yn̄ kə̄ loo ndi tə́ loo ń toō tə́.

⁷ I kojə gə̄ yā Juda ń Kɔ́ɔ̄ɓē a ajədə́ ta kəga dɔ ní. Loo ń noō tə́ de gə̄ kə́ kem kojə yā Dabid tə́ ō, de kə́ Jerusalem gə̄ ō, a rāān̄ rɔ̄də́ i de gə̄ kə́ dɔɔ́ dɔ gotə de kə́ rang gə̄ kə́ Juda tə́ alé.

⁸ Kum mbang ngeé ń noō tə́ ní, Kɔ́ɔ̄ɓē a ngɔ̄m̄ de kə́ Jerusalem gə̄. De kə́ tɔ́gə́də́ gətóo al̄ naā gə̄ kə́ dandə́ tə́, a télən̄ de kə́ ngan̄g tītə̄ Dabid gə̄. Tām̄ yādə́ nin̄ tə́ ɓáa, de gə̄ kə́ kem kojə yā Dabid tə́, a ton̄ i tītə̄ Nə́ɓā beé ta kumdə́ tə́, a ton̄ tītə̄ de kə́ dɔ rā̰ tə́ yā Kɔ́ɔ̄ɓē beé.

De kə́ kem ɓēé gə̄ malang əhɔn̄ ndoō

⁹ Kɔ́ɔ̄ɓē əda na: Kum mbang ngeé ń noō tə́ ní, gír de gə̄ malang ń a reēn̄ kənī ɓē kə́ Jerusalem rɔ̄ɔ̄ tə́ ní, m-ā m̄-sāā loo nujədə́ kɔ̄ɔ́ malang.

¹⁰ M-ā m̄-ɓōkə́ ndíl kem majə ō, ndɔ̄ȳ Nə́ɓā ō, dɔ de gə̄ kə́ kem kojə yā Dabid tə́ ō, dɔ de gə̄ kə́ kem ɓē kə́ Jerusalem tə́ ō. Nin̄ a a̰a̰n̄ loo kum kə̄ rɔ̄ḿ mā tə́, najə̄ yā nge ń nin̄ ɔsənən̄ adə̄ teē dām̄ kə́rēý tə́ ní tə́. Nin̄ a ənīn̄ pā kəhɔ ndoō tām̄ yān tə́, tītə̄ ń deē a rāań ndɔ̄ yo ngōn̄ kə́ dəngam kə́ kal kógə̄ḿ beē tə́ ní. A nōōnən̄ tītə̄ loo nōō ngōn̄ hágə beé.

¹¹ Kum mbang ngeé ń noō tə́ ní, kəhɔ ndoō kə́ ngá̰ý a to kem ɓē kə́ Jerusalem tə́, tām̄ yā de kə́ koy tə́, tītə̄ kəhɔ ndoō Adad Rimon kə́ wól loo kə́ Megido tə́ beē.

¹² Gír kojə gə̄ kógə̄ḿ kógə̄ḿ kə́ kem ɓēé a əndān̄ yo i tayā tayā: Gír kojə yā Dabid a ndi i tayā, dəngam gə̄ a ndin̄ kógə̄ḿ tə́ ō, dəyá̰ gə̄ a ndin̄ dām̄ kə́rēý tə́ ō, gír kojə yā Natan a ndi i tayā, dəngam gə̄ dām̄ kógə̄ḿ tə́ ō, dəyá̰ gə̄ dām̄ kə́rēý tə́ ō,

¹³ gír kojə yā Lebi a ndi i tayā, dəngam gə̄ a ndin̄ dām̄ kógə̄ḿ tə́ ō, dəyá̰ gə̄ a ndin̄ dām̄ kə́rēý tə́ ō, gir kojə yā Simei a ndi i tayā, dəngam gə̄ a ndin̄ dām̄ kógə̄ḿ tə́ ō, dəyá̰ gə̄ a ndin̄ dām̄ kə́rēý tə́ ō.

¹⁴ Gotə gír kojə kə́ rang gə̄ a əndān̄ yo yādə́ i tītə̄ ń noō ō. Nin̄ a ndin̄ i tayā tayā, dəngam gə̄ a ndin̄ dām̄ kógə̄ḿ tə́ ō, dəyá̰ gə̄ a ndin̄ dām̄ kə́rēý tə́ ō.