JA̰A̰ 7 - Bibəl ta Sar̄

Ngákó̰o̰ Jeju gə̄ taān̄ kemən alé

¹ Gō yá̰a̰ gə̄ ń toō tə́ anī, Jeju njə̄rā gō nang kə́ Galile tə́. Ni ndigə njə̄rā gō nang kə́ Jude tə́ alé, tām̄ Jipə gə̄ sāān̄ tɔ̄lə̄n.

² Banī nāā yā Jipə gə̄ ń rīn na i nāā yā kújə kámbə gə̄ ní dɔ i ngɔr.

³ Ngákó̰o̰n gə̄ ədanən̄ na: Ī-ndɔ́tə̄ laā kɔ̄ɔ́, āw̄ dɔ nang kə́ Jude tə́, adə̄ ngé ndóō yá̰a̰ yāí gə̄ a̰ā̰n̄ kəla gə̄ ń ī-rāā ní ō.

⁴ Tɔdɔ̄ loo ń deē gḛy kadə̄ rīn ɓār̄ anī, a rāā yá̰a̰ loo mundə̄ tə́ alé. Dan ń ā ī-rāā yá̰á̰ kə tītə̄ ń noō gə̄ ní, majə kadə̄ ɔ́jə rɔ̄í ta kum de kə́ dɔ nang tə́ gə̄ tə́.

⁵ Nin̄ kɔ́ gə̄ ngákó̰o̰n gə̄ taān̄ kemən alé.

⁶ Anī Jeju ədadə́ na: Ndɔ̄ yāḿ ugə̄ aĺ ɓáý, banī ndɔ̄ yāsí to kə ndɔ̄ gə̄.

⁷ Banī nin̄-imə̄mə̄n̄ mā i tɔdɔ̄ kəda ń m-ə́da kə̄ ndágá wáńg na kəla rāādə́ gə̄ i kə́ majaĺ ní.

⁸ Sḭḭ̄ āwī nāā ní tə́, ba mā m-āw̄ nāā ní tə́ alé, tɔdɔ̄ m̄-tɔ̄l̄ ta ndɔ̄ yāḿ gə̄ aĺ ɓáý.

⁹ Ni-ɔr̄ najə̄ gə̄ ń noō ba ndi Galile.

Jeju aw̄ nāā kújə́ kámbə gə̄ tə́

¹⁰ Banī loo ń ngákó̰o̰n gə̄ aw̄n̄ nāā ní tə́ anī, nəkɔ́ aw̄ tū tə́ ō, banī i kə̄ dɔ ndágá njóý njóý alé, ba i jəke.

¹¹ Kem ndɔ̄ gə̄ ń de gə̄ a rāān̄neé nāā tə́ ní, Jipə gə̄ sāānən̄ ba dəjen̄ na ké ni i rá wa.

¹² Kósə de gə̄ kɔdə́n̄ naā najə̄ dɔ dáńdə́ tə́ dɔn tə́. Ngé kə́rēý gə̄ ədan na ni i de kə́ majə, ba ngé kə́rēý gə̄ ədan na i tītə̄ ń noō alé, ni a gól̄ i kósə de gə̄.

¹³ Banī deē kógə̄ḿ kə́ əda najə̄ yān kə̄ ndágá wáńg beē gətóo, tɔdɔ̄ nin̄-ɓōlə́n̄ i Jipə gə̄.

¹⁴ Dan bo nāā yā kújə́ kámbə gə̄ tə́ anī, Jeju aw̄ kem kújə yā Kɔ́ɔ̄ɓē tə́, ba ndóō de gə̄ yá̰a̰.

¹⁵ Anī ɔr kum Jipə gə̄ ngá̰ý, adə̄ ədan̄ na: Ni ndóō yá̰a̰ alé, ba ger̄ makətūbə̄ yā Nə́ɓā i ba̰ý?

¹⁶ Jeju tél ədadə́ na: Najə̄ ń m-ɔ́jə́ ní i najə̄ yāḿ alé, banī i najə̄ yā nge ń əlam̄ ní.

¹⁷ Ré deē kógə̄ḿ gḛy rāā yá̰á̰ ń kem Nə́ɓā ndigə ní anī, a ger̄ ké yá̰á̰ ń m̄-ndóō de gə̄ ní ḭḭ rɔ̄ Nə́ɓā tə́, aké m-ɔ̄r̄ najə̄ i kə dɔḿ mə̄kɔ́ wa.

¹⁸ Deē ń ɔr̄ najə̄ kə dɔneé ní, sāā i kɔsə gɔn yān nəkɔ́. Ba deē ń sāā i kɔsə gɔn yā nge ń əlan ní, ni i de kə́ rɔ̄kum, adə̄ yá̰á̰ kə́ gōtə́ aĺ gətóo kemən tə́.

