JA̰A̰ 9 - Bibəl ta Sar̄

Jeju rāā adə̄ kum de kə́ ojənən̄ məndō a̰a̰ loo

¹ Jeju a mān̄ róbó anī, a̰a̰ deē kógə̄ḿ kə́ ojənən̄ məndō.

² Ngé ndóō yá̰a̰ yān gə̄ dəjenən̄ na: Ngoljí, i náā n rāā majaĺ á ojənə̄ń deē ń toō məndō ní, i nəkɔ́ aké i ngé kojən gə̄ ḿ?

³ Jeju tél ədadə́ na: I nəkɔ́ ń rāā majaĺ aĺ ō, i ngé kojən gə̄ n rāān̄ majaĺ aĺ ō, banī i yā kadə̄ kəla rāā Nə́ɓā ɔjəń rɔ̄n kə̄ ndágá.

⁴ Dan ń loo kə́ kadaá to ɓáý ní, majə kadə̄ jə-rāāī kəla yā nge ń əlam̄ ní. Loo kə́ ndɔ̄ɔ́ a reē noó, yā kadə̄ deē a asə rāā kəla alé.

⁵ Dan ń mā i dɔ nang tə́ ní, mā i loo kə́ unjə̄ kow yā de kə́ dɔ nang tə́ gə̄.

⁶ Loo ń ni-əda beé oy anī, tībə̄ hōr̄ nang tə́ ló̰yń bɔr ba tə́ya̰ kum məndō ní tə́,

⁷ ba ədan na kə aw̄ kə tə́go kumən gár̄ man̄ kə́ Siloe tə́. Siloe kə ta ɓē yādə́ ní kumən na i Nge kaw̄ kəla. Ni-aw̄ tū tə́ aké tə́go kumən, dan ń a tél a reē kə̄ ɓēé anī, a̰a̰ loo.

⁸ Madə̄ ɓēn gə̄ ō, de gə̄ ń a̰a̰nən̄ kété loo gəde yá̰á̰ tə́ ní ō, dəjen̄ na ké deē ń noō i deē ń ndi a gəde yá̰á̰ ní aĺ wa.

⁹ De kə́rēý gə̄ ədan̄ na i ni ō, de kə́ rang gə̄ ədan̄ na i ni alé, ba na teēn̄ naā i mbée ō. Banī ni-ədadə́ na i mā nəkɔ́.

¹⁰ Anī nin̄-ədanən̄ na: Tá kumií teē i ba̰ý?

¹¹ Ni-tél ədadə́ na i deē ń a ɓāŕnən̄ na i Jeju ní n rāā bɔr tə́ya̰ kumḿ tə́, ba ədam̄ na kə m-aw̄ kə m̄-tə́go kumḿ gár̄ man̄ kə́ Siloe tə́ ní. M-aw̄ m̄-tə́go kumḿ á m-á̰a̰ loo toó.

¹² Nin̄-dəjenən̄ na ké nəkɔ́ i rá wa, anī ni-ədadə́ na n-ger̄ alé.

Parijiyḛ gə̄ dəjen̄ deē ń ojənən̄ məndō á a̰a̰ loo ní najə̄

¹³ Aw̄n̄ kə deē ń kété kumən a̰a̰ loo aĺ ní rɔ̄ Parijiyḛ gə̄ tə́.

¹⁴ Tá ndɔ̄ ń Jeju rāań bɔr teēń kumən ní, i ndɔ̄ sabat tə́.

¹⁵ Parijiyḛ gə̄ dəjenən̄ na ké rāā i ba̰ý n kumən tél a̰a̰ń loo gogə́ ní wa. Anī ni-tél ədadə́ na: Ni ló̰ȳ i bɔr n tə́ya̰ kumḿ tə́ ní, ba m̄-tə́go kumḿ anī m-á̰a̰ loo.

¹⁶ De kə́rēý gə̄ dɔ dan Parijiyḛ gə̄ tə́ ədan̄ na: Deē ń toō ḭḭ i rɔ̄ Nə́ɓā tə́ alé, tɔdɔ̄ ni-ngɔ̄m̄ ndɔ̄ sabat alé. De kə́ rang gə̄ ədan̄ na: De kə́ nge rāā majaĺ asə rāā yá̰á̰ kə́ yáā kə́ tītə̄ ń noō gə̄ i ba̰ý? Adə̄ míndə kasə naā aĺ to dandə́ tə́.

¹⁷ Anī Parijiyḛ gə̄ dəjen̄ məndō ɓáý to̰ na ké nəkɔ́ a əda na i rí dɔ deē ń teē kumən tə́ ní wa. Anī ni-tél ədadə́ na: I nge koō ta kógə̄ḿ.

¹⁸ Banī Jipə gə̄ taān̄ kem kadə̄ ni i de kə́ ojənən̄ məndō tá a̰a̰ loo alé, bátə́ kadə̄ ɓārə́n̄ ngé kojən gə̄

¹⁹ dəjen̄də́ najə̄. Nin̄-dəjen̄də́ na: Deē ń toō i ngōn̄sí ń ə́daī na ojiīn̄ məndō ní á? Yá̰á̰ ń rāā yá̰á̰ tá kadə̄ ni-a̰a̰ń loo ngɔlaā ní i rí?

²⁰ Ngé kojən gə̄ tél ədan̄ na: Jə-ger̄ kadə̄ ni i ngōn̄jí ō, j-ojən məndō ō.

