JAKƏ 3 - Bibəl ta Sar̄

Ɔ̄rī najə̄ láẃ alé

¹ Ngákó̰ó̰ḿ gə̄, ādī de kə́ dáńsí tə́ kə́ ngé ndóō de gə̄ yá̰a̰ gə̄ i ngá̰ý alé, tɔdɔ̄ ī-gerī kadə̄ a gāngə̄n̄ sarya kə́ ngan̄g ngá̰ý dɔjí jḭḭ ngé ndóō de gə̄ yá̰a̰ gə̄ tə́.

² Tɔdɔ̄ jḭḭ̄ malang jə-rāāī yá̰á̰ kə́ gō tə́ alé. Ré deē kógə̄ḿ ɔr̄ najə̄ ba əda yá̰á̰ kə́ gō tə́ aĺ alé anī, ni i de kə́ majə ɔtə̄ kə taá kə́ asə kəhɔ rɔ̄n kə taā malang kə jámá.

³ Ré j-əlaī jámá ta sə́nda gə̄ tə́ yā kadə̄ nin̄-oōn̄neé tají anī, i yā kadə̄ jə-tetiīneé dɔ rɔ̄də́ kə taá malang ō.

⁴ Á̰a̰ī too bo gə̄. Ká boon̄ ngá̰ý ō, néĺ ń a səlādə́ ní əla i kə tɔ́gɔ́ ngá̰ý ō gə̄gē anī, a tetən̄ dɔdə́ ta kaw̄ loo ń nge nēl̄də́ gḛy kaw̄ sedə́ tū tə́ ní tə́ i kə háý kə́ dūú ngá̰ý.

⁵ Yā ta ndo̰jí i beé ō. Ni i ngōn̄ rɔ̄jí kə́ dūú sḛ́ý beē ba rāā yá̰á̰ kə́ bo ngá̰ý gə̄. Hor kə́ sḛ́ý beē asə ko̰o̰ ku kāgə̄ kə́ bo ngá̰ý gə̄ ní ī-gerī aĺ a?

⁶ Ba ta ndo̰jí i hor ō, i loo kə́ yá̰á̰ kə́ majaĺ gə̄ malang i tū tə́ ō. Ni i ngōn̄ rɔ̄jí kógə̄ḿ kə́ dan madə̄ gə̄ tə́ kə́ nge tákə̄ gotə rɔ̄jí malang kə yá̰á̰ kə́ yḛreé. Ni i nge kunjə̄ hor Gehen kəla dɔjí tə́ ndɔ̄ kojəjí tə́ bátə́ ndɔ̄ koyjí tə́.

⁷ Gír dā̰ kə́ bembeé gə̄ malang ō, yel̄ gə̄ ō, kur̄ kə́ kagə nang tə́ gə̄ ō, dā̰ kə́ maná gə̄ ō ní, deē asə ndóōdə́ rāā yá̰á̰ ń kemən ndigə ní.

⁸ Banī ta ndo̰jí ní, deē kógə̄ḿ kə́ asə tetə dɔn gətóo. I yá̰á̰ kə́ tōr̄ kə́ a to jəke alé. Kəga kə́ a tɔ̄l̄ deē rosə kemən.

⁹ J-ɔriī ta nge ń i Kɔ́ɔ̄ɓē ō, Bɔbə̄jí ō ní seneé ō, jə-ndɔ̄líī de gə̄ ń Nə́ɓā rāādə́ adə̄ teēnən̄ ní i seneé ō.

¹⁰ Tɔ́r̄ ta ō, ndɔ̄ĺ ō, teēn̄ i tají kə́ kógə̄ḿ beē tə́. Ngákó̰ó̰ḿ gə̄, majə kadə̄ i tītə̄ ń noō alé.

¹¹ Man̄ kə́ sɔl̄ ō, man̄ kə́ katə̄ ō, a teēn̄ ta kəɓa man̄ kə́ kógə̄ḿ beē tə́ a?

¹² Ngákó̰ó̰ḿ gə̄ kāgə̄ kótə̄ asə kan̄ olibə a? Kāgə̄ nduú asə kan̄ kótə̄ a? Kəɓa man̄ kə́ katə̄ a teē man̄ kə́ sɔl̄ alé.

Kum kedə̄ kə́ dɔɔ́

¹³ I náa n i de kə́ kumən edə̄ ō, kə́ ger̄ yá̰a̰ ō, dɔ dáńsí tə́ ní? Ādə̄ ni-ɔjə hál dɔ sɔl̄ ō, kum kedə̄ yān ní ō kə̄ ndágá.

¹⁴ Ba ré ə̄ndāī naā nii adə̄ wursí atə̄sí kárárá kə naá ō, ā ī-rɔ̄ɔ̄ī naā dɔ yá̰á̰ tə́ ō anī, ī-lōōī hítə̄ rɔ̄sí ō, nujə najə̄ kə́ rɔ̄kum kə sor̄ yāsí ō.

¹⁵ Kum kedə̄ ń toō i kum kedə̄ kə́ ḭḭ i dɔɔ́ alé, banī i kum kedə̄ kə dɔ nang tə́ ō, i yā deē ndul ō, yā ndíĺ kə́ majaĺ gə̄ ō.

¹⁶ Tɔdɔ̄ loo ń kəndā naā nii ō, rɔ̄ɔ̄ naā dɔ yá̰á̰ tə́ ō i tū tə́ ní, yá̰a̰ a a̰a̰ gō naā tū tə́ aĺ ō, yá̰á̰ kə́ majaĺ gə̄ malang i tū tə́ ō.

¹⁷ Banī deē ń aw̄ kə kum kedə̄ kə́ dɔɔ́ ní a ngɔ̄m̄ rɔ̄n kanjə̄ rāā yá̰á̰ kə́ majaĺ kógə̄ḿ pá tá ndi kə kem sɔl̄ lɔmɔɔ́ ō, dɔn i kə́ sɔl̄ ō, ndigə najə̄ gō madə̄n gə̄ tə́ láẃ ō, a̰a̰ kum tō ndoō yā de gə̄ ngándáńg ō, kan̄ kə́ majə a rosə kemən ō, ni-ɔr̄ kam̄ de gə̄ aĺ ō, ni gól̄ loo aĺ ō.

¹⁸ Ngé gə̄ ń kem sɔl̄ lɔm nel̄də́ ní, a dubə̄n̄ i kōō kem sɔl̄ lɔm kə gō gidədə́. Ba kan̄ yá̰a̰ gə̄ ń nin̄ a əjan̄ ní, i yá̰a̰ rāā kə́ gōtə́ gə̄.