¹⁹ I Moijə n adə̄sí ndū najə̄ ní aĺ a? Ba deē kógə̄ḿ kə́ dansí tə́ kə́ ngɔ̄m̄ ndū najə̄ gətóo. I tām̄ rí tə́ á ī-sāāī tɔ̄lə̄m̄ ní?

²⁰ Kósə de gə̄ tél ədanən̄ na: Ndíĺ kə́ majaĺ i kemií tə́, i náā n sāā tɔ̄lī?

²¹ Jeju tél ədadə́ na: m̄-rāā kəla kógə̄ḿ, adə̄ ɔr kumsí malang.

²² Moijə adə̄sí kəja mɔtə, ba i Moijə kə dɔneé alé, i yá̰a̰ yā kaasí gə̄, adə̄ sḭḭ̄ ə́jaī mɔtə deē ndɔ̄ sabat tə́.

²³ Ré ə́jaī mɔtə deē ndɔ̄ sabat tə́ tām̄ kadə̄ ī-mānī dɔ ndū najə̄ yā Moijə aĺ anī, i tām̄ rí tə́ á wursí atə̄sí seḿ tām̄ m̄-rāā adə̄ rɔ̄ deē kógə̄ḿ ngáā ndɔ̄ sabat tə́ ní?

²⁴ Ī-lōōī gān̄g sarya tām̄ gidə yá̰a̰ kə́ ndágá ń á̰a̰ī tə́ ní, banī ī-gāngī sarya kə́ gōtə́ tá.

Jeju i Kərist nəkɔ́ a?

²⁵ De kə́rēý gə̄ kə́ Jerusalem ədan̄ na: I deē ń toō n a sāānən̄ yā tɔ̄lə̄n ní aĺ a?

²⁶ Á̰a̰ī ra a ɔr̄ najə̄ dan de gə̄ tə́ banī nin̄-ədanən̄ najə̄ alé. Ní ngār yājí gə̄ gerə̄n̄ rɔ̄kum kadə̄ i ni n i Kərist ní a?

²⁷ Deē ń toō jə-ger̄ loo ń ni-ḭḭ tū tə́ ní, ba loo ń Kərist a reē ní, deē kógə̄ḿ kə́ ger̄ loo ń ni-ḭḭ tū tə́ ní gətóo.

²⁸ Anī Jeju ń ndóō de gə̄ yá̰a̰ kem kújə yā Kɔ́ɔ̄ɓē tə́ ní əda na: Ī-ger̄mī ō, ī-gerī loo ń m-ḭ́ḭ tū tə́ ní ō a? Tá i mə̄kɔ́ n m̄-reē kə dɔḿ alé. Nge ń əlam̄ ní asə kadə̄ deē ənī kemən adə̄n. Sḭḭ̄ ī-gerīin̄ alé,

²⁹ ba mā m̄-gerə̄n. Tɔdɔ̄ m-ḭ́ḭ i rɔ̄n tə́ ō, i nəkɔ́ n əlam̄ ní ō.

³⁰ Lon ń noō tə́ nin̄-sāān̄ kəhɔn, ba deē kógə̄ḿ kə́ əla jīn yā kəhɔnəń gətóo, tɔdɔ̄ kum mbang yān asə aĺ ɓáý.

³¹ De gə̄ ngá̰ý dan kósə de gə̄ tə́ taān̄ kemən, adə̄ ədan̄ na: Kərist ní, loo ń a reē anī, a rāā yá̰á̰ kə́ yáā gə̄ ngá̰ý tɔȳ yā deē ń toō a?

Əlan̄ pajā gə̄ kəhɔ Jeju tə́

³² Parijiyḛ gə̄ oōn̄ kósə de gə̄ ń a kɔdə́n̄ najə̄ dɔn tə́ ní anī, ngol gə̄ kə́ dɔ ngé tun̄ yá̰a̰ gə̄ tə́ ō, Parijiyḛ gə̄ ō, əlan̄ pajā gə̄ kəhɔn tə́.

³³ Anī Jeju əda na: M-ā m̄-ndi sesí sḛ́ý ɓáý tá m-ā m-āw̄ rɔ̄ nge ń əlam̄ tə́ ní.

³⁴ Ā ī-sāāmī, ba ā ə́ngemī aĺ ō, ā ásiī kugə̄ loo ń mā i tū tə́ ní tə́ aĺ ō.

³⁵ Gō najə̄ ń toō tə́ anī Jipə gə̄ ədan̄ naā dɔ dáńdə́ tə́ na: Ni a aw̄ i kə̄ rá yā kadə̄ j-əngein̄ aĺ ní? A aw̄ i kə̄ dan Jipə gə̄ ń tḭ̄ḭ̄n̄ naā kə̄ dan Gərek gə̄ tə́ ní a? A ndóō Gərek gə̄ yá̰a̰ a?

