JAKƏ 4 - Bibəl ta Sar̄

Kəhɔ madə̄ naā kə yá̰á̰ kə́ dɔ nang tə́

¹ Yá̰á̰ ń rāā tá kadə̄ a ī-rɔ̄ɔ̄ī naā ō, a ī-kɔ̄lī naā ō ní i rí? I ngur yá̰á̰ kə́ majaĺ gə̄ kə kemsí tə́ aĺ a? Ngur yá̰a̰ gə̄ ní i tītə̄ de kə́ ngé rɔ̄ɔ̄ gə̄ kemsí tə́,

² adə̄ dan ń ī-ndə̄ngāī yá̰a̰ ba ə́ngeī aĺ anī, ī-tɔ̄lī deē. Dan ń ə̄ndāī nii kanjə̄ kənge yá̰a̰ anī, ī-kɔ̄lī naā ō, ī-rɔ̄ɔ̄ī naā ō. Ə́ngeī yá̰a̰ aĺ tɔdɔ̄ ī-dəjeī yá̰á̰ ní alé.

³ Ī-dəjeī yá̰a̰ ba ə́ngeī yá̰á̰ ní alé, tɔdɔ̄ ī-dəjeī i kə gír̄ kə́ majaá alé. Gír̄ yāsí ní, ī-sāāī i nujə yá̰á̰ ń ī-dəjeī ní tām̄ yā rɔ̄nel̄ yāsí kə́ karī tə́ ngóy.

⁴ Sḭḭ̄ ngé rāȳ gə̄, ndigə yá̰á̰ kə́ dɔ nang tə́ laā ní rā rɔ̄n i nge ba̰ā̰ Nə́ɓā tə́ aĺ a?

⁵ Aké sḭḭ̄ ɔ́jiīneé na najə̄ ń ndangən̄ kem makətūbə̄ yā Nə́ɓā tə́ ní i kə ndāńg a? Ndangən̄ na: Nə́ɓā rāā jang dɔ Ndíĺ ń ni-əndā kemjí tə́ ní.

⁶ Ba Nə́ɓā rāā yá̰á̰ kə́ bo ngá̰ý yā kɔjəńjí kem majə yān, adə̄ i tām̄ ń noō tə́ n i kə́ ndang na: Nə́ɓā ndi garara ta kum ngé kɔjə rɔ̄də́ gə̄ tə́, ba a rāā kem majə kə ngé gə̄ ń dɔdə́ sɔl̄ ní.

⁷ I beé ní ə́laī dɔsí gíŕ tɔ́gə yā Nə́ɓā tə́, ba ī-mbātíī najə̄ gō diabəl tə́, anī ni a a̰ȳsí kɔ̄ɔ́.

⁸ Ī-ndɔ́tī kə̄ rɔ̄ Nə́ɓā tə́, anī ni a ndɔ́tə̄ kə̄ rɔ̄sí tə́ ō. Sḭḭ̄ ngé kem jōó gə̄, ī-tə́goī ngarān̄g kemsí ādī unjə̄ njáý njáý.

⁹ Ī-gerī rɔ̄ ndoō yāsí ba ə́hɔī ndoō ō, ī-nōōī ō, kadə̄ kəgō yāsí tél kəhɔ ndoō ō, rɔ̄nel̄ yāsí tél rɔ̄ katə̄ ō.

¹⁰ Ī-sɔlī dɔsí kə̄ no Kɔ́ɔ̄ɓē tə́, anī ni a ɔsəsí kə̄ dɔɔ́.

Ī-lōōī gān̄g sarya dɔ de gə̄ tə́

¹¹ Ngákó̰ó̰ḿ gə̄, ī-lōōī kəda najə̄ kə́ majaĺ dɔ naā tə́. Nge ń əda najə̄ kə́ majaĺ dɔ ngōkó̰o̰n tə́ anī, əda najə̄ kə́ majaĺ i dɔ ndū najə̄ tə́ ō, gān̄g i sarya dɔ tə́ ō. Ba ré ī-gān̄g sarya dɔ ndū najə̄ tə́ anī, ḭ̄ i nge ngɔ̄m̄ ndū najə̄ to̰ alé, banī ḭ̄ i nge gān̄g sarya.

¹² Ba i Nə́ɓā ngóy n i nge kadə̄ ndū najə̄ ō, nge gān̄g sarya ō ní. I ni n asə kajə de gə̄ ō, nge rāā kadə̄ nin̄-udən̄ kɔ̄ɔ́ ō ní. Ba ḭ̄ i náā á ī-gān̄g sarya dɔ madí tə́ ní?

Ī-lōōī kɔr ta rɔ̄sí

¹³ Ba ngɔlaā sḭḭ̄ ń ə́daī na ɓōólaā, aláa bírí anī ā āwī kem ɓē ń noō tə́ ō, ā ī-ndiī tū tə́ ɓāl̄ kógə̄ḿ ō, ā ī-rāāī gātə̄ kadə̄ ā ə́ngeī nar ō,

¹⁴ ba ī-gerī ta kə́ nosí tə́ aĺ ní, ndisí kə kumsí i tītə̄ kūndə́ man̄ kə́ sū sa sḛ́ý ba sində̄ kɔ̄ɔ́.

¹⁵ I só tə́ kadə̄ ə́daī na: Ré Kɔ́ɔ̄ɓē ndigə anī, j-a jə-rāāī beé aláa i beé,

¹⁶ ba sḭḭ̄ ɔ́riī ta rɔ̄sí kə kɔjə rɔ̄ yāsí. Kɔr ta rɔ̄ kə́ tītə̄ ń noō malang ní i kə́ majaĺ.

¹⁷ Adə̄ deē ń ger̄ rāā yá̰a̰ kə́ majə tá rāā aĺ ní, rāā i majaĺ.