²¹ Banī ka̰a̰ ń ni-a̰a̰ loo ngɔlaā toó ní tá jə-ger̄ aĺ ō, jə-ger̄ deē ń teē kumən ní aĺ ō. Ī-dəjein̄ nəkɔ́ na asə kəda najə̄ kə́ dɔ rɔ̄n tə́.

²² Ngé kojən gə̄ ɔrə̄n̄ najə̄ tītə̄ ń noō i tɔdɔ̄ nin̄-ɓōlə́n̄ i Jipə gə̄. Tɔdɔ̄ Jipə gə̄ oōn̄ naā kadə̄ náā nəkɔ́ ń a əda ta kum de gə̄ tə́ na Jeju i Kərist ní ɓáa kə n-tə̄ɓānən̄ kújə kán̄ naā tə́ kɔ̄ɔ́.

²³ I tām̄ najə̄ ń noō tə́ n ngé kojən gə̄ ədan̄ na ni na i de kə́ tɔ́gə, ba kə dəjenən̄ nəkɔ́ gíŕ ní.

²⁴ Anī Parijiyḛ gə̄ ɓārə́n̄ deē ń ojənən̄ məndō ní nja kə́ nge ko̰ jōó, ba ədanən̄ na kə ɔsə gɔn Nə́ɓā, na n-gerə̄n̄ kadə̄ deē n noō na i nge rāā majaĺ.

²⁵ Ni-tél ədadə́ na: Ni i nge rāā majanī, m̄-ger̄ alé. Ba yá̰á̰ ń m̄-ger̄ ní i kógə̄ḿ beē: Kété ní mā i məndō, ba ngɔlaā m-á̰a̰ loo.

²⁶ Nin̄-dəjenən̄ na: Ni-rāā i rí seí? Ni teē kumií i ba̰ý?

²⁷ Ni-tél ədadə́ na: M-ə́dásí kɔ̄ɔ́ ɓá, banī sḭḭ̄ ōōī najə̄ yāḿ alé. I tām̄ rí tə́ á ī-sāāī kadə̄ m-ə́da ɓáý kadə̄ ōōī ní? Ī-sāāī kadə̄ ī-téliī ngé ndóō yá̰a̰ yān gə̄ ō a?

²⁸ Nin̄-tájə̄nən̄ ədanən̄ na: Īkɔ́ i nge ndóō yá̰a̰ yān, jḭḭ i ngé ndóō yá̰a̰ yā Moijə gə̄.

²⁹ Jə-ger̄ kadə̄ Nə́ɓā ɔr̄ najə̄ kə Moijə ba deē ń noō jə-ger̄ loo ń ni ḭḭ tū tə́ ní alé.

³⁰ Ni tél ədadə́ na: Nge ń toō i yá̰á̰ kə́ to kɔr kum, sḭḭ̄ ī-gerī loo ń ni ḭḭ tū tə́ ní alé, banī ni tḛḛ̄ kumḿ.

³¹ Jə-gerī kadə̄ Nə́ɓā oō najə̄ yā ngé rāā majaĺ gə̄ alé. Banī deē ń ɓōĺ ndílən ō, rāā yá̰á̰ ń kemən ni-ndigə ō ní, ni a oō najə̄ yān.

³² Jóo toó deē oō na deē kógə̄ḿ na teē kum de kə́ ojənən̄ məndō aĺ ɓáý.

³³ Ré deē ń noō ḭḭ i rɔ̄ Nə́ɓā tə́ aĺ anī, asə rāā yá̰á̰ kógə̄ḿ alé.

³⁴ Nin̄-tél ədanən̄ na: Ojiīn̄ i kum majaĺ tə́ anī ī-gḛy ndóōjí yá̰a̰ a? Gō tə́ anī nin̄-tə̄ɓānən̄ ndágá kɔ̄ɔ́.

Ka̰a̰ loo aĺ yā ndíl deē

³⁵ Jeju oō kadə̄ tə̄ɓānən̄ ndágá kɔ̄ɔ́. Anī reē əngen ba dəjen na ké ni-taā kem Ngōn̄ Deē wa.

³⁶ Ni-tél əda na: Kɔ́ɔ̄ɓē, i náā á kadə̄ m̄-taā kemən ní?

³⁷ Jeju ədan na: Á̰a̰n kɔ̄ɔ́, i ni n a ɔr̄ najə̄ seí toō.

³⁸ Deē ní əda na: Kɔ́ɔ̄ɓē m̄-taā kem. Gō tə́ anī ɔsə non nang tə́ non tə́.

³⁹ Anī Jeju əda na: m̄-reē dɔ nang tə́ i tām̄ yā sarya tə́, kadə̄ ngé gə̄ ń a̰ā̰n̄ loo aĺ ní a̰ā̰n̄ loo, ba kadə̄ ngé gə̄ ń a̰ā̰n̄ loo ní télən̄ ngé ka̰a̰ loo aĺ gə̄.

⁴⁰ Parijiyḛ gə̄ ń ndin̄ seneé ní oōn̄ najə̄ ń toō anī, dəjen̄ na ké nin̄ i ngé ka̰a̰ loo aĺ gə̄ ō wa.

⁴¹ Jeju tél ədadə́ na: Ré sḭḭ̄ i ngé ka̰a̰ loo aĺ gə̄ anī, majaĺ yāsí a gətóo. Banī ngɔlaā ń toō ə́daī na sḭḭ̄ na á̰a̰ī loo, ādə̄ i tāmən ń toō tə́ n majaĺ yāsí toń gotoó ní.