³⁶ Najə̄ ń ni-əda na j-a j-əngein̄ aĺ ō, j-a j-asiī kugə̄ loo ń ni i tū tə́ ní tə́ aĺ ō ní, kumən na i rí?

Man̄ gə̄ kə́ a rāān̄ kadə̄ deē ndi kə kumneé

³⁷ Ndɔ̄ tɔ̄l̄ ta nāā yā kújə́ kámbə gə̄ i ndɔ̄ bo nāā. Ndɔ̄ ń noō tə́ ní, Jeju ra kə njan kə́ dɔɔ́, ba əga kɔŕ ngá̰ý na: Deē ń kəndā rāān anī, ādə̄ kɔ́ɔ̄ reē rɔ̄ḿ tə́ ō, a̰ȳ man̄ ō.

³⁸ Deē ń taā kemḿ anī, tītə̄ ń ndangən̄neé kem makətūbə̄ tə́ ní, man̄ kə́ ngá̰ý kə́ a rāā kadə̄ deē ndi kə kumneé a kə̄rā kemən tə́ tiriri.

³⁹ Ni-əda najə̄ ń toō i tām̄ yā Ndíĺ kə́ Táĺ ń ngé taā kem gə̄ a əngen̄ ɓáý tə́ ní. Dan ngeé ń noō tə́ ní adə̄n̄ Ndíl reē aĺ ɓáý, i tɔdɔ̄ ɔsə gɔn Jeju aĺ ɓáý.

Kósə de gə̄ mbātə́n̄ najə̄ gō naā tə́ najə̄ yā Jeju tə́

⁴⁰ De kə́rēý gə̄ dan kósə de gə̄ ń oōn̄ najə̄ yān tə́ ní, ədan̄ na deē ń toō na i nge koō ta kə́ rɔ̄kum.

⁴¹ De kə́ rang gə̄ ədan̄ na ni na i Kərist. Ba de kə́ rang gə̄ ɓáý to̰ tél dəjen̄də́ na ké Kərist a teē i Galile wa.

⁴² Ké makətūbə̄ yā Nə́ɓā əda na ni i ngōn̄ kaa Dabid ō, na a teē i Betlehem ɓē yā Dabid tə́ ō aĺ wa?

⁴³ Adə̄ kósə de gə̄ mbātə́n̄ najə̄ gō naā tə́ najə̄ yān tə́.

⁴⁴ De kə́rēý gə̄ dɔ dáńdə́ tə́ gḛyn̄ kəhɔn, banī de kə́ əla jīn əhɔnəń gətóo.

Ngār yā Jipə gə̄ taān̄ kem Jeju alé

⁴⁵ Pajā gə̄ tél aw̄n̄ rɔ̄ ngol gə̄ kə́ dɔ ngé tun̄ yá̰a̰ gə̄ tə́ ō, Parijiyḛ gə̄ tə́ ō, banī nin̄-dəjen̄ pajā gə̄ ní na: I tām̄ rí tə́ á ī-reēī seneé aĺ ní?

⁴⁶ Pajā gə̄ tél ədan̄də́ na: De kə́ ɔr̄ najə̄ tītə̄ deē ń noō gətóó bátə́.

⁴⁷ Anī Parijiyḛ gə̄ tél ədan̄də́ na: Sḭḭ̄ ə́ya̰ī rɔ̄sí ādī ni-gól̄sí ō a?

⁴⁸ Deē kógə̄ḿ kə́ dan ngār gə̄ tə́, aké i dan Parijiyḛ gə̄ tə́ kə́ taā kemən i noó a?

⁴⁹ Banī kósə de gə̄ ń toō ń gerə̄n̄ ndū najə̄ aĺ ní, nin̄ i de gə̄ kə́ ndɔ̄ĺ i dɔdə́ tə́.

⁵⁰ Deē kógə̄ḿ dan Parijiyḛ gə̄ tə́ rīn na i Nikodem, i ni n kété aw̄ rɔ̄ Jeju tə́ ndɔ̄ɔ́ ní, ədadə́ na:

⁵¹ Kə gō ndū najə̄ yājí ní, j-asiī gān̄g sarya dɔ deē kógə̄ḿ tə́ kanjə̄ koō najə̄ yān ō, ger̄ yá̰á̰ ń ni-rāā ní ō a?

⁵² Nin̄-tél ədanən̄ na: Ī-ndəle gír najə̄ kə́ kem makətūbə̄ yā Nə́ɓā tə́, anī ā á̰a̰ā̰ kadə̄ nge koō ta kógə̄ḿ kə́ teē i Galile tə́ gətóo.

⁵³ Gō tə́ anī nin̄ kógə̄ḿ kógə̄ḿ télən̄ kə̄ ɓē yādə́ gə̄ tə́.